• ẸKA ỌLẸ KỊ MỌỌ: 1941

• ẸPWỤMA: BENIN

• EGO: O YE ỊHỤ INE, Ọ KAA TỤ́ ALIBEENU NYA IJIHOVA PYỊPYỊ

EGO NYAM:

M̀ bwu epweji ọtụka ọhẹ ịị Benin kị kaa wụrụ nya Cotonou. Ị kpam nwà ị-ịchọọchị nya ịfada, ma ḿ kaa ka ịchọọchị hyaahyaa ka. Ala ịfada lụmẹ-lụmẹ ẹ-ẹga kam ji kaa ye ịhụ gụ ookpokpo, chajị ehile á pwa ju ọọwa ụka ọwẹ ka. Am ịnyịnyị ye ịhụ ine.

Ẹla ọmwọmwọ ọhẹ dọmwụ la 1970, kam me nyori nyị ka ju apyobwuna ha ẹpwụma nyam. M̀ chẹkpẹ ju ẹla ọmwọmwọ ọọwa la ọngịrị nyam wuu, dudu kam yụbwọ ju ẹla nya upe. Alibeenu nya iJihova wụ́ angị hu ụmwụ nya ẹla ọmwọmwọ ọọwa ẹjẹ chajị nyọlẹ kị ji oye ọlẹlẹhẹ datị ka. M̀ juwa ẹ-ẹpwụ nya angịlẹ kị kaa tụ́ Alibeenu nya iJihova pyịpyị. Ụka kị ku Alibeenu nya iJihova ịlẹ kị bwu ẹpwụma ịkịla warị kaka kpa ẹrụ ọnyịịla pyẹ rụ la 1976 lẹ, m̀ dahịhile nyori ị́ ka mwẹẹkpẹ ẹnẹnẹhẹ kaka.

JAABWỌ KÁ ỊBAYỊBỤỤ YẸ ỌHỊHỊ NYAM DA:

Ẹla ọmwọmwọ ọọwa cheju la 1990. Ọ lam ẹbyẹbyị lụmẹ nyọlẹ ká angị ya ẹla Ohe ịwa myịmyị hyehe gegile. Ụka ọwẹ m dọmwụ nyọka me irya nyori Ohe juwa bala angịwẹ lẹlẹ. Ụka ọwẹ-ọwẹ, ụkụrwọ nyam yẹda. Ọngọhẹ ọlẹ kam kaa họ ụkụrwọ bala ẹ-ẹga onyeewe ọwẹ ri Olibeenu nya iJihova, ọ́ tị bịrị ụka ene kọọ dọmwụ nyọka ya ẹla Ohe ka. Ọ mẹ ụpa nya ịBayịbụụ ịhyẹ jẹ́m ịlẹ kị mẹjẹ nyori iJihova nyị ri Ohe nya ọháha bala eje ọkpẹẹkpẹẹ. (Ehile Ọmada 32:4; 1 ịJọn 4:8) Abwụma ịwẹ hám yẹẹyẹẹ. M̀ tịtọ nyọka jẹ́ ang gụ ọọwa u-uhye nya iJihova, lẹ m̀ myị ọnụ nyọka jẹ́ ịBayịbụụ.

Ọ́ tata lụmẹ ene kam dọmwụ nyọka ka ọjịra-jịra nya Alibeenu nya iJihova kaka. Ọháha nyịlẹhị ọlẹ kam yẹ ẹ-ẹpwarịrị nyaa myịm lẹhị lụmẹ, ị́ jẹ́ ọdatị nya ọngọ onyoowuru bala ọngọ onyobiri lee ọlụdụ bala okpehi ka. Jaabwọ kam wẹẹ yẹjula Alibeenu nya iJihova, m̀ wẹ ka yẹ gụ olene nyori ịwa à ri angịjụgbẹyị nya iJisọsị nyịlẹhị lẹ.—ỊJọn 13:35.

