• ẸKA ỌLẸ KỊ MỌỌ: 1963

• ẸPWỤMA: BRITAIN

• EGO: Ọ LA ỤKỤRWỌ OLIHI ỌTỤKA-ỌTỤKA

EGO NYAM:

Ị mam ịị Croydon, South London. Am à ri ọnyị ọharwọnyẹ ẹ-ẹpwụ nya anyị ihikichu ịlẹ ká adam bala ịnam ma lẹ. Adam bala ịnam bwu Caribbean island ọla St. Vincent. Ịnam kaa ka ịchọọchị nya Methodist. Ịlẹhị lẹ, ang ọjẹ́jẹ kaa kpụm ịpyọ yẹẹyẹẹ, ma ḿ tịtọ nyọka jẹ́ Ohe ka. Ụka nya ọmwịịnyọ bwu ube-ụpwụ, m̀ kaa hụhụ ba ọnụ enyi ba, juwa wa apwụ ịlẹ kam kpịla bwu ẹga ọ-ya apwụ guru.

Ẹka ịmanyị-ịmanyị ẹ-ẹkpẹ nyọlẹ kam họ kpá bwu ube-ụpwụ, m̀ dọmwụ nyọka la irya nya ọ-da ikpehika ụbwọ. M̀ dọmwụ nyọka họ ụkụrwọ bala angị la ẹpwa ka, angịlẹ ká èhè họ, bala angịlẹ kọọ lujwo nyọka jẹ́ ụpwụ. M̀ ka ube-ụpwụ ọgbẹgbịlẹ nyọka jẹ́ ang u-uhye nya utoji ọhọhọ la ang abwọ nya angị chị ang ehe. Ụka kam họ kpá bwu ube-ụpwụ ọwẹ, akụrwọ ịtụka-ịtụka mwụ́ wẹ ẹga nyam, ọọwa lẹ, m ja kpụdụ ịnyịnyịịnyị lẹlẹ. Chajị nyọlẹ kam la gbẹgbịlẹ, ká ụkụrwọ nyam ri irya o-ju angịnyị ju kem lẹ, ang ọlẹ kam baba nyọka kpa họ ụkụrwọ ri ikomputa bala intanẹtị. M̀ kaa ju ụgbọ ka ẹpwụma ọkịla ka hụwa lala epwihi ịmanyị-ịmanyị, kụ ịhọtẹlụ ọlẹ kọ hám gụ wuu, juwa yẹ ang ịlụwa, ka ẹga ọlẹ kị kaa chị́ ịnyịrọ nya ọngịnyị abwọ, bala ọ-ka ẹga ọ-kpa ịnyịrọ kọ ayịlọ nyaa. M̀ me ịnọ ká ọhịhị ọlẹ kọ há gụ wuu à wẹ kam la lẹ. Ḿ tị deeri nya ikpehika ịlẹ kị juwa yẹ akama ka.

JAABWỌ KÁ ỊBAYỊBỤỤ YẸ ỌHỊHỊ NYAM DA:

Ẹ-ẹpwụ nya ẹka lụmẹ-lụmẹ, m̀ kaa tịlọm wo nya ang odudu ká Ohe họhị bala etu nya ọhịhị. Ma ḿ kaa maga nyọka yé ọwẹwẹ bwu ịBayịbụụ ka. Ẹnẹhẹ la ẹka nya 1999 lẹ, Margaret ọnyịnam ochiche, ko ri Olibeenu nya iJihova bala oligu nyamwụ à jum ụga lẹlẹ. Oligu nyamwụ ọọwa mẹ ọháha jẹ ẹ-ẹga nyam. Ḿ jẹ́ ang odudu ka, ma m̀ myị ọnụ nya ịBayịbụụ ọjẹ́jẹ bala oligu nyamwụ ọọwa. Ma ḿ nwà hyaahyaa ka chajị ụkụrwọ nyam bala ọhịhị ụma ọlẹ kam la, ye ụka nyam wuu.

La arịrị nya 2002, m̀ mwụ́ ka oye ọkịla nya England. Ụ-ụwa, m̀ tịrẹkpẹ ka ube-ụpwụ ọgbẹgbịlẹ nyọka ye ụpwụ ibeenu ọgbẹgbịle ọkịla. M̀ dọmwụ nyọka ka ọjịra-jịra ụ-ụwa bala ọnyị nyam hyaahyaa gụ olene. Nanana nyori ube-ụpwụ ọgbẹgbịlẹ hám yẹẹyẹẹ, ịBayịbụụ ọjẹ́jẹ dam ụbwọ nyọka jẹ́ ang odudu ká akama ji odehe bala o-ya abwọlẹ ká akama ịwẹ ka bwu cheju. M̀ yẹ nyori ẹla ọlẹ ká ụpwụ nya ịMatiyu 6:24 ya nyori ọngọ ookpokpo nyị́ ka jẹ́-ẹ ri ọnchẹ nya ayịbaba imiiye ka, ri ẹlịlẹhị. À ka chụ ọngọ ookpokpo ọlẹ kọ ka ri ayịbang pyii bwu ẹpwụ nya Ohe bala ụdụ nya odehe. M̀ yẹ nyori m̀ baba nyọka cheje u-uhye nya ang ọlẹ kọ ka kụ ịlahị ọ-ọhịhị nyam.

Ẹka ọlẹ kọ jene nya ọwẹ, m̀ kaa ka ịBayịbụụ ọjẹ́jẹ nya ọjịra-jịra ka ẹpwa nya ọọnahị ọhẹ. Ọ-ọjịra-jịra ọwẹ, Alibeenu nya iJihova kaa jẹ́ ang bwu ụpwụ ọlẹ ko ri, Is There a Creator Who Cares About You? a M̀ jẹ́ myị̀myị̀ nyori iJihova, ko ri Ọngọ họhị ụbwọọmwụ à ka jẹ́-ẹ myị́ akama nya angịnyị ehe lẹ. U-ube-ụpwụ ọgbẹgbịlẹ, ị kaa mẹjẹ́m nyori am nyị́ baba nyọka myị nyori Ohe nyị ji ene kam nyị ka jẹ́ etu nya ọhịhị ka. Ẹlẹwẹ jum agbama nyịlẹhị-ịlẹhị. Ọya imiiye ẹ-ẹkpẹ nyọlẹ kam dọmwụ nya ube-ụpwụ ọwẹ ọkaka, m̀ tụụbwọ hyoo bala o-cheje nyọka kpa ụka nyam tụ́ ju Ohe chwẹẹ gụ ọọwa.

Ụpwụ ịgọgọ ọlẹ kọ gum gbịla nyọka yẹ ọhịhị nyam da ri Etu 3:5, 6: “Dahịhile Amkpaa lọkịlẹtụ nyang wuu, ā kpụnịrọ ang ọjẹjẹ nya ịlọng ka. Aa kpịtịya nya Amkpaa ẹ-ẹpwụ nya ang myị ang ká ka họ, aalẹ, ọ ka mẹ ụgbẹyị ọlẹ kọ pwoku jẹng.” Apyobwuna ọlẹ kam yé bwu ang ọjẹ́jẹ u-uhye nya Ohe gụ ang ụdụ lee ihi ụma ọlẹlẹhẹ ọlẹ kam ka yé bwu ube-ụpwụ ọgbẹgbịlẹ. Jaabwọ kam wẹẹ jẹ́ irya ọlẹ ká iJihova la u-uhye nya odehe bala ụkụrwọ ọlẹ ká iJisọsị họ bwula o-hu ọhịhị nyamwụ kiliya chajị nyahị, ịnyịnyị imyi nyọka hu ọhịhị nyam ju Ọngọ họhị ụ-ụbwọ à juwa nwụm lẹlẹ. M̀ hu enyi Ohe la Ọya Ohene nya 2003. Bwu ụka ọọwa kịlahị, m̀ dọmwụ nyọka hu ọhịhị nyam hukee dụmwọ-dụmwọ.

APYOBWUNA ỌLẸ KAM YẸ́:

Igu oriri nyam bala iJihova jum apyobwuna gụ ang ọkịla ọlẹlẹhẹ wuu. M̀ yé okpunyi nya ọkịlẹtụ bala ọkẹkẹnị nyọlẹ kam jọ́ọ. M̀ myịmyị kaa yé ọkẹkẹnị yẹẹyẹẹ nyọle kam wẹẹ yẹjula angịkịla ịlẹ kị kaa gbịgba ha Ohe ụ-ụgbẹyị ọlẹ kọ pwoku.

