1. Ẹlịyẹ iJhova à tị́ juhị ọhụ kahị ka họ?

ỌHÁHA o-gbu enyi-ka kaa kpụ iJihova ịpyọ yẹẹyẹẹ. (Hos. 6:6) Ọ tịtọ kahị ka yọọ nya ang ọlẹ kọ baba yẹẹyẹẹ ịnyịnyị. Bwula ọlọmwụ ịMayịka, Ohe byihi nyori ahị nyị “juwa họ ọnahị” lee o-juwa la ọháha o-gbu enyi-ka. (May. 6:8.) Ma, ene kahị ka jẹ́-ẹ họ ịnyị, ahị baba nyọka jẹ́ ang ọlẹ ká ọháha o-gbu enyi-ka ri.

2. Ịyẹ à tị́ ri ọháha o-gbu enyi-ka?

² Ịyẹ à tị́ ri ọháha o-gbu enyi-ka? Omyi ẹla ọlẹ ko ri “ọháha o-gbu enyi-ka” kpehe ụka lala 230 ẹ-ẹpwụ nya New World Translation of the Holy Scriptures. Etu nyamwụ tị́ ri ányị? Kori ká ọngịnyị á la ọháha o-gbu enyi-ka ẹ-ẹga nya ọngọkịla, ọháha ọọwa kaa juwa kịlahị-ilahị la ọ-ka kpụ ịbwọ ka. Ọ tị ka godayị giri-giri bala ọngọọwa ụka wuu ịnyịnyị. Ụka lụmẹ-lụmẹ, ị kaa kpa ya ẹla rụ́ ọháha ọlẹ ká Ohe la ẹ-ẹga nya angịnyị ehe, ma ọ tị ri ọháha ọlẹ ká angịnyị ehe kaa la ẹ-ẹga nya awụlẹ ịnyịnyị. IJihova à ri ọgụ-ẹpẹtẹ ọlẹ kọ há gụ wuu ẹ-ẹpwụ nya ọháha ọlịịwẹ ọ-mẹjẹ ẹẹ. Ẹ-ẹpwụ nya ang ọjẹ́jẹ ọlẹ, ahị ka ya ẹla u-uhye nya abwọlẹ ká iJihova kaa mẹ ọháha o-gbu enyi-ka jẹ ẹ-ẹga nya angịnyị. Ẹ-ẹpwụ nya ang ọjẹ́jẹ ọ-ba ọlẹ ba, ahị ka ya ẹla u-uhye nya abwọlẹ ká ahị ka gbịla iJihova bwula ọ-la ọháha o-gbu enyi-ka ẹ-ẹga nya awụlẹ.

3. Ányị iJihova à tị́ ya ịlọmwụ je iMosisi?

³ Lụka o-kpii nyọlẹ ká ala Isirẹlụ kpehe bwu Ijipti kpá, iJihova ya ịlọmwụ je iMosisi bwula o-ya ẹnyị bala abwụma nyamwụ dodehe. Ọ yẹkẹẹ: “Am kpakpaakpa à ri [iJihova] lẹ. Am [iJihova] ri Ohe Oluhye ọlahyẹẹrwẹrwa bala ọlọnahị ọlẹ koo ju agbama hyaa ka, kọ la ọháha o-gbu enyi-ka bala o-ju ọdahịhile.  M̀ kaa họ ọnahị ẹ-ẹga nya ụnụnụụnọ nya angịnyị. M̀ kaa hịnyọhi ọhọbịrị bala ang ịnyịbyi ịhọhọ nya angịnyị.” (Ehe. 34:6, 7) Bwula omyi ẹla ịnyịịla ịwẹ, iJihova chị ẹlẹhẹ ọkpịpyọ ehe u-uhye nya ọháha o-gbu enyi-ka nyamwụ ya je iMosisi. Ẹla ọọwa tị ri ịyẹ?

4-5. (a) Ányị iJihova à tị́ chabwọ nya ịlọmwụ? (b) Ịtọ ẹla iyina ahị tị́ wẹẹ ka kụ ẹhị yẹ?

⁴ IJihova á chabwọ nya ịlọmwụ nya ọngọ la ọháha o-gbu enyi-ka ịịwẹ kem ka, ma ọ ya ọwa nyị kaa mọ́ọ jẹ yẹẹyẹẹ. Ẹga ịrwọnyẹ ịkịla juwa ká ịBayịbụụ chabwọ nya Ohe ụ-ụgbẹyị ọlịịwẹ. (Ọwa. 14:18; Neh. 9:17; Eje. 86:15; 103:8; Juw. 2:13; Jon. 4:2) Ẹga ịịwa wuu kpa omyi ẹla ọwẹ chabwọ nya iJihova ịnyị, a-angịnyị ehe ka. Ọ́ kpịpyọ nyọlẹ ká iJihova ya ẹla u-uhye nya ọháha o-gbu enyi-ka nyamwụ mwụba-mwụba ịịwẹ ẹ-ẹpwụ nya ịBayịbụụ ka? Ahị ka yẹ wẹ-ẹ̀ nyori ọháha o-gbu enyi-ka baba họọ yẹẹyẹẹ ịnyịlẹhị. * Ịnyị à dudu ká Adịrahụ iDevidi yẹkẹẹ: “[IJihova] ẹẹ, ọháha o-gbu enyi-ka nyang la gbọnọ-gbọnọ pwụ uhye-ọgba . . . Ohe Oluhye ee, ọháha o-gbu enyi-ka nyang chakpa kpịnya! Angịnyị ehe wuu ye ẹga ọkpịbaa e-ekpeleji nya ụrụrụ nya achwọ nyang.” (Eje. 36:5, 7) Ọháha o-gbu enyi-ka nya iJihova myịhị lẹhị jaabwọ kọ myị iDevidi lẹhị?

⁵ Nyọka jẹ́ ang ọlẹ ká ọháha o-gbu enyi-ka ri gụ ọọwa, ahị kụ ẹhị yẹ ịtọ ẹla imiiye ịlẹ wẹẹ: Owo anyị iJihova à tịị mẹ ọháha o-gbu enyi-ka jẹ? Ányị ahị tịị yé apyobwuna ụka ká iJihova á mẹ ọháha o-gbu enyi-ka jẹ?

6. Owo anyị iJihova à tịị mẹ ọháha o-gbu enyi-ka jẹ ẹ-ẹga nyaa?

⁶ Owo anyị iJihova à tịị mẹ ọháha o-gbu enyi-ka jẹ? ỊBayịbụụ ya nyori ang lụmẹ-lụmẹ nyị ka jẹ́-ẹ háahị myị́. Ang lala “ang-ẹrụ,” “ere bala ida,” ‘ang ọmẹjẹ,’ “ang ọjẹjẹ,” ‘ẹla ọjẹjẹ,’ bala ang ịkịla. (2 Ego. 26:10; Etu 12:1; 21:17; 29:3) Ma ị tị jẹ́-ẹ mẹ ọháha o-gbu enyi-ka jẹ ẹ-ẹga nya ang ịlịịwẹ ka, ẹ-ẹga nya ọngịnyị ehe kem ị jé-ẹ mọ́ọ jẹ lẹ. Ma iJihova á tị kaa mẹ ọháha o-gbu enyi-ka jẹ ẹ-ẹga nya angịnyị kuu ịịwẹ ka. Ọọ mọ́ọ jẹ ẹ-ẹga nya angịlẹ kị ri igu ọlam-ọlam balọọ ịnyị. Ohe nyahị á kaa nyẹẹkpẹ da angịlẹ kị ri aligu nyamwụ ka. Ọ la irya ọnyịịla jahị daa, ọ́ tị ka ba la ọ-la ọháha ẹ-ẹga nyaa ẹnẹnẹhẹ ka.

7. Ányị iJihova à tị́ bwu mẹ ọháha jẹ ẹ-ẹga nya angịnyị ehe wuu?

⁷ IJihova mẹ ọháha jẹ ẹ-ẹga nya angịnyị ehe wuu. IJisọsị byi ọlẹng ọhẹ ká enyị nyamwụ ri iNikodimọsị yẹkẹẹ: “Alodehe ọlẹ há Ohe Oluhye lụmẹ gbee kọ du Ọnyẹwẹ olookpokpo nyamwụ warị kaka gbu wọnụ nyaa ju, chajị ká ọng myị́ ọng ọlẹ kọ myị lọọ lẹ, á ka ta ayịreji  kaka. Ma, kọ ka la ọhịhị ọmyịmyị-ka.”​—Jọn. 3:1, 16; Mat. 5:44, 45.

8-9. (a) Ịyẹ tị́ du ká iJihova kaa mẹ ọháha o-gbu enyi-ka jẹ ẹ-ẹga nya anchẹ nyamwụ? (b) Ẹlịyẹ ahị tị́ wẹẹ ka kụ ẹhị yẹ kịlahị?

⁸ Jaabwọ kahị ya ene, angịlẹ kị ri igu ọlam-ọlam bala iJihova kem, kị ri anchẹ nyamwụ, ọ kaa mẹ ọháha o-gbu enyi-ka nyamwụ jẹ ẹ-ẹga nyaa lẹ. Ahị ka yẹ ẹlẹwẹ bwu ẹpwụ nya ẹla ọlẹ ká Adịrahụ iDevidi bala ọlọmwụ ịDanẹlụ ya. Ọ-chụ pwokwita, iDevidi yẹkẹẹ: “Ọháhá o-gbu enyi-ka nyang ā kịnyaa juwa mwụ chị angịlẹ kị jẹng ọgụ.” “Ọháha o-gbu enyi-ka nya [iJihova] tị lẹ, ọ juwa gbe oyi myị oyi ha angịlẹ kị ju ihi nyamwụ.” ỊDanẹlụ ọwa tị yẹkẹẹ: “Ọngọlahị Ohe Oluhye ee, à . . . kaa họ ọnụ ọmyịmyị nyang jịra nyọka la ọháha o-gbu enyi-ka ẹ-ẹga nya angịlẹ ká háa kị myị ju ehile nyang ihi.” (Eje. 36:10; 103:17; Dan. 9:4) Jaabwọ ká ẹla ịlẹpwụ nya ụpwụ ịgọgọ ịwẹ họ kahị jẹ́, iJihova kaa la ọháha o-gbu enyi-ka ẹ-ẹga nya anchẹ nyamwụ chajị nyori ị jọ́ọ, ị kaa ju ihi nyamwụ, ị la ọháha ẹ-ẹga nyamwụ, bala ọ-kaa kpa ehile nyawmụ. IJihova kaa mẹ ọháha o-gbu enyi-ka jẹ ẹ-ẹga nya angịnyị nyamwụ ịlẹ kị kaa gbịgba họọ ụ-ụgbẹyị ọlam kem ịnyị.

⁹ Ene kahị-ị̀ dọmwụ nyọka gbịgba ha iJihova, ahị yé apyobwuna bwu ọháha ọlẹ ká Ohe kaa mẹjẹ ẹ-ẹga nya angịnyị ehe wuu ene lẹ. (Eje. 104:14) Ma, lala anchẹ nyamwụ, ahị kaa yé apyobwuna bwu ẹpwụ nya ọháha o-gbu enyi-ka nyamwụ dọọ u-uhye. IJihova dọmwụ byi anchẹ nyamwụ yẹkẹẹ: ‘Ọháha o-gbu enyi-ka nyam ọlẹga nyanụ á ka myị ẹnẹnẹhẹ kaka.’ (Ayị. 54:10) Jaabwọ ká iDevidi lịlọmwụ yẹ jẹ́, “iJihova kaa kpa ọngọ godayị giri-giri họọ ụ-ụgbẹyi ọdatị.” (Eje. 4:3, NW ) Ụgbẹyị ọdatị ọlẹ ká iJihova kaa kpahị juhị tị́ ka du kahị ka họ ịyẹ? Ọngọ da Eje Ọnyịịla yẹkẹẹ: “Angị jẹ ẹla ā kpịtịya nya ala ịwẹ, kị juwa me irya ju ọháha o-gbu enyi-ka nya [iJihova] ọlẹga nyahị mẹ.” (Eje. 107:43) La ẹla ọnyịịla ọwẹ i-irya, ahị ka kụ ẹhị yẹ agbẹyị ịta ịlẹ ká anchẹ nya iJihova kaa yé apyobwuna ụka kọ mẹ ọháha o-gbu enyi-ka jẹ ẹ-ẹga nyaa.

