TOLUMỌYE 50

Teeki Iné Warịbolou Mịẹ Pọwẹịmọ A Paa Emi A O?—Part 2

FARỊ

Jehovah kị awọụ akị daụ mọ yin mọ pịrị wẹrị emi. Anị duonị, amịnị ebibara tọrụtụa bei dịẹpịrịye dii kị Jehovah mọ dọụ wẹrị emi. Jehovah baratụa a pịrị a paa emi kịlịkịlị tolumọyeama akị a pịrịdẹ. Mị tolumọyebo baratụa awọụbo kpọ pịrị wẹrị laa warịbolou mịẹ pọwẹịmọ mịnị.

1. Jehovah te tolumọye ka kị daụ mọ yin mọ otu pịrị wẹrị emi a o?

Jehovah dọụ emi bara mị, daụ mọ yin mọ otu anị awọụbo tarị, ifie mịẹpaamọ awọụbo mọ inyenrin gbelei, akpotu bụọmọ wẹrị a laa kụmọ bá Bible tolumọbịbị dii wẹrị a tolumọ. (Proverbs 1:8) Ọkpọnanaowei gbaa daụ otubo pịrị amọ: “Jehovah tolumọyebo akị [anị awọụbo] . . . sibe paamọ.” (Ephesians 6:4 goo.) Daụ mọ yin mọ otu Jehovah gbaa bara dii awọụ sibe, má awọụ sibefịrị mị akị zịnịotu pịrịghaba, Jehovah mịẹ pọwẹị mịnị.

2. Jehovah te tolumọye ka kị awọụbo pịrị ma o?

Jehovah gbaa akị awọụbo pịrị amọ: “Anị daụ mọ yin mọ gbaa egberi pei.” (Colossians 3:20 goo.) Awọụbo daụ mọ yin mọ diidụbamọ má anị gbaa egberi pei daba, amịnị Jehovah bá anị daụ mọ yin mọ otubo mịẹ pọwẹịmọ mịnị. (Proverbs 23:22-25) Jesus kala tọbọụ ghọ timi ifie mị, ebi mịẹdịaye ka paa mị. Jesus sei gbelegha kị gbaa kpọ, omịnị wo yalịyalịgha daụ mọ yin mọ otubo diidụbamọ, má anị gbaaye pei inyenrin mị.—Luke 2:51, 52.

3. Teeki baratụa iné warịbolou pịrị Jehovah mọ naịn dẹịn mịnị a o?

Ị́ kpọ daụ anịghakpọ yin ụbọ aba, iné awọụbo Jehovah tarị daba ị́ mịẹ pọwẹị nana mịnị. Teeki baratụa ị́ pịrị mịnị a o? Bible gbaa bara mịẹ: “Petimi emi ifie má wẹnị mịnị ifie, [Jehovah egberibo] akị ebibara anị awọụbo tolumọ.” (Deuteronomy 6:7) “Ebibara tolumọ” gbaa mịnị mị, barịị barịị akị a tolumọ kị gbaa mịnị. Ị́ kpọ nimi wẹrị emi bara bị, kala awọụ ye ukie ị́ mọ dọụmịnị aba, ị́mịnị yebị akị barịị barịị a tolumọ mịnị. Anị duonị, mị Bible gooyọ gbaa mịnị bara bị, ifiemọsẹ fomuun mịẹpaamọ Jehovah emibara mị akị iné awọụbo tolumo. Akẹn ovurubosẹ ifie mịẹpaamọ wẹrị warịbolousẹ gbelei Bible tolumọ. Ị́ naa awọụ ziigha kpọ, akẹn ovurubosẹ, ifie mịẹpaamọ wẹrị Bible tolumọ mịnị yọmị ebi emi.

EBIBARA TUUDỌỤ

Baratụa iné warịbolou pịrị wẹrị dọọ má pọwẹịtimi a paa emi tolumọ yeama dọụ ẹrị.

4. Tarị nana wẹrị emi bara ka kị iné awọụbo tolumọ

Tọbọụ tolumọ fịrị mị kụrọ fa k’emi. Anịa Bible tebara ka kị baratụa wó pịrị a paa emi a o? James 1:19, 20 goo dá, bei biibịbịmọ kẹrị ẹrẹtei:

Daụ mọ yin mọ anị awọụbo mọ ẹrẹtei mịnị ifie mị, tebara ka kị tarị nana wẹrị emi bara mịẹdịa a paa emi a o?
Tetuu kị duonị boloukọọn mịnị ifie a zezemọye akị tọbọụ pịrị agbẹịgha o? a

5. Iné awọụbo kekere

Iné awọụbo ị́ mọ kekere dọụ mịnị aba, zọzọ bụnụ egberi bị akị a mọ mọ ẹrẹtei mị, yelaa fa k’emi. Bịsẹ bara mịẹmụ yọmị kụrọ ị́ pịrị kpọ paa emi. VIDIO farị dá, bei biibịbịmọ kẹrị ẹrẹtei.

