UKỌCHẸ 53

Tu Amẹñwu Edu Yaju Ki Ajẹñwu Ẹdọ Jihofa Bọ

PLAY

Jihofa che ‘Ọjọ ẹdẹbọ.’ (1 Timoti 1:11) I atene k’a n’ẹdẹbọ k’a la jura ọlai wa. Ẹdọ-wñ abọ ichẹñwu k’a d’iko tanẹ k’a ñmi ubi k’a f’ukọlọ che. Ef’ukọchẹ-i, a na li am’ọna k’a neke d’iko tanẹ k’a ñmi ubi ukọlọ lọna ki anyọ ñwu wa, ki ajẹñwu ẹdọ wa bọ, ki la añọ jẹñwu ẹdọ Jihofa bọ gẹ.

1. Ẹñwu dukpẹ k’a kpibe oji-wñ ichẹñwu k’a tu ẹñwu k’a du yaju?

Ẹñwu ẹ ñeju k’ẹ na du yaju ichẹñwu k’ẹ ñmi? Abo ka añeju ku ma gw’unyi añmi, ku ma na gb’ọtakada, na gb’eli, na g’ifimu abẹki elo t’oji intanẹti. Abomunẹ añeju ku ma na ny’udufu kp’amonukwu ma, ku ma na gw’aji abẹki et’igemu. E-duu k’a ñeju k’a na du yaju efu amẹñwu-i, i dukpẹ k’a tu ẹñwu ki “ar’Ondu ẹdọ.” (Abo Ẹfẹsọs 5:10) I chẹñwu ogbogaga k’a d’amẹñwu-i t’ibe todu ojile amẹñwu k’amonẹ adu yaju chẹ kọ ñwu amẹñwu ki Jihofa ach’ulaka-ma dabu ẹñwu olo, abutabu kpai obochi eche. (Gba Eli Ekọ D’Ọjọ 11:5.) Ẹñwu neke ch’atẹko wẹ k’ẹ neke tu ẹñwu ọmẹmẹlẹ k’ẹ du yaju?

Ichẹñwu k’a tu amonukwu ku ma fẹdọ Jihofa, e-lẹ ach’atẹko wa, i la añọ jẹñwu wa k’a neke tu amẹñwu ọmẹmẹlẹ k’a du yaju. Dabalu k’a kọchẹ kwefu Ukọchẹ 48, “ẹnẹ ki ab’anibe kpẹrẹ an’ibe.” Abalẹ gẹ, ichẹñwu k’a b’abo ku ma ma n’ufẹdọ Jihofa n kp’ẹrẹ, “a kpabiẹ.”—Ita Ita 13:20.

2. Ẹñwu chi ki ma dukpẹ k’a na kp’iko biẹ ololo oji amẹñwu k’a du yaju n?

Dagba k’ẹñwu k’a tu k’a du yaju ki chẹñwu ọmẹmẹlẹ, i dukpẹ k’a d’ibe che k’a we kp’iko biẹ ololo oji-wñ. Ichẹñwu k’a ma d’ibe che n, a neke we n’iko ki dukpẹ k’a du ch’amẹñwu ki ch’ogbogaga tule. Baibul ka ñwu wa ‘k’a f’iko la tẹ’ ñwu ẹñwu ki ch’ogbogaga tule.—Gba Abo Ẹfẹsọs 5:15, 16.

N’UMA NYỌGBA

Kọchẹ alu k’ẹ neke m’ẹñwu ọmẹmẹlẹ k’ẹ tu lugbo amẹñwu k’ẹ du yaju.

3. Ra b’amẹñwu ẹbiẹnẹ edu yaju tẹ

Ẹñwu chi ki dukpẹ k’a na d’ibe tu amẹñwu k’a du yaju nyọnyọ? G’IFIDIO-i, ubilẹ mẹ ch’oluka oji am’ene-i.

IFIDIO: Ẹñwu I Dukpẹ Ku Na Du Yaju? (4:39)

Abu am’uja k’abo Rom adu yaju iko igbele biu amẹñwu k’amonẹ añeju edu yaju eñini?
Efu ifidio-i, ẹñwu Danny kọchẹ lugbo ẹñwu edu yaju?

Gba Abo Rom 12:9, ubilẹ mẹ ch’oluka oji ene-i:

Abu ọgba Baibul-i neke ch’atẹko wẹ k’ẹ tu amẹñwu uyaju ọmẹmẹlẹ?

Ẹñwu ch’amẹñwu ka ki Jihofa ach’ulaka-wñ? Gba Ita Ita 6:16, 17 kpai Abo Galatia 5:19-21. Ubi ku mẹ f’amọgba Baibul-i gba, mẹ ch’oluka oji ene-i:

Ẹñwu ch’amẹñwu k’ọgba Baibul-i kọla oji-wñ ki chẹ kpọranẹ ef’amẹñwu k’amonẹ adu yaju eñini?

Ọna k’ẹ neke d’ibe tu amẹñwu k’ẹ du yaju

T’ọla wẹ ene:

Iya ẹñwu i che? Amẹñwu uyaju lẹ che n’ẹñwu ki Jihofa ach’uklaka efu-wñ?
Iko mẹ na ch’iya lẹ? I agb’iko ki dukpẹ ku du ch’amẹñwu ogbogaga?
Uwẹ kp’abo ache? I ajẹñwu mi na kp’iko biẹ kpai abo ki ma fẹdọ Jihofa ni?

I anyọ ñwu wa ichẹñwu k’a ra b’amẹñwu ki neke du wa tefu ihianyi tẹ. Todulẹ, i dukpẹ k’a lejiji b’amẹñwu uyaju k’a li kaki i neke biẹnẹ ñwu wa tẹ

4. D’iko wẹ chekwu nyọnyọ

G’IFIDIO-i, ubilẹ mẹ ch’oluka oji ene-i.

IFIDIO: Ẹñwu Ẹ D’iko Wẹ Che? (2:45)

Dagba k’ọmaye ẹnẹkẹlẹ ki def’ifidio-i ma g’ẹñwu ẹbiẹnẹ n, ẹñwu du ña kaki i d’iko-wñ chekwu lọna ọmẹmẹlẹ n?

Gba Abo Filipai 1:10, ubilẹ mẹ ch’oluka oji ene-i:

Abu ọgba Baibul-i neke ch’atẹko wẹ k’ẹ tu alu ki dukpẹ k’ẹ kp’iko biẹ kade oji ẹñwu k’ẹ du yaju?

5. Tu amẹñwu ọmẹmẹlẹ k’ẹ du yaju

Dagba ki n’amẹñwu edu yaju ki biẹnẹ eju Ọjọ, i che n’amẹñwu omunẹ k’a neke du yaju ki ab’Ọjọ ẹdọ. Gba Akọla ñw Ujeju 8:15 kpai Abo Filipai 4:8, ubilẹ mẹ ch’oluka oji ene-i: