1. Ịyẹ ahị tị́ ka ya ahị guru gbe? Ẹlịyẹ ahị tị́ ka jẹ́ myị̀myị̀?

 AHỊ ka ya ahị guru nyori ahị ka la ọtụpyịpyị jaabwọ kahị wẹẹ họ ụkụrwọ nya ẹrụ ọnyịịla ọ-kpa pyẹ. Ọtụpyịpyị ọọwa tị ka dọmwụ lụmẹ gụ́ ọwẹ ị-ịlahị myị́ wẹẹ. (Dan. 11:44; 2 Tim. 3:12; Ọwụ. 16:21) Kpọkpọọkpọ, ahị jẹ́ myị̀myị̀ nyori iJihova ka ya ụbwọ ọdada ọlẹ kahị baba hahị. Ịyẹ à tị́ du? Chajị iJihova kaa da anchẹ nyamwụ ụbwọ ụka wuu nyọka họ ụkụrwọ ọlẹ kọ ya haa myị́, jaabwọ myị́ abwọ kọ lujwo kaka ba. Nyọka chụ pwokwita, ahị kụ ẹhị yẹ ang ịhyẹ ịlẹ kị họ ọ-ọhịhị nya ọlọmwụ Isikẹlụ, kọ ya ẹla nya Ohe je ala iJuu ịlẹ kị ji ọ-yẹdada ị-ịBabịlọn wẹẹ.

2. Ányị iJihova à tị́ chabwọ nya angịlẹ ká Isikẹlụ kaa ya ẹla nya Ohe je? Ẹlịyẹ ahị tị́ ka kụ ẹhị yẹ ẹ-ẹpwụ nya ang ọjẹ́jẹ ọlẹ? (Isikẹlụ 2:3-6)

² Angịnyị ịlanyị Isikẹlụ à tị́ ya ẹla nya Ohe je? IJihova ya nyị ri angị “la egbeju ọngịrị” bala ‘o-ju Ohe ihi ka.’ Ị tịpyọ lala ejwo bala o-ju ẹhwa lala ịgịrịhya. Ịnyị à dudu lẹ ká iJihova byi Isikẹlụ ụka lụmẹ-lụmẹ nyori nyị ‘juhi ka’ lẹ! (Wa Isikẹlụ 2:3-6.) Isikẹlụ jụ́ ụkụrwọ nyamwụ họ myị́ chajị nyori (1) iJihova à doo ẹrụ lẹ, (2) olegu nya Ohe ya ọngịrị họọ, bala (3) Omyi Ẹla nya Ohe ju ọmyịmyị nyamwụ ọngịrị. Ányị ang ịta ịwẹ à tị́  da Isikẹlụ ụbwọ? Ányị ị tị́ ka jẹ́-ẹ dahị ụbwọ alẹ?

3. Omyi ẹla oyina à tị́ ju Isikẹlụ ọhụ? Ányị iJihova à tị́ họ ká Isikẹlụ jẹ́ myị̀myị̀ nyori ọ ka dọọ ụbwọ?

³ IJihova byi Isikẹlụ yẹkẹẹ: “M̀ juwa dung ẹrụ.” (Isi. 2:3, 4) Ẹlẹwẹ ka ju Isikẹlụ ọngịrị. Ịyẹ à tị́ du? Chajị Isikẹlụ ka kpịtịya myị́ nyori iJihova kpa omyi ẹla ọlịịwẹ ya ẹla ta iMosisi bala Ayịsaya ụka kọ chwaa nya alọmwụ nyamwụ. (Ehe. 3:10; Ayị. 6:8) Isikẹlụ jẹ́ ịnyịnyị jaabwọ ká iJihova da alọmwụ imiiye ịwẹ ụbwọ nyọka jụ ụkụrwọ olujwo họ. Lẹ ụka ká iJihova byi Isikẹlụ ụka imimiiye nyori “m̀ juwa dung ẹrụ,” ọlọmwụ ọwẹ ka jẹ́-ẹ dahịhile nyori iJihova ka dọọ ụbwọ. Ịnyịnyị, Isikẹlụ da ụpwụ ugbabwọ lụmẹ-lụmẹ yẹkẹẹ: ‘IJihova ya ẹla tam.’ (Isi. 3:16; 6:1) Lẹ, Isikẹlụ jẹ́ myị̀myị̀ nyori iJihova à doo ẹrụ lẹ. Datị hi ọọwa, nyọlẹ ká Isikẹlụ ri ọnyị nya ọngọkiliya wẹẹ, adamwụ ka mẹjọ́ọ myị́ nyori iJihova kaa họ ká alọmwụ Nyamwụ ka jẹ́ myị̀myị̀ nyori Ọ ka daa ụbwọ ụka wuu. Ọ-chụ pwokita, iJihova byi Ayịsiki, iJekọbụ, bala iJeremaya yẹkẹẹ: “M̀ ka juwa tang.”—Ọmwụ. 26:24; 28:15; Jer. 1:8.

