Ọgbọ duu wa che n’ọna ojoji ojoji k’a tene k’a na mọla le. Ichẹñwu k’a lebọ amọla-ukọ ki defu Baibul lugbo ọla emu, e-lẹ ajẹñwu wa k’a neke mọla ọna ki ny’uwa eju, ki la ñọ jẹñwu ẹdọ Jihofa bọ gẹ. K’a kọchẹ lugbo amọla-ukọ ka ki kọla lugbo ọla emu.

1. Ẹn̄wu ch’amọla-ukọ ki dukpẹ k’a na lebọ ichẹñwu k’a tene mọla?

I dukpẹ k’a na tu “ubọla ma ki ch’iko-[wa] manyu eju anyọ kp’ibe ewanẹ,” k’a la na jẹñwu ukpo wa ki chẹ fẹ iko duu k’abomunẹ neke li kaki “a kpẹdọr’Ọjọ.” (1 Timoti 2:​9, 10) G’amọla-ukọ mẹlẹ-i: (1) I dukpẹ k’ukpo wa ki na “ch’iko-wa.” Dabalu k’ẹ ch’ali ef’ujeju abudọ, Amẹnibenu Jihofa amọla ọna ojoji ojoji, ama oji k’a che kpai ukpo k’a nẹ ad’ojima ñwu Ọjọ k’a rẹ. (2) Emọla kpai “eju anyọ” che kaki a ki jẹñwu ukpo k’a nẹ ki jẹñwu abomunẹ ku ma na kpibe ẹbiẹnẹ n, ki la we jẹñwu amonẹ k’eju kado wa ololo n. (3) A “d’ibe ewanẹ” ña ichẹñwu k’a ma ra t’ukpo abẹki oji emu manyu oji ela etitọ duu ki dufu ubi n. (4) Ọna k’a mọla le iko duu ki na du ña kaki “a kpẹdọr’Ọjọ,” todu k’amonẹ ki neke li kaki a r’Ọjọ ochochi.​—1 Abo Kọrint 10:31.

2. Ẹñwu chi ki dukpẹ k’a na kpibe lugbo amọmaye wa ichẹñwu k’a tene tu ẹñwu k’a nẹ?

Ochochi i che kaki a neke tu ẹñwu du k’a tene nẹ. Ama i dukpẹ k’a na kpibe lugbo abomunẹ ichẹñwu k’ẹñwu k’a tene nẹ neke n’ihianyi wa ñwu ma. A ch’alu duu k’a neke che k’a we kp’ẹnẹ duu ẹdọ biẹ, chai, k’a “na che ẹñwu ki r’ekeji [wa] eju, owñ chẹñwu k’i nyọ k’i anẹ owñ nyọgba.”​—Gba Abo Rom 15:​1, 2.

3. Abu ọna k’a mọla neke jẹñwu abomunẹ ku ma wa rẹ Jihofa?

Ochochi i che kaki a tene k’a na mọla nyọnyọ iko duu, ama e-ki dukpẹ k’a du t’ibe nyọnyọ ch’e-k’a nẹ lo t’ujeju kpai oko uchẹnyọ ejẹ. A tene k’amonẹ ki kọ eneti r’uchẹnyọ todu ọna k’a mọla n. Ama, a tene k’ọna k’a mọla ki jẹñwu amonẹ ku ma ñeju ekọchẹ ochochi lugbo Ọjọ k’a rẹ, ki la ñọ “ch’ọñwẹ ny’ukọ-ọla Ọjọ, Ẹnajadu wa.”​—Taitọs 2:​10.

 N’UMA NYỌGBA

4. Ichẹñwu k’a mọla nyọnyọ, a d’ojima ñwu Jihofa

Ẹñwu chẹñwu ki ch’ogbogaga tule ki ajẹñwu wa na mọla nyọnyọ iko duu? Gba Eli Ekọ D’Ọjọ 47:​2, ubilẹ mẹ ch’oluka oji am’ene-i:

• Ichẹñwu k’a rewa kaki a j’odu Jihofa, abu e-lẹ neke jẹñwu wa k’a na mọla nyọnyọ?

• Ẹ neju kaki i chẹñwu ogbogaga k’a na mọla nyọnyọ ichẹñwu k’a lo t’ujeju abẹki oko uchẹnyọ ejẹ? Ẹñwu chi k’ẹ kabalẹ?

 5. Alu k’a neke d’ibe ẹnyọ tu ọna k’a mọla le

G’IFIDIO-i.

Dagba k’ukpo k’a nẹ ki ch’e-ọkọ lile abẹki e-ọkọ kẹkẹ, i dukpẹ ki chẹ fẹ ki la ch’aleju uche k’a nẹ todu-wñ. Gba 1  Abo Kọrint 10:24 kpai 1 Timoti 2:​9, 10. Ubilẹ, mẹ ch’oluka oji ẹñwu ki ma jẹñwu wa n’ukpo . . .

• ki chẹ ch’iwa kpai e-ki ma ch’aleju ẹñwu k’a che n.

• ki chẹ de m’onẹ ọla, ki ad’añọla onẹ ña abẹki e-ki neke jẹñwu onẹ kpibe abutabu.

Dagba k’a ma def’ọlọda Mosis n, i jẹñwu wa m’ẹñwu ki ch’ibe Ọjọ lugbo ẹñwu-i. Gba Ọlọda Eduwa Onukeji 22:​5, ubilẹ mẹ ch’oluka oji ene-i:

• Ẹñwu chi ki ma dukpẹ k’a na mọla lọna ki ajẹñwu onobulẹ ki biu ẹnẹkẹlẹ abeki ẹnẹkẹlẹ ki biu onobulẹ n?

Gba 1  Abo Kọrint 10:​32, 33 kpai 1 Jọn 2:​15, 16, ubilẹ mẹ ch’oluka oji am’ene-i:

• Ẹñwu chi ki dukpẹ k’a na kpibe ichẹñwu k’ọna k’a mọla ad’ihianyi ñwu abo ki d’ogbegbele wa abẹki abo ki d’ujeju abudọ wa?

• Abu amonẹ amọla ogbegbele wẹ?

• Ẹ neju kaki i n’e-ki ma nyọ ñwu Abo Kraist ochochi ni? Ẹñwu chi k’ẹ kabalẹ?

 ẸY’ỌLA UKỌ-I

Ichẹñwu k’a d’ibe tu ẹñwu ọmẹmẹlẹ lugbo ọna k’a mọla le, e-lẹ adu ña kaki a d’ojima ñwu Jihofa kpai abomunẹ.

Ẹñwu ẹ kọche?

• Ẹñwu chi k’ọna k’a mọla chẹñwu ogbogaga ñwu Jihofa?

• Ẹñwu ch’amọla-ukọ ki dukpẹ ki nẹ wa le ichẹñwu k’a tene tu ọna k’a mọla le?

• Eju ẹñwu amonẹ neke du g’Ọjọ k’a rẹ todu ọna k’a mọla le?