1. Ịyẹ tị́ du ká iru nya angịnyị á jẹ́ ịgba ọgbagba nya ịlẹhị datị ka?

ỊGBA ọgbagba lụmẹ-lụmẹ ji alẹ kị ya nyori ịwa nyị ri angịnyị nya ịKịrayịsị bala o-ri ịwa nyị kaa gbịgba ha Ohe Oluhye ụ-ụgbẹyị ọlẹ kọ pwoku. Ịnyị à du ká iru nya angịnyị á jẹ́ ọlẹ ko ri ịnyịlẹhị datị ka lẹ! Ị kaa towo yẹkẹẹ: “Ịgbagba nyịlẹhị ookpokpo à tị́ ji, lee ịgba ọgbagba wuu tị́ kaa họ ẹla kpụ Ohe ịpyọ?” Ahị jẹ́ myị̀myị̀ i-irya nyahị nyori ẹla ọlẹ kahị wẹẹ mẹjẹ à ri ẹlịlẹhị lẹ bala o-ri ụgbẹyị nya ịgba ọgbagba ọlẹ ká Alibeenu nya iJihova wẹẹ bajẹ alẹ à ri ọlẹ ká iJihova ye myị lẹ? Ọ chịkpẹẹ kahị ka la ọ-jẹ́ myị̀myị̀ ọlịịwẹ myị́? Ahị wụla ang ẹjẹẹ yẹ wẹẹ.

2. Jaabwọ ká ụpwụ nya 1 Ala ịTẹsalonika 1:5 ya, ịyẹ tị́ du ká ịPọlụ jẹ́ myịmyị nyori ẹla ọlẹ kọ myị la ri ẹlịlẹhị?

² Ọlẹrụ ịPọlụ jẹ́ myị̀myị̀ nyori ẹla ọlẹ kọ myị la ri ẹlịlẹhị. (Wa 1 Ala ịTẹsalonika 1:5.) Ọ́ myị jwọọ chajị nyori ẹla ọọwa kpọọ ịpyọ ị-ịwẹ kem ka. ỊPọlụ ri ọngọ kaa jẹ́ Omyi ẹla nya Ohe rige-rige. Ọ myị nyori “Ohe Oluhye a kpa angịnyị ehe bwula Olegu Ịgọgọ nyamwụ da ẹla myị́ ẹla ọlẹpwụ nya Ụpwụ Ịgọgọ lẹ.” (2 Tim. 3:16) Ẹlịyẹ ọ tị́ jẹ́? ỊPọlụ yẹ ang ẹjẹẹ ịkpọnchị ịlẹ kị mẹjẹ nyori iJisọsị à ri iMesaya lẹ. Alegbeju nya ịgbagba nya ala iJuu tị chụ nyọka gu ahị gboo hi ang ẹjẹẹ ịịwa. Alahị imiiye ịwẹ kaa ya nyori ịwa nyị ku ọmwakpa nya Ohe Oluhye, ị tị kaa họ ang ịlẹ kị wọọ ẹjẹ. (Tay. 1:16) Ma ịPọlụ á lala angịwẹ ka. Ọwa-á kaa chụ ụpa nya ụpwụ ịgọgọ ọlẹ kọ ka myị ju, pẹhi ịkịla deeji ka. Ọ nwụlanọ nyọka mẹ “obyi omeme nya Ohe Oluhye wuu” jẹ bala ọ-kpa họ ụkụrwọ.”​—Ụkụr. 20:27.

3. Ahị baba nyọka la ọwẹwẹ nya ịtọ ẹla nyahị wuu ene kahị ka jẹ́ myị̀myị̀ nyori ẹla ọlẹ kahị myị la ri ẹlịlẹhị? (Yẹ akpa ọlẹ ko ri, “ Akụrwọ Bala Irya nya IJihova ‘Ju Iru Kịlọnụ.’ ”)

 ³ Angịhyẹ kaa me irya nyori ịgba ọgbagba nyịlẹhị nyị baba nyọka jẹ́-ẹ wẹ ịtọ ẹla ọnyị myị́ ọnyị wuu, tụ́ ịlẹ ká ịBayịbụụ dọmwụ ya ẹla u-uhye nyaa kpangga ka. Ẹlẹwẹ ka chịkpẹẹ myị́? Kụ ẹhị yẹ ọ-chụ pwokwita nya ịPọlụ wẹẹ. O ju aanamwụ ọhụ nyị “wụla ang myị́ ang wu yẹ myịmyị,” ma ọ myị ịnyịnyị nyori ang lụmẹ-lụmẹ ji ịlẹ kị lọọ gbagbịla ka. (1 Tẹs. 5:21) O yẹkẹẹ: “Ang ọjẹ́jẹ nyahị ahị angịnyị ehe á nwa ụga kpong-kpong ka . . . ahị jam yẹ ang myị́ ang wuu bwuru-bwuru lala ịnyọ ọyọyị ọlẹ kọ jẹ́-ẹ yọyị yẹẹyẹẹ ka.” (1 Kọr. 13:9, 12) A-ang myị́ ang wuu à la ịPọlụ gbagbịla ka, a-ang myị́ ang wuu à tị lahị gbagbịla ka ịnyịnyị. Ma ịPọlụ tị jẹ́ ẹlịlẹhị ịkpọnchị u-uhye nya iJihova. Ẹla ọlẹ kọ jẹ́ ya ọ-jẹ́ myị̀myị̀ họọ nyori ẹlịlẹhị à wẹ lẹ!

4. Ányị ahị tị́ ka bwu ju ọ-jẹ́ myị̀myị̀ nyahị ọngịrị nyori ẹla ọlẹ kahị myị la ri ẹlịlẹhị? Ẹlịyẹ ahị tị́ wẹẹ ka kụ ẹhị yẹ u-uhye nya Angịnyị nya ịKịrayịsị nyịlẹhị?

⁴ Ụgbẹyị ọhẹ ọlẹ kahị ka bwu ju ọ-jẹ́ myị̀myị̀ nyahị ọngịrị nyori ẹla ọlẹ kahị myị la ri ẹlịlẹhị ri ọ-ka chụ ọgụ-ẹpẹtẹ nya ịgba ọgbagba ọlẹ ká iJisọsị ya deeji ka pwoku ọlẹ ká Alibeenu nya iJihova kaa bajẹ alẹ. Ẹ-ẹpwụ nya ang ọjẹ́jẹ ọlẹ, ahị ka yẹ nyori angịnyị nya ịKịrayịsị nyịlẹhị kaa (1) cheji ba hi ọ-ka gbịgba ha ihye ịkịla, (2) chị ihi ju ẹnyị nya iJihova, (3) la ọháha ẹ-ẹga nya ẹlịlẹhị, bala (4) ọ-la ọháha okpori-kpori ẹ-ẹga nya awụlẹ.

5. Ẹlịyẹ ahị tị jẹ́ bwu ẹga nya iJisọsị u-uhye nya ụgbẹyị ọlẹ kọ pwoku nyọka gbịgba ha Ohe? Ányị ahị tị́ ka bwu kpa ẹla ọlẹ kọ mẹjẹ họ ụkụrwọ?

⁵ Chajị nyọlẹ ká iJihova há iJisọsị lụmẹ lẹ, ọwa kem ọ kaa gbịgba ha e-epwoohe bala ụka ọlẹ kọ jam odehe lẹ. (Luk. 4:8) Ịnyị ọ mẹjẹ angịjụgbẹyị nyamwụ kị ka họ ịnyịnyị le. IJisọsị  lee angịjụgbẹyị nyamwụ á kpa ukpeku gbịgba ka. Chajị nyọlẹ ká Ohe ri olegu lẹ, ịngịngịhyẹ ọlẹ ká ọngịnyị ehe họ á ka jẹ́-ẹ moo kaka! (Ayị. 46:5) Ma ọ-họ ukpeku nya angịlẹ ká angịnyị kaa yẹ lala angị ịgọgọ bala ọ-raabwọ haa tị bẹẹ? Ehile ọhọhẹ bwu ẹpwụ nya iwo ịlẹ ká Ohe ya ha ala Isirẹlụ yẹkẹẹ: “Ānụ họ ukpeku o-me ịngịngịhyẹ ọla uhye-ọgba lee ọla odehe . . . koo. Anụ hirikpẹẹ haa . . . koo.” (Ehe. 20:4, 5) Omyi ẹla ịwẹ la gbagbịla ẹ-ẹga nya angịlẹ kị tịtọ nyọka họ ẹla kpụ Ohe ịpyọ.