10. Ányị ahị ọ-jẹ́ nyori ọháha o-gbu enyi-ka nya Ohe kaa juwa gboyi myị́ oyi à tị́ kaa dahị ụbwọ? (Eje Ọnyịịla 31:7)

¹⁰ Ọháha o-gbu enyi-ka nya Ohe juwa gbe oyi myị́ oyi. Ụpwụ nya Eje Ọnyịịla 136 gu enyị nya ọháha o-gbu enyi-ka ugbabwọ 26 chiriri.  Ọgba ọhọhẹ yẹkẹẹ: “Anụ ji [iJihova] obe, chajị ọ ri ọngọ ọnyịịla, ọháha o-gbu enyi-ka nyamwụ juwa gbe oyi myị oyi.” (Eje. 136:1) Ẹ-ẹpwụ nya ọgba ọnyị myị́ ọnyị bwu ọgba 2 lalaala juka 26, ahị ka yẹ omyi ẹla ọlẹ ko ri “ọháha o-gbu enyi-ka nyamwụ juwa gbe oyi myị oyi.” Jaabwọ kahị wẹẹ wa eje ọnyịịla ọwẹ, ọ ka kpụhị ịpyọ nya agbẹyị ịdatị-datị ịlẹ ká iJihova kaa mẹ ọháha o-gbu enyi-ka jẹ la ọ-kaa mwịịnyọ ka. “Ọháha o-gbu enyi-ka” ọlẹ kị da kpehe mwụba-mwụba wẹ họ kahị jẹ́ myị̀myị̀ nyori ọháha ọlẹ ká Ohe la ẹ-ẹga nya anchẹ nyamwụ á kaa yẹda ka. Ọ kpịpyọ lụmẹ nyọka jẹ́ nyori abwọ-ọ́ kaa chị iJihova pyẹpyẹ la ọ-ka mẹ ọháha jẹ ẹ-ẹga nya anchẹ nyamwụ ka! Ọkọkọ nya ọọwa, ọ́ kpụ kọ dọmwụ nyọka mẹ ọháha jẹ ẹ-ẹga nya ọngịnyị ọlẹ kọ kaa gbịgba họọ lẹ aalẹ, ọ́ kaa ba kaka, ọgụgụ ri ụka nya akama. Apyobwuna ọlẹ áhị ka yé: Ahị ọ-jẹ́ nyori iJihova kaa juwa balahị kaa ya ọkẹkẹnị bala ọngịri hahị nyọka bọhụ ẹ-ẹpwụ nya akama bala ọ-ka kịnyaa la ọ-jẹdịyẹ ụ-ụgbẹyị nya ọhịhị.​—Wa Eje Ọnyịịla 31:7.

11. Jaabwọ ká ụpwụ nya Eje Ọnyịịla 86:5 ya, ịyẹ à tị́ kaa gu iJihova gbịla nyọka hịnyọhi?

¹¹ Ọháha o-gbu enyi-ka nya Ohe kaa gwọọ gbịla nyọka hịnyọhi. Ụka ká iJihova á yẹ ọlọhọbịrị kọ yẹ irya da bala ọ-jẹkpẹ da ụgbẹyị nya ọhọbịrị, ọháha o-gbu enyi-ka kaa gwọọ gbịla nyọka hịnyọhi ha ọngọlịnyị. IDevidi ọngọ da eje ọnyịịla ya ẹla u-uhye nya iJihova yẹkẹẹ: “Ọ́ọ yẹhị akama ta ọ-họ tịpyọ nyahị meme ka, lee ọ-wuhi uri jaabwọ ká ang inyibyi ịlẹ kahị họ lụmẹ kaka ba ka.” (Eje. 103:8-11) IDevidi la ịlọmwụ jẹ́ jaabwọ ká ọkịlẹtụ ọ-la ọngịnyị eje chajị nya ang ọtịpyọ ọhọhọ kaa la ọngịnyị ilo kaka ba. Ma ọ tị jẹ́ ịnyịnyị nyori iJihova kaa nwụlanọ nyọka “hịnyọhi.” Ịyẹ à tị́ kaa gu iJihova gbịla nyọka hịnyọhi? Ọwẹwẹ juwa ẹ-ẹpwụ nya Eje Ọnyịịla 86:5. (Wọọ.) Ee, jaabwọ ká iDevidi ya ẹ-ẹpwụ nya abwọ ọrịrị wẹ, iJihova kaa hịnyọhi chajị ọ la ọháha o-gbu enyi-ka ẹ-ẹga nya angịlẹ kị kaa bịlọọ nyọka hịnyọhi haa.

