1. Ányị ahị tị́ họ kahị jẹ́ nyori iJihova tịtọ kahị ka tụ jwoo chwẹẹ?

 IJIHOVA wụrụụhị nyọka tụ jwoo chwẹẹ. (Jem. 4:8) Ọ tịtọ nyọka ri Ohe nyahị, Adahị, bala Oligu nyahị. Ọ kaa wẹ abwọ ọrịrị nyahị bala ọ-dahị ụbwọ lụka olujwo. Ọ tị kaa kpa ogu nyamwụ mẹ ang jẹ́ẹhị bala ọ-chewu keehi ịnyịnyị. Ma ịyẹ ahị tị́ ka họ pyii nyọka tụ ju iJihova chwẹẹ?

2. Ányị ahị tị́ ka bwu tụ́ ju iJihova chwẹẹ?

² Ahị ka jẹ́-ẹ tụ ju iJihova chwẹẹ bwula ọ-raabwọ họọ, wa Omyi Ẹla nyamwụ bala o-me irya jwoo. Jaabwọ kahị wẹẹ họ ịnyị, ọ kaa háahị, ẹla nyamwụ tị kaa myịhị lẹhị ịnyịnyị. Ọọwa kaa guhi gbịla nyọka jwoo ihi bala ọ-ya ogbo họọ jaabwọ kọ chịla. (Ọwụ. 4:11) Jaabwọ kahị wẹẹ jẹ́ iJihova gụ́ olene, ịnyịnyị ahị ka dahịhilọọ bala ogu ọlẹ kọ ya yeji nyọka dahị ụbwọ gụ́ olene lẹ.

3. Ányị Olegu Onyobyi à tị́ kaa maga nyọka chịhị ebwo hi iJihova? Ịyẹ à tị́ ka dahị ụbwọ nyọka nyẹẹkpẹ da Ohe nyahị bala ogu nyamwụ ẹnẹnẹhẹ ka? (Eje Ọnyịịla 31:13, 14)

³ Ma Olegu Onyobyi tị kaa maga nyọka chịhị ebwo hi iJihova, ọgụgụ ri ụka kahị ja yẹ akama. Ijẹẹhị iyina ọ tị́ kaa kpa? Ọ kaa maga kahị ka ba la ọ-dahịhile iJihova bala ogu nyamwụ dụmwọ-dụmwọ. Ma ahị tị ka jẹ́-ẹ ma uya kụrụ ijẹẹhị nyamwụ myị́. Ụka ká ọmyịmyị nyahị á la ọngịrị, ká ahị ọdahile nyahị ẹ-ẹga nya iJihova á la giri-giri lẹ aalẹ, áhị ka nyẹẹkpẹ  da Ohe nyahị bala ogu nyamwụ kaka.—Wa Eje Ọnyịịla 31:13, 14.

4. Ẹlịyẹ ahị tị́ wẹẹ ka kụ ẹhị yẹ ẹ-ẹpwụ nya ang ọjẹ́jẹ ọlẹ?

⁴ Ẹ-ẹpwụ nya ang ọjẹ́jẹ ọlẹ, ahị ka ya ẹla u-uhye nya akama ịta ịlẹ kị ka wẹ bwu odehe nya ọjịra-jịra myị́; ọnyọnyọọnyị nyaa ka du kahị ka hwabwọ la ọ-dahịhile iJihova bala ogu nyamwụ myị́. Ányị akama ịwẹ à tị́ ka jẹ́-ẹ bwu chịhị ebwo hi iJihova? Ịyẹ ahị tị́ ka họ nyọka jẹ́-ẹ ma uya kụrụ aga ọmama nya Olegu Onyobyi myị́?

5. Ányị akama à tị́ ka bwu huhi abwọ la ọ-dahịhile iJihova bala ogu nyamwụ myị́?

⁵ Ụka ọhẹ, ahị kaa la akama lala ọtụpyịpyị ọla ugbiyegu lee ụkụrwọ ọ-gụụhị myị́. Ányị akama ọlịịwẹ à tị́ ka huhi abwọ la ọ-dahịhile ogu nya iJihova bala ọ-chịhị ebwo hyoo myị́? Ụka ká akama á yẹ rịrịịhị lụka ọtata, ahị ọdahile ka gụụhị myị́ du kahị ka la ọkịlẹtụ ọ-kpụ enyi. Olegu Onyobyi kaa kpa iwe ọlịịwẹ họ ụkụrwọ kahị ka da ịwẹẹ nyori iJihova á la ọháha ẹ-ẹga nyahị ka. Olegu Onyobyi kaa tịtọ kahị ka kụ irya nyori iJihova bala ogu nyamwụ à ju ọmwụ nya akama nyahị lẹ. Ẹlẹhẹ ọlịịwẹ họ tọ ala Isirẹlụ ịhyẹ ọ-ọpyị nya Ijipiti. Ị myị ụka nya ọgbanyẹ nyori iJihova à chụ iMosisi bala Erọn nyọka gbaa kpehe bwu ọnyọhị oriri lẹ. (Ehe. 4:29-31) Ma ụka ọkịla nyọlẹ ká iFero họ ká ọhịhị lujwo haa gụ́ olene, ị kpụ iMosisi bala Erọn abyị u-uhye nya akama nyaa, bwula ọ-byaa yẹkẹẹ: ‘Anụ họ ká adịrahụ bala alekpeleji nyamwụ juwa bahị ẹtẹ onyobyi. Anụ à ju ọmwụ igu nyahị wẹ lẹ.’ (Ehe. 5:19-21) Ị kpụ anchẹ nya Ohe abyị. Ọ tolujwo kaka kpoye! Kori ká juwa ẹ-ẹpwụ nya akama lụka ọtata lẹ, ányị a tị́ ka bwu ju ahị ọdahịhile ọlẹ ká la ẹ-ẹga nya iJihova bala ogu nyamwụ ọngịrị?

6. Ẹlịyẹ ahị tị́ ka jẹ́ bwu ẹga nya ịHabakuku u-uhye nya abwọlẹ kahị ka bwu bọhụ ẹ-ẹpwụ nya akama? (ỊHabakuku 3:17-19)

⁶ Ya ọkịlẹtụ nyang je iJihova, ká ya ẹhị rịrị ka ẹga nyamwụ nya ụbwọ ọdada. Ọlọmwụ ịHabakuku la akama lụmẹ-lụmẹ. Ụka ọhẹ, ọ lala o-ri nyị da ịwẹẹ kori ká iJihova á kpahị jwoo wẹẹ. Lẹ o ya ẹla ọla irya nyamwụ je iJihova ẹ-ẹpwụ nya abwọ ọrịrị. Ọ yẹkẹẹ: “Ányị ọ tị́ ka tata ka ba ene ká ka wo ẹkọ ọlẹ kam wẹẹ be nya ọ-bịlẹng ká ka dam ụbwọ? . . . Ịyẹ tị́ du ká juwa yẹ ang onyobyi ọhọhọ ịlịnyị chịng?” (Hab. 1:2, 3) IJihova wẹ abwọ ọrịrị ọ-bwu ọkịlẹtụ nya ọnchẹ nyamwụ ọwẹ. (Hab. 2:2, 3) ỊHabakuku chị ọkẹkẹnị gụ́ ọowa nyọlẹ kọ me irya ju abwọlẹ ká iJihova kaa chị angịnyị nyamwụ da. Ọ wẹ ka jẹ́ myị̀myị̀ nyori iJihova kpahị jwoo bala o-ri ọ ka dọọ ụbwọ nyọka bọhụ ẹ-ẹpwụ nya ọmayẹ ọnyị myị́ ọnyị. (Wa ịHabakuku 3:17-19.) Ẹlịyẹ ahị tị́ ka jẹ́? Ụka ká la akama, raabwọ ha iJihova ká ya joo jaabwọ ká ẹla ọọwa lang. Ọọwa lẹ a ya ẹhị rịrị ka ẹga nyamwụ nyọka dang ụbwọ lẹlẹ. Kori ká họ ịnyị, à ka jẹ́ myị̀myị̀ nyori iJihova ka ya ọngịrị ọlẹ ká baba hang nyọka bọhụ. Ụka ká tị jẹ́ nyori ọ wẹẹ dang ụbwọ, ọmyịmyị nyang ka la ọngịrị gụ́ olene.