6. Ọgụ-ẹpẹtẹ nya ịgba ọgbagba oyina Alibeenu nya iJihova à tị́ kaa bajẹ alẹ?

⁶ Angị jẹ́ ang u-uhye nya ego ya nyori Ohe Oluhye kem angịnyị nya ịKịrayịsị ịla oyi nya ọgbanyẹ nya-à kaa gbịgba ha lẹ. Ọ-chụ pwokwita, ụpwụ ọlẹ kị wụrụ nya History of the Christian Church ya nyori irya nya ọ-ya ekpeku guru ẹ-ẹga ọgbịgba nyị dọmwụ ka la Angịnyị nya ịKịrayịsị ịla oyi nya ọgbanyẹ “lala ang ibyi.” Alẹ, Alibeenu nya iJihova kaa ba ọgụ-ẹpẹtẹ nya Angịnyị nya ịKịrayịsị ịla oyi nya ọgbanyẹ jẹ. Áhị kaa raabwọ ha ekpeku nya angị ịgọgọ lee alegu-ẹrụ ka. Áhị dọmwụ kaa raabwọ ha iJisọsị ka. Áhị kaa ya ụbwọ ba egbeju lee ọkịlẹtụ ha apwụ nya ẹpwụma lee ọ-dọmwụ họ ịngịngịhyẹ ọlẹ kọ ka lala ịgba ọgbagba ha ẹpwụma nyahị ka. Jaabwọ myị́ abwọ kọ la, ahị kaa cheje nyọka kpa ehile nya iJisọsị họ ụkụrwọ: “Ohe Oluhye nyang ụbwọọmwụ kem à ri ọngọlẹ ká ka raabwọ ha, juwa myị ẹrụ họọ ẹ-ẹpwụ nya ịgba ọgbagba ha kem ịnyịnyị lẹ.”​—Mat. 4:10.

7. Agbẹyị iyina Alibeenu nya iJihova à tị́ datị hi ịgba ọgbagba ịkịla?

⁷ Alẹ, iru nya angịnyị kaa tịtọ nyọka ke ụrụ wo la ẹla nya angị ya ẹla Ohe ịlẹ ki ru ohi. Ị kaa hu angịlịnyị hwaa gbee kọ ka lala ịgba ọgbagba. Angịnyị kaa pá tọọ ka ịchọọchị nyaa, ra apwụ nyaa, hu okpoko ga haa bala ogu ọnyị myị́ ọnyị ọlẹ kị chẹkpẹ ju. Ị kaa myị ọnụ ju ẹla ọnyị myị́ ọnyị ọlẹ kị ya. Ọ́-ri ká angị ka ịchọọchị ịwẹ á yẹ iJisọsị ayịdang wẹwẹ, ị́ ka chị ọkẹkẹnị gụ abwọlẹ kị kaa chị ju alegbeju nyaa ịwẹ kaka! Ma angị kaa gbịgba ha Ohe ụ-ụgbẹyị ọlam tị datị, ị́ kaa ba ọngịnyị ehe jẹ ka. Ịlẹhị lẹ, ahị kaa ju ihi nya angịlẹ kị kaa kpịlahị, ma ahị ye ẹla ọgbagbịla ọlẹ ká iJisọsị mẹjẹ myị. Ọ yẹkẹẹ: “Anụ wuu ri anyadịda.” (Mat. 23:8-10) Áhị kaa gbịgba ha angịnyị ehe ka, kori kị ri alegbeju nya ịchọọchị lee angị kpeji wẹwẹ. Áhị tị kaa chẹkpẹ ju ẹla nya ịchọọchị lee ẹla nya upe ọlẹlẹhẹ ọlẹ kị ja họ ka. Ọkọkọ nya ọọwa lẹ, ahị kaa chị ịlọhị ebwo hi odehe. A-agbẹyị ịwẹ, ahị datị hi ịgba ọgbagba ịkịla ịlẹ wuu kị ya ịwa nyị ri angịnyị nya ịKịrayịsị.​—Jọn. 18:36.

8. Ányị ahị tị́ họ kahị jẹ́ nyori iJihova tịtọ ká ẹnyị nyamwụ ka la ihi bala angịnyị ọ-ka jọ́ọ?

⁸ IJisọsị raabwọ ụka ọhẹ yẹkẹẹ: “Adịda, chuchuu, chị ụmụmẹ nya ẹnyị nya ịlọng ehe.” IJihova la ịlọmwụ wẹ abwọ ọrịrị ọọwa bwu epwoohe la omyi o-gboo, bala ọ-myị ọnụ nyọka chị ụmụmẹ nya ẹnyị nyamwụ ehe ịnyịlẹhị. (Jọn. 12:28) Ụka ọlẹ ká iJisọsị jam odehe, ọ kaa chị ihi ju ẹnyị nya Adamwụ. (Jọn. 17:26) Lẹ Angịnyị nya ịKịrayịsị nyịlẹhị kaa yọọ lala ihi ọtụka nyọka gu ẹnyị nya Ohe bala ọ-ka mọọ jẹ angịkịla.

9. Ányị Angịnyị nya ịKịrayịsị ịla oyi nya ọgbanyẹ à tị́ mẹjẹ nyori ị chị ihi ju ẹnyị nya Ohe?

⁹ Lụka o-kpii ene ká ọjịra-jịra nya Angịnyị nya ịKịrayịsị lẹẹ yeji la oyi nya ọgbanyẹ, iJihova “chị ọnahị nyamwụ ehe ẹ-ẹga nya ala iJentayịlị bwula ọlẹ ká Ohe Oluhye chụ angịhyẹ bwu ẹpwarịrị nya ala iJentayịlị ịịwa kị ka ri angị myị la ẹnyị nyamwụ.” (Ụkụr. 15:14) Angịnyị nya ịKịrayịsị ịla oyi nya ọgbanyẹ ịwẹ chị ọkẹkẹnị nyọka wụrụ ẹnyị nya Ohe bala ọ-mọọ jẹ angịkịla. Ị kaa gu ẹnyị nya Ohe ụka kị ja ya ẹla nya Ohe bala ụka kị ja da ụpwụ ịgọgọ. * Bwula ọwẹ, ị mẹjẹ nyori  ịwa kem à ri angịlẹ kị kaa họ ká angịnyị ka jẹ́ ẹnyị nya Ohe lẹ.​—Ụkụr. 2:14, 21.

10. Ang ẹjẹẹ iyina à tị́ mẹjẹ nyori Alibeenu nya iJihova kem à kaa họ ká angịnyị ka jẹ́ ẹnyị nya iJihova lẹ?

¹⁰ Alibeenu nya iJihova ri angịlẹ kị kaa chị ihi ju ẹnyị nya iJihova? Kụ ẹhị yẹ ang ẹjẹẹ lẹẹ wẹẹ. Alẹ, alegbeju nya ịgba ọgbagba lụmẹ-lụmẹ maga la ọngịrị nyaa wuu nyọka tụ́ ẹnyị ọlam nya Ohe kpịbaa. Ị gba ẹnyị ọwẹ hi ẹpwụ nya ịBayịbụụ ịlẹ kị yẹda, ụka ọhẹ dọmwụ ị kaa hile ẹnyị ọwẹ ọ-ka wụrụ-wụrụ ị-ịchọọchị nyaa. * Ọngọhẹ ka jẹ́-ẹ da ịwẹẹ nyori Alibeenu nya iJihova à kaa chị ihi ju ẹnyị nya iJihova jaabwọ kọ chịla lẹ wẹẹ? Ebwo nya ịgba ọgbagba ọhẹ-lọhẹ á kaa họ ká ụmụmẹ nya angịnyị ka jẹ́ ẹnyị nya Ohe lala ahị ka! Ịnya ọwẹ lẹ, ahị jam maga yẹẹyẹẹ nyọka myị ẹnyị ọlẹ kahị ri ịlẹhị. Ahị à ri Alibeenu nya iJihova lẹ! (Ayị. 43:10-12) ỊBayịbụụ nya New World Translation of the Holy Scriptures ọlẹ kahị họ ju iru kpoye nya uku 240. Ọ tịrị ẹnyị nya iJihova ẹkpẹ ka ẹga ịlẹ ká angị yẹ ịBayịbụụ da ịkịla gbọọ bwu. Ahị tị kaa họ apwụ ị-da ịBayịbụụ wụlẹ ịlẹ kị kaa chị ihi ju ẹnyị nya iJihova là ìja gụ 1000!

11. Ányị angịnyị nya ịKịrayịsị ịla oyi ọhọhẹ à tị́ mẹ ọháha ọlẹ kị la ẹ-ẹga nya ẹlịlẹhị jẹ?

¹¹ Ẹlịlẹhị há iJisọsị. Ẹlịlẹhị ịịwa ri ẹla u-uhye nya Ohe Oluhye bala ang ịlẹ wuu kọ ka họ. IJisọsị hịhị ba ẹlịlẹhị jẹ, ọ tị mẹ ẹlịlẹhị ọọwa jẹ angịkịla ịnyịnyị. (Jọn. 18:37) Ẹlịlẹhị tị kaa há angị kaa ba iJisọsị jẹ kẹpwụ ọkịlẹtụ ịnyịnyị. (Jọn. 4:23, 24) Ọlẹrụ iPita dọmwụ wụrụ angịnyị nya ịKịrayịsị nya “ụgbẹyị ọnyịịla”  lee ụgbẹyị nya ẹlịlẹhị. (2 Pit. 2:2) Chajị nyọlẹ ká ẹlịlẹhị há angịnyị nya ịKịrayịsị ịla oyi ọhọhẹ yẹẹyẹẹ lẹ, ị kaa pwa ẹla ịmẹjẹ nya ịgba ọgbagba, ọhọhọ nya epweji, bala irya nya angịnyị ịlẹ kị myị ju ẹlịlẹhị ka. (Kol. 2:8) Ịnyịnyị alẹ, Angịnyị nya ịKịrayịsị nyịlẹhị kaa maga nyọka “juwa hịhị ba ẹla nya ịlẹhị kem jẹ” bwula ọ-ya ọhịhị bala ang ọmẹjẹ nyaa kpụnịrọ Omyi ẹla nya iJihova.​—3 Jọn. 3, 4.

12. Ịyẹ à tị́ kaa họ ụka ká Angị Kpẹhị Rịrị Ogu á yẹ ọbaba nyọka nwụ abwọlẹ kahị kaa wo etu nya ẹla ịhyẹ rịrị? Ịyẹ tị́ du kị kaa họ ịnyị?