12-13. Ó-ri ká ọkịlẹtụ á kpụhị enyi u-uhye nya ọ-jẹ́ họ ka nyahị ịkẹkpẹ, ịyẹ à tị́ ka dahị ụbwọ?

¹² Ụka kahị họ ọhọbịrị, ọ pwoku nyahị ọ-ka mẹjẹ nyori ọ tọhị olujwo, ọ dọmwụ há ịnyị. Ọọwa kaa guhị gbịla nyọka yẹ irya da bala o-hu ẹta ẹdịyẹ nyọka nwụ ọ-jẹ́ họ ka nyahị rịrị. Ma anchẹ nya iJihova ịhyẹ juwa ká olegu kaa ya eje waa kpoye u-uhye nya ọ-jẹ́ họ ka nyaa ọkẹkpẹ.  Ị kaa kịnyaa la ọ-kụ irya nyori iJihova nyị́ ka jẹ́-ẹ hịnyọhi haa kaka nanana nyori ị yẹda bala ọ-hwabwọ la ọ-họ ang ọtịpyọ lẹ. Kori ká la irya ọlịịwẹ aalẹ, ọ-jẹ́ nyori iJihova nwulanọ nyọka mẹ ọháha o-gbu enyi-ka nyamwụ jẹ ẹ-ẹga nyang ka dang ụbwọ.

¹³ Apyobwuna ọlẹ áhị ka yé: Nanana nyori áhị la kpẹẹkpẹẹ ka, ahị ka jẹ́-ẹ gbịgba ha iJihova la ọkịlẹtụ ocheri-cheri. Ẹlẹwẹ chịkpẹẹ ịnyị myị́ chajị nyori “ịwọ nya iJisọsị Ọnyẹwẹ nya Ohe Oluhye [kaa] hụ́ ọhọbịrị nyahị ọnyị myị ọnyị wuu cheri-cheri hiihi.” (1 Jọn. 1:7) Ụka ká ọkịlẹtụ á kpụng enyi u-uhye nya ang ịhyẹ ịlẹ kị kaa gụng-gụ họ, kpịtịya nyori iJihova nwụlanọ, ee, ọ charịnya nyọka hịnyọhi ha ọlọhọbịrị ọlẹ kọ yẹ irya da. Yẹ jaabwọ ká iDevidi da ọháha o-gbu enyi-ka bala ọ-hịnyọhi ori wu awụlẹ lẹẹ wẹẹ. Ọ da ụpwụ yẹkẹẹ: “Jaabwọ ká uhye-ọgba la uhye gidogboo hi eji wẹẹ, ịnyịnyị-ịnyịnyị ọháha o-gbu enyi-ka nyamwụ à lụmẹ ẹ-ẹga nya angị kaa jwọọ ịhị lẹ. Jaabwọ ká ọmwẹnụ-ụtụrụ ji hwẹẹẹ hi ọmwẹnụ-obyi wẹẹ, ịnyịnyị-ịnyịnyị ọ tụ ịhọbịrị nyahị rụ hwẹẹẹ hiihi lẹ.” (Eje. 103:11, 12) Ẹlịlẹhị ri, iJihova nwụlanọ nyọka “hịnyọhi” chẹpwụ-chẹpwụ.​—Ayị. 55:7.

14. Ányị iDevidi à tị́ chabwọ nya ụgbẹyị ọlẹ ká ọháha o-gbu enyi-ka nya iJihova kaa chewu keehi?