7. Ẹlịyẹ angịlẹ kị bwu bala Shirley à tị́ maga nyọka hwoo abwọ la ọ-họhọ? Ịyẹ à tị́ dọọ ụbwọ du kọ kịnyaa la ọ-dahịhile iJihova?

⁷ Kịnyaa la ọ-họ ang ịlẹ kị ka tụng ju iJihova chwẹẹ. Ọọwa da Shirley, kọ ri ọọnahị ọnyang bwu Papua New Guinea, ụbwọ ụka kọ la akama. b Ugbiyegu nya Shirley á la ang gbuu ka, ọ dọmwụ kaa lujwo haa ụka ọhẹ nyọka ye ang oriri nwà. Ọlẹng ọhẹ kọ bwu balaa maga nyọka hwoo abwọ la ọ-dahịhile iJihova. Ọ yẹkẹẹ: “À ya nyori olegu ịgọgọ nya Ohe nyị ka dang ụbwọ, ma ụbwọ ọdada  ọọwa tị́ lee mẹ? Ugbiyegu nyang wẹẹ yẹ ẹbyahị. À ja bịrị ụka nyang kpa ya ẹla nya Ohe.” Shirley ya gbagbịla yẹkẹẹ: “M̀ kaa tọ ịlọmwụ wo nyori: ‘Ohe kaa kpahị juhi lee ọ́ tị́ị̀ kpahị juhi ka?’ Ọọwa lẹ m raabwọ ha iJihova i-ijata bala o-ya ẹla myị́ ẹla ọla irya nyam joo lẹlẹ. M̀ kịnyaa la ịBayịbụụ bala apwụ nyahị ọwawa, m̀ tị kịnyaa la ẹla nya Ohe oyaya bala ọjịra-jịra ọkaka ịnyịnyị.” Lụka o-kpii ọọnahị wẹ ka yẹ nyori iJihova kaa kpahị ju ugbiyegu nyamwụ. Ugbiyegu nyamwụ á kaa nọ limyi ka, ị tị kaa chị ọkẹkẹnị yẹẹyẹẹ. Shirley yẹkẹẹ: “M̀ yẹ nyori iJihova kaa wẹ abwọ ọrịrị nyam.” (1 Tim. 6:6-8) Ó ri ká kịnyaa la ang nya olegu ọhọhọ, ahụ ịnyịnyị-ị́ ka ya iwe da akama ka chịng ebwo hi iJihova ka.

8. Ịyẹ à tị́ ka họ tọ aanahị ịlẹ kị kaa kpa ịlahị ẹ-ẹpwụ nya ogu nya iJihova myị́?

⁸ Aluji nyahị kaa kpa intanẹtị bala ẹga o-ja oja ọ-ọhụ me ịnịịkịla lee o-ya ẹla ọ-hụ angịnyị ahị u-uhye nya aanahị ịlẹ kị kaa kpa ịlahị ẹ-ẹpwụ nya ogu nya iJihova. (Eje. 31:13) Ị kaa wu aanahị ịhyẹ bala ọ-chị ẹla baa nyori nyị ri ala uguru-ẹla. Angịnyị nya ịKịrayịsị ịla oyi ọhọhẹ la akama ụma ọlịịwẹ nyọlẹ kị chị ẹla ba ọlẹrụ ịPọlụ ododu bala o-woo. Ányị angịnyị nya ịKịrayịsị ịịwa à tị́ họ?

9. Ányị angịnyị nya ịKịrayịsị ịhyẹ à tị́ họ nyọlẹ kị wu ọlẹrụ ịPọlụ ju agba?