4. Irya o-me ju ẹlịyẹ à tị́ ka ya ẹjẹ ọkpụ́kpụ bala ọngịrị ha Isikẹlụ myị́?

⁴ Ányị iru nya ala Isirẹlụ à tị́ ka họ ụka kị wo ẹla nya Isikẹlụ? IJihova yẹkẹẹ: “Ala Isirẹlụ a juwa ke ụrụ lang ka, jaabwọ ọlẹ kị kaa ke ụrụ lomi nyam ka.” (Isi. 3:7) Nyọlẹ kị nyẹẹkpẹ da Isikẹlụ, iJihova ị wẹẹ nyẹẹkpẹ da ịnyịnyị lẹ. Omyi ẹla ọwẹ họ ká Isikẹlụ jẹ́ myị̀myị̀ nyori nyọlẹ ká angịwẹ nyẹẹkpẹ dọọ á mẹjẹ nyori ọ mileji ẹ-ẹga nya ụkụrwọ nya ọmwụ ọyẹyẹ lẹ ka. IJihova myịmyị họ ká Isikẹlụ jẹ́ myị̀myị̀ nyori ụka ká ẹla nya eje ọlala ọlẹ kọ ya dodehe á họ jịra lẹ, angịnyị ka “jẹ́ ya ọlọmwụ nyị wẹ  ẹpwarịrị nyaa lẹ.” (Isi. 2:5; 33:33) Irya o-me ju ẹlẹwẹ á ka dayi la ọ-ya ẹjẹ ọkpụ́kpụ bala ọngịrị ọlẹ ká Isikẹlụ baba nyọka họ ụkụrwọ nyamwụ họọ kaka.

5. Jaabwọ ká Ayịsaya 44:8 ya, ẹlịyẹ à tị́ ka ya ọngịrị hahị?

⁵ Ahị ịnyịnyị ka yé ọngịrị bwula ọ-jẹ́ nyori iJihova à duuhị ẹrụ kaka ya ẹla nyamwụ lẹ. Ọ chị ihi juhi bwula ọ-wụrụụhị nya “alibeenu” nyamwụ. (Ayị. 43:10) Ihi ọtụka o ri hahị lẹ! Jaabwọ ká iJihova byi Isikẹlụ nyori nyị ‘juhi ka,’ iJihova byihi ịnyịnyị yẹkẹẹ: “Anụ juhi ka.” Ịyẹ tị́ du kahị ka juhi nya angị tụ́ụhị pyịpyị ka? Chajị iJihova ọngọlẹ kọ du Isikẹlụ ẹrụ à duuhi ẹrụ lẹ, ọ tị ji ẹkpẹ nyahị ịnyịnyị.—Wa Ayịsaya 44:8.

6. (a) Ányị iJihova à tị́ họ kahị jẹ́ myị̀myị̀ nyori ọ ka dahị ụbwọ? (b) Ẹlịyẹ à tị́ ka ya ẹjẹ ọkpụ́kpụ bala ọngịrị hahị?