¹⁴ Ọháha o-gbu enyi-ka nya Ohe kaa chewu ke igu oriri nyahị balọọ. IDevidi raabwọ ha iJihova yẹkẹẹ: “Ahụ à ri ẹga ọkpịbaa nyam lẹ, à ka chewu kem hi akama. M̀ mwu eje gboo rụ ọchịda nyang, chajị à gbam kpehe. . . . Angịlẹ kị tị dahịhile [iJihova] lẹ, ọ kaa chewu kaa lọháha o-gbu enyi-ka nyamwụ.” (Eje. 32:7, 10) Jaabwọ ká egwalọ ịlẹ kị me dakoko ju epweji lụka onyogo kaa chewu ke angịnyị ịlụwa, ịnyịnyị-ịnyịnyị ọháha o-gbu enyi-ka nya iJihova à kaa dakoko juhi bala ọ-chewu keehi hyi ang ịlẹ kị ka bịrị igu oriri nyahị balọọ lẹ. Da ọọwa u-uhye, ọháha o-gbu enyi-ka nya iJihova kaa gwọọ gbịla nyọka gbileehi ba ịlọmwụ.​—Jer. 31:3.

15. Ányị ọháha o-gbu enyi-ka nya iJihova à tị́ lala ẹga ọ-chewu ke ọngịnyị?

¹⁵ IDevidi kpa ẹla ọkịla chụ pwoku nyọka mẹjẹ jaabwọ ká Ohe kaa chewu ke angịnyị nyamwụ. Ọ da ụpwụ yẹkẹẹ: “Ahụ à ri ẹga ọkpịbaa nyam lẹ. À ri Ohe Oluhye ọlẹ kọ la ọháha o-gbu enyi-ka ẹ-ẹga nyam.” IDevidi myịmyị ya ẹla rụ́ iJihova yẹkẹẹ: “Ọ ri ọngọ chewu kem, epweji ọnyọọngịrị nyam ọlẹ kị me ugwulọ dagaga ju. O ri ọngọ ma uya yẹm dada bala ọngọchịmda, ọkụmada bala ewu ọ-chi ke nyam.” (Eje. 59:17; 144:2) Ịyẹ tị́ du ká iDevidi chụ ọháha o-gbu enyi-ka nya iJihova kaka pwoku ẹga ọ-kpịbaa bala epweji ọnyọọngịrị? Ẹga myị́ ẹga kahị ji odehe ọlẹ, ọ́ kpụ kahị jẹ́ ri anchẹ nya iJihova lẹ aalẹ, ọ ka chewu keehi chajị kahị ka jẹ́-ẹ kịnyaa la o-ri igu balọọ lẹ. Ụpwụ nya Eje Ọnyịịla 91 họ kahị jẹ́ ẹlẹwẹ myị̀myị̀. Ọngọ da eje ọnyịịla ọwẹ yẹkẹẹ: ‘M̀ ka ya ẹla rụ́ [iJihova] yẹkẹẹ, “Ọwa-à ri ẹga ọkpịbaa bala ube ọnyọọngịrị nyam lẹ.”’ (Eje. 91:1-3, 9, 14) IMosisi kpa omyi ẹla ọlịịwẹ mẹjẹ nyori iJihova kaa chewu keehi lala ẹga ọ-kpịbaa. (Eje. 90:1) Lụka o-kpii ene ká iMosisi gbu, ọ myịmyị ya ẹla ọnyịịla-ọnyịịla ọhẹ dọọ u-uhye. Ọ yẹkẹẹ: “Ohe Oluhye . . . à ri ẹga ọkpịbaa nyanụ lẹ, Ọọ wụhị kpa la legbirabwọ i-gbe oyi myi oyi nyamwụ.” (Ehile. 33:27) Omyi ẹla ọlẹ kọ ri “wụhị kpa la legbirabwọ i-gbe oyi myi oyi nyamwụ” tị́ mẹ ẹlịyẹ jẹ́ẹhị u-uhye nya iJihova?

