Nyọka họ ụkụrwọ nya ẹrụ ọnyịịla ọ-kpa pyẹ myị́, Angị Wụla ịBayịbụụ Yẹ baba nyọka ju ugbodu. Ị́ ka ya “ẹrụ ọnyịịla” ju ikpehika kem ka, ma ị baba nyọka ya ụka nya ‘ọkụrụ-kụrụ’ lee ayịreji ọtata ju angị inyibyi.

Ọọnahị J. H. Hoskin, kọ kụ Canada, ya ẹrụ ọnyịịla la ugbodu ojuju nanana nyori ị tọọ pyịpyị. La 1921, ọ tọ ọngọ ya ẹla Ohe nya ala ịchọọchị nya Methodist ọhẹ. Ọọnahị Hoskin dọmwụ nya ẹla oyaya nyamwu bwula ọ-yẹkẹẹ: “O pwoku ká ẹla oyaya nyahị u-uhye nya Ụpwụ Ịgọgọ ka ju okpunyi. Kori kahị tị dọmwụ myị ọnụ ju awụlẹ ka u-uhye nya ịngịhyẹ wẹwẹ, ahị ka jẹ́-ẹ chị ẹla nyahị eju la okpunyi bala ọ-kịnyaa la o-ri aligu.” Ma ọ́ tị lịnyị ka. Ọọnahị Hoskin yẹkẹẹ: “Áhị ya ẹla la iminiti ịmanyị ene kọọ ju agbama yụbwọ mịla ụgbẹyị la ọngịrị-ọngịrị kaka. M̀ dọmwụ me ká ịnyọ ịlẹ kị kpa họ ụgbẹyị ọọwa ka bene.”

Ọngọ ya ẹla Ohe ọwẹ chọọ aga, byoo yẹkẹẹ, “Kele ka ẹga nya angị jẹ́ Ohe ka, ká ya ẹla jaa mẹ!” Ọọnahị Hoskin á wọọ ka, ma jaabwọ kọ wẹẹ jẹ rụ, o byi ịlọmwụ ẹ-ẹpwụ-ẹpwụ nyori nyị dọmwụ họ ẹla me ọwa ọngọ jẹ́ Ohe ka.

Ụka ká ọngọ ya ẹla Ohe ọwẹ wẹẹ kpa ẹla ya ị-ịchọọchị nyamwụ ẹnụtụrụ ọ-bọọ ba, o ya ala ihideeji ba ọọnahị. Ọọnahị Hoskin yẹkẹẹ, “Ọ da ịkpịlọ nyamwụ ọna u-uhye nyam. O byaa nyori am nya-à ri ọlọnọọkịla ọgụgụ wuu ọlẹ kọ wẹ epweji nyaa ẹẹ, nyị tị baba nyọka chịm ọkọnị.” Ọọwa-á tị wọọ kpa ka, ọ kịnyaa la o-ya ẹrụ ọnyịịla, ọ tị jẹ́ ya ẹla bala angịnyị lụmẹ-lụmẹ. Ọ myịmyị yẹkẹẹ: “Ẹrụ ọnyịịla ọ-kpa pyẹ ọla ẹgẹwẹ kpụm ịpyọ lụmẹ. Angịhyẹ nyaa dọmwụ byim nyori ịwa nyị jẹ́ káam nyị ri ọngịnyị nya Ohe. Ị myịmyị tịtọ nyọka dam ụbwọ la ang myị́ ang ọlẹ kam baba.”

Nyọka da angịnyị ụbwọ wo etu nya ẹla ọla ịBayịbụụ gụ ọwọwa, Angị Wụla ịBayịbụụ Yẹ kaa da ịtọ ẹla u-uhye nya ịBayịbụụ bala ọwẹwẹ nyaa juwa ẹ-ẹpwụ nya The Golden Age. * Ịtọ ẹla nya anjwo ịlẹ ká adịda bala ịnịna ka jẹ́-ẹ kpa mẹ ang jẹ anyị nyaa juwa ịnyịnyị. Adịda bala ịnịna ka “tọ anyị nyaa ịtọ ẹla ịwẹ bala ọ-daa ụbwọ nyọka  yé ọwẹwẹ nyaa bwu ẹpwụ nya ịBayịbụụ.” Ịtọ ẹla ịhyẹ lala, “apwụ ịmanyị à tị́ jula awụlẹ ri ịBayịbụụ?” kaa mẹ ẹla ichiche ịhyẹ jẹ. Ịkịla lala, “Ọngịnyị nya ịKịrayịsị ọnyị myị́ ọnyị ka yahị guru kị ka tọọ pyịpyị?” kaa nwụla anjwo nọ nyọka ri angị ya ẹla Ohe la ugbodu ojuju.