⁶ IJihova myọnụ nyori ọwa nyị ka dahị ụbwọ. Ọ-chụ pwokwita, ene ká iJihova yẹkẹẹ: “Anụ à ri alibeenu nyam lẹ,” ọ ya nyori “Ụka ká juwa chịpwụrụ bwu ụjẹ-ẹmwụ m̀ ka juwa tang. Á chịpwụrụ bwu ihu nya akama, á ka byi enyi ka. Á chịpwụrụ bwu ẹpwụ nya ila, ila-á ka bang ka, ila nya ịmayẹ-ẹ́ ka rụng ka.” (Ayị. 43:2) Ụka kahị ja ya ẹla nya Ohe, ahị kaa gbachị akama lụmẹ-lụmẹ ịlẹ kahị ka jẹ́-ẹ chabwọ nyaa lala ụjẹ-ẹmwụ ọlẹ kọ kaa biri ọngịnyị myị́, bala ịmayẹ ilujwo ịlẹ kahị ka jẹ́-ẹ chụ kaka me ila. Ma, iJihova tị ka dahị ụbwọ nyọka kịnyaa la ọ-kpa ẹrụ ọnyịịla pyẹ. (Ayị. 41:13) Jaabwọ ká ahyẹẹnụ nya Isikẹlụ la, ụmụmẹ nya angịnyị alẹ kaa nyẹẹkpẹ da ẹla nyahị. Ahị tị ka kpịtịya nyori ọọwa á mẹjẹ nyori ahị à jẹ́ ya ẹla nya Ohe ka lẹ ka. Ahị kaa yé ẹjẹ ọkpụ́kpụ bala ọngịrị bwụla ọ-jẹ́ nyori iJihova kaa chị ọkẹkẹnị kori kahị kịnyaa la o-ya ẹla nyamwụ. Ọlẹrụ ịPọlụ yẹkẹẹ: “Ohe Oluhye . . . ka nwụ ọng myị́ ọng . . . uri nya ụkụrwọ jaabwọ kị bwu họ ụkụrwọ ọọwa kaka ba.” (1 Kọr. 3:8; 4:1, 2) Ọọnahị ọnyang ọhẹ kọ kaa ye ịlahị nya ụgbẹyị lụka ọtata lẹ yẹkẹẹ: “Ọ kaa ya ọkẹkẹnị ham nyọka jẹ́ nyori aga ọmama nyahị, iJihova à kaa yẹ kpa nwụ uri lẹ.”

7. Ányị ọ tị́ ka la Isikẹlụ ụka myị́ ụka kọ kụ irya ju ang ọlẹ kọ yẹ a-arụrụ? (Yẹ ifoto ọla ẹbẹ nya ọgbanyẹ.)

⁷ Isikẹlụ yẹ jaabwọ ká olegu nya Ohe la ọngịrị kaka ba. Ang ọlẹ ká Isikẹlụ yẹ a-arụrụ dọọ ụbwọ du kọ jẹ́ nyori olegu ịgọgọ kaa da alegu-ẹrụ bala ata nya ang ọrụnyẹ otụka ọlẹ kọ yẹ ụbwọ du kọ jẹ́-ẹ rụnyẹ. (Isi. 1:20, 21) Ányị Isikẹlụ à tị́ họ? Ọ da ẹla ọlẹ kọ họ ju yẹkẹẹ: “Ụka ọlẹ kam chẹhị kaa yọọ, am ya ahị kụreji.” Ọ la Isikẹlụ ẹbyẹbyị gbee kọọ hị da ka ịpyị. (Isi. 1:28) Ụka ọkịla ká Isikẹlụ ka kụ irya nya ọyị ọyẹyẹ ọnyịịla ọwẹ, ọ ka jẹ́ myị̀myị̀ nyori olegu nya Ohe ka dọọ ụbwọ kpụ ọ ka họ ụkụrwọ nyamwụ myị́.

8-9. (a) Ịyẹ à tị́ họ ta Isikẹlụ ụka ká iJihova byoo nyị “wuleji godayị kọkọ? (b) Ányị iJihova à tị́ myị́myị́ ju Isikẹlụ ọngịrị gbe ẹga olujwo ọlẹ kọ wẹẹ ka họ ụkụrwọ?

