Paul: La Ọya Ọkụrụ Ọhọhẹ nya 1985, ahị wẹẹ jẹ ka Liberia, ịị West Africa, ko ri ẹga ọhọhẹ ọlẹ kị yahị du ka nyọka ri angị kpa ẹrụ ọnyịịla pyẹ ẹ-ẹpwụma ọkịla. Ọkẹkẹnị myị̀ ọkịlẹtụ nyahị pwẹẹpwẹẹ! Ụgbọ nyahị dayị ịị Senegal. Ahụ nyam byim yẹkẹẹ: “O hi awa ookpokpo kahị ka pwụ́ Liberia lẹ!” Ọọwa lẹ, ahị wo ẹla o-ya dodehe ọhẹ lẹlẹ: “Angịlẹ kị ja ka Liberia ka hireji pyii ẹ-ẹgẹlẹ. Angịhyẹ wẹẹ maga nyọka ye eji ọkpakpa nya alụwa la agbụrụ, lẹ áhị ka jẹ́-ẹ hireji ụ-ụwa ka.” Ẹ-ẹpwụ nya ahyẹẹnụ iwo gbẹgbịlẹ, ahị kụ Senegal bala angị bwu ẹpwụma ịkịla kaka kpa ẹrụ ọnyịịla pyẹ ụ-ụwa. Ahị wo oja nyori nyị nwụ angịnyị lụmẹ-lụmẹ bala o-ri angịkpeji nyị́ ya iwe da ha ọngọngọhẹ nyọka kpehe hi ẹpwa nyamwụ lobyi ka, nyị kaa nwụ angị bịrị ehile ọọwa ọgbọọgba.

Anne: Ẹla kaa lahị uhihi lụmẹ. Bwu ụka-ụka kam ri onjwo, ị dọmwụ jẹ́m nya Anne ọ-la uhi. M̀ dọmwụ kaa ju uhi ụka kam ja chị ụgbẹyị eku! Ma ahị tị cheje nyọka pwụ ẹga kị yahị du ka pyii.

Paul: Am bala Anne nwa e-epweji ookpokpo ọ-ọmwụ ẹnụ obyi nya England. Ahị angị imimiiye dọmwụ nyọka ye ịlahị nya ụgbẹyị ụka kahị họ kpá bwu ụpwụ-iwo, chajị adam bala ịnam tụ́ ịnịna nya Anne kaa juhi ọhụ yẹẹyẹẹ. Ị chẹkpẹ juhi yẹẹyẹẹ nyọlẹ kahị la irya nyọka kpa ụka nyahị wuu họ ụkụrwọ nya iJihova. Ị yem ka ịBẹtẹlụ ụka kam gu ẹka 19, Anne wẹ ka julam ụka kahị ye awụlẹ la 1982.

Anne: ỊBẹtẹlụ háahị, ma irya nyahị ji ọ-ka da ụbwọ ẹ-ẹga ká ọbaba ji gụ́. Ahị họ ụkụrwọ bala angịlẹ kị kpa ẹrụ ọnyịịla pyẹ ẹ-ẹpwụma ọkịla ụka ọhẹ lẹ. Ọgụ-ẹpẹtẹ ọnyịịla bala oja nyaa du kahị kaa tịtọ nyọka kpa ẹrụ ọnyịịla pyẹ ẹ-ẹpwụma ọkịla ịnyịnyị. Ahị kaa raabwọ chajị nya ẹlẹwẹ lodu ọnyị myị́ ọnyị ẹ-ẹpwụ nya ẹka ịta, lẹ ahị chị ọkẹkẹnị nyọlẹ kị wụrụụhị la 1985 nyọka ka ịkịlasị 79 nya Gilead! Ị yahị du ka Liberia, ịị West Africa.