16. Ahị ọwawa imiiye iyina ahị tị́ la? (Eje Ọnyịịla 136:23)

¹⁶ Ụka kahị hu iJihova nya Ẹga Ọkpịbaa nyahị, ahị kaa la ewu ọ-chị ke. Ma, ụka ọhẹ tị ji ká ọkịlẹtụ o-kpenyi ka kpụhị beji la ahị ọ-ka jẹ́-ẹ wuleji ka myị́. Ụka kọ lịnyị, ịyẹ iJihova à tị́ ka họ hahị? (Wa Eje Ọnyịịla 136:23.) Ọ ka ya ụbwọ nyamwụ dahị bwu eji, huuhị chwee, yahị ẹta reeji myịmyị. (Eje. 28:9; 94:18) Apyobwuna  ọlẹ áhị ka yé: Ahị ọ-jẹ́ nyori ahị ka jẹ́-ẹ kpụnịrọ iJihova ụka myị́ ụka dahị ụbwọ nyọka kpịtịya nyori ahị la ahị ọwawa a-agbẹyị ịmiiye. Ọhọhẹ, ẹga myị́ ẹga kahị ji, ahị la ẹga ọkpịbaa ọlẹ kọ ju ọ-dahịhile. Oheeye, Adahị olepwoohe kaa kpahị juhi yẹẹyẹẹ.

17. Ẹlịyẹ ahị tị́ jẹ́ myị̀myị̀ ọọlajị nya ọháha o-gbu enyi-ka nya iJihova? (Eje Ọnyịịla 33:18-22)

¹⁷ Jaabwọ kahị jẹ́ wẹ, ụka myị́ ụka kahị ju ka ẹpwụ nya akama, ahị jẹ́ myị̀myị̀ nyori iJihova ka dahị ụbwọ nyoka kịnyaa la o-ri igu balọọ. (2 Kọr. 4:7-9) Ọlọmwụ iJeremaya yẹkẹẹ: “Ọháha o-gbu enyi-ka nya [iJihova] bala ahyẹẹrwẹrwa nyamwụ kaa juwa pyịyọọ.” (Ida. 3:22) Ahị ka jẹ́ myị̀myị̀ nyori iJihova ka mẹ ọháha o-gbu enyi-ka jẹ ẹ-ẹga nyahị pyịyọọ chajị ịBayịbụụ byihi nyori iJihova nyị kaa “kpẹhị rịrị angịlẹ kị ju uhi nyamwụ, ịwa angịlẹ wuu kị kpụnịrọ ọháhá o-gbu enyi-ka nyamwụ.”​—Wa Eje Ọnyịịla 33:18-22.

18-19. (a) Ẹlịyẹ ahị tị́ ka kpịtịya? (b) Ẹlịyẹ ahị tị́ ka kụ ẹhị a-ang ọjẹ́jẹ ọ-ba ọlẹ ba?

¹⁸ Ẹlịyẹ ahị tị́ ka kpịtịya? Ene kahị-ị̀ dọmwụ nyọka gbịgba ha iJihova, ahị yé apyobwuna bwu ọháha ọlẹ ká Ohe kaa mẹjẹ ẹ-ẹga nya angịnyị ehe wuu lẹ. Ma lala angịlẹ kị kaa gbịgba họọ, ahị kaa yé apyobwuna bwu ọháha o-gbu enyi-ka nyamwụ. Ọháha ọwẹ gu iJihova gbịla nyọka yehi ju ka ẹpwụ-achwọ nyamwụ ọlẹ kọ kaa kpa chewu keehi. Ọ ka ji baahị ba ụka myị́ ụka, ọ tị ka họ irya ọlẹ kọ la ẹ-ẹga nyahị jịra ịnyịnyị. Ọ tịtọ kahị ka ri oligu nyamwụ pyịyọọ! (Eje. 46:1, 2, 7) Lẹ, jaabwọ myị́ abwọ ká akama nyahị á la kaka ba, iJihova ka ya ọngịrị ọlẹ kahị baba nyọka godayị giri-giri hahị.

¹⁹ Ahị yẹ jaabwọ ká iJihova kaa mẹ ọháha o-gbu enyi-ka jẹ ẹ-ẹga nya anchẹ nyamwụ lẹ. Ọ tị ya ahị guru kahị ka la ọháha o-gbu enyi-ka ẹ-ẹga nya awụlẹ ịnyịnyị. Ányị ahị tị́ ka bwu họ ịnyị? Ang ọjẹ́jẹ ọ-ba ọlẹ ba, ahị ka kụ ẹhị yẹ ẹla ọkpọnchị ọwẹ.