ẸKA ọnyị myị́ ọnyị, ị kaa ye iru nya ịkpịlọ nya iJihova tịrẹkpẹ wẹ ẹpwụ nya ọjịra-jịra nya angịnyị nya ịKịrayịsị. Kụ irya nya “ọkẹkẹnị ọtụka [ọlẹ kọ] ka juwa e-epwoohe” ụka ká ọngọngọọng nyaa á nyà tịrẹkpẹ wẹẹ! (Luk. 15:7, 10) Kori kị yeng tịrẹkpẹ lẹ aalẹ, jẹ́ myị̀myị̀ nyori iJisọsị, alegu-ẹrụ, bala iJihova lịlọmwụ chị ọkẹkẹnị nyọka yẹ jaabwọ ká wẹẹ ya ẹta reeji ẹ-ẹpwụ nya ẹlịlẹhị myịmyị. Ma, jaabwọ ká wẹẹ nwụla igu oriri nyang bala iJihova, à ka la akama ịhyẹ myị́. Ịhyẹ lẹpwụ nya akama ịịwa tị́ ri ịyẹ? Ịyẹ à tị́ ka jẹ́-ẹ dang ụbwọ?

Angịhyẹ kaa la ọkịlẹtụ okpenyi ụka kị tịrẹkpẹ wẹ ẹpwụ nya ọjịra-jịra kpá. Ọhẹka à ka jẹ́ jaabwọ kọ la Adịrahụ iDevidi lẹ. Nyọlẹ ká Ohe dọmwụ hịnyọhi ịhọbịrị nyamwụ họọ kpá wẹwẹ, ọ yẹkẹẹ: “Ịhọbịrị [nyam yẹm] jii kaka kpoye.” (Eje. 40:12; 65:3) Ụka ká angịhyẹ á nyà wẹ ẹga nya iJihova kpá, irya nya abyị ọlala bala oyoyi á kaa myị haa ka ẹ-ẹpwụ nya ẹka lụmẹ-lụmẹ. Isabelle, * kị gbọọ kpehe kpoye nya ẹka 20 yẹkẹẹ: “Ọ lam ujwo nyọka myị nyori iJihova ka jẹ́-ẹ hịnyọhi ham wẹẹ.” Kori ká ọkịlẹtụ á kpụng enyi aalẹ, igu oriri nyang bala iJihova ka la dẹwụ-dẹwụ myịmyị wẹẹ. (Etu 24:10) Maga nyọka ya iwe da ká ọọwa ka họ tang ka.

Angịkịla kaa juhi nya ụkụrwọ ọlẹ kọ ji ẹpwụ nyọka họ ká igu oriri nyaa bala iJihova ka wu myịmyị. Nyọlẹ kị ye Antoine tịrẹkpẹ kpá, ọ yẹkẹẹ: “Ọ lam lala o-ri am nyị deeri nya ang myị́ ang ịlẹ wuu kam kaa họ lala ọngịnyị nya ịKịrayịsị ene-ene lẹ.” Irya ọlịịwẹ dudu ká angịhyẹ kaa họ atịmẹ la ọ-ka họ ụkụrwọ nya iJihova jaabwọ kọ chịla.

Nyọka chụ pwokwita, kori ká igbachịwụ á bịrị ẹpwa nya ọngịnyị kpoye-kpoye, ọkịlẹtụ ka kpọọ enyi ụka kọ kụ irya u-uhye nya ụkụrwọ bala ụka ọlẹ kọ baba nyọka ma ube ọọwa nwụ́ myị́. Ịnyịnyị-ịnyịnyị, kori ká ọhọbịrị ọtụka ọhẹ á bịrị igu oriri  nyang bala iJihova, ọ ka lang lala o-ri ụkụrwọ ọtụka nyị ji ẹpwụ nyọka nwụla igu oriri nyang bala iJihova myị́. Ma ụbwọ ọdada tị ji.