⁸ IJihova byi Isikẹleụ yẹkẹẹ: “Ọngịnyị ehe ee, wuleji godayị kọkọ kam ya ẹla tang wẹẹ.” Ụka ká iJihova byi Isikẹlụ ịnyị, ọ ka la ọngịrị ọlẹ kọ baba nyọka wuleji hi ịpyị. Isikẹlụ da ụpwụ yẹkẹẹ: “Olegu . . . à ju wẹ ẹpwụ nyam lẹ, ọ wulem eji godayị kọkọ” lẹlẹ. (Isi. 2:1, 2) Ụka ọkịla ọlẹ ká Isikẹlụ wẹẹ họ ụkụrwọ wuu, “ọngịrị” nya Ohe, kọ ri olegu ịgọgọ nyamwụ, à kaa kpọọ ụgbẹyị lẹ. (Isi. 3:22; 8:1; 33:22; 37:1; 40:1) Olegu nya Ohe ju Isikẹlụ ọngịrị nyọka họ ụkụrwọ ọlẹ kọ la, kọ ri ọ-ka ya ẹla nya Ohe je angịlẹ kị “la egbeju-ọngịrị bala [ọ-chị] ọkịlẹtụ nyaa ori” e-epweji ọọwa. (Isi. 3:7) IJihova byi Isikẹlụ yẹkẹẹ: “Am ka họ a ka kpẹhị ọngịrị bala [ọla egbeju] ọngịrị taa jaabwọ ọlẹ kịwa aladang legbeju ọngịrị ịnyịnyị. Am ka họng a ka lọkịlẹtụ [ọ-la ọngịrị] gụ ẹjwọ ọlẹ kọ lọngịrị gụ  ajwọ ịkịla wuu, a ka dọmwụ lọngịrị gụ ẹjwọ ụga wẹẹ. A ju uhi lee ọ che kpakpaakpa chajị nyangị la egbeju ọngịrị ịwẹ ka.” (Isi. 3:8, 9) Ọ lala o-ri iJihova nyị wẹẹ byi Isikẹlụ yẹkẹẹ: ‘A myị ká egbeju ọngịrị ọlala nya angịwẹ a kpụng ọkịlẹtụ enyi ka. M̀ ka jung ọngịrị.’

⁹ Ku ẹkpẹ nya ọọwa, olegu nya Ohe kpa Isikẹlụ họ ụkụrwọ nya ẹla Ohe oyaya nyamwụ. Isikẹlụ da ụpwụ yẹkẹẹ: “Ọngịrị nya Ohe Oluhye wẹ uhye nyam ọtụka-ọtụka.” Ọ kpa Isikẹlụ ahyẹẹnụ irwiye ene kọ jẹ́-ẹ wo etu nya ẹlẹwẹ bala ọ-ka jẹ́-ẹ yoo ụ-ụgbẹyị ọlẹ kọ ka wu angịnyị ẹpwụ. (Isi. 3:14, 15) Ọọwa iJihova à byoo nyị ka ọkpọọ ọhẹ mẹ, ụ-ụwa ‘olegu à ju ka ẹpwụ nyamwụ’ lẹlẹ. (Isi. 3:23, 24) Isikẹlụ nwụlanọ nyọka dọmwụ nya ụkụrwọ nyamwụ lẹ.

10. Ụbwọ ọdada ọlanyị ahị tị́ baba nyọka jẹ́-ẹ ya ẹla nya Ohe? Ịyẹ à tị́ du?

¹⁰ Ụbwọ ọdada ọlanyị ahị tị́ baba nyọka họ ụkụrwọ nya ẹla nya Ohe oyaya? Nyọka wẹ ịtọ ẹla ọwẹ, kụ irya nya ẹla ọlẹ kọ họ ta Isikẹlụ wẹẹ. Ene ká Isikẹlụ ka dọmwụ nya ụkụrwọ nyamwụ ọlam-ọlam, olegu nya Ohe ya ọngịrị ọlẹ kọ baba họọ. Jaabwọ kọ la lụka nya Isikẹlụ, olegu nya Ohe à wẹẹ dahị ụbwọ du kahị jẹ́ wẹẹ ya ẹla nya Ohe myị́ alẹ ịnyịnyị lẹ. Ịyẹ tị́ du? Chajị Olegu Onyobyi wẹẹ dẹwụ tahị chajị ká ụkụrwọ nya ẹla nya Ohe oyaya nyahị ka dayi. (Ọwụ. 12:17) Ẹ-ẹhị nya ọngịnyị ehe lẹ, ọ lala o-ri ahị nyị́ nwà ịngịhyẹ ẹ-ẹga nya Olegu Onyobyi ka. Ma bwula ụkụrwọ nya ẹla Ohe oyaya nyahị, ahị wẹẹ kụrọọ myị́! (Ọwụ. 12:9-11) Ụ-ụgbẹyị oyina tị́? Ụka kahị ya ẹla nya Ohe, ahị wẹẹ mẹjẹ nyori áhị ju uhi nya Olegu Onyobyi ka. Ụka ọnyị myị́ ọnyị kahị ya ẹla nya Ohe, Olegu Onyobyi kaa mịleji. Lẹ, ẹlịyẹ a tị́ la gbagbịla hahị nyọlẹ kahị jẹ́ wẹẹ ya ẹla nya Ohe myị́ nanana nyori ọtụpyịpyị ji? Ahị ka jẹ́-ẹ ya nyori olegu ịgọgọ à wẹẹ juhi ọngịrị lẹ bala o-ri iJihova chẹkpẹ juhi.—Mat. 5:10-12; 1 Pit. 4:14.

