UKỌCHẸ 35

Ọna K’a Neke Tu Ẹñwu Ọmẹmẹlẹ K’a Che

PLAY

Ọgbọ wa che n’ẹñwu ki dukpẹ k’a che. Ojile amẹñwu k’a tu neke nyọ ñwu wa abẹk ebiẹnẹ ñwu wa, i la ñọ neke jẹñwu wa k’a mẹru Jihofa abẹk ejẹñwu wa le jiji b’ọ tẹ. K’a g’ujiwe, a neke na kpibe ugbo k’a gwu, alu k’a n’ukọlọ ki ad’ọkọ ñwu wa k’a du dejutẹ ọla wa, abẹk ichẹñwu k’a na n’ọkọ abẹk ọya. Ichẹñwu k’a tu ẹñwu ọmẹmẹlẹ, e-lẹ ajẹñwu wa n’ẹdẹbọ ef’ọlai wa. I la añọ jẹñwu ẹdọ Jihofa bọ.

1. Abu ẹ neke du Baibul chekwu ichẹñwu k’ẹ tene tu ẹñwu ọmẹmẹlẹ k’ẹ che?

Tak ẹ chẹñwu du, ch’adua ru Jihofa ki ch’atẹko wẹ k’ẹ la ñọ g’efu Baibul nyọnyọ k’ẹ m’ẹñwu ki Baibul ka lugbo ọla lẹ. (Gba Ita Ita 2:3-6.) I n’iko ki Jihofa ad’ọda ñwu wa efu Baibul lugbo ẹñwu ki dukpẹ k’a che abẹk ẹñwu ki ma dukpẹ k’a che n. Ichẹñwu ki dabalẹ, eleb’ọda lẹ chẹñwu ogbogaga ki dukpẹ k’a che.

Ama, ichẹñwu ki Baibul ma d’ọda tẹ pee lugbo ẹñwu ki dukpẹ k’ẹ che n, abu ẹ che le? I chaka dabalẹ, Jihofa anẹ wẹ “l’ọna ki dukpẹ k’ẹ le.” (Aizaya 48:17) Abu i ache le? I neke n’amọla-ukọ ki defu Baibul ki an’ẹ le. Am’ọla-ukọ ki defu Baibul ch’amọgẹcha ki ajẹñwu wa ma ọla ẹnẹ ki Jihofa che manyu ẹñwu ki d’ẹdọ-wñ. Ichẹñwu k’a gba ọhiala ki defu Baibul, e-lẹ ach’atẹko wa k’a neke ma alu k’ẹñwu dẹ eju Jihofa. E-lẹ ajẹñwu wa chẹñwu ki ajeñwu ẹdọ-wñ bọ.

2. Amẹñwu dukpẹ k’ẹ kpibe oji-wñ tak ẹ m’eñwu k’ẹ che?

Baibul kakini: “Ẹnugbeju muda atejanẹ ugbo k’i anyi nyọnyọ.” (Ita Ita 14:15) E-lẹ che kaki, i dukpẹ k’a kpibe nyọnyọ oji ẹñwu k’a tene che. Alu k’ẹ kpibe oji-wñ, t’ọla wẹ am’ene ki dẹ: ‘Ọla-ukọ Baibul ẹñwu k’ọla lugbo ẹñwu ku na tene che-i taa? Ẹñwu ch’e-ki ad’urẹdọ ñwu mi? Ẹñwu ku na tene che-i neke d’ihianyi ñwu abo omunẹ? E-ki ch’ogbogaga tule, i ajẹñwu ẹdọ Jihofa bọ?’—Ọlọda Eduwa Onukeji 32:29.

Jihofa che n’ọda eka ñwu wa ẹñwu ki nyọ kpai ẹñwu ki ma nyọ n. Ichẹñwu k’a m’amọda manyu amọla-ukọ Jihofa nyọnyọ, k’a la alebọ, akonẹ ọla wa ana ch’ukọlọ nyọnyọ. Akonẹ ọla chẹñwu ki Jihofa du tefu ẹdọ wa ki ajẹñwu wa m’ẹñwu ẹnyọ kpai ẹñwu ẹbiẹnẹ. (Abo Rom 2:14, 15) Ichẹñwu k’a kọ akonẹ ọla wa nyọnyọ, e-lẹ ajẹñwu ki ch’atẹko wa k’a neke chẹñwu ọmẹmẹlẹ.

N’UMA NYỌGBA

Kọchẹ ọna k’amọla-ukọ ki defu Baibul kpai akonẹ ọla wa ach’atẹko wa k’a neke chẹñwu ọmẹmẹlẹ.

3. Jẹñwu Baibul ki n’ẹ le

Abu amọla-ukọ ki defu Baibul neke n’ẹ le iko ki n’ẹñwu k’ẹ tene che? G’IFIDIO-i, ubilẹ mẹ ch’oluka oji am’ene-i.

IFIDIO: Jẹñwu Am’ọla-ukọ Ki Defu Baibul Ki N’ẹ Le (5:54)

Ẹñwu ch’ele ogbogaga ki Jihofa du ñwu wa?
Ẹñwu chi ki Jihofa d’ele ogbogaga ki dẹ-i ñwu wa k’a na tu ẹñwu k’a che kp’ọla wa?
Ẹñwu Jihofa du ñwu wa ki ajẹñwu wa neke ch’ẹñwu ọmẹmẹlẹ?

K’a neke li ujiwe ọla-ukọ ka ki defu Baibul, gba Abo Ẹfẹsọs 5:15, 16. Ubilẹ, mẹ ch’oluka alu k’ẹ neke ‘na f’iko la tẹ’ k’ẹ . . .

na gba Baibul iko duu.
neke ch’ọkọ abẹk ọya ọmẹmẹlẹ, ata abẹki iye ọmẹmẹlẹ kpai ọma ọmẹmẹlẹ.
na lo t’ujeju abudọ iko duu.

4. Kọ akonẹ ọla wẹ ki ch’atẹko wẹ k’ẹ neke chẹñwu ọmẹmẹlẹ

Ichẹñwu ki n’ọda ki defu Baibul lugbo ẹñwu ki dukpẹ k’a che, i neke lọla ñwu wa echẹñwu ki ch’eju-wñ. Ama, ẹñwu a che ichẹñwu k’ọda lugbo ẹñwu k’a tene che ma defu Baibul n? G’IFIDIO-i, ubilẹ mẹ ch’oluka oji ene-i.

IFIDIO: “Akonẹ Ọla Wẹ Ki Na Ch’ukọlọ Nyọnyọ” (5:13)

Efu ifidio-i, ẹñwu ọmaye onobulẹ ka che ki neke kọ akonẹ ọla-wñ ki jẹñwu chẹñwu ki ajẹñwu ẹdọ Jihofa bọ?

Ẹñwu chi ki ma dukpẹ k’a ka ñwu onẹ ki b’uwa tu ẹñwu ki dukpẹ k’a che n? Gba Abo Hibru 5:14, ubilẹ mẹ ch’oluka oji am’ene-i:

I neke lọla ñwu wa k’a ka ñwu onẹ ki ka ñwu wa ẹñwu ki dukpẹ k’a che, ama ẹñwu chi ki dukpẹ k’a neke ñwa ẹñwu ọmẹmẹlẹ kp’ẹñwu ẹbiẹnẹ r’ojoji?
Amẹñwu neke ch’atẹko wẹ k’ẹ kọ akonẹ ọla wẹ k’ẹ la na chẹñwu ọmẹmẹlẹ?

Dabalu k’ujiwe anẹ ach’atẹko onẹ ki m’ugbo ki alo, abalẹ akonẹ ọla wa anẹ wa le lugbo ẹñwu ki dukpẹ k’a che

5. Bumọ akonẹ-ọla abomunẹ

Amẹñwu k’amonẹ atu ch’ojoji ñwu ọlama. Abu a neke bumọ akonẹ ọla abomunẹ? G’ujiwe meji ki dẹ:

Ujiwe ejodudu: Ọmaye onobulẹ ka ki añeju ki na kw’eju, kw’ujeju abudọ ugbo ki dẹ lotu ujeju abudọ omunẹ ugbo k’amọmaye onobulẹ ki dọmọ ma ñeju k’onẹ ki na kw’eju n.

Gba Abo Rom 15:1 kpai 1 Abo Kọrint 10:23, 24, ubilẹ mẹ ch’oluka oji am’ene-i:

Dabalu k’amọgba Baibul-i ka, ẹñwu ọmaye onobulẹ lẹ neke che? Ẹñwu ẹ na che ichẹñwu k’ẹ d’ugbo ẹnẹ k’akonẹ ọla-wñ ma jẹ ki ch’ẹñwu k’akonẹ ọla wẹ jẹ k’ẹ che n?

Ujiwe ekeji: Ọmaye ẹnẹkẹlẹ ka ma kakini Baibul kp’onẹ abi ki ñmọ ọtẹ n, ama i f’ibe-wñ lo kaki owñ ñmọ ọtẹ dimi dimi n. Ma dọ ki w’uche ka, i la li amọmaye ẹnẹkẹlẹ ku ma añmọ ọtẹ.

Gba Akọla Ñw Ujeju 7:16 kpai Abo Rom 14:1, 10, ubilẹ mẹ ch’oluka oji am’ene-i:

Dabalu k’amọgba Baibul-i ka, ẹñwu ọmaye ẹnẹkẹlẹ lẹ neke che? Ẹñwu ẹ na che ichẹñwu k’ẹ li ẹnẹ ki achẹñwu k’akonẹ ọla e-wẹ ma jẹ k’ẹ che n?

Amẹñwu dukpẹ k’a che ichẹñwu k’a tene ch’ẹñwu ọmẹmẹlẹ?

1. Ch’adua ru Jihofa ki neke jẹñwu ẹ m’ẹñwu k’ẹ che.—Jemis 1:5.

2. Gwili kwefu Baibul kpai am’ọtakada manyu am’ifidio ki aka nẹreju am’ọla-ukọ ki defu Baibul ki neke ch’atẹko wẹ lugbo ẹñwu k’ẹ tene che. Ẹ ñọ neke kọla kp’abo ku ma gbọkonẹ efu ujeju abudọ.