Paul: Ahị ju ụgbọ oluhye ọhọhẹ ọlẹ kị ya iwe da nyọka tịrẹkpẹ ka Liberia. Uhi ji ẹpwụ nya angịnyị wẹẹ, ị́ tị myị angịnyị ka kpehe hi ẹpwa nyaa lobyi ka ịnyịnyị. Uhi myị ẹpwụ nya angịnyị gbee, ọ́ dọmwụ ri ká imoto á họ anụ ọtụka la ọ-ya ahị me ka, angịnyị kaa cheko rụnyẹ rụ i-ihi! Nyọka họ ká ọkịlẹtụ nyahị ka weji, ahị kaa wa ụpwụ nya Eje Ọnyịịla la awụlẹ la odu ọnyị myị́ ọnyị. Nanana nyori iwe-ahụrụ nya ẹpwụma ọwẹ tịpyọ pwụ ọlịịwẹ, ụkụrwọ nyahị háahị yẹẹyẹẹ. Anne kaa kpa  ẹrụ ọnyịịla pyẹ ẹnụ myị́ ẹnụ, am tị juwa ị-ịBẹtẹlụ, kaa họ ụkụrwọ bala John Charuk. a M̀ jẹ́ ang yẹẹyẹẹ bwu ẹga nyamwụ chajị ọ juwa ịị Liberia lụka ọtata lẹ, lẹ ọ jẹ́ akama bala iwe-ahụrụ nya aanahị ịlụwa yẹẹyẹẹ.

Anne: Ịyẹ tị́ du ká Liberia háahị i-ijata ị-ịwẹ? Ọọlajị nya aanahị alẹng bala anyang ịnyị. Ị mẹ ọháha jẹ ẹ-ẹga nyahị, ị́ tị kaa nyẹẹkpẹ dahị ka ịnyịnyị. Ahị ri aligu ahyaahị, ị lala alugbiyegu nyahị onyeewe. Ọhụ ojuju nyaa juhi ọngịrị yẹẹyẹẹ. Ẹrụ ọnyịịla ọ-kpa pyẹ kaa kpịpyọ. Angịlẹ ká tọ ẹ-ẹpwa kaa wụ ẹjẹ kori ká hụ tata jaabwọ kọ háa ka! Angịnyị kaa ya ẹla u-uhye nya ịtọ ẹla bwu ịBayịbụụ ọ-ọka nya ụgbẹyị. Ọ kaa chịkpẹẹ la ọ-ka yẹ julaa ẹ-ẹpwụ nya ẹla oyaya ọlịnyị. Ahị la angịlẹ kahị kaa jẹ́ ịBayịbụụ ta ju iru gbee kọ kaa lujwo hahị nyọka yé ụka jẹ́ ang taa ịwa wuu. O ri akama ọnyịịla hahị!

Paul: Okpunyi ji pwụ ẹgẹhẹ ịnọ ẹ-ẹpwụ nya ẹka ine lẹ. Ma ang wuu yẹda la 1989 nyọlẹ ká ẹwụ ọtụka-ọtụka kpeji myị́myị́. Angịlẹ kị tịtọ nyọka ye ọngịrị bwu ụbwọ nya igomenti yẹ epweji ịla oya nya ịBẹtẹlụ dada la ahyẹẹnụ 2 nya Ọya Ọharwiye, 1990. Ẹ-ẹpwụ nya ọya ịta lẹpwụ-lẹpwụ, áhị jẹ́ wo ẹla bwu ẹga nya ọngọngọhẹ ka odehe nya ẹpwụma ọwẹ ka, tụ alugbiyegu nyahị bala egbeju ẹpwa nyahị ọla odehe wuu. Agbụrụ ọhọhọ bala o-wo lawụlẹ ka, ang oriri ọ-gamwụ bala anyang o-wu chị beji ji ẹga myị́ ẹga. Akama ọwẹ kịnyaa ẹ-ẹpwụ nya ẹka 14, ịnyịnyị ọ tị pyẹ yịrị ẹpwụma ọwẹ yịrị ẹẹ.

Anne: Ala ìja ịhyẹ kaa bá ẹla ta ala ìja ịkịla juwa nwụ awụlẹ. Alisoja kaa tụ opeje ọnyị myị́ ọnyị da. Ị kaa kpa ịkọnị ịtụka-ịtụka bala ọ-kụrụ ang ịlẹ kị la uhi-uhi. Ị kaa ka ẹpwa ọnyị myị́ ọnyị kaka hu ang ọlẹ kị tịtọ. A-ahị nya angịhyẹ nyaa lẹ, ọngịnyị ọnwụnwụ lala abwọlẹ kịị “chị ụnụ imyi.” Egu nya angịnyị kaa kụ ogu ẹ-ẹga kịị wu angịnyị dayị ụ-ụgbẹyị, ọlịnyị ọhẹ dọmwụ ji ba egbeju ẹpwa nyahị ba. Ị nwụ aanahị lụmẹ-lụmẹ, tụ angị imiiye nya angịlẹ kịị kpa ẹrụ ọnyịịla pyẹ ẹ-ẹpwụma ọwẹ lala ahị-ahị.

Ụka myị́ ụka ká alẹwụ á yẹ ọngịnyị ọlẹ kọ bwu òja ọlẹ kọ waa ẹjẹ, ị kaa nwọọ. Aanahị kaa hu ọhịhị nya ịlaa ju odo nyọka jẹ́-ẹ tụ aanahị alẹng bala anyang kpịbaa chajị kị ka chịda. Aanahị ịlẹ kị ya du bwu ẹpwụma ọkịla wẹ ụwa ka kpa ẹrụ ọnyịịla pyẹ bala ala ịBẹtẹlụ kaa họ ịnyị ịnyịnyị. Angịhyẹ ịlẹ kị rụnyẹ rụ wẹ ịBẹtẹlụ kaa nune ẹ-ẹpwụ nya ube oleji, angịkịla kụ ube oluhye bala aanahị ịla ịBẹtẹlụ. Angị irwiye kụ ẹpwụ nya ube ookpokpo balahị.

Paul: Ahyẹẹnụ ọnyị myị́ ọnyị alẹwụ kaa maga nyọka ju wẹ ẹpwụ nya ịBẹtẹlụ kị ka jẹ́ kori kahị tụ angịhyẹ kpịbaa ụ-ụwa. Ụka myị́ ụka kọ lịnyị, ahị angị imiiye kaa baa ka ogirigba olodehe kaka ya ẹla  balaa, aanahị imiiye ịkịla kaa kpẹhị ba ẹla ọnyị myị́ ọnyị ọlẹ kọ wẹẹ họ bwu iwindo ọhẹ. Kori ká angị imiiye ịlẹ kị baa ka ogirigba á kpa abwọ nyaa ị-ịlahị aalẹ, ẹla ọọwa á la ọngịrị ka. Ma, ọ́ tị ri kị kpa abwọ nyaa kẹkpẹ lẹ aalẹ, ọ mẹjẹ nyori angịịwa la ọngịrị-ọngịrị lẹ, ọọwa angịlẹ kị laa yọyị bwu iwindo à ka tụ aanahị ịlẹ kị juwa kpịbaa ahyaahị lẹlẹ.