Ịtọ bala ọwẹwẹ i-bwu ẹpwụ nya ịBayịbụụ juwa ịnyịnyị ha angịlẹ kị jẹ́ ịBayịbụụ chẹẹ lẹ. Ọwẹwẹ nyaa juwa ụ-ụpwu ọhọhẹ nya Studies in the Scriptures. Ụnọ ịmanyị tị́ nya angịnyị yé apyobwuna bwu ẹpwụ nyamwụ, ma The Golden Age nya ahyẹẹnụ 21 nya Ọya Ọkụrụ Oheeye, 1921 ya nyori nyị́ ka ji kaka. Ịyẹ tị́ du?

Angị kpịlahị ụka ọwẹ wẹ ka yẹ nyori angịnyị baba nyọka jẹ́ ịBayịbụụ ụbẹẹtụ-ụbẹẹtụ. Chajị nya ọọwa lẹ, ị gba ụpwụ nya The Harp of God kpehe la 1921. Angịlẹ kị ye ụpwụ ọwẹ kaa kpa jẹ́ ịBayịbụụ lịlaa ịnyịnyị. Ọọwa kaa da angị ke ụrụ ụbwọ nyọka jẹ́ “irya nya Ohe u-uhye nyọka ya ọhịhị ọmyịmyị-ka ha angịnyị ehe.” Ányị ụpwụ ọwẹ à tị́ kaa daa ụbwọ jẹ́ ang?

Ụka ká ọngịnyị á ye ụpwụ ọwẹ, ị kaa ya ụpwụ ọpẹchịkẹẹ ọkịla ọhẹ bọọ họọ ọlẹ kọ kaa ya abẹ ịlẹ kọ ka wa joo. Epwihi ọ-bọọ ba, ị kaa ya ụpwụ ọpẹchịkẹẹ ọkịla du tọọ ịnyịnyị. Ẹ-ẹpwụ nya ụpwụ ọọwa, ị kaa da ịtọ ẹla lụmẹ-lụmẹ bwu ẹpwụ nya ang ịlẹ kọ wa. Ọọwa lẹ, ị myịmyị kaa ya abẹ ịlẹ kọ ka wa epwihi ọ-bọọ ba joo lẹlẹ.

Epwihi ọnyọnyọọnyị ẹ-ẹpwụ nya epwihi 12, ọjịra-jịra ọla oye nyamwụ kaa ya ụpwụ ọpẹchịkẹẹ ọwẹ du tọọ. Ụka lụmẹ-lụmẹ, angịlẹ kị ri angịgbahị lẹ lee angịlẹ ká iwe-ahụrụ nyaa á myị kpụ ị kaa kpehe bwu ẹpwa ka ẹpwa ka, à kaa ya apwụ ịpẹchịkẹẹ ịwẹ du lẹ. Ọ-chụ pwokwita, Anna K. Gardner, bwu Millvale, Pennsylvania, U.S.A., yẹkẹẹ: “Ụka kị gba The Harp of God kpehe, o du ká ọọnam ọnyang ọlẹ kọ jẹ́-ẹ jẹdịyẹ nwà ka, kaa yé ụkụrwọ họ gụ ọwọwa, chajị ọ kaa ya apwụ nya ịtọ ẹla ịpẹchịkẹẹ ịwẹ du ta angịnyị epwihi ọnyị myị́ ọnyị.” Ụka ká ọngọọwa á chị ang ọjẹ́jẹ ọwẹ eju, ọngọhẹ bwu ọjịra-jịra kaa jwoo ụga nyọka dọọ ụbwọ jẹ́ ịBayịbụụ gụ ọọwa.

La ocheju nya ẹka, Ọọnahị J.F. Rutherford da ụpwụ du ta ọjịra-jịra ọnyị myị́ ọnyị. O yẹkẹẹ, “Ụkụrwọ nya ẹrụ ọnyịịla nya Ịpyị-Adịrahụ á wu angịnyị ọyị bala ọ-daa ụbwọ la ẹka ọlẹlẹhẹ kẹkpẹ, lala ẹka ọlẹ lẹka.” Ọọwa lẹ, ọ myịmyị yẹkẹẹ: “Ụkụrwọ hi lụmẹ kahị ka họ wẹẹ. Ju angịkịla ọhụ nyọka yụbwọ ju ụkụrwọ ọnyịịla ọlẹ.” Ọ la gbagbịla nyori Angị Wụla ịBayịbụụ Yẹ ịwẹ kpa ẹla ọwẹ họ ụkụrwọ ịnyịlẹhị. La ẹka nya 1922, ị ya ẹrụ ọnyịịla nya Ịpyị-Adịrahụ dodehe la ugbodu ojuju ụ-ụgbẹyị ọlẹ kị họ ẹnẹnẹhẹ lẹka.