Ichẹñwu k’ẹnẹ k’a fẹdọ lekwu, i awọ wa nyọnyọ. I ajẹñwu wa n’ẹdẹkpabiẹ. Todulẹ, Baibul dọ ukwu k’ẹnẹbi. (1 Abo Kọrint 15:26) Efu Ukọchẹ 27, ẹ kọchẹ kaki Jihofa ana d’ukwu kwo. Ama, ẹñwu ch’ukibeno k’a nẹ lugbo abo ki lekwu mẹ? Efu ukọchẹ-i, ẹ na kọchẹ lugbo amugbalutanẹ ọmẹmẹlẹ omunẹ ki Jihofa nẹ ñwu wa. Jihofa ana k’amonẹ wewe ki ma n’aluka n dajikwanẹ ku ma neke jura ogbegbelẹ. Ochochi, Jihofa ana ko ma dajikwanẹ dabi! E-lẹ neke wa chẹ ọgẹcha? Ọjọ adabi du ma dajikwanẹ tefu ojale abẹki anẹ ilẹ-i?

1. Ẹñwu Jihofa atene ki che ñwu abo wa k’a fẹdọ ki kwu?

Jihofa añeju ki k’abo ki kwu dajikwanẹ dabi. Ẹnẹkẹlẹ ẹdọ ekono ka k’odu-wñ kọ Job, kẹdọno kaki Ọjọ ana gbenyọ owñ ichẹñwu ki lekwu n. I ka ñwu Ọjọ kakini: “Uwẹ adudọ, omi la ajẹ [kwefu oji].”​—Gba Job 14:​13-​15, NWT.

2. Ẹñwu jẹñwu wa ma kaki abo ki kwu neke dabi dajikwanẹ?

Iko ki Jisọs d’ilẹ-i, Ọjọ d’ukpahiu ñwu ki neke d’abo ki kwu dajikwanẹ. Jisọs d’ọma onobulẹ ọdọ mẹgweji [12] dajikwanẹ kpai ọma ọya-ukwu-ọkọ ka. (Mark 5:​41, 42; Luku 7:​12-​15) An’ubilẹ, onukwu Jisọs ku ma dọ Lazarọs lekwu. Dagba ki Lazarọs lekwu ma la fu ji ọjọ mẹlẹ mẹ, Jisọs dabi mudu dajikwanẹ. Jisọs ch’adua r’Ọjọ. Ubilẹ, i d’omu dago ka nana kakini: “Lazarọs, dufu wa!” Ubilẹ, “ẹnẹ ki ku lẹ la kwodufu wa.” Lazarọs mu dabi deju gẹ! (Jọn 11:​43, 44) Kpibe alu k’amonukwu kpai am’efu Lazarọs an’uyọ kade iko ki dajikwanẹ!

3. Ukibeno ẹñwu dọmọ ñwu abo wẹ ki kwu?

Baibul gbalutanẹ kakini: “Udajikwanẹ . . . adọmọ.” (Ẹwñ 24:15) Abo ki kwu ki Jisọs ko dajikwanẹ ẹgba ki def’ilẹ-i lo tef’ojale n. (Jọn 3:​13) Ẹdọ ma chẹ bọ alu ku ma du ma dajikwanẹ w’efu ilẹ-i. Abalẹ gẹ, Jisọs ana k’amonẹ wewe ki ma n’aluka n dajikwanẹ ku ma neke jura ogbegbelẹ efu paradais anẹ ilẹ-i. I kakini “abo du ku ma j’ef oji” k’Ọjo arewa dagba ki ch’abo ki dabẹnẹ kaki ma fuma gbenyọ mẹ, ma na dabi dajikwanẹ.​—Jọn 5:​28, 29.

 N’UMA NYỌGBA

4. Jisọs du ña kaki i neke d’abo ki kwu dajikwanẹ

Kọchẹ manyu lugbo ẹñwu ki Jisọs che ñwu Lazarọs onukwu-wñ. Gba Jọn 11:​14, 38-​44, ubilẹ mẹ ch’oluka oji am’ene-i:

• Ẹñwu jẹñwu wa ma kaki Lazarọs kwu ochochi?​—G’ọgba 39.

• Ichẹñwu ki ch’efojale Lazarọs lo ẹgba ki kwu, ẹ neju kaki Jisọs adabi du dajikwanẹ w’efu ilẹ-i?

G’IFIDIO-i.

5. Amonẹ wewe ana dajikwanẹ!

Gba Eli Ekọ D’Ọjọ 37:​29, ubilẹ mẹ ch’oluka oji ene-i:

• Ugbo amonẹ wewe ki ma n’aluka n ku ma na dajikwanẹ ana dodo?

Jisọs ak’amonẹ wewe dajikwanẹ dagba ki ch’abo ku ma ma rẹ Jihofa taku ma kwu n. Gba Ẹwñ 24:​15, ubilẹ mẹ ch’oluka oji ene-i:

• Ẹnẹ ẹ ñeju k’ẹ li iko udajikwanẹ?

• Abu ukibeno kaki abo ki kwu ana dajikwanẹ d’ugbẹdọ ñwu ata kpai iye Phelicity?

 ẸY’ỌLA UKỌ-I

Baibul gbalutanẹ kaki amonẹ wewe ki ma n’aluka n ki kwu ana dabi dajikwanẹ. Jihofa atene ku ma dabi w’ilẹ. I la m’ukpahiu du ñwu Jisọs ki neke ko ma dajikwanẹ dabi mẹ.

Ẹñwu ẹ kọchẹ?

• Abu idẹ ọla Jihofa kpai Jisọs lugbo ek’abo ki kwu dabi w’ilẹ?

• Ugbo amonẹ wewe ki ma n’aluka n ku ma ana dajikwanẹ ana dodo, efu ojale abẹki anẹ ilẹ-i? Ẹñwu chi k’ẹ kabalẹ?

• Ẹñwu jẹñwu ẹ n’ukẹdọno kaki abo wẹ k’ẹ fẹdọ ki kwu ana dabi dajikwanẹ?