UKỌCHẸ 24

Ẹñwu Ch’ochochi Lugbo Am’onuche Ọjọ Kpai Am’ebili?

PLAY

Jihofa atene k’a kọchẹ lugbo akwọra unyi-wñ ki defu ojale. Am’onuchẹ Ọjọ ch’abo ka efu akwọra unyi ki dẹ, Baibul dọ ma “k’amọma Ọjọ.” (Job 38:7) Ẹñwu Baibul ka lugbo am’onuchẹ Ọjọ? Ẹñwu ma neke che ñwu amonẹ? Ọgbọ am’onuchẹ lẹ ch’abo akwọra unyi Ọjọ?

1. Abo ch’amonuchẹ Ọjọ?

Jihofa nyi am’onuchẹ tak i ny’ilẹ-i. Dabu Jihofa, am’onuchẹ-wñ onugo ch’afu ki defu ojale. (Abo Hibru 1:14) Am’onuchẹ ki defu ojale chẹ wewe, okoke ma la ch’ojoji ñwu ọlama. (Ọla Ebitẹ 5:11) Am’onuchẹ lẹ ‘la che alu k’ọla Jihofa ka, ma la netir’ọla k’i aka.’ (Eli Ekọ D’Ọjọ 103:20) Iko igbele igbele, Jihofa akpẹ am’onuchẹ-wñ ku ma d’inabali ñwu amonẹ, ku ma ch’atẹko ma manyu ku ma gb’uma kwefu ihianyi. Eñini-i, am’onuchẹ Ọjọ anẹ Abo Kraist le t’ugbo abo ku ma ñeju ku ma kọchẹ lugbo Ọjọ.

2. Ẹnẹ Setan kpai am’ebili-wñ che?

Am’onuchẹ ka kọ eleb’ọda Ọjọ. Onuchẹ ejodudu ki r’ẹrẹ ubi ñwu Ọjọ che “e-ku ma dọ kọ Abulumonẹ kpai Setan, k’i k’ọgbọ amonẹ du ugbo k’amonẹ dodo kade la.” (Ọla Ebitẹ 12:9) Setan atene ki n’ọda oji abomunẹ. Todulẹ, i jẹñwu Adam kpai If manyu am’onuchẹ ka ku ma we gb’omu Ọjọ gbọ. Am’onuchẹ ku ma r’ẹrẹ ubi ñwu Ọjọ lẹ owñ ma dọ k’amebili. Jihofa m’uma ko rikpolo tefu anẹ-ilẹ, i ako ma kpa rinyọ ichẹñwu ki dẹ pẹẹ.—Gba Ọla Ebitẹ 12:9, 12.

3. Am’ọna ẹñwu Setan kp’amebili ak’amonẹ la?

Setan kp’amebili ak’amonẹ la lefu obochi eche abẹki echẹñwu kp’abo ki akọla kp’amafu bibi. Ujiwe-wñ ch’abo ku ma alo t’ugbo am’abifa, am’akẹma, am’agegwugilẹ kpai am’achogwu. Abomunẹ agb’ogwu ki n’ọwọnẹ kpai am’afu bibi ki neke ch’ọga ma kpa. Setan kpai am’ebili ajẹñwu amonẹ neju kaki ma neke kọla kpai abo ki kwu. Ama Jihofa d’ufeti ñwu wa kakini: A ki “rida tugbo abo ku ma d’ichẹkpa kpai akẹma n.” (Abo Lifai 19:31) I d’amufeti ki dẹ ñwu wa todu ki gb’uwa kwefu ọwọ Setan kpai am’ebili. Ẹnọla Ọjọ ma che, ma la atene d’ẹñwu ẹbiẹnẹ kẹrẹbu wa.

N’UMA NYỌGBA

Kọchẹ lugbo amẹñwu ẹnyọ k’amonuchẹ Ọjọ ache, ẹbiẹnẹ ki defu obochi eche kpai ọna k’a neke f’ọla wa de todu Setan kpai amebili.

4. Am’onuchẹ ach’atẹko amonẹ ku ma kọchẹ lugbo Jihofa

Am’onuchẹ Ọjọ j’uchenyọ r’amonẹ kp’ọlama n. Ama, am’onuchẹ anẹ am’adu Ọjọ le t’ugbo abo ku ma ñeju ku ma kọchẹ lugbo Ọjọ. Gba Ọla Ebitẹ 14:6, 7, ubilẹ mẹ ch’oluka oji am’ene-i:

Ẹñwu chi k’a tene atẹko kwugbo am’onuchẹ Ọjọ k’a neke j’uchẹnyọ?
Alu k’ẹ ma kaki am’onuchẹ Ọjọ an’ẹ le k’ẹ neke t’ugbo abo ku ma ñeju egb’ọla lugbo Baibul, e-lẹ ad’ugbẹdọ ñwẹ? Ẹñwu chi k’ẹ kabalẹ?

5. Ẹ ki n’ẹñwu duu eche kpai am’achobochi n

Setan kpai am’ebili ch’amẹnọla Jihofa. Ẹnọla wa onugo ma che. Gba Luku 9:38-42, ubilẹ mẹ ch’oluka oji ene-i:

Ẹñwu am’ebili ache amonẹ?

A ki chẹñwu duu ki ajẹñwu am’ebili mẹru wa lọna du n. Gba Ọlọda Eduwa Onukeji 18:10-12, ubilẹ mẹ ch’oluka oji am’ene-i:

Am’ọna ẹñwu am’ebili ale b’amonẹ kọla ku ma la ko ma la? Am’ọna ẹñwu abo ki d’ogbegbele wẹ ach’ẹñwu kp’amafu bibi?
Ẹ neju kaki ibe k’Ọjọ du ñwu wa k’a we chẹñwu kp’amebili ch’ibe ọmẹmẹlẹ? Ẹñwu chi k’ẹ kabalẹ?

G’IFIDIO-i, ubilẹ mẹ ch’oluka oji am’ene-i.

IFIDIO: “Mẹ Ki B’uña Ñwu Abulumonẹ Lẹ N” (5:02)

Ẹ neju kaki ẹñwu ẹbiẹnẹ neke wa che todu agba ogwu ki Palesa du ji many’ọma-wñ ọwọ? Ẹñwu chi k’ẹ kabalẹ?
Ẹñwu dukpẹ ki Palesa ki che ki neke f’ọla-wñ jadu b’afubibi tẹ?

Kw’iko igbele, Abo Kraist ochochi b’uña ñwu am’ebili n. Gba Ẹwñ 19:19 kpai 1 Abo Kọrint 10:21, ubilẹ mẹ ch’oluka oji ene-i:

Ẹñwu chi ki chẹñwu ogbogaga k’a m’amẹñwu ki n’ọwọ kpai am’afubibi ko rinyọ?

6. Mẹ hi dago ñwu Setan kpai am’ebili, ma la ra bumẹ tẹ

Setan ch’agboji am’ebili. Ama Maikẹl ch’agboji am’onuchẹ Ọjọ. Maikẹl ch’odu omunẹ ki Jisọs nẹ. Abu ukpahiu Maikẹl nana kade? Gba Ọla Ebitẹ 12:7-9, ubilẹ mẹ ch’oluka oji am’ene-i: