Ukọchẹ 7

Etẹ Mẹr’Ọjọ ef Adua

Ẹwñ chi ki ch’ẹwñ kpaka k’a chadua ẹgbadu? (1)

Ẹnẹ dukpẹ k’a chadua ñwu, abu? (2, 3)

Ẹwñ ch’eju-wñ k’a chadua-wñ? (4)

Ẹgba dukpẹ k’ẹ chadua? (5, 6)

Ọjọ anetiru adua chakaa? (7)

1. Adua che ehiọlawanẹ kọla ñw Ọjọ. Ẹnachadua ñw Ọjọ ẹgbadu. Todu k’ẹ neke tẹmẹr’u dab onukwu ufẹdọ-wẹ. Jihofa nana gbẹ ila n’ukpahiu, tabalẹ tabalẹ i aneti ru adua-wa! Ẹ chadua ñw Ọjọ ẹgbadu?—Eli Ekọ d’Ọjọ 65:2; 1 Abo Tẹsalonaika 5:17.

2. Adua ch’ọwọ’ka edojikanẹ-wa. Todulẹ, a nachadua ñw Ọjọ, Jihofa kate. Ẹgba ki Jisọs d’efilẹ, ichadua  ñw Ata-wñ ẹgbadu, iche ñw ẹnẹ du n. Anache abalẹ. (Matiu 4:10; 6:9) I chaka dabalẹ, adua du ka che ki che ef odu Jisọs. E-du ña kakini a d’ojima ñw ugwugwu Jisọs ala kẹdọno ichẹbọ oji ekpailọ-wñ.—Jọn 14:6; 1 Jọn 2:1, 2.

3. Ẹgbadu k’a chadua akọla ñw Ọjọ kw’ef ẹdọ-wa. Aki chadua kwefu akatoji abẹk echọkalatu kw’ef ọtakada adua n. (Matiu 6:7, 8) Aneke chadua ef ugwugwu ojima du, ẹgbadu, kpai ugbodu. Ọjọ neke gbọ adua eche yẹẹ ef ẹdọ-wa. (1 Samiuẹl 1:12, 13) I anyọ k’a tene ugbo ki dẹ hio kw’ugbo amonẹ tak achadua ñw ọla-wa.—Mark 1:35.

4. Ẹwñ ẹneke chadua oji-wñ? Ẹwñ du ki chi kẹrẹb ech’onukwu-wẹ kp’owñ. (Abo Filipai 4:6, 7) Uwọli adua lẹ du ña kakini ana chadua lugbo odu Jihofa kpai ibe ki kpẹ. Añọ neke bi ki du ẹwñ k’ekwu-wñ akwu-wa ñwu wa, k’i t’adure-wa nọ ñwu wa, kpai echabunẹ-wa k’a dago ef ajama. (Matiu 6:9-13) Adua wa ki we ch’e-ọla-wa kate. Ana chadua amẹwñ ki dama kpai ẹwñ ki d’Ọjọ ẹdọ.—1 Jọn 5:14.

5. Ẹneke chadua ẹgbadu k’ẹdọ-wẹ kwanẹ k’ẹ d’ugwa abẹk ejẹnyu ñw Ọjọ. (1 Iko Iko Ẹwñ 29:10-13) Ẹna chadua ẹgba kẹ n’ihianyi k’ẹdọ ekono-wẹ d’ef ajama. (Eli Ekọ d’Ọjọ 55:22; 120:1) I cheju-wñ k’ẹ chadua tak ẹjẹwñ-wẹ. (Matiu 14:19) Jihofa dọ wa k’a na chadua “iko t’iko du.”—Abo Ẹfẹsus 6:18.

6. Idukpẹ k’a chadua gbali ichẹwñ ka f’adure gbolo ta. Iko abalẹ a gbọkọ bọ Jihofa ki li wa ejumoni ki la t’ọnọ ñw wa. I chẹwñ ka gbalu adure wa ñwu ka la che alu ka neke che k’a ñọ dabi che gẹ n, Ọjọ che ‘mọla ki tọnọ.’—Eli Ekọ d’Ọjọ 86:5; Ita, Ita 28:13.

7. Jihofa aneti ru adua amẹnọkpakpa kate. Tak Ọjọ k’i gbọ adua-wẹ, echokikili kẹ gwugwu ef ukọọla-wñ tila. (Ita, Ita 15:29; 28:9) Ẹhiọla-wẹ wanẹ tila ẹgbadu k’ẹ chadua. (Luku 18:9-14) Idukpẹ k’ẹ chukọlọ kpai ẹwñ k’ẹ chadua-wñ lẹ. Abalẹ ẹneke du ña kakini ẹn’ẹdọ ekono ẹla chema ẹwñ kẹ ka lẹ pee. Ẹgbalẹ kate tak i Jihofa adohi adua-wẹ.—Abo Hibru 11:6.