⁹ Angịnyị nya ịKịrayịsị ịhyẹ la oyi ọhọhẹ hwabwọ la ọ-da ọlẹrụ ịPọlụ ụbwọ ụka kị woo ju agba i-iRom. (2 Tim. 1:8, 15) Ịyẹ à tị́ du? Ọ laa oyoyi nyọlẹ ká angịnyị yẹ ịPọlụ lala ọla ugurụ-ẹla ịnyị? (2 Tim. 2:8, 9) Lee ị tị́ juhi nyori ị ka taa ịwa pyịpyị ịnyịnyị tị́? Ang ọnyị myị́ ọnyị ọlẹ kọ du kị họ ịnyị, kụ irya nya abwọlẹ kọ ka la ịPọlụ wẹẹ. Ọ chịpwụrụ bwu ẹpwụ nya akama lụmẹ-lụmẹ lẹ, ọ tị hu ọhịhị nyamwụ ju odo chajị nyaa ịnyịnyị. (Ụkụr. 20:18-21; 2 Kọr. 1:8) Ahị lala angịlẹ kị nyẹẹkpẹ da ịPọlụ lụka nya ọbaba ẹnẹnẹhẹ ka! Ẹlịyẹ ahị tị́ ka kpa i-irya ụka kị juwa tụ aanahị ịlẹ kị kaa kpa ịlahị pyịpyị?

10. Ẹlịyẹ ahị tị́ ka kpịtịya ụka kị juwa tụ́ aanahị ịlẹ kị kaa kpa ịlahị pyịpyị? Ịyẹ à tị́ du?

 ¹⁰ Kpịtịya nya ang odudu kị kaa tụụhị pyịpyị bala ọngọlẹ kọ kaa ju ọmwụ nyamwụ. ITimoti oheeye 3:12 yẹkẹẹ: “Angịlẹ wuu kị juwa tịtọ kị ka la ọhịhị nya ọngịnyị nya Ohe Oluhye oriri ọlẹ ẹ-ẹpwụ nya ịKịrayịsị iJisọsị lẹ aalẹ, ị ka la ọ-tụ pyịpyị pyii lẹ.” Lẹ ọ́ ka lahị ẹbyẹbyị nyọlẹ ká Olegu Onyobyi wẹẹ ya ahị da angịlẹ kị wẹẹ kpa ịlahị gụgụụgụ ka. Ọ tịtọ ká aanahị ịwẹ ka nyẹẹkpẹ da iJihova bala ọ-ka chị uhi juhi ịnyị.—1 Pit. 5:8.

11. Ẹlịyẹ ahị tị́ ka jẹ́ bwu oja nya Ọnẹsịfọrọsị? (2 iTimoti 1:16-18)

¹¹ Kịnyaa la ọ-da aanang ụbwọ, a nyẹẹkpẹ daa ẹnẹnẹhẹ ka. (Wa 2 iTimoti 1:16-18.) Ọnẹsịfọrọsị ri Ongịnyị nya ịKịrayịsị ọhẹ la oyi ọhọhẹ ọlẹ kọ họ ẹla datị hi angị ịkịla ụka kị wu ịPọlụ ju agba. ỊPọlụ juwa u-ube nya agba, ma ọọwa á “la Ọnẹsịfọrọsị oyoyi . . . kpong-kpong ka.” Ọkọkọ nya ọọwa, Ọnẹsịfọrọsị mwahị nya ịPọlụ bala ọ-dọọ ụbwọ a-agbẹyị ịdatị-datị ụka kọ yọọ. Ọhịhị nya ịlọmwụ o hu ju odo nyọlẹ kọ họ ịnyị lẹ. Ẹlịyẹ ahị tị́ ka jẹ́ bwu ụwa? Áhị ka myị uhi nya ọngịnyị ehe ka huhi abwọ la ọ-da aanahị ịlẹ kị ja tụ pyịpyị ụbwọ ka. Ọkọkọ nya ọọwa, ahị maga jaabwọ kahị ka họ ba myị́ nyọka daa ụbwọ. (Etu 17:17) Ị baba nya ọháha bala ụbwọ ọdada nyahị.

