Ọlai Abounyi ki b’Ọjọ Ẹdọ
Ukọchẹ 8
Ọlai Abounyi ki b’Ọjọ Ẹdọ
Ẹwñ ch’ugwugwu ọkọ ef abounyi? (1)
Ab’ọkọ dukpẹ ki che kpai ọya-wñ? (2)
Ẹwñ ch’udu k’ata nẹ? (3)
Ẹwñ ch’ukpẹ ọya ef abounyi? (4)
Ẹwñ Ọjọ tene ugbo abo ki biọma kpai abimọtọ? (5)
Ẹwñ Baibul li lugbo edaru kpai edu tinyọ ọkọ kpai ọya? (6, 7)
1. Baibul kakini ọkọ choji abounyi. (1 Abo Kọrint 11:3) Ọkọ dukpẹ ki n’ọya’ka tila. Ku ma n’ọla-ma alu k’ọda ka.—1 Timoti 3:2; Taitọs 3:1.
2. Ọkọ ki fẹdọ ọya-wñ dabalu ki afẹdọ ọla-wñ onugo. K’i nache kp’owñ alu ki Jisọs che kpai abo ki tọubi lẹ. (Abo Ẹfẹsus 5:25, 28, 29) I k’i d’ẹwñ gw’ọya-wñ abẹk ech’o ọwọ ẹbiẹnẹ ọna du n. Chai, k’i na bum’ọ kpai ojima.—Abo Kọlọse 3:19; 1 Pita 3:7.
3. Ata k’i chukọlọ gbiti k’i dejutọ abounyi-wñ. I k’i ch’ọna ujẹwñ, ukpo, kpai unyi ñw ọya-wñ kpai amọma-wñ. Ata ki ñọ ch’ọna ekwu e-ef afu ñw abo unyi-wñ gẹ. (1 Timoti 5:8) Owñ atọgba e chabunẹ abo unyi-wñ k’u ma kọchẹ ẹwñ lugbo Ọjọ kpai ibe-Wñ.—Ọlọda Ekeji 6:4-9; Abo Ẹfẹsus 6:4.
4. Ọya ki ch’ẹnẹ abunẹ ẹnyọ ñw ọkọ-wñ. (Abakwanẹ 2:18) I k’i na chabunẹ ọkọ-wñ ef ekọ amọma ọla kpai enẹma gba. (Ita, Ita 1:8) Jihofa tene k’ọya ki nadeju t’abounyi-wñ ef ufẹdọ. (Ita, Ita 31:10, 15, 26, 27; Taitọs 2:4, 5) I k’i na railo ọkọ-wñ gbali.—Abo Ẹfẹsus 5:22, 23, 33.
5. Ọjọ tene k’amọma ki gbọla abo ki bi ma. (Abo Ẹfẹsus 6:1-3) I aneju k’abo ki biọma ku ma k’amọma-ma ọla. Abo ki biọma dukpẹ ku ma kp’ikobiẹ kpai amọma-ma ku ma kọchẹ Baibul kpai ama, ku ma dejutẹ ẹwñ ekwu ma ef afu kpai ọrẹla. (Ọlọda Ekeji 11:18, 19; Ita, Ita 22:6, 15) Abo ki biọma ki k’ọma-ma ọla kpai ẹkpuna ẹdọ n.—Abo Kọlọse 3:21.
6. chẹwñ k’ọkọ ñ’ọya nẹ ihianyi ejọ dama, ma chokikili ku ma d’ọla ukọ Baibul chukọlọ. Baibul d’ugbẹdọ ñwu wa k’a d’ufẹdọ ña k’a na duba. (Abo Kọlọse 3:12-14) Ọla Ọjọ d’ugbẹdọ kak edaru ch’ọna ka neke che amihianyi ree n. Ama ọya neke tu ki t’ọkọ-wñ nọ ichẹwñ (1) ki gwejugede kọ egbabo unyi-wñ munẹ, (2) ki a ch’alachi k’ọlafia-wñ kpai ọlai-wñ dejuna, abẹki (3) k’akobọ-wñ tabale ki ma jẹ che ñwu ki a dojikanẹ ñwu Jihofa n.—1 Abo Kọrint 7:12, 13.
7. Ọkọ ñ’ọya dukpẹ ku ma kẹdọn’ọla-ma tila. Ẹ ñọya eche ch’adure ugbo Ọjọ kpai ugbo ẹn’ẹkẹji. (Abo Hibru 13:4) Eb’ẹnẹ omunẹ dachi ọdọda ọkọ ñọya kate ch’ẹwñ che ọna Kiafọ kọnẹ akọla-ma ki n’ẹnẹ omunẹ. (Matiu 19:6-9; Abo Rom 7:2, 3) Ẹwñ ki Jihofa achulaka ch’ẹgba k’amonẹ kọla-ma ki ma ch’alu Kiafọ n ku ma f’ẹnẹmunẹ nẹ.—Malakai 2:14-16.
[Amifoto ki joji ẹpa 16, 17]
Ọjọ aneju k’abo ki biọma ki k’ọma-ma ọla
[Foto ki joji ẹpa 17]
Ata ufẹdọ a ch’ẹwñ ñw abounyi-wñ ẹwñ anẹ kpai e-ef afu
