Ukọchẹ 2

Ẹnẹ ch’Ọjọ?

Ẹnẹ ch’Ọjọ ochochi, ab’odu-wñ la kọ? (1, 2)

Añọla ẹgọ nya inẹ? (3)

Ẹwñ ch’ogbogaga-wñ kpaka? (4)

I dukpẹ k’a dojikanẹ ñwu lefu amojibo kpai amujiwe ẹwñ? (5)

Ẹwñ ch’ọna meji ka neke kọchẹ lugbo Ọjọ? (6)

1. Amonẹ adojikanẹ ñw amẹwñ wewe. Ama Baibul ka ñwu wa kakini Ọjọ OCHOCHI kate dọmọ. Inyi ẹwñ du efojale kpai anẹ-ilẹ. Todu ki d’iñmi ñwu wa lẹ, owñ kate dukpẹ k’a dojikanẹ ñwu.—1 Abo Kọrint 8:5, 6; Ọla Ebitẹ 4:11.

2. Ọjọ ch’enẹ od’ukọlọ wewe ama odu-wñ ch’okate. Odu lẹ che JIHOFA. Efu ojile Baibul, ma modu Ọjọ yọ kwo tak uma m’od’ukọlọ dabu ONDU abẹk ỌJO kọjọ ẹgwu-wñ. Ama ẹgba ku ma kọ Baibul, odu Jihofa dufu ef uwñ dabu ugbo 7,000!—Akwodufu 3:15; Eli Ekọ d’Ọjọ 83:18.

3. Jihofa nẹ añọla, ama id’ab e-wa n. “Ọjọ ch’Afu,” Baibul ka-i. (Jọn 4:24) Afu che ọlai ki d’atatẹ t’e-wa  le nyọnyọ. Ẹnẹ du li Ọjọ eju mama ta n. Jihofa d’ef ojale, ama ineke li ẹwñ du. (Eli Ekọ d’Ọjọ 11:4, 5; Jọn 1:18) Ẹwñ, la, ch’afu kiafọ? I ch’onẹ dab Ọjọ n. Chai, ukpahiu Ọjọ iche.—Eli Ekọ d’Ọjọ 104:30.

4. Baibul du ọla ẹnẹ ki Jihofa che tejugede ñwu wa. Idu ña kakini ẹwñ ki che kpaka che ufẹdọ, ọkpakpa, ugbeju, kpai ukpahiu. (Ọlọda Ekeji 32:4; Job 12:13; Aizaya 40:26; 1 Jọn 4:8) Baibul ka ñwu wa kakini i ñọ ch’ẹnẹ ejumoni, ẹn’umọla, i aduba, ẹn’ẹdọfo, ki n’ẹdọ ejẹ. Awa, dabu amọma ki agbomugbọ, k’a ch’okikili k’a ñw’ọche.—Abo Ẹfẹsus 5:1, 2.

5. I dukpẹ k’a dojikanẹ abẹk e chadua ñw amojibo, amufoto, abẹk ujiwe ẹwñ ef edojikanẹ wa? Ọda! (Akwodufu 20:4, 5) Jihofa kakini owñ kate adojikanẹ ñwu tila. I neke kpẹ ojima-wñ kpai ẹnẹ du abẹk ẹwñ du n. Amojibo n’ukpahiu ku ma ach’abunẹ wa n.—Eli Ekọ d’Ọjọ 115:4-8; Aizaya 42:8.

6. Ab’ache k’a m’Ọjọ nyọnyọ. Ọna’ka che lef edejutọ amẹwñ ki nyi k’a la kp’ibe nyọnyọ lugbo ẹwñ ku ma ka ñwu wa. Amẹwñ k’Ọjọ nyi du ña wa kakini iche n’ukpahiu kpai ugbeju lile. Ache li ufẹdọ-wñ ef ẹwñ du ki nyi. (Eli Ekọ d’Ọjọ 19:1-6; Abo Rom 1:20) Ọna omunẹ ka neke kọchẹ lugbo Ọjọ che lef ekọchẹ Baibul. Ef uwñ ika ñwu wa nyọnyọ ọla k’Ọjọ che. Iñọ ka ñwu wa ibe ki kpẹ kpai ẹwñ ki tene k’a che.—Emọs 3:7; 2 Timoti 3:16, 17.

[Amifoto ki joji ẹpa 5]

Akọchẹ lugbo Ọjọ kw’ef ẹwñ ki nyi kpai kw’efu Baibul