12. Ẹlịyẹ ahị tị́ ka jẹ́ bwu ẹga nya aanahị ịla Russia?

¹² Kụ ẹhị yẹ abwọlẹ ká aanahị alẹng bala anyang ịla Russia da aanaa ịla ọjịra-jịra ịlẹ kị wu ju agba ụbwọ wẹẹ. Ụka kị ja la angịhyẹ nyaa eje, iru nya aanahị alẹng bala anyang kaa baa ka ịkọtụ nyọka chẹkpẹ jwaa. Ẹlịyẹ ahị tị́ ka jẹ́ bwu ụwa? Ụka kị bịrị ẹnyị nya aanahị ịlẹ kị kaa kpa ịlahị, waa tụ ju ube, lee ọ-taa pyịpyị, ahị juhi ka. Raabwọ chajị nyaa, kpẹhị rịrị alugbiyegu nyaa, ká mwahị nya agbẹyị ịkịla ịlẹ ká ka jẹ́-ẹ daa ụbwọ.—Ụkụr. 12:5; 2 Kọr. 1:10, 11.

13. Ányị ọ-kpa họ à tị́ ka du kọ ka lahị ujwo la ọ-dahịhile iJihova bala ogu nyamwụ myị́?

¹³ Alugbiyegu nyahị, ala ọlụkụrwọ lee ala ube-ụpwụ nyahị ịlẹ kị kaa gbịgba ha iJihova ka, ka kpahị họ chajị nyọlẹ kahị kaa ya ẹla nya Ohe bala ọ-kaa hịhị ba ehile nya iJihova jẹ myị́. (1 Pit. 4:4) Ị ka bying myị́ yẹkẹẹ: “Ẹla nyanụ kaa há, ma ẹla nya ịgba ọgbagba nyanụ tị la ọngịrị kpoye, ọ́ pwoku ẹla ọla ichẹnẹ ọlẹ kaka.” Angịhyẹ kaa kpụhị abyị u-uhye nya abwọlẹ kahị kaa họ ẹ-ẹga nya angịlẹ kị gbaa kpehe hi ọjịra-jịra bwula o-yẹkẹẹ: “Ányị a tị́ ka jẹ́-ẹ ya nyori à la ọháha ẹ-ẹga nya angịkịla?” Ẹla ịlịịwẹ ka hu ịwẹẹ ọdada ju ka ẹpwụ ọkịlẹtụ nyahị myị́. Ahị ka dọmwụ nya ọ-kụ irya myị́ yẹkẹẹ: ‘Ẹla ọlẹ ká iJihova tịtọ á kịlaam-kịla wẹẹ ka? Ogu nyamwụ á jam da ehile lụmẹ wẹẹ ka?’ Ó ri ká juwa ẹ-ẹpwụ nya iwe-ahụrụ ọlịịwẹ aalẹ, ányị a tị́ ka bwu kịnyaa la ọ-tụ ju iJihova bala ogu nyamwụ chwẹẹ?

14. Ányị ahị tị́ ka họ ụka ká angịnyị á ja kpahị họ chajị nyọlẹ kahị kaa hịhị ba ehile nya iJihova jẹ? (Eje Ọnyịịla 119:50-52)

¹⁴ Cheje nyọka kịnyaa la ọ-ba ehile nya iJihova jẹ. IJobu ri ọngịnyị ọlẹ kọ kaa ba ehile nya iJihova jẹ nanana nyori ị kaa kpọọ họ chajị nya ọọwa. Ọngọhẹ lẹpwụ nya alẹng ịlẹ kị byi ịlaa nyị ri aligu nya iJobu dọmwụ maga nyọka họ ká iJobu ka myị nyori ọ́ kaa ri ẹla nya Ohe kori ká iJobu á họ ang ọnyịịla ka. (Job. 4:17, 18; 22:3) IJobu á tị myị ju ịnịịkịla ịlịnyị ka. Ọ jẹ́ nyori ehile nya iJihova u-uhye nya ang ọnyịịla bala ọtịpyọ nyị la kpakpa, ọ tị nwụlanọ nyọka baa jẹ ịnyịnyị. Ọ́ ya iwe da angịkịla ka họ kọ ka godayị giri-giri ka lẹ ka. (Job. 27:5, 6) Ẹlịyẹ ahị tị́ ka jẹ́ bwu  ẹga nyamwụ? A myị ká ọ-kpa họ a du ká da ehile nya iJihova ịwẹẹ ka. Kụ irya u-uhye nya abwọlẹ ká ọhịhị nyang la wẹẹ. À ka yẹ ụka lụmẹ-lụmẹ nyori ọhịhị nyang há gụ́ ọọwa nyọlẹ á kaa kpa ehile nya Ohe u-uhye nya ang ọnyịịla bala ọtịpyọ. Lẹ cheje nyọka kịnyaa la o-ri ụpa nya ogu ọlẹ kọ kaa kpa ehile nya iJihova. Aalẹ, ọ-kpa họ ụma ọnyị myị́ ọnyị bwu ẹga nya ọngọngọhẹ á ka chịng ebwo hi iJihova myị́ kaka.—Wa Eje Ọnyịịla 119:50-52.

15. Ịyẹ tị́ du kị kpa Brizit họ?

¹⁵ Kụ irya nya oja nya Brizit, kọ ri ọọnahị ọnyang bwu India wẹẹ. Alugbiyegu nyamwụ kaa kpọọ họ chajị nya ọmyịmyị nyamwụ. Lụka o-kpii nyọlẹ kọ hu enyi Ohe la 1997 kpá, ụkụrwọ nya ọrụmwụ kọ ri olibeenu nya iJihova ka, gwọọ myị́. Ọọwa lẹ, ọrụmwụ à cheje nyori ọwa bala Brizit ahụ nyamwụ tụ́ anjwo nyaa nyị ka mwụ ka kụ ta adamwụ bala ịnamwụ e-epweji ọkịla lẹlẹ. Ma iwe-ahụrụ tị lujwo ha Brizit gụ́ ọọwa ụ-ụwa. Nyọlẹ ká ọrụmwụ á la ụkụrwọ kaka wẹẹ, ọ baba nyọka họ ụkụrwọ lụka nyamwụ wuu nyọka jẹ́-ẹ da ugbiyegu ụbwọ. Datị hi ọọwa, ọjịra-jịra ọlẹ ko ji bọọba gụ́ lụrụ lala ịmaalị 220. Ọ tị tolujwo nyori alugbiyegu nya ọrụmwụ kaa tọọ pyịpyị ọọlajị nya ọmyịmyị nyamwụ. Ọtụpyịpyị ọọwa lụmẹ gbee ká ugbiyegu nya Brizit mwụ myị́myị́. Lụka ọkpahị ju kaka tị lẹ, ọrụmwụ à gbu lẹlẹ. Nyọlẹ kọ nọ chẹẹ, ọnyị nyamwụ ọnyang ọhẹ gbu igu nya ẹbẹ ọgọja ụka kọ gu ẹka 12. Ọlẹ kọ tị tịpyọ gụ́ wuu ri alugbiyegu nya Brizit kaa kpọọ abyị u-uhye nya ẹla ịtịpyọ ịwẹ. Ị ya nyori kori kị nyị ri ọngọhẹ nya Alibeenu nya iJihova ka ịnọ, ẹla inyibyi ịwẹ wuu nyị́ ja họ ka. Kpọkpọọkpọ, ọ kịnyaa la ọ-dahịhile iJihova bala ọ-tụ ju ogu nyamwụ chwẹẹ.

