UKỌCHẸ 10

Abu Ẹ Neke Jile Kwefu Ujeju Amẹnibenu Jihofa?

PLAY

Ẹ ny’ujeju Amẹnibenu Jihofa mama mẹ? Ichẹñwu k’ẹ ma w’ọmọ mama ta n, ọla wẹ neke na ga pẹẹ alu k’ẹ kpibe ew’ọmọ ọmama. Ẹ neke na kpibe: ‘Ẹñwu ma ch’ache efu ujeju ma? Ẹñwu chi k’ujeju-i chẹñwu ogbogaga? Ẹñwu chi ki nyọ ku ny’ọmọ?’ Efu ukọchẹ-i, ẹ na li alu ki eny’ujeju kpai Amẹnibenu Jihofa neke d’ẹ tẹmẹr’Ọjọ, ki la ñọ chabunẹ wẹ gẹ.

1. Ẹñwu chi ki chẹñwu ogbogaga k’a w’ujeju dama?

G’alu k’ẹnẹ ki k’ọtakada Baibul ka du tejugede ẹñwu ki chi k’ewujeju kpai abomunẹ chẹñwu ogbogaga: “Ef ujeju ujeju nakele Jihofa.” (Eli Ekọ D’Ọjọ 26:12) Abalẹ gẹ, Amẹnibenu Jihofa an’uyọ lile ef’ujeju ma. Efu ilẹ-i chaka, ma ajeju efu aladi du ku ma jẹnyu ñw’Ọjọ, ku ma keli, ku ma ñọ ch’adua dama gẹ. Efu ọdọ duu ma an’amujeju lile ku ma r’arẹ Jihofa.

2. Ẹñwu ẹ na kọchẹ efu am’ujeju wa?

Efu am’ujeju wa, ẹñwu k’a du t’ọgba ch’Ọla Ọjọ. A jẹñwu ‘ki tejugede pee, ma la doji-wñ dufu.’ (Gba Nihemaya 8:8.) Efu ujeju wa, ẹ na kọchẹ ẹñwu lugbo Jihofa kpai am’ukọlọ awuwu-wñ. Alu k’ẹ ma nyọgba ọla ufẹdọ ki Jihofa nẹ ñwẹ, ẹ na tẹmẹru. Ẹ na ma alu ki neke chabunẹ wẹ k’ẹ n’urẹdọ ọmẹmẹlẹ.—Aizaya 48:17, 18.

3. Abu abo k’ẹ ny’ujeju kpai ama neke ch’abunẹ wẹ?

Jihofa ka ñwu wa kakini “a ki nadibetẹ omunẹ k’a k’omunẹ ẹchẹ tef ufẹdọ kp’ukọlọ ọmẹmẹlẹ eche, a ki t’ek’ọla-wa jeju nọ n.” (Abo Hibru10:24, 25) Efu am’ujeju wa, ẹ na li alu k’a d’ufẹdọ ñ’ọla wa. Ẹ la ali kaki i ach’uwa ẹdọ fafa k’a kọchẹ ẹñwu lugbo Ọjọ dab’uwẹ. Ẹ la agbọ alu k’a na kọla ugbẹdọ ñw’ọlawa kwefu Baibul. (Gba Abo Rom 1:11, 12.) Ẹ ñọ ma abomunẹ, am’agbadufu kpai am’ọkọya manyu am’ọya-ọkọ ku ma n’uyọ dagba ihianyi ki dẹ añọla ma. E-ki dẹ ch’ọree ef’amile wewe ki Jihofa atene k’a nẹ kwefu ejọ dama iko duu!

N’UMA NYỌGBA

Tejanẹ alu k’Amẹnibenu Jihofa ach’ujeju ma le kpai ẹñwu ki chi ki nyọ k’a feju gbiti k’a na nyam’ujeju-i.

4. Am’ujeju Amẹnibenu Jihofa

Ef ọdọ ogu mẹlu ejodudu iko Kraist, Abo Kraist an’ujeju dama iko duu ku ma neke rẹ Jihofa. (Abo Rom 16:3-5) Gba Kọlọse 3:16, ubilẹ mẹ ch’oluka oji ene-i:

Abu abo Kraist ejodudu rẹ Jihofa le?

Iko e-wa, Amenibenu Jihofa ach’ujeju iko duu efu unyi ujeju ma. K’ẹ neke li alu k’ujeju ma dẹ, g’IFIDIO-i. Ubilẹ, g’ifoto ujeju wa-i, ku mẹ ch’oluka oji am’ene ki lebọ.

IFIDIO: Ẹñwu Ma Ch’ache Efu Unyi Ujeju Amẹnibenu Jihofa? (2:12)

Am’ẹñwu biu ọlama kwefu eñwu k’ẹ li efu unyi ujeju kpai ẹñwu k’ẹ gba efu Kọlọse 3:16?
Ef’ifidio abẹki ifoto-i, i n’ẹñwu omunẹ k’ẹ li efu amujeju wa ki r’ẹ eju?

Gba 2 Abo Kọrint 9:7, ubilẹ mẹ ch’oluka oji ene-i:

Ẹñwu chi k’Amẹnibenu Jihofa ma n’ene ọkọ era ef’ujeju ma n?

Uwẹ kpai ẹnẹ ki ach’ukọchẹ Baibul kpai uwẹ ki ch’oluka amẹñwu k’a na kọchẹ ef’aladi ki awa-i.

Ẹñwu ch’ukpẹ ujeju wa ki r’ẹ eju abẹki e-ki nyọ ñwẹ tule?

Ẹ che ma?

Efu jw.org, ẹ neke li ugbo kpai iko k’a ch’ujeju ugbo duu ojanẹ ilẹ-i.

A. Ukọ-ọla kwefu Baibul, ukọchẹ lugbo ọnak’a j’uchẹnyọ kpai am’ifidio defu am’ujeju wa. Ujeju achanẹ kpai eli manyu adua, i la akpoji kpai eli manyu adua gẹ
B. Efu ujeju lẹ, ma ad’iko tẹ ñwu abo ku ma wa ku ma kọla. Ẹnẹ du ki d’ọwọ ny’atẹ ku ma fu dọ, neke dohi ene
CH. Ẹnẹ duu neke wa—ogijo, imọtọ, abo akwọra unyi, abo ku ma ma n’ọkọ abẹki ọya ta n
D. A ch’agbọkọ ef’ujeju wa n. Amẹnibenu Jihofa ch’agbọkọ odu n abẹki ed’ugba lale ku ma d’ọkọ tọ n

5. Feju gbiti k’ẹ na ny’ujeju

G’ujiwe akwọra unyi Jisọs. Ku ma neke ny’ujeju ọdọ duu, ma al’ulẹ ẹrẹ kw’ewo Nazarẹt atu Jẹrusalẹm. Ulẹ lẹ dab’ulẹ ọjọ mẹta. Ọna ku ma ale la ch’uwo uwo. Gba Luku 2:39-42, ubilẹ mẹ ch’oluka oji amene-i: