ỊBAYỊBỤỤ KAA YẸ ỌHỊHỊ DA

Ịyẹ à tị́ da ọngọ kaa da ẹchị nya okpoko bala ọngọ ka ẹpwa nya angịnyị ka go ang yoyi ụbwọ nyọka pẹhị ohịhị ọlịnyị beji? Wa ẹla ọlẹ kọ ya lẹẹ.

“Ayịlọ nya ụnyịrẹ ọ-kpa rụnyẹ hám yẹẹyẹẹ.”—RICHARD STEWART

ẸKA ỌLẸ KỊ MỌỌ: 1965

ẸPWỤMA: JAMAICA

EGO: ỌNGỌ DA ẸCHỊ NYA OKPOKO BALA OLUGURU ẸLA

EGO NYAM: Ị kpam nwà e-epweji nya Kingston, ko ri egbeju ẹpwa nya Jamaica. Alepweji ọwẹ-ẹ́ la ang ka, angịnyị myịmyị ju iru lụmẹ ụ-ụwa. Angịnyị lụmẹ-lụmẹ ụ-ụwa á la ụkụrwọ ka, uguru ẹla ọhọhọ tị lụmẹ ịnyịnyị. Angịnyị kaa kụ la uko ụka myị́ ụka chajị nya aluguru ẹla. Ahyẹẹnụ ịlẹ kam kaa wo la anụ nya ọkọnị ka á kaa la ịmanyị ka.

Ịnam ri ọngọ jụ ụkụrwọ họ yẹẹyẹẹ, ọ tị kaa maga nyọka kpẹhị rịrịm am bala aanam ichiche. Ọ yahị du ka ube-ụpwụ ọnyịịla. Ube-ụpwụ á kaa hám ka, ma ayịlọ nya ụnyịrẹ ọ-kpa rụnyẹ kaa hám yẹẹyẹẹ. M̀ kaa chị ube-ụpwụ da chajị kam ka jẹ́-ẹ ka ẹga ọ-kọ ayịlọ, m̀ dọmwụ kaa kụ ụnyịrẹ ịlụwa ịnyịnyị.

Ọ́ tata ene kam dọmwụ nyọka da ẹchị nya okpoko u-uhye nya ọngọ ka kụrụ ayịlọ nya ụnyịrẹ ọkụkụ kaka. M̀ hu ọhịhị nyam wuu ju kele. M̀ la ọhịhị nya ụchị ọhọhọ bala ọ-kaa họ ụya bala anyang lụmẹ-lụmẹ. M̀ kaa nwà igbo bala o-nu angịnyị ang la agbụrụ nyọka kpa kpẹhị rịrị ịlọm. M̀ la ịkọnị myị ang myị ang, ma m̀ ji Ohe obe nyori ḿ nwụ ọngọngọhẹ ụka kam kaa yoyi ka.

Ụka ohyẹẹkpẹ angị chị ugbohụ wum bala ọ-yam du ka ube nya agba chajị nya uguru ẹla nyam. Ma ụka kam kpehe, m̀ kịnyaa la uguru ẹla ọwọwa ọhọhọ. M̀ dọmwụ tịpyọ gụ olene. Ịlẹhị lẹ, ḿ me ọngọlịnyị ẹ-ẹhị ka, ma m̀ kaa họ ang myị́ ang ọlẹ kọ hám, m̀ kaa ju agbama hyaa, bala ọ-họ ẹla ọkwọ-ọkwọ. Irya nya ịlọm-ịlọm kem m kaa kụ lẹ.

JAABWỌ KÁ ỊBAYỊBỤỤ BWU YẸ ỌHỊHỊ NYAM DA: Ụka ọlẹ kam wẹẹ họ uguru ẹla ọwẹ, ịnam dọmwụ nyọka jẹ́ ịBayịbụụ bala Alibeenu nya iJihova. M̀ yẹ jaabwọ ká ọọwa yẹ abwẹla nyamwụ da, lẹ m̀ tịtọ nyọka jẹ́ gụ ọọwa. M̀ tịtọ nyọka jẹ́ ang ọlẹ kọ yọọ da, lẹ m̀ dọmwụ nyọka jẹ́ ịBayịbụụ bala Alibeenu nya iJihova ịnyịnyị.

M̀ yẹ nyori ang ọmẹjẹ nya Alibeenu nya iJihova datị hi ịnya ala ịgba ọgbagba ịkịla. Ang ọmẹjẹ nyaa wuu kaa bwu ẹpwụ nya ịBayịbụụ. Ịwa kem à kaa ya ẹla Ohe bwu ẹpwa ka ẹpwa jaabwọ ká Angịnyị nya ịKịrayịsị ịlụka nya ọgbanyẹ kaa họ lẹ. (ỊMatiyu 28:19; Ụkụrwọ nya Alẹrụ 20:20) M̀ jẹ́ myịmyị nyori m̀ yé ịgba ọgbagba nyịlẹhị lẹ ụka kam yẹ ọháha ọlẹ kị kaa mẹjẹ ẹ-ẹga nya awụlẹ.—ỊJọn 13:35.

Bwula ẹla ọlẹ kam wẹẹ jẹ́ bwu ẹpwụ nya ịBayịbụụ, m̀ wẹ ka yẹ nyori m̀ baba nyọka yẹ ang lụmẹ-lụmẹ da ẹ-ẹpwụ nya ọhịhị nyam. M̀ jẹ́ nyori ụya ọhọhọ wụ́ iJihova ẹjẹ bala o-ri m̀ baba nyọka cheji ba ịhọhọ ịlẹ kị kaa chị ịnyịrọ nyam ịrị, kori kam tịtọ nyọka họ ẹla kpọọ ịpyọ. (2 Ala ịKọrịntị 7:1; Ala iHiburu 13:4) Ọ lam ẹbyẹbyị ụka kam wẹ ka jẹ́ nyori ang myị́ ang kam họ kaa gu iJihova ọ-ọkịlẹtụ, ọ kaa wọọ ẹjẹ lee ọ-kpa ọkẹkẹnị wọọ. (Etu 27:11) Lẹ m̀ cheje nyọka pẹhi igbo ọnwànwa, pẹhi ịkọnị nyam, bala ọ-yẹ abwẹla nyam da ịnyịnyị. Ịngịhyẹ ọlẹ kọ lam ujwo nyọka yẹda wuu à ri ọhịhị nya ụya ọhọhọ bala ẹchị nya okpoko ọdada lẹlẹ.

Ụka nya ọgbanyẹ, ḿ tịtọ ká aligu nyam ka jẹ́ nyori m̀ wẹẹ jẹ́ ịBayịbụụ bala Alibeenu nya iJihova ka. Ma ọọwa yẹda ụka kam wa ụpwụ nya ịMatiyu 10:33, ká iJisọsị yẹkẹẹ: “Ma, ọng myị́ ọng ọlẹ kọ tị ka pwam am ịKịrayịsị rwarụ yẹkẹẹ, ọwa nyị ri ọngịnyị nyam kpong-kpong ka aalẹ, am ayịdang tịtị ka pwa ọngọọwa rwarụ ị-ịlahị nya Adam olepwoohe ịnyịnyị.” Ẹlẹwẹ gum gbịla nyọka ya je aliko nyam nyori m̀ wẹẹ jẹ́ ịBayịbụụ bala Alibeenu nya iJihova. Ọ laa ẹbyẹbyị kaka kpoye. Í jẹ́ nyori ọngịnyị ọlalam ka jẹ́-ẹ tịtọ nyọka ri Ọngịnyị nya ịKịrayịsị ka. Ma m̀ byaa nyori ḿ tịtọ nyọka la ịngịngịhyẹ ka họ bala ọhịhị nyam onyogo kaka.

APYOBWUNA ỌLẸ KAM YÉ: Ịnam chị ọkẹkẹnị yẹẹyẹẹ nyọlẹ kọ yẹ nyori m̀ wẹẹ kpa ẹla ọlẹpwụ nya ịBayịbụụ họ ụkụrwọ ọ-ọhịhị nyam. Ọlẹẹlẹẹ ọ́ kaa chị uko kori kam juwa họ ang ọtịpyọ kaka. Ahị kaa ya ẹla u-uhye nya ang ọlẹ kọ kaa tụ́ụhị ju awụlẹ chwẹẹ, ko ri ọháha ọlẹ kahị la ẹ-ẹga nya iJihova. Ụka ọhẹ kori kam kpịtịya nya ụma nya ọhịhị ọlẹ kam la ụka ọhẹ lẹ, ang ịlẹ kam yẹda myị́ bwula ụbwọ ọdada nya iJihova kaa lam ẹbyẹbyị. Imyi nya ụya ọhọhọ á kaa nwụm kaka, ḿ tị la ọhịhị nya ang ụdụ okuku jaabwọ kam kaa họ ene-ene kaka ịnyịnyị.

Kori kam ke ụrụ wo ẹla ọlẹpwụ nya ịBayịbụụ ka ịnọ, ọhẹka m̀ ka gbu alẹ anyị lee o-juwa u-ube nya agba lẹ. Ọlẹẹlẹẹ, m̀ la ugbiyegu ọnyịịla ọlẹ kọ kaa chị ọkẹkẹnị. Ọ kaa ya ọkẹkẹnị ham nyọka gbịgba ha iJihova bala ahụ nyam ọlẹ kọ kaa chẹkpẹ jum bala ọnyị ọnyang ọlẹ kọ kaa kpịlọmwụ keji ham yẹẹyẹẹ. M̀ ji iJihova obe nyọlẹ kọ ya iwe ham nyọka ri ụpa nya ugbiyegu nyamwụ ọlẹ kọ myị la ọháha. M̀ ji Ohe obe nyọlẹ ká ọngịnyị maga nyọka mẹ ẹla ọlẹpwụ nya ịBayịbụụ jẹ́m. Iwe ọlẹ kam la nyọka da angịkịla ụbwọ jẹ́ ẹla ọlẹ ká ịBayịbụụ mẹjẹ kaa myịm lẹhị yẹẹyẹẹ ịnyịnyị. Ọ myịm lẹhị gụgụụgụ nyọlẹ ká iJihova mẹ ọnahị nyamwụ jẹ ẹ-ẹga nyam bwula ọ-tụm bịlọmwụ.

[Ụpwụ Ọdada ọ-kpọyị]

“M wẹ ka jẹ́ nyori ang myị́ ang kam họ kaa gu iJihova ọ-ọkịlẹtụ, ọ kaa wọọ ẹjẹ lee ọ-kpa ọkẹkẹnị wọọ”

[Ifoto]

Am bala ahụ nyam bala ọnyị nyahị

[Ifoto]

M̀ yẹ nyori abwẹla nya ịnam yẹda yẹẹyẹẹ