16. Ahị ọwawa iyina Brizit à tị́ yé nyọlẹ kọ nyẹẹkpẹ da iJihova bala ogu nyamwụ ka?

¹⁶ Nyọlẹ ká Brizit kụ lụrụ hi ọjịra-jịra pwụ ọlịịwẹ wẹẹ, ọngọ kpẹhị rịrị isekut jwoo ọhụ nyọka ya ẹla je angịnyị ẹ-ẹga kọ kụ bala ọ-ka họ ọjịra-jịra ẹ-ẹpwa nyịlọmwụ. Ụka nya ọgbanyẹ, ọ lọọ lala ẹla olujwo. Ma ọ ba ẹla ọọwa jẹ. O ya ẹrụ ọnyịịla je angịkịla, ọ họ ọjịra-jịra ẹ-ẹpwa nyamwụ, bala o-hu  ụka nọ nya ang ọjẹ́jẹ nya ugbiyegu bala anyị nyamwụ. Ịyẹ à tị́ ri ocheju nyamwụ? Brizit jẹ́ dọmwụ nya ịBayịbụụ ọjẹ́jẹ bala angịnyị lụmẹ-lụmẹ, iru nya angịlẹ kọ tị mẹ ang jẹ wẹ ka hu enyi Ohe. La 2005, ọ dọmwụ nyọka ye ịlahị nya ụgbẹyị ọkpụrụrụ. Ahị ọdahile ọlẹ kọ la ẹ-ẹga nya iJihova bala ọ-dayị giri-giri ẹ-ẹpwụ nya ogu nyamwụ kpa ahị ọwawa wọọ. Anyị nyamwụ kaa gbịgba ha iJihova yẹẹyẹẹ, ọjịra-jịra imiiye tị juwa ẹ-ẹga ọọwa lẹẹlẹẹ lẹ! Brizit jẹ́ myị̀myị̀ nyori iJihova à ya ọngịrị họọ du kọ jẹ́ bọhụ ẹ-ẹpwụ nya akama nyamwụ bala ọ-kpa họ bwu ẹga nya ugbiyegu nyamwụ myị́ lẹ.

17. Ẹlịyẹ ahị tị́ ka cheje nyọka họ?

¹⁷ Olegu Onyobyi tịtọ kahị ka myị nyori iJihova kaa nyẹẹkpẹ dahị lụka nya akama bala o-ri o-juwa ẹ-ẹpwụ nya ogu nya iJihova nyị du ká ọhịhị kaa lujwo hahị gụ́ ọọwa. Olegu Onyobyi tịtọ kahị ka juhi ụka kị chị ẹla ba angịlẹ kị kaa kpa ịlahị, taa pyịpyị, lee o-waa ju agba. Bwula ọ-kpa họ, ọ tịtọ kahị ka ba la ọ-dahịhile iJihova bala ogu nyamwụ ịnyịnyị. Ma, ahị tị jẹ́ ijẹẹhị inyibyi nyamwụ lẹ, ọ́ ka hụhị ahị myị́ ka. (2 Kọr. 2:11) Cheje nyọka pwa ịnịịkịla nya Olegu Onyobyi ká godayị giri-giri ha iJihova bala ogu nyamwụ. Kpịtịya nyori iJihova á ka nyẹẹkpẹ dang ẹnẹnẹhẹ ka. (Eje. 28:7) Chajị nya ọọwa lẹ, a myị ká ịngịngịhyẹ a chịng ebwo hi iJihova ka!—Rom. 8:35-39.

18. Ẹlịyẹ ahị tị́ ka kụ ẹhị yẹ ẹ-ẹpwụ nya ang ọjẹ́jẹ ọkịla?

¹⁸ Ẹ-ẹpwụ nya ang ọjẹ́jẹ ọlẹ, ahị kụ ẹhị yẹ akama ịlẹ kị kaa chịhị ọgụ bwu ẹga nya angịlẹ kị ri ala ọjịra-jịra ka lẹ. Ma ahị ka la ịmayẹ u-uhye nya ahị ọ-dahile iJihova bala ogu nyamwụ bwula akama ịlẹpwụ nya ọjịra-jịra myị́. Ányị ahị tị́ ka họ kahị ka be akama ịlịnyị? Ahị ka kụ ẹhị yẹ ẹlẹwẹ ẹ-ẹpwụ nya ang ọjẹ́jẹ ọkịla.