UKỌCHẸ 14
Abu A Neke M’ọna Ọjọ Egwa Ki Ab’Ọjọ Ẹdọ?
Dabalu k’a ka efu ukọchẹ ki le gwudu-i, i ch’ọchaka am’ọna Ọjọ egwa ab’Ọjọ ẹdọ n. Tabalẹ, a neke r’Ọjọ wa lọna ki ajẹñwu ẹdọ-wñ bọ. Ẹñwu che “Ọjọ eche” abẹki, ọna Ọjọ egwa ki ajẹñwu ẹdọ Ọjọ bọ? (Jemis 1:27) G’amẹñwu ki Baibul ka.
1. Abu a neke m’ọna k’Ọjọ atene k’a r’owñ?
Efu Baibul, a neke li ọna k’Ọjọ atene k’a r’owñ. Jiṣos ka ñwu Ọjọ kakini: “Ọla-wẹ lẹ ch’ochochi.” (Jọn 17:17) Am’ọna Ọjọ egwa wewe jẹ lebọ ochochi ki defu Baibul Ọtakada Ọla Ọjọ n. Ma fu kpailọ kp’amukọ amonẹ manyu amẹñwu ọgwu. Ẹdọ Jihofa abọ r’abo ku ma “hi ukọ e-Ọjọ t’iba” n. (Gba Mark 7:9.) A jẹñwu ẹdọ Ọjọ bọ ichẹñwu k’a jẹñwu arẹ wa dago oji ẹñwu ki defu Baibul k’a la lebọ ibe-wñ.
2. Abu i dukpẹ k’a rẹ Jihofa?
Jihofa kate a dukpẹ k’a rẹ todu ki ch’owñ ch’ọna wa. (Ọla Ebitẹ 4:11) E-lẹ du ña kaki otila i che k’a fẹdọ-wñ, k’a rẹ owñ kate k’a la we d’ojibo chekwu efu arẹ wa.—Gba Aizaya 42:8.
Otila i che k’arẹ wa “k’i afọ k’i ny’ọ eju” Jihofa. (Abo Rom 12:1) E-lẹ che kakini i dukpẹ k’a na lebọ am’ọda-wñ. G’ujiwe, abo ki afẹdọ Jihofa alebọ amẹñwu ki ka lugbo ọkọ enẹ kpai ọya enẹ. Ma la ach’ẹñwu du ki ad’akanya ñwu añọla ma n, dabu ochiga eñmọ, igbo eñmọ, ataba eñmọ, ọtẹ eñmọ tabale kpai ed’ogwu chekwu lọna ki ma dukpẹ n. a
3. Ẹñwu chi ki dukpẹ k’awa kpai am’ọmaye ki bọ ki na rẹ Jihofa dama?
Am’ujeju wa k’a che efu aladi du ad’uña ñwu wa k’a “jẹñyu ñw Jihofa . . . ef ọgbadu [ọwọ amonẹ].” (Eli Ekọ D’Ọjọ 111:1, 2) Ọna ka k’a neke che-i che k’a na k’eli jẹnyu ñwu Ọjọ. (Gba Eli Ekọ D’Ọjọ 104:33.) Jihofa atene k’a na w’ujeju todu ki afẹdọ wa, i la ñọ ma kaki i ana ch’atẹko wa k’a neke jura ogbegbelẹ. Ichẹñwu k’a w’ujeju, a d’ugbẹdọ ñwu abomunẹ, ma la d’ugbẹdọ ñwu wa gẹ.
N’UMA NYỌGBA
G’ẹñwu ki chi ki Jihofa ma tene k’a d’ojibo chekwu efu arẹ wa n. Kọchẹ am’ọna ogbogaga k’a neke jẹnyu ñwu Ọjọ.
4. A ki d’ojibo chekwu efu arẹ wa n
Ab’ile k’a ma kakini ed’ojibo chekwu efu arẹ wa akp’Ọjọ ẹdọ biẹ? G’IFIDIO-i, ubilẹ mẹ ch’oluka oji ene-i.
-
Iko igbele, ẹñwu kẹrẹb’amadu Ọjọ ka ku ma tene ku ma na d’ojibo r’Ọjọ?