11. Ịyẹ olegu nya Ohe à tị́ ka họ hahị? Ányị ahị tị́ ka họ ká olegu nya Ohe ka ji uhye nyahị kịnyaa?

¹¹ Ẹla ọkịla oyina ahị tị́ ka jẹ́ kori kahị kụ irya  nya abwọlẹ ká iJihova ju Isikẹlụ ọngịrị nyọka ya ẹla nya Ohe myị́? Olegu nya Ohe ka jẹ́-ẹ ya ọngịrị hahị nyọka kụrụ akama ọnyị myị́ ọnyị kahị ka la ẹ-ẹpwụ nya ẹrụ ọnyịịla ọ-kpa pyẹ myị́. (2 Kọr. 4:7-9) Ịyẹ ahị tị́ tịtị ka họ chajị ká olegu nya Ohe ka ji uhye nyahị kịnyaa? Ahị baba nyọka raabwọ nyịlẹhị-ịlẹhị bịlẹ iJihova chajị nya olegu ịgọgọ, la ọ-jẹ́ myị̀myị̀ nyori Ọ ka wo abwọ ọrịrị nyahị. IJisọsị mẹjẹ angịjụgbẹyị nyamwụ yẹkẹẹ: “Anụ juwa bịlẹ ang ka ẹpwụtụbwọ nya Ohe Oluhye mẹ! . . . Anụ juwa tịtọ nya ang ka ẹpwụtụbwọ nya Ohe Oluhye mẹ! . . . Anụ yụbwọ kpụ ọnụ ụgbẹyị ịnyịnyịịnyị mẹ!” Ọọwa lẹ, iJihova à ka ‘hu olegu ịgọgọ nyamwụ ha angịlẹ wuu kị juwa bịlọọ’ lẹlẹ.—Luk. 11:9, 13; Ụkụr. 1:14; 2:4.

12. Jaabwọ ká Isikẹlụ 2:9–3:3 ya, ale ụpwụ ọwaba à tị́ bwu? Ẹlịyẹ ị tị́ da ẹ-ẹpwụ nyamwụ?

¹² Olegu nya Ohe ya ugbodu ojuju ha Isikẹlụ nyọka kpa ẹrụ ọnyịịla pyẹ. Ọ́ tị ba ọọwa kem ka. Omyi ẹla nya Ohe ju ọmyịmyị nyamwụ ọngịrị ịnyịnyị. Isikẹlụ yẹ ụbwọ ọhẹ a-arụrụ kọ kpa ụpwụ ọwaba. (Wa Isikẹlụ 2:9–3:3.) Ale ụpwụ ọwaba ọọwa à tị́ bwu? Ẹlịyẹ ị tị́ da ẹ-ẹpwụ nyamwụ? Ányị ẹla ọọwa à tị́ ju ọmyịmyị nya Isikẹlụ ọngịrị? Ahị yẹ wẹẹ. Ụpwụ ọwaba ọọwa bwu ẹga nya Ohe. Ọ chịkpẹẹ myị́ kọ ka ri ọngọhẹ nya alegu-ẹrụ ine ịlẹ ká Isikẹlụ yẹ ụka nya ọgbanyẹ ká iJihova ya ụpwụ ọwẹ du ẹrụ kịlọọ. (Isi. 1:8; 10:7, 20) Ẹla ọlẹpwụ nya ụpwụ ọọwa ri omyi ẹla nya Ohe, kọ ri eje ọlala ọlẹ ká Isikẹlụ ka ya dodehe je angị la egbeju ọngịrị ịlẹ kị juwa ọ-ọyẹdada wẹẹ. (Isi. 2:7) Ị da ẹla ọọwa a-ahị bala ẹkpẹ nya ụpwụ ọọwa.

13. Ịyẹ iJihova à tị́ byi Isikẹlụ nyị họ la ụpwụ ọwẹ? Ịyẹ tị́ du kọ la ịpyọ?