M̀ wẹ ka yẹ nyori kori kam tịtọ nyọka gbịgba ha iJihova ịnyịlẹhị aalẹ, m̀ ka rụ bwu ịchọọchị ịfada pyii. Ẹlẹwẹ-ẹ́ chịkpẹẹ la ọhọhọ lụmẹ ka, chajị m̀ juhi nya ẹla ọlẹ ká angịkịla ka ya. Nyọlẹ kọ tị nọ chẹẹ, bwula ụbwọ ọdada nya iJihova, m̀ jẹ́ la ugbodu ojuju nyọka rụ hi ịchọọchị ọwẹ.

Ang ọkpọnchị ọkịla ọhẹ juwa kam baba nyọka yẹda pyii. Ẹla ọlẹ kam jẹ́ bwu ịBayịbụụ dam ụbwọ nyọka yẹ nyori Ohe-é tịtọ nya ọngịnyị ọ-ka ye ahụ gụ ookpokpo ka. (Ọmwụ Ọdada 2:18-24; ịMatiyu 19:4-6) Ahụ ọhọhẹ nyam kem à ri ahụ ẹ-ẹhị nyamwụ lẹ. Lẹ m̀ kpa awụlẹ oyeye nyahị ka yụbwọ ju ụpwụ ẹ-ẹpwụ, ọọwa lẹ m tụụbwọ hi ịhụ ịkịla lẹlẹ. M̀ tị kaa họ ịbaba nyaa haa wẹẹ. Ọ ka nọ chẹẹ lẹ, angị imiiye bwu ẹpwụ nya anyang ịlẹ kị ri ịhụ nyam ene-ene à wẹ ka ri Alibeenu nya iJihova lẹlẹ.

APYOBWUNA ỌLẸ KAM YÉ:

Ahụ nyam á myị kpehe bam bwu ịchọọchị ịfada ka, ma ọ tị kaa ju ihi nya eje ọchịchị nyam nyọka gbịgba ha iJihova. Ahị angị imimiiye ye nyori m̀ ri ọrụ-ahụ ọnyịịla gụ olene nyọlẹ kam jẹ́ ẹlịlẹhị.

M̀ kaa me nyori m̀ ka jẹ́-ẹ da epweji nyam ụbwọ bwula ẹla nya upe, ma aga ọmama ọọwa ri ododu. Ọlẹẹlẹẹ m̀ jẹ́ nyori Ịpyị-Adịrahụ nya Ohe kem à ka jẹ́-ẹ myị́ akama nya angịnyị ehe lẹlẹ. (ỊMatiyu 6:9, 10) M̀ ji iJihova obe nyọlẹ kọ mẹjẹ́m jaabwọ kam ka bwu la ọhịhị ọlẹ kọ myị̀ la ọkẹkẹnị.

• ẸKA ỌLẸ KỊ MỌỌ: 1977

• ẸPWỤMA: BRAZIL

• EGO: OLEGBEJU NYA ỊCHỌỌCHỊ

EGO NYAM:

M̀ nwà e-epweji nya Itu, ịị São Paulo. Alụwa kaa họ uguru ẹla lụmẹ.

M̀ ri ọngọ kaa họ agbụrụ bala ọ-kaa họ ụya kaka kpoye. Datị hi ọọwa, m̀ kaa kpa eteji ịnyịịngịrị ra. Nyọlẹ kọ nọ chee, m̀ yẹ nyori ọhịhị ọlịịwẹ ka kpam ka ube nya agba lee iworu pyii lẹ. Chajị nya ọọwa lẹ, m̀ ba la ang ọlịnyị ọhọhọ. M̀ rụ ka ri ala Pentecostal Church kpụ m̀ dọmwụ ri olegbeju ụ-ụwa.

Ọ lam nyori m̀ ka jẹ́-ẹ da angịnyị ụbwọ bwula ụkụrwọ nya ịchọọchị ọwẹ. M̀ dọmwụ kaa ya ẹla Ohe bwu irediyo ọlụwa, chajị nya ọọwa lẹ, angịnyị jẹ́m yẹẹyẹẹ. Ma m̀ wẹ ka yẹ dụmwọ-dụmwọ nyori ịchọọchị ọwẹ lẹpwụ-lẹpwụ á kaa kpahị ju angịnyị nyaa ka, ihi ọ-chị ju Ohe à dọmwụ ri olichi-lichi wẹẹ lẹ. Ọ lam ká okpoko à ri ang ọlẹ kị wẹẹ tịtọ kem. M̀ rụ hi ịchọọchị ọwẹ.

JAABWỌ KÁ ỊBAYỊBỤỤ YẸ ỌHỊHỊ NYAM DA:

Ụka kam dọmwụ nyọka jẹ́ ịBayịbụụ bala Alibeenu nya iJihova, m̀ yẹ ahyaahị nyori ị datị hi ịgba ọgbagba ịkịla. Ang imiiye ịhyẹ à kpụm ịpyọ gụgụụgụ lẹ. Ọhọhẹ ri, Alibeenu nya iJihova á kaa ya ẹla u-uhye nya ọháha ọ-ka la ẹ-ẹga nya Ohe bala angịnyị ehe aanaa kem ka; ị kaa mọ́ọ jẹ ịnyịlẹhị. Oheeye ri, ị́ kaa yụbwọ ju ẹla nya upe lee ẹwụ ka. (Ayịsaya 2:4) Ẹla imiiye ịwẹ du kam jẹ́ myịmyị nyori m̀ yẹ ịgba ọgbagba nyịlẹhị lẹ, m̀ yẹ ụgbẹyị ọlẹ kọ da ka ọhịhị ọmyịmyị-ka lẹ.—ỊMatiyu 7:13, 14.

M̀ yẹ nyori m̀ baba nyọka yẹ ang ịkpọnchị ịhyẹ da ọ-ọhịhị nyam kori kam tịtọ nyọka họ ẹla kpụ Ohe ịpyọ. M̀ baba nyọka kpẹhị rịrị ugbiyegu nyam gụ olene. M̀ myịmyị baba nyọka kpịlọm keji gụ olene. Ọ lujwo nyọka yẹ ang ịwẹ da, ma m̀ jwọọ họ myị́ bwula ụbwọ ọdada nya iJihova. Ọyẹda ịwẹ kpụ ahụ nyam ịpyọ lụmẹ. Ọ dọmwụ nya ịBayịbụụ ọjẹ́jẹ ene nyam, ma ụka ọwẹ lẹ, ọ dọmwụ nyọka nwà hyaahyaa ẹ-ẹpwụ nya ang ọjẹ́jẹ nyamwụ gụ olene ọọlajị nya ọọwa lẹlẹ. Ọ́ tata lụmẹ ene káahị angị imimiiye jẹ́ nyori ahị tịtọ nyọka ri Alibeenu nya iJihova kaka. Ahị hu enyi Ohe lawụlẹ ahyẹẹnụ ookpokpo.

APYOBWUNA ỌLẸ KAM YÉ:

Am bala ahụ nyam kaa chị ọkẹkẹnị yẹẹyẹẹ nyọlẹ kahị jẹ́ da anyị nyahị ụbwọ wẹ ka ri aligu nya iJihova. Ugbiyegu nyam kaa chị ọkẹkẹnị yẹẹyẹẹ. M̀ ji iJihova obe nyọlẹ kọ wụrụm ka jẹ́ ẹlịlẹhị ọlẹpwụ nya Omyi Ẹla nyamwụ. Ọ kaa yẹ ọhịhị nya angịnyị da ịnyịlẹhị! M̀ ri ang ẹjẹẹ.

• ẸKA ỌLẸ KỊ MỌỌ: 1957

• ẸPWỤMA: AUSTRALIA

• EGO: Ọ YẸ AKAMA ỤKA NYA ONJWO

EGO NYAM:

Ị kpam nwà ịị Newcastle, New South Wales. Am à ri ọnyị ọhọhẹ ẹ-ẹpwụ nya anyị irwiye ịlẹ ká adam bala ịnam ma lẹ. Adam bala ịnam ri alagbụrụ bala angị kaa ju agbama. Adam myịmyị ri ọkpịlagada ọ-nwà ere kpere. Ịnam kaa nyím, họm ang ọtụka-ọtụka, bala ọ-myịmyị kaa dom. Ọ kaa byim ụka lụmẹ-lụmẹ nyori am nyị ri ọngịnyị ọtịpyọ bala o-ri am nyị ja ka obwila. Ẹla ịlịnyị kaa chị uhi jum.

Ụka lụmẹ-lụmẹ m̀ kaa chị ube-ụpwụ da chajị nya ang ịlẹ ká ịnam kaa họm. Ụka kam gu ẹka 11, igomenti hum kpa rụ bwu ẹga nya adam bala ịnam, ọọwa lẹ, ị kaa kpẹhị rịrịm lẹlẹ. Ọ tị ka nọ ka, ị kpam ka jula ogu nya anyang ịlẹ kị hu ọhịhị nyaa wuu ha ịchọọchị. Ụka kam gu ẹka 14, m̀ rụnyẹ rụ bwu ụwa. Ḿ tịtọ nyọka tịrẹkpẹ rụ ka ẹpwa ka, lẹ m̀ kụ opeje nya Kings Cross, o-oye nya Sydney.

Ụka ọọwa m̀ dọmwụ nyọka mile eteji ịnyịịngịrị, nwà ere kpoye-kpoye, yẹ arụrụ nya ụya ọhọhọ, bala ọ-họ ụkpara. Ẹlẹhẹ họ kọ lam uhihi kaka kpoye. M̀ kụ ẹpwa nya ọngọhẹ ọlẹ kọ la ube nya ịpati ọhẹ. Ọọwa ẹnụmwụ ọhẹ lobyi lẹ, alẹng imiiye ịhyẹ à warị kaka yọọ lẹlẹ. O kụm rụ ka ube ọlẹpwụ, ma m̀ jẹ́ wo ẹla nyaa pwụ́ ụwa. Ọ tịtọ nyọka yam ra ha alẹng ịwẹ. Ị la irya nyọka yam kpịbaa ẹ-ẹpwụ nya ụgbọ nya enyi ọlẹ kọ wẹẹ ka kpa olo ka Japan. Ị tịtọ kị ka kpam ka ụwa ka họ ụkụrwọ ẹ-ẹga ọ-kpa ere ra. M̀ juhi ọtụka-ọtụka, ọọwa lẹ m gbajị hireji bwu iwindo nya ube oluhye lẹ, m rụnyẹ rụ ka mwahị nya ụbwọ ọdada lẹlẹ.

M̀ tọ ọlẹng ọhẹ ọlẹ kọ ju ụga wẹ Sydney, m̀ ya iwe-ahụrụ nyam joo la irya nyori ọ ka dam ụbwọ la okpoko. Ma ọkọkọ nya ọọwa, ọ wụrụm ka ẹga ọlẹ kọ kụ chajị kam ka jẹ́-ẹ hyo enyi bala o-ri ang. Ang tị yẹda, chajị ḿ rụ bwu ụwa kaka. Ẹka ookpokpo ẹ-ẹkpẹ nya ọọwa lẹ, m̀ rụrwọọ lẹlẹ.

JAABWỌ KÁ ỊBAYỊBỤỤ YẸ ỌHỊHỊ NYAM DA:

Ụka kam dọmwụ nyọka jẹ́ ịBayịbụụ bala Alibeenu nya iJihova, m̀ la irya ịdatị-datị. M̀ ju agbama nyọlẹ kam jẹ́ nyori Olegu Onyobyi nya-à ju ọmwụ nya ang onyobyi lẹ; ị kaa mẹjẹ́m ene-ene nyori Ohe nya-à kaa yẹẹhị akama lẹ. Ọhụ nyam weji ụka kam jẹ́ nyori Ohe-é ka yẹ angịnyị akama o-obwila ka, chajị ọmẹjẹ ọwẹ chị uhi jum lụka ọtata lẹ.

Ụgbẹyị ọlẹ ká Alibeenu nya iJihova kaa ya ịwẹ da ká ịBayịbụụ ka gu eje ọchịchị nyaa ọnyị myị́ ọnyị kaa kpụm ịpyọ lụmẹ. Ị́ kaa ya ịwa nyị la ọmyịmyị ịịwẹ kem ka, ma ị kaa hịhị ba ẹla ọlẹ kị myị la jẹ. Ẹla nyam ị kaa chịkpẹẹ ka, ma ẹla myị́ ẹla kam ya bala abwọ myị́ abwọ kam họ, Alibeenu nya iJihova ịwẹ kaa kpam ẹ-ẹpwụ nya ọháha bala ihi.

Ịngịhyẹ ọlẹ kọ lam ujwo nyọka yẹda gụgụ wuu à ri irya nyori ḿ ju apyobwuna nya ịngịngịhyẹ ka ẹẹ. M̀ wụ́ ịlọm ẹjẹ, irya ọwẹ tị kịnyaa ẹ-ẹpwụ nyam dọmwụ kpoye nya ụka ọlẹ kam hu enyi Ohe kpá. M̀ jẹ́ nyori iJihova hám am lẹ, ma m̀ kaa byi ịlọm nyori ọngịnyị ehe ụma nyam nyị́ ka jẹ́-ẹ họ́ọ ẹnẹnẹhẹ ka.

M̀ la irya ọyẹda ọlam-ọlam ẹka 15 ẹ-ẹkpẹ nyọlẹ kam hu enyi Ohe. Ụka kị wẹẹ ya ẹla dodehe bwu ịBayịbụụ u-ube nya Ịpyị-Adịrahụ, ọngọ ya ẹla wa ụpwụ nya iJemsi 1:23, 24. Ụpwụ ịgọgọ ọwẹ chụ Omyi Ẹla nya Ohe kaka pwoku ịnyọ ọlẹ kọ kaa dahị ụbwọ yẹ ịlọhị jaabwọ ká iJihova kaa yẹhị. M̀ dọmwụ nyọka tịlọm wo kori ká ang ọlẹ kam yẹ u-uhye nyịlọm á datị hi ọlẹ ká iJihova yẹ u-uhye nyam. Ụka nya ọgbanyẹ, ḿ myị ju irya onyeewe ọwẹ ka. M̀ kaa yọọ nyori ọháha ọ-ka la ẹ-ẹga nyam nyị lụmẹ kpoye nyam ọ-ka yahị guru bwu ẹga nya iJihova.

Ahyẹẹnụ ịmanyị-ịmanyị ẹ-ẹkpẹ nya ọọwa lẹ, m wa ụpwụ ịgọgọ ọlẹ kọ yẹ ọhịhị nyam da lẹlẹ. O ri Ayịsaya 1:18, ká iJihova ya ụ-ụwa yẹkẹẹ: “Anụ kẹwẹ kahị chị ẹla ọlẹ kahị kpa ta awụlẹ eju mẹ, . . . ó-ri ká ịngịhyẹ-ẹ́ chịnụ ịrị jaabwọ ká ịwọ kaa chị ang ịrị wẹwẹ, m̀ tị̀ ka yịlẹẹnụ kanụ ka la owuru lala owu olewu-lewu.” Ọ lam lala o-ri iJihova wẹẹ byim yẹkẹẹ: “Vicky, kẹwẹ kahị chị ẹla ọlẹ kahị kpa eju mẹ. M̀ jẹ́ng, m̀ jẹ́ ịhọbịrị nyang, m̀ jẹ́ ọkịlẹtụ nyang, à tị hám kpọkpọọkpọ.”