Ang ọjẹ́jẹ kaa hám wẹẹ. Ọlẹẹlẹẹ lẹ, ang ọlẹ kam wẹẹ jẹ́ bwu ịBayịbụụ bala ọjịra-jịra tịị ya ọkẹkẹnị ham lẹ. Ọ kaa kpụm ịpyọ nyọka ya ọmyịmyị nyam dodehe je angịkịla. Ụkụrwọ nyam onyeewe à wẹ ẹẹ. Ẹ-ẹpwụ nya ụkụrwọ ọwẹ, m̀ jẹ́-ẹ da angịnyị ụbwọ nyọka la ọhịhị ọnyịịla lẹẹlẹẹ bala ọ-ka la ẹhị ọrịrịị-rịrị nyọka hịhị odehe onyeewe. Dọmwụ bwu Ọya Ọharwọnyẹ nya 2008, m̀ kaa ye ịlahị nya ụgbẹyị. M̀ chị ọkẹkẹnị gụ olene. Ang ọlẹ kam la nwam ịnyịnyị. M̀ jẹ́ etu nya ọhịhị ụgbẹyị lẹ. Chajị nya ọọwa lẹ, m̀ ji iJihova obe lụmẹ.

• ẸKA ỌLẸ KỊ MỌỌ: 1973

• ẸPWỤMA: AUSTRIA

• EGO: ỌNGỌ DA ẸCHỊ NYA OKPOKO

EGO NYAM:

Ị kpam nwà e-epweji nya Braunau, Austria. Ala epweji ọwẹ kpụdụ, ang onyobyi ọhọhọ á tị lụmẹ ka ịnyịnyị. Ugbiyegu nyam kaa ka ịchọọchị ịfada, ụwa ị tịị kpam ka ịnyịnyị lẹ.

Ẹlẹhẹ kọ họ lụka nya onjwo nyam gu ọhịhị nyam yẹẹyẹẹ. Ẹnụmwụ ọhẹ la 1984 kam gu ẹka 11, am bala oligu nyam ọ-bam i-iyo ọhẹ da olo. Alẹnụ nya ẹnụmwụ ọwẹ, o gbu ọọlajị nya ẹla ọ-họ ta ang ọrụnyẹ ọ-yahị me ka. Igu nya oligu nyam ọọwa wum ejiri lụmẹ. Ẹka lụmẹ-lụmẹ ẹ-ẹkpẹ nya ẹlẹwẹ, m̀ kaa tọ wo nya ang ọlẹ kọ kaa họ tahị ụka kahị gbu wẹẹ.

Ụka kam họ kpá bwu ube-ụpwụ, m̀ kaa họ ụkụrwọ nya ila. Nanana nyori ọ bam ahị nyọka da ẹchị nya okpoko bala o-ri m̀ kaa hu okpoko ọtụka-ọtụka da ẹchị ọwẹ, ḿ kaa la akama nya okpoko ka. M̀ myịmyị kaa bịrị ụka lụmẹ-lụmẹ ju ayịlọ ọkọkọ bala ọ-la ọháha ẹ-ẹga nya eje ị-la ọngịrị-ọngịrị bala ịnya abwẹga. Ọhịhị nyam ri o-bwu ịpati ọhẹ ka ọkịla. Ọhịhị nya ụya ọyaya bala ụya ọhọhọ m la lẹ. Ọ tị kaa dam uhwo-uhwo pyịyọọ.

JAABWỌ KÁ ỊBAYỊBỤỤ YẸ ỌHỊHỊ NYAM DA:

La 1995, Alibeenu nya iJihova ọgbahị ọhẹ yụbwọ kpụ ụgbẹyị nyam bala ọ-ya ụpwụ ọhẹ ham ọlẹ ko ya ẹla u-uhye nya ang ọlẹ ká ịBayịbụụ mẹjẹ kọ kaa họ ta ọngịnyị ụka ko gbu. Igu nya oligu nyam ri olo ham wẹẹ, lẹ m̀ ye ụpwụ ọwẹ. Ḿ wa egbeju nya ẹla ọlẹ kọ ya ẹla nya igu kem ka, ma m̀ wa ụpwụ ọwẹ wuu!

Ẹla ọlẹ kam wa wẹ ịtọ ẹla nyam. M̀ tị jẹ́ ang ịkịla dọọ u-uhye ịnyịnyị. Ị kpam nwà ị-ịchọọchị nya ịfada lẹ, iJisọsị baba ẹ-ẹpwụ nya ọmyịmyị nyam gụ Ohe ịnọ. Ma ịBayịbụụ ọjẹ́jẹ rige-rige nyam dam ụbwọ nyọka ri igu bala iJihova Adịda nya iJisọsị. Ọ kpụm ịpyọ lụmẹ nyọlẹ kam jẹ́ nyori iJihova kpahị juhi bala o-ri ọ tịtọ kahị ka jọ́ọ. (ỊMatiyu 7:7-11) M̀ jẹ́ nyori ang ọlẹ kahị họ ka jẹ́-ẹ hu ọkẹkẹnị họọ lee ọ-wọọ ẹjẹ. M̀ jẹ́ ịnyịnyị nyori ọ kaa họ ẹla myị́ ẹla ọlẹ kọ kpehe bwu ọnụ nyamwụ. Ọọwa du kam tịtọ nyọka wụla ọmwụ ịlẹpwụ nya ịBayịbụụ yẹ bala ọ-jẹ́ ang kpori-kpori u-uhye nya abwọlẹ kị wẹ ka họ jịra. Ang ọlẹ kam jẹ́ ju ọmyịmyị nyam ọngịrị lụmẹ.

M̀ jẹ́ ahyaahị nyori Alibeenu nya iJihova kem à kaa maga nyọka da angịnyị ụbwọ wo etu nya ẹla ọlẹpwụ nya ịBayịbụụ lẹ. M̀ kaa kpa ịBayịbụụ nya ala ịchọọchị nyahị wa ụpwụ ịgọgọ ọnyị myị́ ọnyị ọlẹ kị da ẹ-ẹpwụ nya apwụ nya Alibeenu nya iJihova. Jaabwọ kam wẹẹ dịrẹ ẹlẹwẹ, ịnyịnyị m wẹ ka jẹ́ myị̀myị̀ nyori m̀ yé ẹlịlẹhị lẹlẹ.

Ẹla ọlẹ kam jẹ́ bwu ịBayịbụụ mẹjẹ́m nyori iJihova tịtọ kam ka hịhị ba ehile nyamwụ jẹ. Ẹla ọlẹ kam wa bwu ụpwụ nya Ala Efesọsị 4:22-24 dam ụbwọ nyọka yẹ nyori m̀ baba nyọka nyẹ ụhụ la “ọngịnyị onyogo” nyam deeji, ọlẹ kọ kaa ba “ọhịhị nya ọhọbịrị ọhọhọ” jẹ, ma nyori m̀ baba nyọka “hu ọhịhị onyeewe nya Ohe Oluhye dakụrụ,” ọlẹ kọ kaa ba irya nya Ohe Oluhye jẹ. Chajị nya ọọwa lẹ, m̀ pẹhi ọhịhị nya ụya ọhọhọ beji. M̀ myịmyị yẹ nyori m̀ baba nyọka hwabwọ la ẹchị nya okpoko ọdada, chajị ọ kaa tụ́ ọngịnyị tutu nyọka la ọháha nya okpoko bala ọ-la ẹhị ọ-chị nyànyà. (1 Ala ịKọrịntị 6:9, 10) M̀ jẹ́ nyori ene kam ka jẹ́-ẹ yẹ ang ịwẹ da ẹ-ẹpwụ nya ọhịhị nyam, m̀ ka baba nyọka ba la ọ-yẹjula aligu nyam inyogo bala ọ-ka mwahị nya aligu inyeewe ịlẹ kị kaa kpa ehile nya Ohe lala am-am.

O lujwo nyịlẹhị-ịlẹhị nyọka yẹ ang ịwẹ da. Ma m̀ dọmwụ nyọka ka ọjịra-jịra bala ọ-la aligu inyeewe ụ-ụwa. M̀ myịmyị kaa jẹ́ ịBayịbụụ kpori-kpori lịlọm. Ẹta ẹdịyẹ ịwẹ dam ụbwọ nyọka yẹ eje ịlẹ kam kaa ke ụrụ wo la da, nwụ ang ọlẹ kam wẹẹ ku ọ-ọhịhị họ, bala ọ-kpa ịlọm cheri-cheri. La 1995, m̀ hu enyi Ohe lala ọngọhẹ nya Alibeenu nya iJihova.

APYOBWUNA ỌLẸ KAM YÉ:

Okpoko bala ang ụdụ nya odehe á hám lala olene kaka. Ene-ene lẹ, m̀ kaa ju agbama kaka kpoye, ma ọlẹẹlẹẹ m̀ ri ọngọ kpẹnẹẹ lẹ. Ḿ kaa chị uko nya ijuju kaka ịnyịnyị.

Ọ hám nyọlẹ kam ji ebwo nya angịnyị ịlẹ kị kaa gbịgba ha iJihova chị odehe ọnụ wuu. Ẹ-ẹpwụ nyaa, m̀ kaa yẹ angịnyị ịlẹ kị juwa ẹ-ẹpwụ nya akama, ma kị kaa gbịgba ha iJihova kpẹẹkpẹẹ. M̀ chị ọkẹkẹnị yẹẹyẹẹ nyọlẹ kam kaa kpa ụka bala ọngịrị nyam wuu gbịgba ha iJihova bala ọ-da angịkịla ụbwọ, ọkọkọ nyọka họ ang ịlẹ kị kaa mam ma kem.

• ẸKA ỌLẸ KỊ MỌỌ: 1963

• ẸPWỤMA: ENGLAND

• EGO: ỌHỊHỊ DỌỌ CHỊ ỌPYỊ

EGO NYAM:

Ị mam England, ma ụka kam gu ẹka irwiye, ugbiyegu nyam mwụ́ rụ ka Australia. Ahị kụ ịị Gold Coast, ko ri oye nya Queensland, Australia ọlẹ ká angịnyị kaa ju ụga yẹẹyẹẹ. Nanana nyori ugbiyegu nyam-ḿ kpụdụ ka, ịngịngịhyẹ ọlẹ kahị baba á nyẹhị ka.

Nanana nyori ọhịhị chịm kpẹẹ, ḿ kaa chị ọkẹkẹnị ka. Ọhịhị-ị́ la jaabwọ kam me irya ka. Adam kaa nwà ere kaka kpoye. Ẹla nyamwụ-ụ́ kaa hám lụmẹ ka, ọgụgụụgụ ri ọlajị nya ere ọnwànwa nyamwụ bala abwọlẹ kọ kaa kpa ịnam. Ọ nọ chẹẹ, kam jẹ́ ang ịlẹ kọ chịpwụrụ bwu ụka ko ri isoja ịị Malaya, ene kam jẹ́ ang odudu ká ọhịhị nyamwụ la ịịwẹ.

M̀ dọmwụ nyọka nwà ere kpoye-kpoye ụka kam juwa ụ-ụpwụ iwo wẹẹ. Ụka kam gu ẹka 16, m̀ rụ hi ube ụpwụ kaka ri ọngọ da ẹwụ ẹ-ẹpwụ nya enyi. M̀ dọmwụ nyọka mile eteji ịnyịịngịrị bala ẹchụ ọtaba ọ-bam ahị. Kori kam nwà ere kaka lẹ, ḿ jẹ́-ẹ lịlọm kaka. Ene-ene lẹ, ọmyịmyị nya epwihi kem m kaa nwà ere kpoye-kpoye lẹ, ma nyọlẹ kọ nọ chẹẹ, m̀ dọmwụ nyọka họ ịnyị ẹnụ myị́ ẹnụ.

Ụka kam wẹẹ jahị da ẹka iwo imiiye ka ẹka iwo imiiye kụrụ, m̀ dọmwụ nyọka da ịwẹẹ nyori Ohe nyị́ ji ka. M̀ kaa yẹkẹẹ, ‘Kori ká Ohe-é ji, ịyẹ tị́ du kọ ya iwe da ká angịnyị wẹẹ yẹ akama bala ọ-kaa gbu?’ M̀ dọmwụ kaa da eje ị-kpa Ohe abyị chajị nya ọkwọ ọla odehe ọlẹ.

M̀ kpehe bwu ẹpwụ nya angi dẹwụ ẹ-ẹpwụ nya enyi ụka kam gu ẹka 23. Nyọlẹ kam họ ịnyị kpá, m̀ kaa họ akụrwọ ịdatị-datị bala ọ-rụ ka ẹpwụma ọkịla ka hụwa lala ẹka ookpokpo, ma ịngịngịhyẹ-ẹ́ myị́ ọkịlẹtụ okpenyi nyam ka. Ḿ la irya nyọka ku ịngịngịhyẹ ọ-ọhịhị lee ọ-ka họ ịngịngịhyẹ la ọhịhị nyam kaka. Ịngịngịhyẹ á kaa kpụm ịpyọ ka. Ẹpwa ọlala, ụkụrwọ ọlala, bala ọ-nwà kịlahị ẹ-ẹpwụ nya ụkụrwọ nyam á ju egbeju ẹ-ẹhị nyam ka. Ang ọlẹ kọ kaa kpụm ẹjẹ kem à ri ere ọnyọọngịrị ọnwànwa lẹlẹ.

M̀ kpịtịya nya ụka ọhẹ ọlẹ kam mama nyọka jẹ́ etu nya ọhịhị gụgụ wuu. M̀ ka Poland ụka ọọwa, ka yẹ ube nya agba nya Auschwitz, ọlẹ kị wu angịnyị lụmẹ-lụmẹ ju, ká iwe-ahụrụ ọlụwa tịpyọ kaka kpoye. M̀ wo oja nya ang inyibyi ịlẹ kịị họ ẹ-ẹgẹwẹ, ma ụka kam pwụ́ ụwa, kam kpa ẹhị nyịlọm yẹ jaabwọ ká ẹgẹwẹ ju ẹpwụ kaka ba, ọ jụm kaka kpoye. Ọ lam ẹbyẹbyị jaabwọ ká angịnyị ehe ịhyẹ wẹẹ họ angịnyị ehe aanaa ọkwọ ọlịịwẹ. M̀ jẹ wụla ube nya agba ọwẹ yẹ wuu la egbejida ẹ-ẹhị nyam juwa tọ wo nya ang odudu ká ẹla ọlịịwẹ wẹẹ họ.

JAABWỌ KÁ ỊBAYỊBỤỤ YẸ ỌHỊHỊ NYAM DA:

La 1993, nyọlẹ kam nyà kpá bwu ẹpwụma ọkịla, m̀ dọmwụ nyọka wa ịBayịbụụ kam ka yé ọwẹwẹ nya ịtọ ẹla nyam. Alibeenu nya iJihova imiiye jum ụga nyọka dirom ka ọjịra-jịra ọtụka ọhẹ ọlẹ kị wẹẹ ka họ ẹ-ẹga ọ-da olo ọhẹ ọlẹ kọ ji bam ba. M̀ cheje nyọka ka.

M̀ ka ẹga ọ-da olo ọwẹ ọya ịmanyị-ịmanyị kẹkpẹ kaka yẹ olo, ma ọjịra-jịra ọwẹ datị yẹẹyẹẹ hi ịnya olo ọọwa. Alibeenu nya iJihova ịwẹ la dụmwọ bala ọ-jẹ́ kụrụ ang kẹm-kẹm, anyị nyaa ịnyịnyị jẹ́ ẹla. Ẹla ọlẹ kam yẹ ụka nya ang oriri nya ẹnụ lam ẹbyẹbyị lụmẹ. Angịnyị ohu ịmanyị tí nya Alibeenu nya iJihova ri ang ẹ-ẹga ọ-da olo ọwẹ, ma ụka kị tịrẹkpẹ ka ẹga ọhụhụ nyaa, ḿ yẹ ụ̀pwụ̀ nya ang ọchịrị ookpokpo ụ-ụwa ka! Ọlẹ kọ tị gụgụ wuu ri, ang ọlẹ kị la nwaa, ị myịmyị la okpunyi. Ang ọlẹ kam tịtọ ọ-ọhịhị nyam lụka ọtata lẹ à wẹ lẹ. Ḿ kpịtịya nya ẹla ọlẹ kị ya bwu ịlahị ẹnụmwụ ọwẹ kaka, ma ḿ ka jẹ́-ẹ deeri nya abwẹla nya Alibeenu nya iJihova ịwẹ ẹnẹnẹhẹ kaka.