¹³ IJihova byi ọlọmwụ ọwẹ nyị ri ụpwụ ọwẹ kị nyị “wu ẹpwụ kpọngkpọng” mẹ. Ẹ-ẹpwụ nya ihi ojuju, Isikẹlụ ri ụpwụ ọọwa. Ịyẹ à tị́ ri etu nya ụpa nya ọyị ọyẹyẹ ọwẹ? Isikẹlụ baba nyọka wo etu nya ẹla ọlẹ kọ wẹẹ ka ya yẹẹyẹẹ. Ọ baba kọ ka myị ju ẹla ọọwa, chajị kọ ka gwoo gbịla nyọka yoo dodehe. Ọọwa lẹ ẹla ọla ẹbyẹbyị à tị́ họ lẹlẹ. Isikẹlụ yẹ nyori ụpwụ ọọwa nyị la “ịpyọ ringe-ringe lala ịnwa.” (Isi. 3:3) Ịyẹ à tị́ du? A-ahị nya Isikẹlụ lẹ, ihi nyọka ku ọmwakpa nya iJihova ri ẹla ọlẹ kọ la ịpyọ lee ẹla ọ-kpịpyọ yẹẹyẹẹ. (Eje. 19:8-11) Ọ myọọ lẹhị nyori iJihova yoo myị nyọka ri ọlọmwụ nyamwụ.

14. Ịyẹ à tị́ da Isikẹlụ ụbwọ nyọka ye ụkụrwọ nyamwụ myị?

¹⁴ Ụka ọkịla, iJihova byi Isikẹlụ yẹkẹẹ: “Kpa ẹla myị ẹla ịlẹ kam ya tang wuu ẹpwụ nya ọkịlẹtụ nyang ká tị kpa ụrụ nyang myị̀myị ịnyịnyị mẹ.” (Isi. 3:10) Bwula omyi ẹla ịwẹ, iJihova wẹẹ byi Isikẹlụ nyori nyị maga nyọka kpịtịya nya ẹla ọlẹ kị da ụ-ụpwụ ọwẹ bala ọ-ka kpa me irya ju yẹẹyẹẹ. Ọ-họ ịnyị ju ọmyịmyị nya Isikẹlụ ọngịrị. Ọ myịmyị ya ẹla ọnyọọngịrị ha Isikẹlụ kọ ka ya je angịnyị. (Isi. 3:11) Nyọlẹ ká ẹla nya Ohe juwa ọ-ọkịlẹtụ bala ọnụ nya Isikẹlụ wẹẹ, ọ ka nwụlanọ nyọka dọmwụ nya ụkụrwọ nyamwụ bala ọ-ka họọ pwụ ocheju lẹ.—Kụ ẹhị yẹ Eje Ọnyịịla 19:14.

15. Nyọka jẹ́-ẹ bọhụ myị́, ẹlịyẹ ahị tị́ ka kpa ‘ẹ-ẹpwụ nya ọkịlẹtụ’?

¹⁵ Nyọka jẹ́-ẹ bọhụ ẹ-ẹpwụ nya ẹrụ ọnyịịla ọ-kpa pyẹ, ahị ịnyịnyị baba nyọka ya iwe da ká omyi ẹla nya Ohe ka ju ọmyịmyị nyahị ọngịrị kịnyaa. Ahị baba nyọka kpa ẹla myị́ ẹla ọlẹ ká iJihova wẹẹ ya jehi alẹ ‘ẹ-ẹpwụ nya ọkịlẹtụ.’ Alẹ iJihova kaa ya ẹla jehi bwula Omyi Ẹla nyamwụ, kọ ri ịBayịbụụ. Ányị ahị tị́ ka họ ká Omyi Ẹla nya Ohe ka gu abwọlẹ kahị kaa kụ  irya, abwọlẹ ká ẹla kaa lahị bala ang ọlẹ kọ kaa guhi gbịla kaka họ ẹla?

16. Ịyẹ ahị tị́ ka họ la Omyi Ẹla nya Ohe pyii? Ányị ahị tị́ ka bwu wo etu nya ẹla ọlụwa?