Anne: Nyọlẹ ká epwihi lụmẹ-lụmẹ kam kpá, ebwo nya angịhyẹ ju agbama ọtụka-ọtụka du kị jụ wẹ ẹpwụ nya ịBẹtẹlụ lagbụrụ. M̀ da ụgbẹyị chị ịlọm bala ọọnahị ọnyang ọhẹ u-ube o-hyo enyi ọlẹ ká ẹga ọ-kpịbaa ochiche ọhẹ ọlẹ kọ lala akpa ọlẹ kị kaa go ang guru ji ẹpwụ nyamwụ. Ọọnahị ọnyang ọọwa ju ka ẹpwụ nya ẹga ochiche ọwẹ ka kpịbaa. Alẹwụ ịịwa bam wẹ ube oluhye la ịkọnị ịtụka nyaa. Ị mịla ụgbẹyị nyahị nmoo la agbama. Ayịbam bịlaa gbee kị ka wẹ ka bwula o-byaa nyori, “Ahụ nyam wẹẹ kpa enyi hyo ụ-ụwa.” Ụka kam wẹẹ tụ ang ku ẹga ọlẹ ká ọọnahị ọnyang kpịbaa, ọ họ ọmọnyọ gboo. Ọ tị ye ụka nyọka nwụ ang ịlụwa guru jaabwọ kị la ene ịnyịnyị. M̀ jẹ́ nyori angịwẹ ka kụ irya nyori ịyẹ m tị́ wẹẹ họ da ụka ọwẹ, ọọwa m ju uhi gbee ká ịnyịrọ nyam ja che kpakpaakpa bwu egbeju ka juka ẹpẹtẹ lẹlẹ. Ányị m tị́ ka bwu wụrụ ụgbẹyị kị ka jẹ́ jum ka nyọlẹ kam wẹẹ che ịịwẹ? M̀ raabwọ ẹẹpwụ-ẹpwụ bịlẹ iJihova kọ ka dam ụbwọ. M̀ wụrụ ụgbẹyị kpụ m jẹ́ wu ịlọm kpa da ọnụ chaa kpẹnẹẹ chẹẹ. Ọngọhẹ nyaa gum da ka ọka, ọọwa ọ rụ kpụrụrụ ka ẹga ka ọọnahị ọlaa kpịbaa, juwa yẹ ụwa kpete-kpete lẹlẹ. Ọ lọọ ẹbyẹbyị nyọlẹ kọ yẹ ịngịngịhyẹ ụ-ụwa ka. Ọwa bala angịkịla nyamwụ rụ ka wụla ebe ịkịla bala ẹga ọ-ya ang kpịbaa yẹ. Ma ị́ tị yẹ ịngịhyẹ ka ịnyịnyị.

Paul: Ang oriri gamwụ ẹ-ẹpwụ nya ọya ine. Ma ang oriri nya olegu kaa ya ọngịrị hahị. Ang ọjẹ́jẹ nya ụtụrụ ọla ịBẹtẹlụ à lala “ang oriri nya ụtụrụ” nyahị lẹ, ọngịrị ọlẹ kahị kaa yé bwu ụwa tị kaa myịhị lẹhị yẹẹyẹẹ.

Kori ká ang oriri ọlam á myị́ kpụ kahị bala angịkịla á kpehe hi egbeju ẹpwa, ị ka nwụ aanahị ịlẹ kị wẹ ka kpịbaa ụ-ụwa myị́. Abwọlẹ ká iJihova kaa bwu hu hahị bala ụka ọlẹ kọ kaa họ ịnyị kaa lala ụkụrwọ ẹbyẹbyị! IJihova kpahị juhi bala ọ-dahị ụbwọ nyọka ju uhi ka.