Ḿ nune myị́ ẹnụmwụ ọwẹ lodu ka. M̀ da ịwẹẹ kori kam ka jẹ́-ẹ há iJihova ịlẹhị, ma m̀ dọmwụ nyọka kụ irya u-uhye nya iya ọkịlaakịla nya iJisọsị. Ụka ọwẹ, m̀ wẹ ka jẹ́ nyori iJihova dọhụ pịlẹ tam lụka ọtata lẹ, ọ wẹẹ mẹjẹ́m a-agbẹyị lụmẹ-lụmẹ nyori am nyị há ọwa. Ma ọ lala o-ri m̀ wẹẹ byoo yẹkẹẹ: “Ọháha nyang á lụmẹ nwà kpụ ọ ka wum ọyị ka. Iya ọkịlaakịla nya ọnyị nyang á nwà kpụ ọ ka họ ụkụrwọ wọnụ nyam ju ka.” Ọ lala o-ri m̀ wẹẹ ya ẹta da āhị nya ọ-ra kpehe tịrẹkpẹ ka ẹga nya iJihova. Ma ọlẹẹlẹẹ tị lẹ, m̀ kaa yẹ nyori m̀ há iJihova yẹẹyẹẹ ụka kam kụ irya ju āhị nya ọ-ra kpehe nyamwụ lẹ.

APYOBWUNA ỌLẸ KAM YÉ:

M̀ lịlọm cheri-cheri, lala ọngọ hịhị, bala ọngọ chọnụ le. Ugbiyegu nyam chị ọkẹkẹnị gụ olene, m̀ tị myịmyị chị ọkẹkẹnị chajị nyọlẹ kam ka jẹ́-ẹ kpa oja nyam da angịkịla ụbwọ. M̀ ju iJihova chwẹẹ lẹẹlẹẹ gụ olene lẹ.

• ẸKA ỌLẸ KỊ MỌỌ: 1974

• ẸPWỤMA: RUSSIA

• EGO: EJE NYA ALAGBỤRỤ KAA HỌ́Ọ

EGO NYAM:

Ị mam ịị Votkinsk, ẹga ọlẹ kị ma Pyotr Ilich Tchaikovsky, ko ri ọngọ mweje ọlẹ kọ ru ohi yẹẹyẹẹ. Ugbiyegu nyam á la okpoko ka. Adam ri ọngịnyị ọnyịịla, ma ọ kaa nwà ere kpoye, le arụ ọrụrụ kaa juwa ẹ-ẹpwa ụka myị́ ụka.

Ḿ jẹ́ ang lụmẹ u-ube-ụpwụ ka, lẹ jaabwọ ká ẹka wẹẹ chịpwụrụ, m̀ dọmwụ nyọka me irya nyori ḿ ju apyobwuna nya ịngịngịhyẹ kaka. Ḿ kaa yẹjula ọngọngọhẹ lee ọ-dahịhile ọngọngọhẹ ka. Ube-ụpwụ á kaa chịm kpẹẹ ka. Ụka kam baba nyọka dayị ị-ịlahị nya angịnyị ya ẹla, ọ kaa lam ujwo nyọka ya ẹla ịlẹ kị dọmwụ kaa chịm kpẹẹ la oyaya ene-ene. Ụka kam juwa ụ-ụpwụ iwo wẹẹ, ị da ba ụpwụ nya ọmayẹ nyam yẹkẹẹ: “Ọ́ jẹ́-ẹ ya ẹla ka.” Omyi ẹla ịwẹ jụm, wum ọyị ọ-ọkịlẹtụ, dudu kam me ịlọm ịngịngịhyẹ ka gụ olene. M̀ dọmwụ nyọka kụ irya u-uhye nya ang odudu kam jam hịhị.

