Ị mam ịị Santo Domingo, Dominican Republic. Am à ri ọnyị ohyẹẹkpẹ ẹ-ẹpwụ nya anyị ine ịlẹ ká adam bala ịnam ma lẹ. Adam bala ịnam ka ube-ụpwụ, ị tị myịmyị tịtọ nyọka kpa anyị nyaa nwà ụ-ụgbẹyị ọnyịịla bala ẹ-ẹga ọlẹ ká angị ịlụwa ri angịnyị ịnyịịla bala ọ-kaa ya ẹlịlẹhị. Ẹka ine ene kịị mam, adam bala ịnam tọ angị ya ẹla Ohe nya ịchọọchị nya Mormon. Ang ọkụrụ-kụrụ, agidi ojuju, bala abwẹla nya anyị alẹng ịịwa myaa lẹhị lẹ, ọ́ tata lụmẹ ẹnẹ kịị cheje nyori ugbiyegu nyahị nyị ka juwa ẹ-ẹpwụ nya angị ịhọhẹ bwu Dominican Republic kị ka ri ụpa nya Church of Jesus Christ of Latter-day Saints, lee Mormon Church kaka.

Jaabwọ kam wẹẹ nwà, ụya ọyaya ọla ịchọọchị kaa kpụm ịpyọ. Ọ myịmyị kaa hám jaabwọ ọlẹ ká ala ịchọọchị nya Mormon kaa ya ẹla u-uhye nya ugbiyegu bala abwẹla ọnyịịla. Ọ kpụm ịpyọ nyọlẹ kam ri ala ịchọọchị ọwẹ, lẹ m̀ tịtọ nyọka ri ọngọ kpa ẹla Ohe pyẹ ụ-ụwa.

Ụka kam gu ẹka 18, ugbiyegu nyam rụ ka United States chajị kam ka jẹ́-ẹ ka ube-ụpwụ ọgbẹgbịlẹ ọnyịịla. Ụka kahị juwa lala ẹka lẹ, ọnyịnịna nya ịnam bala ọrụmwụ, kị ri Alibeenu nya iJihova, à wẹ ka juhi ụga ịị Florida lẹlẹ. Ị wụrụụhị kahị ka baa ka ọjịra-jịra ọtụka. Ọ kpụm ịpyọ jaabwọ ọlẹ ká ọng myị́ ọng wuu wẹẹ wụrụ ịBayịbụụ bala ọ-da ụpwụ. Lẹ m̀ byaa nyị ya ang ọ-dụpwụ ham ịnyịnyị.

Nyọlẹ kahị nyà bwu ọjịra-jịra ọwẹ, ọnyịnịna nya ịnam bala ọrụmwụ byim nyori, ọlẹ káam nyị tịtọ nyọka ri ọngọ kpa ẹla Ohe pyẹ wẹẹ, ịwa nyị ka jẹ́-ẹ dam ụbwọ jẹ́ ẹlẹhẹ u-uhye nya ịBayịbụụ. Ẹla ọọwa hám chajị ụka ọwẹ lẹ, ụpwụ nya ịchọọchị nya Mormon m jẹ́ gụ ịBayịbụụ lẹ.

Jaabwọ káam bala ọnyịnịna nya ịnam anyị wẹẹ jẹ́ ịBayịbụụ bwu ifon, ị kaa jum ọhụ nyọka chụ ẹla ọlẹ kam myị la ka pwoku ẹla ọlẹ ká ịBayịbụụ mẹjẹ. Ị tịtọ kam ka yẹ ẹlịlẹhị lịlọm.

Ang ọmẹjẹ nya ala ịchọọchị nya Mormon ji lụmẹ-lụmẹ kam myị ju, la ọ-jẹ́ kori ká ịBayịbụụ á myị ọnụ ju ịmẹjẹ ịịwa ka. Ọnyịnịna nya ịnam ya Awake! nya ahyẹẹnụ 8 nya Ọya Ọkụrụ Ọhọhẹ nya 1995 du wam, ọlẹ ko ya ẹla u-uhye nya ang ọmẹjẹ nya ala ịchọọchị nya Mormon. Ọ lam ẹbyẹbyị nyọlẹ kam jẹ́ iru nya ang ịmẹjẹ nya ịchọọchị ọwẹ ka. Ọwẹ gum gbịla nyọka ka ịwẹbsayịtị nya ịchọọchị ọwẹ nyọka yẹ kori ká ẹla ọlẹ ká Awake! ya á ri ịlẹhị. M̀ yẹ nyori ẹlịlẹhị o ya lẹ. M̀ myịmyị jẹ́ gụ ọọwa ụka kam ka ẹga ọ-ya ang ịbaang nya ịchọọchị nya Mormon guru ọla Utah.

M̀ kaa me ene-ene nyori ụpwụ nya ịchọọchị nya Mormon bala ịBayịbụụ nyị myị ju awụlẹ. Ma ụka kam dọmwụ nyọka wa ịBayịbụụ kpori-kpori, m̀ yẹ nyori ị́ myị ọnụ ju awụlẹ ka. Ọ-chụ pwokwita, ụpwụ nya Isikẹlụ 18:4 ya nyori ugbodu okpukpuru nyị kaa gbu. Ma, ụ-ụpwụ nya Mormon lẹ, Alma 42:9 yẹkẹẹ: “Ugbodu okpukpuru á ka jẹ́-ẹ gbu ẹnẹnẹhẹ kaka.”

