TOLUMỌYE 26

Tetuu Kị Duonị Sei Yeama Paa Mịnị A O?

FARỊ

Biin ifieama seiye paa daba kịmịama bii mịnị “tetuu kị duonị mị seiye bị paa ma o?” Bible bei biibịbị paraị wó pịrị wẹrị emi yọmị, wó mịẹ pọwẹị mịnị!

1. Satan tebara ka kị sei akị bei ọkpọ bọọ tụa ma o?

Satan tịbịkụrọ Jehovah pịrị mị. Omịnị kịmị-otu daa dọụ mịnị duonị Adam mọ Eve mọ lẹịmọ wẹrị tịbịkụrọ Jehovah pịrị mị. (Genesis 3:1-5) Satan ikpé egberi ka kị bei ye mịẹ mị. Omịnị ikpé egberi gbaa Eve pịrị mị. Satan gbaa Eve pịrị amọ Jehovah anị ebi dọụgha, amịnị Ọkpọnanaowei gbaa egberi pei daba pọwẹị a laagha fa. Má omịnị bọlọụ ikpé egberi bị gbaa mị: Amịnị fịịgha fa. Anị duonị, Bible Satan akị “ikpé-owei bá ikpé mịnị kịmịbosẹ daụ” tịịn wẹrị emi.—John 8:44.

2. Adam mọ Eve mọ teeki sẹlẹ angọ pịrị ma o?

Jehovah Adam mọ Eve mọ tẹmẹ bị, kẹnị sei kpọ anị angọ bọọ fa. Anị duonị ebi ye mịẹmụ yọmị kụrọ a pịrịgha. Jehovah tarị nana emi duonị omịnị biin tịn-beinyaịama akị a pịrị mị, má amịnị asẹẹ fị dá kẹnị bẹtịbị kị gbele kụmọ bara gbaa mị. (Genesis 2:15-17) Anịa amịnị Ọkpọnanaowei gbaa egberi peigha, fị kụmọ gbaa tịn-beinyaị mị amịnị mọ fị mị. Eve “tịn-beinyaị kọn fị mị.” Adam bo ifie bị, omịnị kpọ tịn-beinyaị “fị mị.” (Genesis 3:6) Adam mọ Eve mọ ịkịsatụa bara Ọkpọnanaowei gbaa yọ peigha duonị, amịnị sei mịẹ kịmịama a paa mị. Má amịnị Jehovah daabụọ kpọ sẹlẹ tangbei mị. Anị mịẹ ye duonị amịnị ụya fị kụrọmọ mị.—Genesis 3:16-19.

3. Adam mọ Eve mọ mịẹ yebị tebara ka kị wó gbele ma o?

Adam mọ Eve mọ sei mịẹ dẹ mị, sei anị angọbo duo sụọdẹ. Amịnị sei akị anị ziitusẹ pịrị dẹ. Anị duonị Adam gbelemọ yọmị Bible gbaa mị: “Sei, kẹnị kịmị kị duo bo ọkpọ bọọ sụọ mị, fịị kpọ sei kị duo sụọ bo kịmịsẹ laa mị.”—Romans 5:12.

Omịnị biin tuuama kị duonị ụya fịị mịnị. Zụa ifieama wó tọn mịnị ebigha iroromọ wó miẹ ụyafịị mịnị, zịnịotu tọn mịnị sei iroromọ kpọ wó ụyamọ mịnị. Má zụa ifieama omịnị agbẹịgha ifie, agbẹịgha yọ ghọ timi wẹrị akpotu wó laa mịnị.—Ecclesiastes 9:11 goo.

EBIBARA TUUDỌỤ

Ọkpọnanaowei ụya mọ sei mọ akị wó pịrịgha, má akpọ bọọ paa mịnị sei yemọ Ọkpọnanaowei gbele emi bara dọụ ẹrị.

4. Ụya kọn akpọ bọọ bo kịmị mị

Biin kịmịama Ọkpọnanaowei kị ọkpọ daa emi bara kị tọn wẹrị emi. Anị gesii egberi? VIDIO farị.

VIDIO: Te Ụbọ Kị Kiriogbo Daa Mịnị A O? (1:24)

James 1:13 má 1 John 5:19 goo dá, bei biibịbị kẹrị ẹrẹtei:

Ọkpọnanaowei kị ụya mọ seiye mọ mịẹ paamọ mịnị a o?

5. Satan kị akpọ daa mịnị duonị, paa emi yebo dii

VIDIO farị.

VIDIO: Tetuu Kị Duonị Ọkpọnanaowei Ụya Bụọmọ Paa Mịnị A O?—Dọlọyọ (3:07)

Genesis 3:1-6 goo dá, bei biibịbịmọ kẹrị ẹrẹtei:

Satan te ikpé egberi kị gbaa ma o?—Gooyọ 4 mọ 5 dii.
Satan tebara ka kị Jehovah wó ebi dọụgha bara gbaa ma o?
Satan gbaa bara dii daba, Jehovah daabụọ laa kịmịawọụ mịẹ pọwẹị a paa emi a o?

Ecclesiastes 8:9 goo dá, bei biibịbị kẹrị ẹrẹtei:

Jehovah akpọ daagha duonị teeki paa mịnị a o?

Adam mọ Eve mọ paradise ka tim’mị. Sei kpọ anị angọ gbeleghatimi. Anịa, amịnị Satan pei wẹrị tịbịkụrọ Jehovah pịrị mị
Adam mọ Eve mọ tịbị-kụrọ dẹbị, sei, ụya má fịị bo kịmịsẹ laa mị
Jehovah sei, ụya má fịị kọn siin mịnị. Kịmịawọụ sei akị ọngọ ghọ nanagha fa má paradise kọọ timi inyenrin mịnị

6. Wó laa mịnị ụyabo Jehovah dịsẹgha

Wó laa mịnị ụyabo Jehovah dịsẹ emi a o? Pẹrẹ David mọ Peter mọ gẹẹ egberi dii. Psalm 31:7 má 1 Peter 5:7 goo dá, bei biibịbị kẹrị ẹrẹtei:

Wó laa mịnị ụyabo, Jehovah dịsẹgha bara ị́ mọ nimi yọbị tebara ka kị iné angọ a sụọ ma o?

7. Ọkpọnanaowei wó ụyamọsẹ seri siin mịnị

Isaiah 65:17 má Revelation 21:3, 4 goo dá, bei biibịbị kẹrị ẹrẹtei:

Tetuu kị duonị Ọkpọnanaowei wó ụyamọsẹ seri siin mịnị bara gbaa yọmị wó kụrọmọ ma o?

Ị́ kpọ nimi ma?

Satan bọlọụ ikpé ifie mị, omịnị Jehovah ẹrẹ kị seimọ mị. Satan gbaa amọ Jehovah tarị nanagha má sei bara ka kị wó daa mịnị. Anịa Jehovah ụya seri siin daba, omịnị wo ẹrẹ mịẹ yalịyalị mịnị. Jehovah ẹrẹ mịẹ yalịyalị mụ yọmị, yelaa dẹịn ye. Jehovah kị wó daa agbẹị emi bara kịmịsẹ mọ nimi mịnị.—Matthew 6:9, 10.

ZỤA KỊMỊAMA GBAA MỊNỊ: “Ọkpọnanaowei dọụbara kị duonị omịnị ụya mịnị.”