Jaabwọ ká odehe wẹẹ chowu la abwẹla ọtịpyọ gụ́ ọọwa, ịnyịnyị ahịgboo nya ẹlịlẹhị à wẹẹ hụ́ gụ́ ọọwa lẹ. Nanana nyori aanahị alẹng bala anyang kaa rụnyẹ nya ọhịhị nyaa ụka lụmẹ-lụmẹ, ị kaa ya ụbwọ chị ọmyịmyị nyaa gogo bala ọ-kụ kpọọ ẹ-ẹpwụ nya akama. Angịhyẹ nyaa ya nyori ang ọlẹ ká ịwa nyị wẹẹ chịpwụrụ bwu nyị ri “ọnwụlaanọ gbe akama ọtụka okpelego.” Angịgbahị nya ọjịra-jịra bala ikolobya ịkịla kaa kpa ịlahị la ugbodu ojuju. Ụka ká ẹla á ku aanahị rụ hi ẹpwa nyaa, ị kaa yẹ jula awụlẹ, dọmwụ nya ẹrụ ọnyịịla ọ-kpa pyẹ ẹ-ẹga onyeewe ọlẹ kị ji. Ị kaa chị ekeji bwu ipinu kpa nwụ ẹga kị ka họ ọjịra-jịra. Lụka olujwo ọwẹ, ọjịra-jịra ọ-kaka bala ẹrụ ọnyịịla ọ-kpa pyẹ kaa ya ẹhị ọrịrịị-rịrị bala ọhụ ojuju ha aanahị yẹẹyẹẹ. Ụka kahị ja ga ang ịlẹ kị ya du wẹ ka da aanahị ụbwọ, ọ kaa guhi ọ-ọkịlẹtụ nyọlẹ ká angịhyẹ kaa to wo nya ịbang ọlẹ kị ka kpa ya ẹla nya Ohe, ọkọkọ nya ang ịkụrụ-kụrụ! Ụmụmẹ nya angịnyị ịlẹ kị kpa ẹhị nya ịlaa yẹ akama ọlẹ ká ẹwụ ọwẹ gu reeji kaa tịtọ nyọka ke ụrụ wo oja ọnyịịla. Ọ kaa laa ẹbyẹbyị jaabwọ ká Alibeenu nya iJihova jẹ́ chị ọkẹkẹnị ẹ-ẹpwụ nya iwe-ahụrụ  ọwẹ. Ị hụ lala ahịgboo ẹ-ẹpwụ nya ukpowu ọwẹ wuu! (Mat. 5:14-16) Ila ọchịchị nya aanahị du ká angịhyẹ ịlẹ kị wẹẹ dẹwụ la ọngịrị-ọngịrị dọmwụ yẹda wẹ ka ri aanahị.

Paul: Ụka ọhẹ ji kahị baba nyọka rụ hi Liberia. Ahị rụ ụka ịtịta lụka ọ-kpii, ene kahị rụ ụka imimiiye ẹ-ẹpwụ nya ẹka lẹpwụ-lẹpwụ. Ọọnahị ọnyang ọhẹ kọ bwu ẹpwụma ọkịla wẹ ka kpa ẹrụ ọnyịịla pyẹ ịnyịnyị ya jaabwọ kọ lahị kpangga ụka kahị wẹẹ ka rụ. Ọ yẹkẹẹ: “Ị mẹjẹẹhị ịị Gilead nyọka la ọháha ẹ-ẹga nya aanahị ịla ẹga kị yahị du ka, ahị tị họ ịnyị ịlẹhị. Lẹ ọ jụhị kaka kpoye nyọlẹ kahị wẹẹ ka rụ hi aanahị ẹ-ẹpwụ nya iwe-ahụrụ olujwo ọwẹ!” Ma ahị tị chị ọkẹkẹnị nyọlẹ kahị jẹ́-ẹ da ụkụrwọ nya ẹrụ ọnyịịla ọ-kpa pyẹ ọla Liberia ụbwọ bwu ẹpwụma ị-ba ụwa ba ịlẹ kahị rụ ka.

Anne: La Ọya Ọharụ 1996, ahị angị ine wẹẹ rụ la apwụ ịkpọnchị ịhyẹ ẹ-ẹpwụ nya ang ọrụnyẹ nya egbeju-ẹpwa. Ahị tịtọ nyọka pa ang ọrụnyẹ rụ ká oye ọlẹ ká okpunyi ji gụ́ chẹẹ, kọ lụrụ lala ịmayịlị 10. Ụka ọwẹ kpangga ị dọmwụ nyọka gba mịla aloye nyahị lẹlẹ. Angịhyẹ nya angịlẹ kị wẹẹ ba ẹla la ọngịrị-ọngịrị da ịkọnị nyaa ka uhye, wuhi dayị, ọọwa ị pá ang ọrụnyẹ nyahị rụ la ọrụm ẹ-ẹpwụ nyamwụ lẹlẹ. Ahị dayị rụwa la ahị họhị bwuu. Lụka ọ-kpahị ju kaka lẹ, ahị yọọ kọ laa jẹ la ẹpẹtẹ warị la ịwọ ja nya bwu itochi nyamwụ lẹlẹ. Ụka nya ọgbanyẹ, ahị me nyori ọkọnị ị chọọ wẹ lẹ, ma ahị tị kụ irya nyori kori kọ lịnyị ọ́ ka jẹdịyẹ myị́ ka! Ọngọhẹ nya angị ma uya ịwẹ à yụbwọ mịlọọ lọngịrị-ọngịrị ụka kọ wẹẹ gboo kpehe bwu ẹpwụ nya imoto lẹ. Ahị tị ji Ohe obe nyori ang ọlẹ kọ họọ á lụmẹ kpoye ka.