Datị hi ịmẹjẹ nyaa ịlẹ kị pwoku ịBayịbụụ ka, abwọlẹ kị kaa hu ẹla nya ẹpwụma kpa e-egbeju á kpụm ịpyọ ka. Ọ-chụ pwokwita, ala ịchọọchị ọwẹ ya nyori iku nya Iden nyị juwa ịị Jackson County, Missouri, U.S.A ene-ene ịnyị. Olegbeju nya ịchọọchị ọwẹ myịmyị ya nyori ụka ká Ịpyị-Adịrahụ nya Ohe ka pweeji, igomenti nya United States nya-à ka kpa kpọọ lẹ.

M̀ kaa kụ irya nya ẹla ọlẹ kọ ka họ ta ẹpwụma ịkịla, lala ẹpwụma nyam am ayịdang. M̀ gba ẹlẹwẹ kpehe ụka ká ọnyị ọlẹng ọhẹ ọlẹ kọ juwa u-ube-ụpwụ nya angị ka kpa ẹla Ohe pyẹ nya ala Mormon, wụrụm bwu ifon ẹnẹhẹ. M̀ tọọ wo kori kọ ka myị-ị̀ ka ẹwụ ka ma uya ta ọla Mormon ọkịla kori ká ẹpwụma nyaa á juwa da ẹwụ ta ịnyamwu. Ọ lam ẹbyẹbyị nyọlẹ kọ ya nyị ee! M̀ jẹ́ ang gụ ọwọwa u-uhye nya ẹla ọlẹ kam myị la bala o-ya ẹla bala alegbeju nya ịchọọchị nya Mormon. Ị byim nyori ọwẹwẹ nya ịtọ ẹla nyam nyị ri ẹla ị-kpịbaa hi angịnyị ehe ịlẹ kịị nyị ka la gbadaa gụ ọwọwa ụka ká ahịgboo nyị́ gụ olene.

Nyọlẹ ká ọwẹwẹ nyaa hám kaka lẹ, m kụ ẹhị yẹ ịlọm bala ang odudu kam tịtọ nyọka ri ọngọ kpa ẹla nya Ohe pyẹ lẹlẹ. M̀ yẹ nyori m̀ tịtọ nyamwụ chajị nyọka da angịkịla ụbwọ ịnyị. Ang ọkịla ri ihi ọlẹ ká ọngịnyị kaa la kori ko ri ọngọ kpa ẹla nya Ohe pyẹ. Ḿ jẹ́ ịngịhyẹ lụmẹ u-uhye nya Ohe ka. M̀ wa ịBayịbụụ yẹẹyẹẹ lụka ọkẹkpẹ lẹ, ma ḿ jẹ́ apyobwuna nyamwụ ka. M̀ jẹ́ irya ọlẹ ká Ohe kpa họ odehe bala angịnyị ehe ka.

Bwula ịBayịbụụ ọjẹ́jẹ nyam bala Alibeenu nya iJihova, m̀ wẹ ka jẹ́ ang lụmẹ-lụmẹ, lala ẹnyị nya Ohe, ẹla ọlẹ kọ kaa họ ụka ká ọngịnyị á gbu, bala abwọlẹ ká iJisọsị bwu lụbwọ ẹ-ẹpwụ nya irya nya Ohe ọ-họ jịra. M̀ wẹẹ jẹ́ ụpwụ ọnyịịla ọwẹ dụmwọ-dụmwọ ugbẹnyị lẹ. Ọ tị kaa kpụm ịpyọ nyọka ya ẹlịlẹhị ịlẹ kam wẹẹ jẹ́ je angịkịla ịnyịnyị. M̀ jẹ́ gbalẹ-gbalẹ nyori Ohe ji, ma ọlẹẹlẹẹ m̀ jẹ́ kaa ya ẹla balọọ lala oligu nyam lẹ. M̀ hu enyi Ohe lala Olibeenu nya iJihova la ahyẹẹnụ 12 nya Ọya Ọharwiye nya 2004. Ọ ka la ọya ịrwọnyẹ ẹ-ẹkpẹ nya ọọwa lẹ, m̀ dọmwụ nyọka kpa ụka nyam wuu họ ụkụrwọ nya iJihova lẹlẹ.

Ẹ-ẹpwụ nya ẹka ịrụ, m̀ họ ụkụrwọ e-egbeju ẹpwa nya Alibeenu nya iJihova ọla odehe wuu ịị Brooklyn, New York. Ọ kpụm ịpyọ lụmẹ nyọka jẹ́-ẹ dụbwọ họ ịBayịbụụ bala apwụ ịkịla ịlẹ kị ka ju apyobwuna ha uku ịmanyị tị́ nya angịnyị odehe wuu. Ọ kaa kpụm ịpyọ nyọka da angịkịla ụbwọ jẹ́ ang u-uhye nya iJihova wẹẹ.