¹² Alibeenu nya iJihova á kaa ya nyori ịwa nyị jẹ́ ang myị́ ang ịlẹpwụ nya ịBayịbụụ weji-weji lẹ ka. Ụgbẹyị ọlẹ kị da ẹla ọlẹpwụ nya ịBayịbụụ wụlẹ bala abwọlẹ kị kaa họ ang ọọjịra-jịra á la kpakpa ka ụka ọhẹ lẹ. Ọọwa-á tị lahị ẹbyẹbyị ka. ỊBayịbụụ họ ọ la gede-gede nyori ẹlịlẹhị kaa wụrụ gụ olene jaabwọ ká ụka wẹẹ jẹ ịnyị. (Kol. 1:9, 10) IJihova kaa wụrụ ẹlịlẹhị nyamwụ dụmwọ-dụmwọ, ahị ka nwụlanọ nyọka dọhụ pịlẹẹ jaabwọ ká ahịgboo nya ẹlịlẹhị wẹẹ wụrụ gụ ọwọwa. (Etu 4:18) Ụka ká Angị Kpẹhị Rịrị Ogu á yẹ nyori ọ baba nyọka nwụ abwọlẹ kahị kaa wo etu nya ẹlịlẹhị ọhẹ rịrị, ị́ kaa bịrị ụka nyọka họ ịnyị ka. Ịchọọchị lụmẹ-lụmẹ alẹ kaa yẹ ang ọmẹjẹ nyaa da nyọka kpụ angịnyị nyaa ịpyọ lee ọ-ka ru ohi ẹ-ẹpwụ nya odehe. Ma Alibeenu nya iJihova kaa yẹ ang ọmẹjẹ nyaa da chajị nyori ị tịtọ nyọka tụ́ ju Ohe chwẹẹ bala ọ-ka gbịgba họọ ụ-ụgbẹyị ọlẹ ká iJisọsị họ ịnyị. (Jem. 4:4) Ụka kahị nwụ ịngịhyẹ họ aalẹ, ọọlajị nyori irya nya angịnyị yẹda odehe lẹ à dudu ka, ma chajị nyori ahị wo etu nya ẹla ọla ịBayịbụụ gụ olene ịnyị. Ẹlịlẹhị háahị!​—1 Tẹs. 2:3, 4.

13. Abwẹla oyina Angịnyị nya ịKịrayịsị nya ịlẹhị à tị́ kaa mẹjẹ gụ wuu? Ányị Alibeenu nya iJihova à tị́ị̀ mọọ jẹ alẹ?

¹³ Ẹ-ẹpwụ nya abwẹla ịnyịịla ịlẹ kị kaa kpa jẹ́ Angịnyị nya ịKịrayịsị ịla oyi nya ọgbanyẹ wuu, ọháha à ri ọlẹ kọ gụ lẹ. IJisọsị yẹkẹẹ: “Ó ri kaanụ ayịdang á juwa la ọháha ẹ-ẹga nya awụlẹ nya ịlẹhị-ịlẹhị lẹ aalẹ, angịnyị wuu a ka jẹ́ yẹkẹẹ, anụ nyị ri angịjụgbẹyị nyam ịnyịlẹhị lẹlẹ.” (Jọn. 13:34, 35) Alẹ, Alibeenu nya iJihova chị odehe ọnụ wuu kaa yẹ jula awụlẹ ẹ-ẹpwụ nya ọháha. Ahị datị hi ịgba ọgbagba ịkịla wuu chajị ahị lala ugbiyegu ookpokpo nanana nyori ahị bwu ẹpwụma bala epweji ịdatị-datị. Ọháha ọwẹ kaa chehe ụka kahị juwa ọọjịra-jịra nyahị ọlẹpwụ nya epwihi, ọjịra-jịra nya isekut bala ọtụka ịnyịnyị. Ọwẹ du kahị jẹ́ myị̀myị̀ gụ olene nyori ahị à wẹẹ gbịgba ha iJihova ụ-ụgbẹyị ọlẹ kọ tịtọ lẹ.

14. Jaabwọ ká ụpwụ nya Ala iKolosi 3:12-14 ya, ụgbẹyị ọkpọnchị oyina ahị tị́ ka jẹ́-ẹ mẹ ọháha okpori-kpori jẹ ẹ-ẹga nya awụlẹ?

¹⁴ Ụpwụ ịgọgọ byihi ya ahị nyị “la ọháha nya ịlẹhị-ịlẹhị ẹ-ẹga nya awụlẹ.” (1 Pit. 4:8) Ụgbẹyị ọhẹ ọlẹ kahị kaa mẹ ọháha ọlịnyị jẹ ri ọ-ka hịnyọhi ha awụlẹ bala ọ-ka chị ịpyị chị ọkpẹẹkpẹẹ ọ-lala ka nya awụlẹ. Ahị kaa mwahị nya iwe nyọka hu ha bala ọ-họ ọng̣ myị́ ọng ọlẹpwụ nya ọjịra-jịra ụga, tụ́ angịlẹ kị dọmwụ họ ẹla wụụhị ẹjẹ. (Wa Ala iKolosi 3:12-14.) Ọ-yẹ jula awụlẹ ẹ-ẹpwụ nya ọháha ọlịịwẹ à ri ang ẹjẹẹ ọgụgụ wuu nya Angịnyị nya ịKịrayịsị nyịlẹhị lẹ.