Ang ọrụnyẹ nya alisoja ọhẹ juwa ka angịnyị myọọ kpụ ọ ja ka rụ lẹ. Angịnyị myọọ lụmẹ wẹẹ, iwe á hi hahị ẹ-ẹpwụ nyamwụ kaka. Lẹ ahị yụbwọ chọọ ẹ-ẹga ochiche ọhẹ bwu odehe, ọọwa ọ kpahị rụ lẹlẹ. Ahị tụbwọọ ka gba mileji nyọlẹ ká ọngọọwa ja rụnyẹ kaka kpoye. Ahị bịlọọ kọ ka ba, ma ọ tị juhi kpoye lẹ ọ́ ke ụrụ lahị ka. Ahị maga kpụ ahị jẹ́ ya ụbwọ chị ang gbee kahị pwụ ẹga kọ yahị kụ eji, ma abwọ tị ruhi lẹtẹ-lẹtẹ la ịnyịrọ nyahị ja che kpakpakpa ọọlajị nya uhi.

Paul: Ụka kahị chẹhị kaka yẹ awụlẹ jaabwọ kahị chịrị kaka ba bala abwọlẹ ká ang nyahị gu ene wuu, ọ lahị ẹbyẹbyị nyọlẹ kahị ji la ọhịhị wẹẹ. Ahị nune ẹ-ẹga nya ụgbọ oluhye ochiche ọhẹ kị chị ịnmọ myị́ ịnyịrọ-ịnyịrọ lala o-ri nyị ja ka cheku hi awụlẹ lẹ, chajị ọwa à ka kpahị rụ ka Sierra Leone la ahị́ ọpyẹpyẹ lẹ. Ụka kahị pwụ Sierra Leone, ahị chị ọkẹkẹnị nyori ahị be lẹ, ma ahị tị kaa chuko yẹẹyẹẹ chajị nya aanahị ịla Liberia wẹẹ.

Anne: Ahị pwụ ịBẹtẹlụ ịị Freetown, Sierra Leone la okpunyi, aanahị tị kpahị juhi yẹẹyẹẹ ịnyịnyị. Ma m̀ tị myị́myị́ dọmwụ nyọka kpịtịya nya ẹla ịlẹ kị họ lụka ọkẹkpẹ. M̀ kaa juhi ẹnụ myị́ ẹnụ nyori ịngịhyẹ ọtụka-ọtụka ja ka họ tam, ḿ jẹ́-ẹ kụ irya nya ẹla yẹẹyẹẹ kaka. Ẹla myị́ ẹla kaa lam lala ụlaa. M̀ kaa hu gburu-gburu lodu ja che la uhi-uhi nyori ịngịhyẹ ọtịpyọ ja ka họ tam lẹ. Ọ kaa lujwo nyọka da ịhụ. Ayịbam kaa ya ụbwọ chịm, tụm ba ịlọmwụ juwa raabwọ balam. Ahị kaa mwu eje nyahị gbee ká ịnyịrọ nyam ka ba la ọ-cheche. Ọ lam lala o-ri ẹdụrụ ọtụka-ọtụka ọhẹ nyị ka jụm du kam ka kịnyaa la ụkụrwọ myị́ kaka.

