Ukọchẹ 3

Ẹnẹ che Jisọs Kraist?

Ẹwñ chi ku ma dọ Jisọs “ọmọgba” Ọnẹkẹlẹ Ọjọ? (1)

Ẹwñ chi ku ma d’ọ “Ọla lẹ”? (1)

Ẹwñ chi ku Jisọs w’efilẹ dab onẹ? (2-4)

Ẹwñ chi ki ch’ẹwñ awuwu? (5)

Ẹwñ Jisọs anyache ejọgba ananẹ? (6)

1. Jisọs d’efojale dab onẹ afu tak i w’efilẹ. Ọwñ ch’ẹwñ k’Ọjọ nyi ejodudu, todulẹ ma d’ọ “ọmọgba” Ọnẹkẹlẹ Ọjọ. (Abo Kọlọse 1:15; Ọla Ebitẹ 3:14) Jisọs kate ch’Ọma k’Ọjọ nyi kpai ọla-wñ. Taki ch’on’ilẹ Jihofa du Jisọs ch’ukọlọ dabu ‘agboji ukọlọ’ wñ ef ẹwñ omunẹ du ki nyi ef ojale kpai anẹ-ilẹ. (Ita, Ita 8:22-31; Abo Kọlọse 1:16, 17) Ọjọ ñọ d’u ch’ukọlọ dab onu agbọlaka ñw U. Ẹwñ ki chi ku ma dọ Jisọs “Ọla lẹ” dẹ.—Jọn 1:1-3; Ọla Ebitẹ 19:13.

2. Ọjọ kp’Ọma-Wñ w’efilẹ lef edu iñmi-wñ t’efu Meri. Todulẹ Jisọs nẹ ata on’ilẹ n. Ẹwñ ki chi ki ma jẹ ẹwñ ogwu adure du abẹk amajọkpa n dẹ. Ọjọ kpẹ Jisọs w’ilẹ todu ẹwñ mẹta: (1) K’i kọ wa ochochi lugbo Ọjọ (Jọn 18:37), (2) k’i gwọnyu ẹdọfoo ki jọkpa, k’i t’ẹwñ uwọli nọ tanẹ ñwu wa k’a t’ọubi (1 Pita 2:21), kpai (3) k’i d’ọlai-wñ che ichẹbọ ki gba-wa tanẹ kw’ef adure kpai ukwu. Ẹwñ chi k’e-i cheju-wñ?—Matiu 20:28.

3. Lef ekọ gbomu ukọ Ọjọ, ọnẹkẹlẹ ejodudu, Adam, f’ẹwñ ki Baibul d’ọ “adure” ta. Todulẹ Ọjọ f’ajọ-wñ ka t’ukwu. (Abakwanẹ 3:17-19) Iñọ dẹ alu ki dukpẹ ki adẹ eju Ọjọ gẹ n, todulẹ iñọ jọkpa gẹ n. Ẹmẹma igbanagbo tak i lekwu. Adam f’adure nadala tugbo amoma-wñ chakaa. Ẹwñ ki chi k’awa onugo agbanagbo, k’a chọga, k’a kwu dẹ. Ab’abilẹ neke nẹ ujadu ke?—Abo Rom 3:23; 5:12.

 4. Jisọs ch’ẹnẹ ki jọkpa dab Adam. Ama alu k’Adam dẹ, Jisọs ch’egbomu Ọjọ gbọ jali ichaka ch’efu ajama lile. Todulẹ ineke du ọlai-wñ ki jọkpa lẹ che ichẹbọ k’i rọmẹ adure Adam. Ẹwñ ki Baibul d’ọ “ẹwñ ukoji ọmẹ” dẹ. Amọma Adam neke futanẹ kw’ef ajọ ukwu lẹ. Abo du ku ma kẹdọno Jisọs ma neke t’adure ma nọ ñwu ma k’u ma n’iñmi ogbegbelẹ.—1 Timoti 2:5, 6; Jọn 3:16; Abo Rom 5:18, 19.

5. Ẹgba ki d’efilẹ Jisọs ch’ọga amonẹ kpa, du ujẹwñ ñw abo k’ebi akpa ma, ila f’afu lile ẹdọ hi-wanẹ. Iñọ k’abo ki kwu kwanẹ gẹ. Ẹwñ chi ki che amẹwñ awuwu taa? (1) I li ejumoni abo ku ma a chọbata, ila tene ki ch’abunẹ ma. (2) Ẹwñ awuwu-wñ du ña kakini ich’Ọma Ọjọ. (3) Ma du ña ẹwñ ki a nya che ñw abilẹ ku ma gbomugbọ ẹgba ki anya j’ọfẹ dab Onu oji anẹ-ilẹ.—Matiu 14:14; Mark 2:10-12; Jọn 5:28, 29.

6. Jisọs lekwu Ọjọ la m’u du dajikwanẹ dab ẹwñ ẹnyi afu, taki mu dabi t’efojale. (1 Pita 3:18) Kw’ẹgba lẹ, Ọjọ m’u du ch’Onu. Piopio Jisọs anya ko amẹwñ ẹbiẹnẹ kpai ọbata chakaa kwo anẹ-ilẹ-i.—Eli Ekọ d’Ọjọ 37:9-11; Ita, Ita 2:21, 22.

[Amifoto ki joji ẹpa 7]

Ẹwñ ki manyu ukọlọ Jisọs che ukọ ekọ, awuwu eche, kpai ichaka che edu ọlai-wñ ñwu wa