15. Agbẹyị ịkịla iyina ahị tị kaa dịrẹ ọgụ-ẹpẹtẹ nya ịgba ọgbagba ọlẹ ká Angịnyị nya ịKịrayịsị ịla oyi nya ọgbanyẹ ya deeji?

¹⁵ Agbẹyị ịkịla ji kahị kaa dịrẹ ọgụ-ẹpẹtẹ nya ịgba ọgbagba ọlẹ ká Angịnyị nya ịKịrayịsị ịla oyi nya ọgbanyẹ ya deeji ịnyịnyị. Ọ-chụ pwokwita, ọjịra-jịra nyahị la jaabwọ ká ịnya Angịnyị nya ịKịrayịsị ịịwa la. Ahị la angị kpẹhị rịrị isekut, angịgbahị nya ọjịra-jịra, bala angị myị ẹrụ, jaabwọ kịịwa la ịnyịnyị. (Filip. 1:1; Tay. 1:5) Lala ịwa-ịwa, ahị kaa ju ihi nya ehile nya iJihova u-uhye nya ẹga nya awụlẹ ọkaka, awụlẹ oyeye, ẹla ọlẹ ká Ohe ya u-uhye nya ịwọ, ahị tị kaa  chị ewu ke ala ọjịra-jịra hi alọhọbịrị ịlẹ kị myị yẹda ka ịnyịnyị.​—Ụkụr. 15:28, 29; 1 Kọr. 5:11-13; 6:9, 10; Hib. 13:4.

16. Ẹlịyẹ ahị tị́ jẹ́ bwu ẹpwụ nya ẹla ọlụpwụ nya Ala Efesọsị 4:4-6?

¹⁶ IJisọsị ya nyori angịnyị lụmẹ-lụmẹ nyị ka ya nyori ịwa nyị ri angịjụgbẹyị nyamwụ, ma ị-ịwa wuu à ka họ ẹla nya ịlẹhị ka. (Mat. 7:21-23) Ụpwụ ịgọgọ ịnyịnyị dọmwụ dahị ọna neeji nyori ụka nya ahyẹẹnụ ihyẹẹkpẹ, iru nya angịnyị nyị ka “kpa abwụma nya ọngịnyị nya Ohe Oluhye oriri” kem. (2 Tim. 3:1, 5) Ma, ịBayịbụụ ti ya jehi gbagbịla nyori “ọmyịmyị ọlala ookpokpo” à ji ká Ohe myị ju lẹ.​—Wa Ala Efesọsị 4:4-6.

17. Owo anyị à tị́ wẹẹ ba iJisọsị jẹ bala ọ-la ọmyịmyị ookpokpo alẹ?

¹⁷ Owo anyị à tị́ mẹ ọmyịmyị ookpokpo ọlẹ kọ ri ọlam jẹ alẹ? Ahị wụla ang ẹjẹẹ yẹ lẹ. Ahị kụ ẹhị yẹ ụgbẹyị nya ịgba ọgbagba ọlẹ ká iJisọsị ya deeji ká Angịnyị nya ịKịrayịsị ịla oyi nya ọgbanyẹ tị ba jẹ ịnyịnyị lẹ. Ọwẹwẹ ookpokpo à ji lẹ​—Alibeenu nya iJihova ịnyị. O ri ihi ọtụka nyọka ri ọngọhẹ nya angịnyị nya iJihova bala ọ-ka jẹ́ ẹlịlẹhị u-uhye nya iJihova bala ang ịlẹ kọ ja ka họ ị-ịlahị! Lẹ ahị kịnyaa la ọ-ya ụbwọ chị ẹlịlẹhị ọlẹ kahị jẹ́ myị̀myị̀ wẹ gogo mẹ.