Abo ka ad’ojibo chekwu efu arẹ ma todu ku ma tene ku ma mẹr’Ọjọ. Ama ẹ neju kaki e-lẹ jẹñwu ma le jiji b’Ọjọ tẹ n? Gba Akwodufu 20:4-6 kpai Eli Ekọ D’Ọjọ 106:35, 36, ubilẹ mẹ ch’oluka oji am’ene-i:
-
Am’ojibo ẹñwu ẹ li abẹki ẹñwu omunẹ k’amonẹ adu chekwu efu arẹ ma?
-
Abu ẹdọ Jihofa dẹ lugbo ed’ojibo chekwu?
-
Abu ẹdọ wẹ dẹ lugbo ed’ojibo chekwu?
5. Ichẹñwu k’a rẹ Jihofa kate e-lẹ agba wa tanẹ kwefu am’ibe ọlemi
G’alu ki erẹ Jihofa lọna ki cheju-wñ neke gba wa tanẹ kwefu am’ibe ọlemi. G’IFIDIO-i.
Gba Eli Ekọ D’Ọjọ 91:14, ubilẹ mẹ ch’oluka oji ene-i:
-
Ẹñwu Jihofa gbalu kaki i ana che ñwu wa ichẹñwu k’a du tejugede kaki afẹdọ-wñ lefu er’owñ kate?
6. A rẹ Jihofa ef’unyi ujeju
A jẹnyu ñwu Jihofa, a ñọ d’ugbẹdọ ñwu ọla wa lefu eli ekọ kpai edohi efu am’ujeju wa. Gba Eli Ekọ D’Ọjọ 22:22, ubilẹ mẹ choluka oji am’ene-i:
-
Ẹdọ wẹ abọ ichẹñwu k’ẹ netiru am’ohi ku ma du efu am’ujeju wa?
-
Ẹ ñeju k’ẹ mọla k’ẹ neke d’ohi?
7. Ẹdọ Jihofa abọ ichẹñwu k’a ka ñwu abomunẹ ẹñwu k’a kọchẹ
Ọna wewe dọmọ k’a neke kpukpẹ ọgẹcha ki defu Baibul kp’amonẹ. Gba Eli Ekọ D’Ọjọ 9:1 kpai 34:1, ubilẹ mẹ ch’oluka oji ene-i:
-
Ẹñwu ẹ kọchẹ kwefu Baibul k’ẹ ñeju k’ẹ ka ñwu abomunẹ?
ABO KA KAKINI: “Onẹ neke chẹñwu ki ab’Ọjọ ẹdọ n.”
-
Ẹñwu ch’ibe wẹ?
ẸY’ỌLA UKỌ-I
A jẹñwu ẹdọ Jihofa bọ ichẹñwu k’a r’owñ kate, k’a jẹnyu ñwu efu am’ujeju, k’a ñọ kpukpẹ ẹñwu k’a kọchẹ kp’amonẹ.
Ẹñwu ẹ kọchẹ?
-
Ugbo a neke kọchẹ ọna k’Ọjọ atene k’a r’owñ?
-
Ẹñwu chi ki che Jihofa kate i dukpẹ k’a na rẹ?
-
Ẹñwu chi ki dukpẹ k’a na r’Ọjọ kpai abomunẹ ku ma tene chẹñwu ki ab’Ọjọ ẹdọ?
KỌCHẸ MANYU
Efu ọhiala “U Ch’adu Ñwu Ode Gẹ N,” gba ọna k’onobulẹ ka kwefu ode eche.
Kọchẹ ẹñwu ki neke ch’atẹko wẹ k’ẹ neke na dohi ef’unyi ujeju.
G’alu k’agbadufu ka jile kwefu ew’ujeju dagba ki ma lọla-wñ n.
Amonẹ wewe neju kaki oli akọfida ma adu m’Abo Kraist, ama i dukpẹ k’a du chekwu efu arẹ wa?
“Ẹñwu Chi K’Amẹnibenu Jihofa Ma D’oli Akọfida Chekwu Efu Arẹ Ma N?” (I dẹ jw.org)
a Ma ch’oluka oji am’ọla-i efu am’ukọchẹ ki d’ọgba.