Ḿ ka jẹ́-ẹ deeri nya ẹla ọlẹ kọ họ ba ọọwa ba kaka. Ahị ye apwụ imiiye ịhyẹ la epwihi ọwẹ kpangga. Ọhẹ ri Awake! nya Ọya Ọharwọnyẹ 8, 1996. Egbeju nya ẹla ọlẹ kọ ri “Abwọlẹ Á ka Bwu Bọhụ Ụka ká Uhi nya Ẹla á Chị Jung.” Ụka ọwẹ m jẹ́ ang ọlẹ kọ wẹẹ họ tam lẹlẹ. Oheeye ri Ẹpwang ọ-Kụ Gbeji nya Ọya Ọharụ 15, 1996, ọlẹ ká egbeju nya ẹla ọlẹ kọ ri “Where Do They Get Their Strength?” ji ẹpwụ nyamwụ. Ẹpwang ọ-Kụ Gbeji ọọwa la ifoto nya obiritete ọlẹ ká arụrụ nyamwụ ịhyẹ mwụ eku lẹ. Ang ọjẹ́jẹ ọọwa wụlẹ nyori jaabwọ ká obiritete kaa hụ nanana nyọlẹ ká achwọ nyamwụ chị eku wẹ, ahị ịnyịnyị ka jẹ́-ẹ kịnyaa la ọ-da angịkịla ụbwọ bwula olegu nya iJihova myị́ nanana nyori ẹla họ chị uhi juhi. Ẹlẹwẹ ri ọngịrị ọtụka-ọtụka ká iJihova ya ham lụka ọlẹ kọ baba. (Mat. 24:45) M̀ mwahị nya egbeju nya ẹla ịkịla ị-lala ịwẹ bala ọ-gbaa kpehe ju ẹ-ẹga okpokpo. Ị dam ụbwọ yẹẹyẹẹ. Nyọlẹ kọ nọ chẹẹ, uhi ọọwa dọmwụ nyọka myị́ him dụmwọ-dụmwọ.

Paul: Nyọlẹ kahị rụ bwu Liberia kpá, ọ kaa kpụhị ịpyọ ụka myị́ ụka kahị la iwe nyọka tịrẹkpẹ ka ụwa. Ọ ka pwụ ocheju nya 2004 wẹẹ, ahị họ ụkụrwọ nya iJihova tụ ahị ju ẹka 20 myị́ lẹ. Ẹwụ ọọwa myị́ lẹ. Aanahị wẹẹ nwụlanọ nyọka nwụ ebe ịhyẹ e-egbeju ẹpwa. Ma ị tị ya ụkụrwọ onyeewe hahị lụka ọ-kpahị ju ka.

 Ụkụrwọ ọọwa ri ọmayẹ ọtụka. Aanahị ịla Liberia háahị yẹẹyẹẹ. Ị lala alugbiyegu nyahị, lẹ áhị tịtọ nyọka rụ hyaa ka. Ma nyọlẹ kahị tụụbwọ hi alugbiyegu nyahị kahị rụ ka ube-ụpwụ nya Gilead, ahị yẹ jaabwọ ká iJihova wahị kụrụụhị, lẹ ahị ye myị. Ụkụrwọ ọọwa ka kpahị ka Ghana kọ lụrụ lụmẹ ka.

Anne: Ahị nyà egbejida yẹẹyẹẹ ụka kahị wẹẹ rụ hi Liberia. Ọ lahị ẹbyẹbyị nyọlẹ ká Frank, ọọnahị ọgbahị ọhẹ kọ jẹ́ ẹla yẹẹyẹẹ byihi yẹkẹẹ: “Anụ baba nyọka deeri hiihi!” Ọọwa lẹ ọ dọọ wụlẹ yẹkẹẹ: “Ahị jẹ́ nyori ánụ ka deeri nyahị ẹnẹhẹ ka, ma anụ ka baba nyọka ya ọkịlẹtụ nyanụ wuu nịrọ ụkụrwọ nyanụ onyeewe. Ẹga nya iJihova o bwu lẹ, lẹ anụ kpahị ju aanahị alẹng bala anyang ịlụwa mẹ.” Ẹla ọlẹ ká ọọnahị ọwẹ ya juhi ọhụ nyọka nwụlanọ nyọka la aligu ịkịla ẹ-ẹpwụma onyeewe ọlẹ ká angị ịmanyị-ịmanyị à jẹ́ẹhị.

