Ukọchẹ 5

Ẹwñ ch’Ibe k’Ọjọ Kpẹ ñw Anẹ-ilẹ?

Ẹwñ chi ki Jihofa nyi anẹ-ilẹ? (1, 2)

Ẹwñ chi k’anẹ-ilẹ ma che paradais abajọ-i n? (3)

Ẹwñ anya che kẹrẹ b’abo ẹbiẹnẹ? (4)

Ejọgba, ẹwñ Jisọs anya che ñw amẹn’ọga? amanagbo? abo ki kwu? (5, 6)

Tak ẹnukpẹ ef amẹnyọ ejọgba lẹ, ẹwñ dukpẹ k’ẹ che? (7)

1. Jihofa nyi anẹ-ilẹ-i todu k’onilẹ ki j’ura edodo ef uwñ ogbegbelẹ. I tene k’abo ọkpakpa ki nẹdọ ẹbọ ku ma dodo efilẹ ẹgbadu. (Eli Ekọ d’Ọjọ 115:16; Aizaya 45:18) Anẹ-ilẹ akpabiẹ gbegbelẹ n; i adago ogbegbelẹ.—Eli Ekọ d’Ọjọ 104:5; Akọla ñw Ujeju 1:4.

2. Tak Ọjọ ch’onẹ, I tu ọwọ’ka kekele anẹ-ilẹ tak i f’u che paradais ọmẹmẹlẹ. I d’ọ uchẹ Idẹn. Emi oñ iko ọnẹkẹlẹ kpai onobulẹ lẹ, Adam kpai If jọ. Ọjọ kp’ibe ñwu ma ku ma nẹ amọma ku ma f’anẹ-ilẹ dẹdẹ kpẹkọ. Ẹmẹma ma ma f’ilẹ chakaa che paradais.—Abakwanẹ 1:28; 2:8, 15.

3. Adam kpai If gwejugede kpọda Ọjọ biẹ. Todulẹ Jihofa mu ma ko b’ef uchẹ Idẹn lẹ tẹ. Paradais lẹ lenyọ. (Abakwanẹ 3:1-6, 23) Ama Jihofa gbenyọ ibe ki kpẹ ñw anẹ-ilẹ-i n. I gbalutanẹ kak i anya ch’o paradais, ugbo kabilẹ adodo ogbegbelẹ. Ab’i anya che e-kidẹ taa?—Eli Ekọ d’Ọjọ 37:29.

4. Tak ilẹ-i ki rida paradais, ma anya ko amẹbibi kwo tila. (Eli Ekọ d’Ọjọ 37:38) E-anya che iko Amagẹdọn, ki ch’ogwu Ọjọ ki ako amẹwñ ẹbiẹnẹ w’ukpoji. Arọne-wñ, m’amu Setan du tef uny’uga ọdọ 1,000. E-che kakini amẹnẹbibi ñ’a bọ ku ma akpanẹ-ilẹ-i biẹ gẹ n. Abo Ọjọ kate anya ye.—Ọla Ebitẹ 16:14, 16; 20:1-3.

 5. Ẹgbalẹ Jisọs Kraist anya j’ọfẹ dab Onu oji anẹ-ilẹ-i ọdọ 1,000. (Ọla Ebitẹ 20:6) I anya du adure kw’ef ẹdọ-wa kpai añọla-wa ẹmẹma. A nya d’abilẹ ki jọkpa alu k’Adam kpai If dẹ gbagẹdẹ tak uma dure lẹ. Ẹgbalẹ ọga, ogbo, kpai ukwu ñ’adọmọ gẹ n. Ma anya ch’ọga amẹnọga kpa, amanagbo anya d’okolobia kpai igbẹlẹ gẹ.—Job 33:25; Aizaya 33:24; Ọla Ebitẹ 21:3, 4.

6. Adiko Ọfẹ Icham Nyọgwọkọ Jisọs lẹ, abilẹ ku ma kẹdọno anya chukọlọ ku ma filẹ-i chakaa rida tu paradais. (Luku 23:43) Abalẹ gẹ, ma ak abo miliyọn ki kwu dajikwanẹ t’ef iñmi on’ilẹ anẹ-ilẹ-i. (Ẹwñ 24:15) I chẹwñ ku ma che ẹwñ k’Ọjọ tene ugbo ma, ma anya deju alo ogbegbelẹ ef anẹ-ilẹ-i. I ma dabalẹ n, ma anya kp’uma biẹ ogbegbelẹ.—Jọn 5:28, 29; Ọla Ebitẹ 20:11-15.

7. Ibe k’Ọjọ kpẹ abakwanẹ lẹ anya che. Ẹtene k’ẹ n’ukpẹ ef amẹnyọ ejọgba-i? I dabalẹ, idukpẹ k’ẹ n’akọchẹ lugbo Jihofa k’ẹ n’agbomu amẹwñ ki tene lẹ. Enyam ujeju Unyi Ujeju Amẹnibenu Jihofa ugbo kẹ dẹ neke chabunẹ-wẹ k’ẹ che abalẹ.—Aizaya 11:9; Abo Hibru 10:24, 25.

[Foto ki joji ẹpa 10]

Paradais lenyọ

[Amifoto ki joji ẹpa 11]

Ubi Amagẹdọn, anẹ-ilẹ anya rida tu paradais