TOLUMỌYE 28

Jehovah Mọ Jesus Mọ Mịẹ Ị́ Pịrị Dẹ Yebo Ina Tọrụkẹrị Emi Bara Mịẹdịa

FARỊ

Iné ikie-ụbọ ebi ye akị ị́ pịrị daba, ị́mịnị pọwẹịtimi tọrụkẹrịyọ mịẹdịa mịnị. Jehovah mọ Jesus mọ ebi dẹịn dịẹpịrịye akị wó pịrịdẹ. Bei dịẹpịrịye mị te ye a o, má omịnị tebara ka kị tọrụkẹrị emi bara mịẹpaamọ mịnị a o?

1. Jehovah mọ Jesus mọ wó pịrị yebị, omịnị tebara ka kị tọrụkẹrị inyenrinbụọ mịẹdịa mịnị a o?

Bible gbaa amọ “peibolou akị Jesus ghọ tụa dẹ kịmịsẹ” bẹseri bẹseri ụndụ nana mịnị. (John 3:16) Anịa omịnị tebara ka kị peibolou akị Jesus ghọ tụa mịnị a o? Peibolou akị Jesus ghọ tụa daba naa fagha. Omịnị wó sẹlẹ akị angọ pịrị mịnị yemọ ka kị wó peibolou mịẹdịa a paa emi. (James 2:17) Omịnị wó mịẹ mịnị ye bá wó ẹrẹ mịnị egberi ka kị peibolou nana wẹrị emi bara mịẹdịa daba, omịnị bo Jehovah mọ Jesus mọ naịn dẹịn mịnị.—John 14:21 goo.

2. Te bẹbẹẹ ugé kị baratụa wó pịrị wẹrị Jehovah mọ Jesus mọ mịẹ yebị tọrụkẹrịyọ mịẹdịa mịnị a o?

Jesus fịịmụ erein mị, buboru korodẹ ifie mị, omịnị zịnị ụwọụ nị wo tuuduo-otubo akị wo kụn ịkịan kẹrị-ukie mụ ye mịẹ mị. Omịnị kẹnị bẹbẹẹ ugé mịẹ akị wo tuuduo-otubo dịa mị. Bible, Jesus bei mịẹ yemị akị “Nanaowei buboru Fịyaị Fị Ugé,” anịghakpọ Christ fịị ukieye kị tịịn wẹrị emi. (1 Corinthians 11:20) Jesus bei ye mịẹ tuu sẹ wo fịrịmọpaa-otu mọ—má gesii Christtuuduo-otumọsẹ—wo fịị bị ukiemụ yọ kị dọụ mị. Omịnị gbaa mị: “ifiemọsẹ bei ye mịẹ ine ukietimi.” (Luke 22:19) Anị duonị, ị́mịnị nanaowei buboru fịyaị fị ugé bọọ bo paa dẹ ifiesẹ, ị́mịnị Jehovah mọ Jesus mọ mịẹ yemị, tọrụkẹrị emi bara kị mịẹdịa mịnị.

EBIBARA TUUDỌỤ

Mọkpọ Jehovah mọ Jesus mọ mịẹ yemị iné tọrụkẹrị emi bara mịẹdịa mịnị ụwọụama tolumọ. Má Jesus fịị bị yelaa emi bara kpọ tolumọ nimi.

3. Iné tọrụkẹrị emi bara mịẹdịa mụ bara mị

Kịmị fịị duo ị́ zụọbụọmọ daba, ị́mịnị bịsẹ ụbọ barafa agbẹị emi a? Anịghakpọ ị́mịnị tọrụkẹrịyọ mịẹdịa mịnị a o?

Jehovah wó ụndụ bosẹ zụọdẹ. 1 John 4:8-10 goo dá, bei biibịbịmọ kẹrị ẹrẹtei:

Tetuu kị duonị Jesus kụn ịkịan mị ebi dịẹpịrịye a paa ma o?
Jehovah mọ Jesus mọ mịẹ ị́ pịrị yebị tebara ka kị ị́ gbele ma o?

