Jihofa atene k’ẹ m’ẹnẹ ki che nyọnyọ. Ẹñwu chi? Todu ichẹñwu k’ẹ kọchẹ lugbo ọla ẹnẹ ki che, ọna ki ch’ache am’ẹñwu kpai ẹñwu ki atene ñwẹ, e-lẹ ajẹñwu ẹ k’ẹ na tene k’ẹ ch’onukwu ñwu. Ẹ neke ch’onukwu Ọjọ ochochi? (Gba Eli Ekọ D’Ọjọ 25:14.) Ẹñwu ẹ neke che k’ẹ ch’onukwu ñwu? Baibul m’ohi am’ene-i du tejugede. I la ñọ jẹñwu wa ma ẹñwu ki chi k’onukwu eche kpai Jihofa ch’ẹñwu ogbogaga tule.

1. Ẹñwu Jihofa atene k’ẹ che?

“Mẹ tẹmẹr’Ọjọ tak owñ atẹmẹru mẹ.” (Jemis 4:8) Ẹñwu ch’ẹtẹ ọla ki dẹ? Jihofa atene k’ẹ ch’onukwu-wñ. Abo ka neju kaki ma neke ch’onukwu Ọjọ n todu ku ma ma neke li n. Tabalẹ, Jihofa d’amẹnwu duu ki chukpẹ k’a ma lugbo ñwu tejugede efu Baibul todu k’a neke tẹmẹru. Ichẹñwu k’a gba Baibul, e-lẹ ajẹñwu onukwu wa kpai Jihofa ki chẹ lonyanẹ dagba k’a ma neke li n.

2. Ẹñwu chi ki Jihofa ch’Onukwu ki nyọ tule k’ẹ neke nẹ?

I n’ẹnẹ duu ki neke fẹdọ wẹ dabalu ki Jihofa afẹdọ wẹ n. Jihofa atene k’ẹ n’ẹdọ ẹbọ k’ẹ la ka ñwu iko duu k’ẹ tene abunẹ. Mẹ neke “m’ejiji eda-mẹ chaka ko rikpolo j’oji-wñ, todabu k’ẹwñ ọla-mẹ chew’e eju.’ ’ (1 Pita 5:7) Jihofa chẹ m’ọla todu ki ch’abunẹ am’onukwu-wñ, ki d’ugbẹdọ-ñw ma ki la ñọ netiru ma gẹ.​—Gba Eli Ekọ D’Ọjọ 94:​18, 19.

3. Ẹñwu Jihofa atene k’amonukwu-wñ ki che?

Jihofa añeju ọgbọ amonẹ, ama “Jihofa . . . afẹdọ ẹnẹ ki at’ọkpakpa ubi.” (Ita Ita 15:​9) Jihofa atene k’amonukwu-wñ ki na ch’amẹñwu ki nyọ eju-wñ ku ma la ra b’ẹñwu ẹbiẹnẹ tẹ. Abo ka neke neju kakini ma neke lebọ ọgbọ amẹñwu ki Jihofa atene ku ma che n, ku ma la ra b’ẹñwu ẹbiẹnẹ du tẹ n. Tabalẹ, Jihofa ch’ẹnẹ ejumomi. Ichẹñwu k’ẹnẹ duu afẹdọ-wñ ki la añọ ch’alu du ki neke che ki jẹñwu ẹdọ-wñ bọ, i agb’ẹnẹ lẹ nyi.​—Eli Ekọ D’Ọjọ 147:11; Ẹwñ 10:​34, 35.

 N’UMA NYỌGBA

4. Ebraham ch’onukwu Jihofa

Ẹñwu ki Baibul ka lugbo Ebraham (ku ma ñọ dọ ki Ebram) jẹñwu wa ma ẹñwu ki ch’ẹtẹ onukwu Ọjọ eche. Gba lugbo Ebraham efu Abakwanẹ 12:​1-4. Ubilẹ, mẹ ch’oluka oji am’ene-i:

• Ẹñwu Jihofa ka ñwu Ebraham ki che?

• Ẹñwu Jihofa gbalutanẹ ñwu?

• Ẹñwu Ebraham che?

5. Ẹñwu ki Jihofa atene k’amonukwu-wñ ki che

I n’amẹñwu k’a ch’aneju kwugbo amonukwu wa.

• Ẹñwu ch’amẹñwu k’ẹ ñeju k’amonukwu wẹ ki che ñwẹ?

Gba 1 Jọn 5:3. Ubilẹ, mẹ ch’oluka oji ene-i:

• Ẹñwu Jihofa atene k’amonukwu-wñ ki che?

K’a neke leb’ọla ki Jihofa ka, ichukpẹ k’a m’ali wa rida. Gba Aizaya 48:​17, 18, ubilẹ mẹ ch’oluka oji ene-i:

• Ẹñwu chi ki Jihofa atene k’amonukwu-wñ ku ma na ch’arida efu uche ma?

 6. Alu ki Jihofa ach’abunẹ am’onukwu-wñ

 ẸY’ỌLA UKỌ-I

Jihofa atene ki ch’onukwu wẹ, i la ach’abunẹ wẹ k’ẹ tẹmẹru owñ.

Ẹñwu ẹ kọchẹ?

• Abu Jihofa ach’abunẹ am’onukwu-wñ?

• Ẹñwu chi ki Jihofa aka ñwu am’onukwu-wñ ku ma na ch’arida ef’uche ma?

• Ẹ neju kakini i chẹ gbiti ololo k’onẹ ki ch’onukwu Jihofa? Ẹñwu chi k’ẹ dohi abalẹ?