Ukọchẹ 6

Ẹwñ ch’Ojanẹ Ọjọ?

Ugbo Ojanẹ Ọjọ dẹ? (1)

Ẹnẹ ch’Onu-wñ? (2)

Ab omunẹ n’ukpẹ ej’ọfẹ kpai Onu lẹ? I dabalẹ, onẹ monu? (3)

Ẹwñ du ña kakini adef ọjọ otitala? (4)

Ẹwñ Ojanẹ Ọjọ anya che ñw abilẹ ejọgba? (5-7)

1. Ẹgba ki d’efilẹ, Jisọs kọ abo ki t’ọubi k’u ma chadua ñw Ojanẹ Ọjọ. Ojanẹ che gọmẹti k’onu’ka ch’agboji-wñ. Ojanẹ Ọjọ che gọmẹti kpaka. Ma du dago efojale ila anya j’onu oji ilẹ-i. I anya che odu Ọjọ k’i fọ. I anya jẹ ñw ẹwñ ki d’Ọjọ ẹdọ ki che alu ki che efojale lẹ ki ñọ che anẹ-ilẹ-i gẹ.—Matiu 6:9, 10.

2. Ọjọ gbalutanẹ kakini Jisọs anya d’Onu Ojanẹ Ñwu. (Luku 1:30-33) Ẹgba ki Jisọs d’efilẹ, iche du ña kakini i anya che Agboji ki mọla, ochochi, ki jọkpa. Ẹgba ki dabi t’efojale, ma d’u j’Onu Ojanẹ Ọjọ ababa lẹ n. (Abo Hibru 10:12, 13) Ef ọdọ 1914, Jihofa d’ọda ukpahiu k’I gbalutanẹ lẹ ñw Jisọs. Akw’ẹgba lẹ, Jisọs j’onu efojale dab Onu ki Jihofa chi.—Daniẹl 7:13, 14.

3. Jihofa ñọ tu abọkẹlẹ kpai abobulẹ ẹdọ ekono kw’anẹ-ilẹ ku ma lo t’efojale. Ma anya j’ọfẹ kpai Jisọs dab amonu, amakajọ, kpai amatama oji abilẹ. (Luku 22:28-30; Ọla Ebitẹ 5:9, 10) Jisọs dọ amaj’ọfẹ kp’owñ ef ojanẹ-wñ lẹ “ujọ amala ree.” Aluka ma che 144,000.—Luku 12:32; Ọla Ebitẹ 14:1-3.

4. Ogbogbolo ki Jisọs d’Onu, imu Setan kpai amonuchẹ-wñ bibi lẹ ko rikpolo kw’efojale w’ef anẹ-ilẹ-i. Ẹwñ ki chi k’ẹwñ abiẹnẹ ololo anẹ-ilẹ kw’ọdọ 1914 lẹ dẹ. (Ọla Ebitẹ 12:9, 12) Ogwu, ukpọta, atulubọ, ugbitẹrẹ ekpọranẹ—abe-i du che ọwọ’ka “ujiwe” ki du ña kakini Jisọs aj’ọfẹ mẹ kakini ọkpanachi-i la d’ef ọjọ otita- wñ mẹ.—Matiu 24:3, 7, 8, 12; Luku 21:10, 11; 2 Timoti 3:1-5.

5. Piopio Jisọs anya kajọ amonẹ, i adamaru b’amonẹ tẹ, alu k’adide ala ad’amala ru b’amewo tẹ. “Amala” lẹ ch’abo ku ma d’ọla-ma ña kak uma ch’abo-wñ ẹnyọ. Ma anya gba iñmi ogbegbelẹ anẹ-ilẹ. “Amewo” lẹ chabo ku ma Ojanẹ Ọjọ tinyọ. (Matiu 25:31-34, 46) Ejọgba pẹẹ, Jisọs anya kp’abo ki dab amewo lẹ biẹ rinyọ. (2 Abo Tẹsẹlonaika 1:6-9) I chẹwñ kẹ tene k’ẹ ch’ẹnẹ’ka efu “amala” Jisọs lẹ, ẹneti ru uchẹnyọ Ojanẹ lẹ tila k’ẹ la che ẹwñ kẹ kọchẹ lẹ.—Matiu 24:14.

6. Abajọ-i ilẹ chẹkpẹru ewo ewo. E-i du che nẹ gọmẹti e-wñ. Abo uchẹichi-i ajuja b’ọla-ma ẹgba du. Ama Ojanẹ Ọjọ anya gb’ẹgwu gọmẹti on’ilẹ chakaa. I ajonu dabu gọmẹti kate oji ilẹ dẹdẹ. (Daniẹl 2:44) Ẹgbalẹ ogwu, udu efẹ, kpai afuma eche ñ’a dọmọ gẹ n. Amonẹ chakaa a nya jọ dama ef urẹdọ kpai udama.—Maika 4:3, 4.

7. Adiko Ọfẹ Icham Nyọgwọkọ Jisọs lẹ, abo ẹdọ ekono anya jọkpa, anẹ-ilẹ dẹdẹ la amud i paradais. Ukpoji ọdọ icham nyọgwọkọ lẹ, Jisọs neke f’ẹwñ du k’Ọjọ ka ñwu ki che lẹ che kpa mẹ. Ẹgbalẹ tak i adu Ojanẹ lẹ dabi ñw Ata-wñ. (1 Abo Kọrint 15:24) Ẹwñ chi kẹ ma ka ñw amonukwu-wẹ kpai abo ufẹdọ-wẹ ẹwñ k’Ojanẹ Ọjọ anya che n?

[Foto ki joji ẹpa 13]

Ef ọfẹ Jisọs, ulaka eche abẹk ejuma eche adọmọ gẹ n