Ụka kam nwà okolobya pwụ́ ẹgẹhẹ, m̀ dọmwụ nyọka nwà ere ọnyọọngịrị. Ụka nya ọgbanyẹ ere ọnwànwa kaa du kam kaa chị ọkẹkẹnị. Ma ụka kam nwà kpoye, ọkịlẹtụ kaa lam eje. Ọ lam lala o-ri ọhịhị nyam nyị́ la etu ka. Ọkịlẹtụ kaa kpụm enyi, kpụ m dọmwụ kaa wu ịlọm ju ube ẹ-ẹpwụ nya ahyẹẹnụ ịmanyị tị́. M̀ dọmwụ nyọka kụ irya kori kọ ka há gụ nyam ọ-ka ju orinwa.

Ụka kam gu ẹka 20, m̀ yé ịngịhyẹ ọlẹ kọ kaa dam ụbwọ lịlọm pyịnyẹng. M̀ kaa ke ụrụ wo la eje nya alagbụrụ. Eje ịwẹ kaa jum ọngịrị, m̀ myịmyị kaa mwahị nya angịkịla ịlẹ kị kaa ke ụrụ wo eje ịlịnyị. M̀ pẹhi ịnyị nyam ị nwà yẹẹyẹẹ, bwuru ụrụ nyam iwa, bala ọ-kaa kụrụ ang lala angị mweje ịlẹ kị kaa hám. Nyọlẹ kọ nọ chẹẹ lẹ, ḿ kaa họ ẹla kpahị ju kaka, m̀ kaa ju agbama kaka kpoye, dọmwụ kaa rwarụ ta alugbiyegu nyam ụka myị́ ụka.

M̀ me ká eje ịlịnyị ka ya ọkẹkẹnị ham, ma ọkọkọ nya ọọwa lẹ, ọkịlẹtụ kaa kpụm enyi. Ọhịhị nyam yẹda gbang-gbang! Ịnyịnyị ụka kam wo ẹla ọtịpyọ u-uhye nya angị mweje ịlẹ kịị hám lụmẹ, ọ kaa lam lala o-ri angịịwa nyị dam chị ọpyị lẹ.

Ụka ọwẹ, m̀ myịmyị dọmwụ nyọka la irya nyọka ju orinwa myịmyị, ugbẹnyị lẹ m̀ tịtọ nyọka họ ịnyị. Ang ọlẹ kọ wum kpa kem à ri uhi nya abwọlẹ ká ẹla ọọwa ka gu ịnam ẹẹ. M̀ họ́ọ lụmẹ, ọ tị họ ang lụmẹ-lụmẹ ham lẹ. Iwe-ahụrụ ọlẹ kam ji wẹ jụ́m kaka kpoye. Ḿ tịtọ nyọka kịnyaa ja hịhị kaka, ḿ tị ka jẹ́-ẹ nwụ ịlọm ka ịnyịnyị.

M̀ dọmwụ nyọka wa apwụ nya oja ịlẹ kị da la òja nya Russian. Ụpwụ ọhẹ bwu ẹpwụ nyaa joja nya ọlẹng o-ru ohi ọhẹ ọlẹ kọ kaa họ ụkụrwọ ị-ịchọọchị. Ọọwa lẹ, irya nyọka họ ụkụrwọ ha Ohe à tị jụ wẹ ẹpwụ nyam la ọngịrị-ọngịrị lẹlẹ. M̀ ya ẹla ọlọkịlẹtụ nyam wuu ji Ohe ẹ-ẹpwụ nya abwọ ọrịrị. O ri ịngịhyẹ ọlẹ kam họ ẹnẹnẹhẹ lẹka. M̀ bịlẹ Ohe kọ ka mẹjẹ́m jaabwọ kam ka bwu la ọhịhị o-ju etu. Ụka kam wẹẹ raabwọ ọwẹ, olegu dam chaa. Ẹla ọlẹ kọ họ ba ọọwa ba à dọmwụ la ẹbyẹbyị gụ wẹẹ lẹ. Awa imiiye ẹ-ẹkpẹ nyọlẹ kam raabwọ kpá lẹ, Olibeenu nya iJihova ọhẹ à yụbwọ kpụ ụgbẹyị nyam bala o-ya ẹla nya ịBayịbụụ ọjẹ́jẹ balam lẹlẹ. M̀ myị nyori Ohe à wẹ abwọ ọrịrị nyam wẹ lẹ. Ẹnẹwẹ ọhịhị onyeewe nyam ọlẹ kọ myị̀ la ọkẹkẹnị à dọmwụ lẹlẹ.