IJihova wẹẹ byihi yẹkẹẹ: “Anụ kẹwẹ kahị chị ẹla ọlẹ kahị kpa ta awụlẹ eju mẹ.” (Ayị. 1:18) À maga yẹẹyẹẹ nyọka ‘chị ẹla eju’ ene-ene lẹ. À tị há iJihova nyọlẹ ká wẹẹ maga nyọka họ ịnyị. Kụ irya wẹẹ: À ya iwe da ha iJihova nyọka jẹ́-ẹ kpa ọnụ ọ-pwọọ wẹ ẹla ọlẹ ká Olegu Onyobyi chị bọọ lẹ!​—Etu 27:11.

Nyọlẹ ká nyà wẹ ẹga nya iJihova wẹẹ, à wẹẹ tụ́ jwọọ chwẹẹ gụ olene lẹ, ọ tị chehe nyọka tụ́ jung chwẹẹ ịnyịnyị. (Jem. 4:8) Ọ há nya angịkịla ọ-ka jẹ́ nyori à tịrẹkpẹ wẹ ẹpwụ nya ọjịra-jịra lẹ. Ma ụkụrwọ ji hang ká ka họ gụ ọwẹ wẹẹ. À baba nyọka kịnyaa la o-ju igu oriri nyang ọngịrị ẹ-ẹga nya iJihova, ọngọlẹ ko ri Adang bala Oligu nyang. Ányị a tị́ ka bwu họ ịnyị?

Maga nyọka chị ang ịlẹ ká ka ju họ myị́ nọ ha ịlọng. Ọhẹka à kpịtịya nya ẹlịlẹhị ịkpọnchị ịlẹ ká jẹ́ u-uhye nya iJihova bala ịparadayịsị ọlẹ kọ myị ọnụ yẹẹyẹẹ wẹẹ. Ma à baba nyọka chị ụgbẹyị nya ọhịhị nya ọngịnyị nya ịKịrayịsị ahị, ko ri ẹrụ ọnyịịla ọ-kpa pyẹ, ọjịra-jịra ọkaka, bala ọ-yẹjula aanahị alẹng bala anyang. Kụ irya u-uhye nya ang ịlẹ ká ka jẹ́-ẹ chị nọ ha ịlọng myị́ lẹẹ wẹẹ.

Ya ẹla bala iJihova ụka myị́ ụka. Adang jẹ́ nyori ịlọng ọ-kpụ abyị kịnyaa nyị ka dudu kọ ka lang ujwo nyọka raabwọ họọ. (Rom. 8:26) Abwọ myị́ abwọ kọ tị la, maga ká “juwa raabwọ ha Ohe Oluhye ụka myị́ ụka,” ká ya je iJihova jaabwọ ká igu oriri nyamwụ háng kaka ba. (Rom. 12:12) Andrej kpịtịya yẹkẹẹ: “Irya nya abyị ọlala bala oyoyi ọtụka-ọtụka kaa yẹ rịrịm. Ma ụka myị́ ụka kam raabwọ kpá, irya ịlịnyị kaa chụ hi. M̀ kaa ye okpunyi nya ọkịlẹtụ gụ olene.” Kori ká jẹ́ ẹla ọlẹ ká ka ya ẹ-ẹpwụ nya abwọ ọrịrị ka, maga ká kụ ẹhị yẹ abwọ ọrịrị nya Adịrahụ iDevidi ịlẹ kọ da ju ụ-ụpwụ nya Eje Ọnyịịla 51 bala 65, ụka ọlẹ kọ yẹ irya da kpá.

