UKỌCHẸ 43
Ẹñwu Baibul Ka Lugbo Ọtẹ Eñmọ?
Efu ọgbọ ilẹ-i, ibe k’amonẹ akpẹ lugbo ọtẹ eñmọ ch’ojoji ojoji. Abo ka añeju eñm’ọtẹ ichẹñwu ku ma dẹ kp’amonukwu ma. Abo omunẹ ñeju ku ma ñm’ọtẹ n. I la ñọ n’abo ki añm’ọtẹ tẹgwule. Ẹñwu Baibul ka lugbo ọtẹ eñmọ?
1. Ọtẹ eñmọ chẹñwu ẹbiẹnẹ i che?
Baibul du ña kakini ọtẹ eñmọ chẹñwu ẹbiẹnẹ i che n. Ẹgba ki Baibul acholi amẹñwu ọmẹmẹlẹ k’Ọjọ du ñwu wa, Baibul kọla lugbo “omi achiwebẹtẹma ki ab’ọnẹ ẹdọ.” (Eli Ekọ D’Ọjọ 104:14, 15) I n’abokẹlẹ kp’abobulẹ ki ar’Ọjọ ki Baibul kọla lugbo ma kaki ma ñm’ọtẹ.—1 Timoti 5:23.
2. Ibe ẹñwu Baibul du ñwu abo ki tu kaki ma añm’ọtẹ?
Jihofa tene k’amonẹ ki ñm’ọtẹ ololo n dagba ki dabẹnẹ kaki ọtẹ mu ma n. (Abo Galatia 5:21) Baibul kakini: ‘Ẹ ki d’ef amañmọtẹ tẹgwule n.’ (Ita Ita 23:20) Ichẹñwu k’a tene ñm’ọtẹ dagba ki ch’awa kate abẹki a dẹ kp’amonẹ, i dukpẹ k’a ñm’ọtẹ gbogbo w’iko k’a chanẹ ekọla abẹki echẹñwu ki ma cheju-wñ n abẹki ech’ọla wa agbe n. Ichẹñwu k’a ma neke d’ibe ch’ọna k’a ñm’ọtẹ n, i dukpẹ k’a fọla mu k’a f’ọwọ n’ọtẹ eñmọ.
3. Ọna ẹñwu a neke bumọ ẹñwu k’abomunẹ tu lugbo ọtẹ eñmọ?
Okoke wa atu ichẹñwu k’a ñm’ọtẹ abẹki a ñm’ọtẹ n. A ki kajọ ẹnẹ ki tu kaki i añm’ọtẹ aleju-wñ n, ichẹñwu k’onẹ ma la tene ñm’ọtẹ n, a ki du ch’atiti ñwu ẹnẹ lẹ ki ñmọ n. (Abo Rom 14:10) A tu kaki a ñm’ọtẹ n ichẹñwu ki ad’ihianyi ñwu abomunẹ. (Gba Abo Rom 14:21.) A ‘ki feju ẹñwu ñwu ọla-wa n, ama . . . a ki na feju ẹñwu ñwu ekeji wa.’—Gba 1 Abo Kọrint 10:23, 24.
N’UMA NYỌGBA
G’amọla-ukọ ki defu Baibul ki neke ch’atẹko wẹ k’ẹ neke d’ibe tu ichẹñwu k’ẹ ñm’ọtẹ abẹki ẹ ñm’ọtẹ n kpai alu ki anana kade ichẹñwu k’ẹ tene ñmọ. Kọchẹ ẹñwu ki neke ch’atẹko wẹ ichẹñwu k’ẹ n’ihianyi ọtẹ eñmọ ololo.
4. Uwẹ atu kp’ọla wẹ ichẹñwu k’ẹ ñm’ọtẹ abẹki ẹ ñmọ n
Ibe ẹñwu Jisọs kpẹ lugbo ọtẹ eñmọ? K’ẹ neke li ohi-i, g’ukọlọ awuwu ejodudu ki Jisọs che. Gba Jọn 2:1-11, ubilẹ mẹ ch’oluka oji am’ene-i:
-
Kwefu awuwu ki Jisọs che-i, ẹñwu a neke kọchẹ lugbo ibe ki Jisọs akpẹ lugbo ọtẹ eñmọ kpai abo ki añmọ?
-
Alu ki Jisọs ma kakini ọtẹ eñmọ chẹñwu ẹbiẹnẹ i che n, eju ẹñwu dukpe k’Abo Kraist ki na du g’ẹnẹ ki tu kak’i añm’ọtẹ?
Dagba k’ẹnẹ Kraist neke tu kaki i añm’ọtẹ, i ch’iko duu i anyọ ki na ñm’ọtẹ n. Gba Ita Ita 22:3, ubilẹ g’alu k’amọla ki d’ọganẹ-i neke jẹñwu ẹ ma ichẹñwu ki dukpẹ k’ẹ ñm’ọtẹ:
-
Ichẹñwu k’ẹ tene n’imoto abẹki ed’ejini chekwu.
-
Iko k’ẹ defu.
-
Ichẹñwu ki dọktọ ka ñwẹ kaki ẹ ki ñm’ọtẹ n.
-
Ichẹñwu ki gbiti ñwẹ k’ẹ m’alu k’ẹ ñmọ kade.
-
Ichẹñwu k’ọda ugbo k’ẹ dẹ ma jẹ k’ẹ ñm’otẹ n.
-
Ichẹñwu k’ẹ d’ugbo ẹnẹ ki tu kaki owñ ñm’ọtẹ n todu ki añm’ọtẹ tẹgwule kwobi.
I dukpẹ k’ẹ kp’ọtẹ efu icholo ọya enẹ abẹki am’uche omunẹ? K’ẹ neke li ẹñwu ki neke ch’atẹko wẹ k’ẹ m’ẹñwu ki dukpẹ k’ẹ che, g’IFIDIO-i.