JAABWỌ KÁ ỊBAYỊBỤỤ YẸ ỌHỊHỊ NYAM DA:

Nanana nyori ọ lam ujwo, m̀ go ang myị́ ang nyam ọlẹ kọ la ịngịngịhyẹ ka họ bala eje nya agbụrụ chịịrụ. Ọ lịnyị odu lẹ, eje ịwẹ á myị rụ hi ọkịlẹtụ nyam ka lụka ọtata. Ụka myị́ ụka kam chịpwụrụ bwu ẹga ọlẹ kị juwa du eje ịlịnyị, m̀ kaa kpịtịya nya ọhịhị onyogo nyam. Ḿ tịtọ kam ka ya ang inyogo ịwẹ jula ang ịnyịịla ịlẹ kị wẹẹ da ụtẹ weji ọ-ọkịlẹtụ bala irya nyam lẹẹlẹẹ kaka. Chajị nya ọọwa lẹ, m̀ kaa mamachịng cheji ba ẹga ịlịnyị. Ịnyịnyị, ụka myị́ ụka kam la ọmayẹ nyọka kụ irya nya ala ịlẹkpẹ, m̀ kaa raabwọ yẹẹyẹẹ ha iJihova. Ọ-họ ịnyị kaa dam ụbwọ nyọka la “okpunyi nya Ohe Oluhye ọlẹ kọ kaa kpoye nya ọ-jẹ́ myịmyị nya angịnyị ehe wuu.”—Ala iFilipayị 4:7.

Jaabwọ kam wẹẹ jẹ́ ịBayịbụụ, m̀ wẹ ka jẹ́ nyori angịnyị nya ịKịrayịsị la ụkụrwọ nyọka ya ọmyịmyị nyaa dodehe je angịkịla. (ỊMatiyu 28:19, 20) M̀ kaa ya nyori am nyị ka jwọọ họ myị́ ẹnẹnẹhẹ ka. Ma, ang inyeewe ịlẹ kam wẹẹ jẹ́ kaa ya ọkẹkẹnị bala okpunyi ham nyịlẹhị-ịlẹhị. M̀ jẹ́ nyori ọ chịla ká angịkịla ka jẹ́ ẹlịlẹhị ịwẹ ịnyịnyị. Lẹ m̀ dọmwụ nyọka ya ẹla ọlẹ kam wẹẹ jẹ́ je angịkịla, nanana nyori m̀ juhi. Ọ tị lam ẹbyẹbyị nyori ẹla o-ya je angịkịla u-uhye nya ang ọlẹ kam wẹẹ jẹ́, dam ụbwọ ịnyịnyị nyọka juhi ka. Ọ myịmyị du ká ẹla ọlẹ kam myị la dụtẹ weji gbọng-gbọng ẹ-ẹpwụ nya ọkịlẹtụ nyam.

APYOBWUNA ỌLẸ KAM YÉ:

Ọlẹẹlẹẹ m̀ ri ọrụ-ahụ ọlẹ kọ chị ọkẹkẹnị yẹẹyẹẹ lẹ, m̀ tị chị ọkẹkẹnị myịmyị nyọka jẹ́-ẹ da angị ịmanyị-ịmanyị ụbwọ wẹ ka jẹ́ ịBayịbụụ, tụ́ ọọnam ọnyang bala ịnam. Ịgba ọ-gba ha iJihova bala ọ-da angịkịla ụbwọ jọ́ọ ya etu ha ọhịhị nyam lẹ.