Jẹ́ ịBayịbụụ ụka myị́ ụka. Ọọwa ka da ụbwọ nyọka ju ọmyịmyị nyang ọngịrị gụ olene bala ọ-họ ká ọháha ọlẹ ká la ẹ-ẹga nya iJihova ka nwà kịlahị. (Eje. 19:7-11) Felipe yẹkẹẹ: “Ọlẹ kam kaa wa ịBayịbụụ bala ọ-jẹ́ ang bwu ụwa lịlọm ụka myị́ ụka ka, à ju ọmwụ nya am ọ-la dẹwụ-dẹwụ gbee káam họ ẹla wụ́ iJihova ẹjẹ lẹ. Ḿ tịtọ nyọka chị ụchụụ ọlịnyị ụka imiiye kaka, lẹ m̀ cheje nyọka chewu ke ịlọm bwula ọ-jẹ́ ịBayịbụụ lịlọm.” À ka jẹ́-ẹ họ ịnyịnyị myị́. Kori ká baba nya ụbwọ ọdada u-uhye nya egbeju nya ẹla ịlẹ ká ka jẹ́ ang u-uhye nyaa, à ka jẹ́-ẹ tọ oligu ọnyịịla ọhẹ nyọka dang ụbwọ myị́?

Nwụla igu oriri nyang bala aanang ịla ọjịra-jịra. Angịhyẹ ịlẹ kị tịrẹkpẹ wẹ ọjịra-jịra kaa chuko nyori angịkịla nyị ka kpa ẹhị ọtịpyọ yaa. Larissa yẹkẹẹ: “Ọ lam oyoyi yẹẹyẹẹ. Ọ lam lala o-ri am nyị da alọjịra-jịra wuu chọpyị lẹ. Irya ịwẹ yẹ rịrịm lụka ọtata.” Jẹ́ myị̀myị̀ nyori angịgbahị bala aligu ịnyịịla ịkịla nwụlanọ kị ka dang ụbwọ nyọka nwụla igu oriri nyang bala iJihova. (Yẹ akpa ọlẹ kọ ri, “ Ịyẹ Angịgbahị nya Ọjịra-jịra à Tị́ ka Jẹ́-ẹ Họ?”) Ị chị ọkẹkẹnị nyọlẹ ká tịrẹkpẹ, ị tị tịtọ ká ka chị ọkẹkẹnị ịnyịnyị!​—Etu 17:17.

Ịyẹ à tị́ ka jẹ́-ẹ tụng ju alọjịra-jịra chwẹẹ? Ya ụbwọ ju ụkụrwọ ọlẹ ká aanang alẹng bala anyang wẹẹ họ yẹẹyẹẹ, ko ri ọjịra-jịra ọkaka bala ẹrụ ọnyịịla ọ-kpa pyẹ. Ányị ọwẹ à tị́ ka jẹ́-ẹ dang ụbwọ? Felix yẹkẹẹ: “Alọjịra-jịra wẹẹ yahị guru gbem nyọka nyà. M̀ jẹ́ nyori m̀ háa. Ị dam ụbwọ nyọka jẹ́ nyori m̀ ri alọjịra-jịra myịmyị lẹ, nyori iJihova hịnyọhi ham lẹ, bala ọ-ka kịnyaa la ọ-gbịgba ha iJihova.”​—Yẹ akpa ọlẹ ko ri, “ Ịyẹ A Tị́ ka Jẹ́-ẹ Họ?”

Olegu Onyobyi ka kịnyaa la ọ-du “igbachịwụ” wẹ ẹga nyang chajị ká abwọ ka chịng pyẹpyẹ jaabwọ ká wẹẹ maga nyọka nwụla igu oriri nyang bala iJihova. (Luk. 4:13) Lẹ nwụlanọ bwula o-ju igu oriri nyang bala iJihova ọngịrị lẹẹlẹẹ.

IJihova chị ịkpịlọ nyamwụ ehe yẹkẹẹ: ‘M ka pịlahị nya ịkpịlọ ịlẹ kị byi, m ka kpa ịlẹ kị hwahị nyaa tịrẹkpẹ. M ka họ ịlẹ kị chị ẹbẹ uda bala ọ-ya ọngịrị ha ịlẹ kị la dẹwụ-dẹwụ.’ (Isi. 34:16) IJihova da iru nya angịnyị ụbwọ nyọka nwụla igu oriri nyaa balọọ lẹ. Jẹ́ myị̀myị̀ nyori ọ tịtọ kọ ka dang ụbwọ nyọka họ ká igu oriri nyang balọọ ka la ọngịrị kịnyaa kịlahị-ịlahị.