Gba Abo Rom 13:13 kpai 1 Abo Kọrint 10:31, 32. Ubi k’ẹ f’okoke am’ọgba Baibul-i gba, mẹ ch’oluka oji ene-i:
-
Abu ed’ọla-ukọ-i chekwu ach’atẹko wẹ k’ẹ tu ẹñwu ki ajẹñwu ẹdọ Jihofa bọ?
Okoke ẹnẹ Kraist atu kp’ọla-wñ ichẹñwu ki añm’ọtẹ abẹki i ñmọ n. Dagba ki n’iko ka ki añm’ọtẹ, i neke tu ki kọ eñmọ iko ẹbọ
5. Ẹ ki ñm’ọtẹ tẹgwule n
Ichẹñwu k’ẹ tu k’ẹ ñm’ọtẹ, rewa kakini: Jihofa kaki ọtẹ eñmọ biẹnẹ n ama i tene k’onẹ ki ñmọ tẹgwule n. Ẹñwu chi? Gba Hosiya 4:11, 18, ubilẹ mẹ ch’oluka oji ene-i:
-
Ẹñwu neke kẹrẹb’onẹ ichẹñwu ki añm’ọtẹ ololo?
Ẹñwu neke ch’atẹko wa k’a we ñm’ọtẹ ololo? I dukpẹ k’a m’ọla wa nyọnyọ, k’a m’ugbo k’a neke ñm’ọtẹ kade. Gba Ita Ita 11:2, ubilẹ mẹ ch’oluka oji ene-i:
-
Ẹñwu chi ki dukpẹ k’a m’ugbo k’a neke ñm’ọtẹ kade, k’a la we ñmọ t’abale?
6. Ẹñwu neke ch’atẹko onẹ ki we ñm’ọtẹ ololo?
G’ẹñwu ki ch’atẹko ẹnẹkẹlẹ ka ki f’ọwọ n’ọtẹ eñmọ ololo. G’IFIDIO-i, ubilẹ mẹ ch’oluka oji am’ene-i.
-
Efu ifidio-i, abu uche Dmitry ch’adẹ ichẹnwu ki ñm’ọtẹ?
-
I lọla ñwu ki f’ọwọ n’ọtẹ eñmọ ẹrẹrẹ?
-
Ẹñwu ch’atẹko-wñ ki neke f’ọwọ n’ọtẹ eñmọ ololo?
Gba 1 Abo Kọrint 6:10, 11, ubilẹ mẹ ch’oluka oji am’ene-i:
-
Ẹñwu Baibul ka lugbo ọtẹ eñmọ ololo?
-
Ẹñwu du ña kaki ẹnẹ ki añm’ọtẹ ololo neke dabi rida?
Gba Matiu 5:30, ubilẹ mẹ ch’oluka oji ene-i:
-
Ofe ujiwe ọwọ ekọda ki Jisọs kọla oji-wñ che kakini i dukpẹ ki n’amẹñwu k’onẹ atọnọ tanẹ todu ki neke jẹñwu ẹdọ Jihofa bọ. Ẹñwu ẹ neke che ichẹñwu ki ma lọla ñwẹ ed’ọwọ n’ọtẹ eñmo ololo n? a
Gba Ita Ita 13:20, ubilẹ mẹ ch’oluka oji ene-i:
-
Ichẹñwu ki ch’abo ki añm’ọtẹ ololo ẹ ch’onukwu kp’ama, ẹñwu e-lẹ neke du kẹrẹb’ẹ?
ABO KA NEKE N’ENE: “Ọtẹ eñmọ chẹñwu ẹbiẹnẹ?”
-
Abu ẹ dohi?
ẸY’ỌLA UKỌ-I
Ọtẹ ch’oka ef’amẹñwu ọmẹmẹlẹ ki Jihofa du ñwu wa, ama i tene k’a ñm’ọtẹ ololo n abẹki eñmọ tẹgwule n.
Ẹñwu ẹ kọchẹ?
-
Ẹñwu Baibul ka lugbo ọtẹ eñmọ?
-
Am’akanya ẹñwu defu ọtẹ eñmọ ololo?
-
Ọna ẹñwu a neke bumọ ẹñwu k’abomunẹ tu lugbo ọtẹ eñmọ?
KỌCHẸ MANYU
Abu amagbadufu neke tu ẹñwu ọmẹmẹlẹ lugbo ọtẹ eñmọ?
G’amẹñwu k’ẹ neke che ichẹñwu k’ẹ tene d’ọwọ n’ọtẹ eñmọ tẹgwule.
“Ẹñwu K’ẹ Che Ichẹñwu K’ẹ Tene D’ọwọ N’ọtẹ Eñmọ Ololo” (Ọdọgọ Ide, January 1, 2010)
I dukpẹ k’Abo Kraist ki na d’ago ọtẹ k’ọlama taku ma ñmọ?
“Ene Kwugbo Abo Ku Ma Agb’ọtakada Wa” (Ọdọgọ Ide, February 15, 2007)
Efu ọhiala “Efu Mi Ch’akọ Ñwu Ọtẹ N,” g’alu k’ẹnẹkẹlẹ ka kw’ọna ọtẹ eñmọ.
a Abo ku ma a ñm’ọtẹ ololo ku ma tene d’ọwọ no ki ma la jẹ che n dukpẹ ku ma tene atẹko kwugbo dọktọ. Dọktọ wewe kakini ichẹñwu k’onẹ n’ihianyi ọtẹ eñmọ tẹgwule, i mẹ k’ẹnẹ lẹ ki f’ọwọ n’ọtẹ eñmọ.