Alobyi nya ẹnụmwụ ọwẹ, m̀ kpịtịya nya ọnyị nya ọnyịnịna nya adam ọlẹ kọọ wa ịBayịbụụ bala ọ-kụ ẹhị yẹ ịgba ọgbagba ịdatị-datị. Ẹka ịmanyị-ịmanyị kẹkpẹ, ọ byim iJisọsị nyị ya nyori ahị nyị ka jẹ́ ịgba ọgbagba ọlam bwula ugbe nyamwụ. (ỊMatiyu 7:15-20) M̀ ya nyori ọ baba nyam ọ-ka kụ ẹhị yẹ ang odudu ká Alibeenu nya iJihova datị hi ịgba ọgbagba ịkịla. Lụka ọhọhẹ ọ-ọhịhị nyam, m̀ la ẹhị ọrịrịị-rịrị nyọka yé ọkẹkẹnị ọ-ọhịhị.

Epwihi ọ-ba ọwẹ ba, Alibeenu nya iJihova imiiye ịlẹ kị wụrụm ka ọjịra-jịra ọtụka mwẹẹkpẹ wẹ ẹpwa nyam. Ị tịtọ nyọka mẹ ịBayịbụụ jẹ́m, m̀ tị ye myị. M̀ myịmyị dọmwụ nyọka ka ọjịra-jịra nya angịnyị nya ịKịrayịsị.

Nyọlẹ kam dọmwụ nya ịBayịbụụ ọjẹ́jẹ, irya ọlẹ kam la ẹ-ẹga nya Ohe yẹda gbang-gbang. M̀ jẹ́ nyori ọọwa à ju ọmwụ nya imajẹ bala akama ọlẹpwụ nya odehe ọlẹ ka, bala o-ri ọ kaa jwọọ ọwa ịnyịnyị ụka ká angịnyị-ị́ họ ang ọtịpyọ. (Ọmwụ Ọdada 6:6; Eje Ọnyịịla 78:40, 41) M̀ chị eje nyọka maga kam ka họ ẹla wụ́ iJihova ẹjẹ ẹnẹnẹhẹ ka. M̀ tịtọ ká ẹla nyam ka kpọọ ịpyọ. (Etu 27:11) M̀ hwabwọ la ọ-ka nwà ere kpoye-kpoye bala ọ-ka nwà ẹchụ ọtaba, m̀ myịmyị ba la ọ-họ ụya. La Ọya Ọhata nya 1994, m̀ hu enyi Ohe lala ọngọhẹ nya Alibeenu nya iJihova.

APYOBWUNA ỌLẸ KAM YÉ:

M̀ chị ọkẹkẹnị yẹẹyẹẹ lẹẹlẹẹ lẹ. Ḿ kaa rụnyẹ ka ẹga nya ere nyọka myị́ akama nyam kaka. Ọkọkọ nyọọwa lẹ, m̀ jẹ́ jaabwọ kam ka kpa olo nyam ka ta iJihova lẹ.—Eje Ọnyịịla 55:22.

Ẹ-ẹpwụ nya ẹka iwo ịkẹkpẹ, m̀ ye Olibeenu nya iJihova ọlẹ ká ẹnyị nyamwụ ri Karen. Ịnyịnyị, ahụ nyam ma ọnyị ọnyang ha ọlẹng ọkịla ene. Ẹnyị nyamwụ à ri Nella lẹ. O ri ọnyị ọnyịịla. Ahị angị ịta-ịta kaa bịrị ụka yẹẹyẹẹ ẹ-ẹpwụ nya ẹrụ ọnyịịla ọ-kpa pyẹ, juwa da angịkịla ụbwọ nyọka jẹ́ ẹlịlẹhị u-uhye nya Ohe Oluhye. Ọhịhị nyam la etu ụka ohyẹẹkpẹ lẹ.