¹⁶ Ụka kahị ri ang oriri kọ yi juhi, ịnyịrọ nyahị kaa la gogo. Ịnyịnyị ụka kahị wa ịBayịbụụ kahị kụ irya jwoo, ọmyịmyị nyahị kaa la ọngịrị gụ́ olene. Lẹ, ahị kpa ẹla ọlẹ kahị jẹ́ u-uhye nya ụpwụ ọwaba ọwẹ i-irya. IJihova tịtọ kahị ka ri Omyi Ẹla nyamwụ “wu ẹpwụ,” ọọwa ri ahị ka wo etu nyamwụ yẹẹyẹẹ. Ahị ka jẹ́-ẹ họ ịnyị bwula abwọ ọrịrị, ịBayịbụụ ọwawa, bala irya o-me jwoo. Họhẹ-họhẹ, ahị ka raabwọ nyọka nwụla ọkịlẹtụ nyahị nọ kọ ka ye irya nya Ohe myị. Ọọwa lẹ, ahị ka wa ịBayịbụụ lẹlẹ. Ọ-ba ọọwa ba, ahị ka chị dayị kahị ka kụ irya kpori-kpori ju ẹla ọlẹ kahị wa. Ịyẹ à tị́ ka ri ocheju nya ọọwa? Jaabwọ kahị wẹẹ kụ irya ju Omyi Ẹla nya Ohe gụ́ ọọwa, ahị ka wo etu nyamwụ gụ́ ọọwa, ọmyịmyị nyahị tị ka la ọngịrị gụ́ ọọwa ịnyịnyị.

17. Ịyẹ tị́ du kahị baba nyọka me irya ju ẹla ọlẹ kahị wa bwu ịBayịbụụ?

¹⁷ Ịyẹ tị́ du kọ baba nyọka wa Omyi Ẹla nya Ohe bala ọ-kụ irya jwoo? Ọ-họ ịnyị ka ya ọngịrị ọlẹ kahị baba hahị nyọka ya ẹla nya Ịpyị-Adịrahụ lẹẹlẹẹ bala ụka nya eje ọlala ọnyọọngịrị ọlẹ kahị ka ya dodehe ị-ịlahị. Ịnyịnyị, ụka kahị kụ irya ju abwẹla ịnyịịla nya iJihova, igu oriri nyahị balọọ kaa la ọngịrị gụ́ olene. Ọọwa ka du kahị ka la ịngịhyẹ ọlẹ kọ la ịpyọ lee ọ-kpịpyọ yẹẹyẹẹ, kọ ri okpunyi nya ọkịlẹtụ bala ang ọ-nwahị.—Eje. 119:103.

18. Ẹlịyẹ angịlẹ kahị kaa ya ẹla nya Ohe je à tị́ ka jẹ́? Ịyẹ à tị́ du?

¹⁸ Isikẹlụ ọwa ri ọlọmwụ, áhị tị ri ọlọmwụ ka. Ma, ahị kaa cheje nyọka kịnyaa la o-ya ẹla nya iJihova ọlẹ kị da ju ịBayịbụụ gbee da ụka ọlẹ ká ụkụrwọ nya ẹrụ ọnyịịla ọ-kpa pyẹ ka chọnụ woo ẹpwụ. Kori ká ụka nya eje ọlala á pwụ lẹ, angịlẹ kahị kaa ya ẹla nya Ohe je á ka yé ẹlẹhẹ ya ụbwọ chị nyori ịwa nyị́ wo ọna ọdada ka lee Ohe nyị nyẹẹkpẹ da ịwa kaka. (Isi. 3:19; 18:23) Ọkọkọ nya ọọwa, ị ka jẹ́ ụka ọwẹ nyori ẹla ọlẹ kahị kaa ya nyị bwu ẹga nya Ohe.

19. Ịyẹ à tị́ ka ya ọngịrị hahị nyọka jụ ụkụrwọ nyahị họ myị́?

¹⁹ Ịyẹ à tị́ ka ya ọngịrị hahị nyọka họ ụkụrwọ nya ẹla Ohe oyaya pwụ ocheju myị́? Ang ịta ịlẹ kị ju Isikẹlụ ọngịrị ịnyị. Ahị kaa ya ẹla nya Ohe kịnyaa chajị ahị jẹ́ nyori iJihova à duhi ẹrụ lẹ, olegu ịgọgọ nya Ohe kaa juhi ọngịrị, bala o-ri Omyi Ẹla nya Ohe kaa ju ọmyịmyị nyahị ọngịrị. Bwula ụbwọ ọdada nya iJihova, ahị cheje nyọka họ ụkụrwọ nya ẹrụ ọnyịịla ọ-kpa pyẹ bala o-ju ugbodu “pwụ ọbaba.”—Mat. 24:13.