Paul: Ma, ọ́ tata ene kahị dọmwụ nyọka la ọháha ẹ-ẹga nya aanahị ịla Ghana ka. Alibeenu nya iJihova ju iru ụ-ụwa! Ahị jẹ́ ang yẹẹyẹẹ bwu o-godayị giri-giri bala ọmyịmyị nya aligu nyahị inyeewe ịwẹ. Ọlẹ kahị tị họ ụkụrwọ ịị Ghana ẹ-ẹpwụ nya ẹka 13 kpá tị lẹ, ị ya ụkụrwọ ọkịla hahị myị́myị́ tị lẹlẹ. Ị yahị du ká egbeju ẹpwa ọla East Africa ịị Kenya. Ịlẹhị, iwe nya aligu nyahị ịla Ghana kaa dahị, ma ahị tị yẹ jula aanahị ịla Kenya i-ijata. Jaabwọ kọ la ẹ-ẹpwụma nya Liberia bala Ghana, ụkụrwọ ji yẹẹyẹẹ nyọka họ ẹ-ẹpwụ nya ẹrụ ọnyịịla ọ-kpa pyẹ ii Kenya ịnyịnyị.

Anne: Ẹ-ẹpwụ nya ẹka lụmẹ-lụmẹ, m̀ chịpwụrụ bwu ẹpwụ nya iwe-ahụrụ ịlẹ kị chị uhi jum du kam kaa che kpakpakpa. Kori kahị kụ ẹga ọ-la uhi-uhi kahị chịpwụrụ bwu ẹpwụ nya ẹla ọlịnyị, ọ kaa chị wuhi. IJihova á kaa chewu keehi la ụkụrwọ ẹbyẹbyị ka. Da ọlẹẹlẹẹ, kori kam wo anụ nya ọkọnị bala ịbọmbụ, ajẹ kaa họm hịla-hịla bala abwọ o-gbum tiri-tiri. Ma m̀ tị kaa maga nyọka yé apyobwuna bwu agbẹyị ịlẹ ká iJihova kaa bwu juhi ọngịrị, lala aanahị alẹng bala anyang. M̀ tị yẹ ịnyịnyị nyori kori kahị kịnyaa la ang ọjẹ́jẹ, abwọ ọrịrị, ọjịra-jịra ọkaka bala ẹrụ ọnyịịla ọ-kpa pyẹ, iJihova kaa dahị ụbwọ nyọka kịnyaa la ụkụrwọ ọlẹ kọ ya hahị.

Paul: Ụka ọhẹ angịhyẹ kaa tọhị wo, “Ụkụrwọ nyanụ háanụ?” Ẹpwụma ka há ụhị myị́, ma ang tị ka la jigi-jigi bala ụwa ọ-la uhi-uhi ịnyịnyị myị́. Lẹ, ịyẹ à tị́ tịtị ri ang ọlẹ kọ háahị gụ́ ẹpwụma ayịdang? Aanahị alẹng bala anyang ịnyịịla ịlụwa ịlẹ kị ri ugbiyegu nyahị ịnyị. Nanana nyori ahị bwu ẹga ọdatị-datị, ahị kaa họ ẹla bala ọ-kụ irya ụ-ụgbẹyị ookpokpo. Ahị me nyori ị yahị du kele nyọka jwaa ọhụ ịnyị, ma ẹlịlẹhị tị ri ịwa à juhi ọngịrị lẹ.

Ọ-yẹ jula awụlẹ nya aanahị ọla odehe wuu ri ụkụrwọ ẹbyẹbyị bwu ẹga nya iJihova! Ahị ri ugbiyegu ẹ-ẹga myị́ ẹga! Kori kahị jẹ́ yẹ jula ọjịra-jịra ọhẹ lẹ aalẹ, ahị la ugbiyegu bala ẹpwa lẹ. Ahị jẹ́ myị̀myị̀ nyori kori kahị kịnyaa la ọ-kpụnịrọ iJihova aalẹ, ọ ka juhi ọngịrị jaabwọ kahị baba nyamwuị ka ba.—Filip. 4:13.