Jehovah mọ Jesus mọ mịẹ wó pịrị yemị dii daba, omịnị tebara ka kị torukẹrịyọ mịẹdịa a paa emi a o? Wó 2 Corinthians 5:15 má 1 John 4:11; 5:3 goo. Iné goo dẹ yọsẹ, bei biibịbị kẹrị ẹrẹtei:

Bei Bible yọ dii daba, omịnị tebara ka kị tọrụkẹrịyọ mịẹdịa mịnị a o?

4. Jesus diimịẹ

Mọkpọ akị tọrụkẹrịyọ mịẹdịa mụ zịnị ụwọụ, anị Jesus diimịẹ mịnị yọmị. Wẹrị 1 Peter 2:21 goo dá, bei biibịbị kẹrị ẹrẹtei:

Ị́ kpọ tebara ka kị Jesus diimịẹ mịnị a o?

Jesus Ọkpọnanaowei egberi tarị, gbaa kịmịama pịrị, bá baratụa kịmịama pịrị mị

5. Ị́ kpọ bo Christ fịị ukie ugé bọọ paa

Christ akị wó fịị ukie ugé mịẹ bara nimi mụ yọmị, wẹrị Luke 22:14, 19, 20 goo dá, bei biibịbịmọ kẹrị ẹrẹtei:

Mị Christ Fịị Ukie Ugé mịẹ ifie mị teeki paa ma o?
Bread mọ wuru mọ te ye ka tịbị-tịẹmọ wẹrị emi a o? —Gooyọ 19 mọ 20 dii.

Jesus, wo tuuduo-otubosẹ, kụraị bo wo fịị erein laa daba, bei yebị mịẹ akị wo ukietimi kị dọụ wẹrị emi. Anị duonị, Jehovah Iseriotu kụraị mị, kẹnị ifie ka kị Christ fịị ukie ugé mịẹ mịnị. Ị́mịnị ebibara mị yelaa ugé nimi dọụ emi aba, VIDIO farị. Má, bei biibibi kẹrị ẹrẹtei.

VIDIO: Jesus Fịị Bị Kẹrị Ukie (1:41)

Teeki Jesus Fịị Ukie Ugé bọọ paa ma o?

Bread mọ wuru mọ, ye kọọ tịbị-tịẹmọ wẹrị emi. Bread bị Jesus sei gbelegha angọ kọọ tịbị-tịẹmọ wẹrị emi. Wuru mị wo asịịn ka tịbị-tịẹmọ wẹrị emi

ZỤA KỊMỊAMA GBAA MỊNỊ: “Peibolou akị Jesus ghọ tụa dẹsẹ fadẹ, zịnịye bá fa.”

Ị́mịnị tebara ka kị John 3:16 má James 2:17 akị peibolou bẹtịbịgha bara mịẹdịa a paa emi a o?

KỊLỌỌBARA

Omịnị peibolou akị Jesus ghọ tụa, má Christ fịị ukie ugé bọọ bo paa mịnị ifiesẹ, omịnị tọrụkẹrịyọ kị mịẹdịa mịnị.

Waị diitụa

Omịnị tebara ka kị peibolou akị Jesus ghọ tụa mịnị a o?
Ị́mịnị tebara ka kị Jehovah mọ Jesus mọ mịẹ yemị iné tọrụkẹrịyọ mịẹdịa mịnị a o?
Christ Fịị Ukie Ugé bọọ bo paa mụ yọmị, tebara ka kị yelaa emi a o?

Tolumọ siin erein mị:

Mịẹmụye

Christ Fịị Ukie Ugé mịẹ ifie laa daba, ị́ kpọ bo paa. Bible akị ị́ tolumọ mịnị kịmị bii dá Christ fịị ukie ugé mịẹmụ ifie nimi. Mịẹmụ ifie mọ, bá yọ mọ gẹẹ akị yọ ghọ wẹrị.

Zịnị:

Your other goal