VIDIO: Iné Awọụbo Bụọmọ Sei A Sụọ Kụmọ (2:58)

Tetuu kị duonị zọzọ bụnụ egberi akị awọụbo mọ ẹrẹteimụ yọmị kụrọ zụa daụ mọ yin mọ otu pịrị mịnị a o?
Zụa daụ mọ yin mọ otuama tebara ka kị ere mọ owei mọ zọzọ bụnụ egberi gbaa akị anị awọụbo pịrịdẹ a o?

Bụrụ koromọ wẹrị bara kị paa mịnị, Satan akpọ mị kọkọ sei bọlọụ ka mú mịnị. Wó 2 Timothy 3:1, 13 goo dá, bei biibịbị kẹrị ẹrẹtei:

Gooyọ 13 gbaa wẹrị emi bolousei kịmịbo, zụa yaị kala awọụ kpọ sọnlọ mịnị. Anị duonị daụ mọ yin mọ otu tetuu kị duonị ọwọụbo kekere bá ere mọ owei mọ zọzọ bụnụ egberi bị akị anị awọụbo mọ ẹrẹtei agbẹị emi a o?

Ị́ kpọ nimi ma?

Baratụa daụ mọ yin mọ pịrị wẹrị awọụmọ kekere, má ere mọ owei mọ zọzọ bụnụ egberi akị awọụ mọ ẹrẹtei a paa emi yeama Jehovah Iseriotu mọ mịẹpaamọdẹ. Wẹrị mịẹdịaye dii:

Ine Awọụbo Kekere (vidio)
Learn From the Great Teacher, chapters 10 má 32
“Teaching Your Child About Sex” (Awake! No. 5 2016)

6. Iné daụ mọ yin mọ diidụbamọ

Kala awọụbo mọ asịyaị-pesibo mọ diidụbamọ bara akị anị daụ mọ yin mọ ẹrẹ. VIDIO farị dá, bei biibịbịmọ kẹrị ẹrẹtei.

VIDIO: Ị Tebara Ka Kị Ine Daụ Mọ Yin Mọ Ẹrẹtei Mịnị A O? (2:19)

Tetuu kị duonị diidụbamọ ụwọụ akị daụ mọ yin mọ otumọ ẹrẹtei mịnị yọmị yelaa emi a o?
Asịyaị-pesi tebara ka kị diidụbamọ nana wẹrị emi bara akị daụ mọ yin mọ otumọ ẹrẹ a paa emi a o?

Proverbs 1:8 goo dá, bei biibịbị kẹrị ẹrẹtei:

Daụ mọ yin mọ mịẹmụ ye gbaa akị asịyaị-pesi kịmị pịrị daba, omịnị tebara kị mịẹ agbẹị emi a?

7. Iné warịbolou mọ kẹnịsụọmọ Jehovah karị

Jehovah Iseriotu wikibosẹ ifie mịẹpaamọ wẹrị warịbolousẹ gbelei Bible tolumọ mịnị. Warịbolou Bible tolumọye tebara k’emi a o? VIDIO farị dá, bei biibịbịbo kẹrị ẹrẹtei.

VIDIO: Warịbolou Bible Tolumọye—Bụụdọọnyebo Mọ Má Arerebo Mọ (8:04)

Tebara kị mịẹ timi wikibosẹ laa warịbolou Bible tolumọye mịẹ a paa emi a o?
Daụ mọ yin mọ otu tebara ka kị warịbolou Bible tolumọye mịẹ ịmbẹlẹmọ má ebimọ dẹịn mịnị a o?—Mị tolumọye agọnọ bọọ emi foto dii.
Iné warịbolousẹ gbelei Bible tolumọ mụ yọmị tetuu kị duonị kụrọ iné warịbolou pịrị a paa emi a o?

Isreal-otu ifie mị, warịboloubosẹ gbelei wo egberibo kẹrị ẹrẹtei bara Jehovah mọ gbaa mị. Deuteronomy 6:6, 7 goo dá, bei biibịbị kẹrị ẹrẹtei:

Ị́mịnị tebara ka kị mị tolumọbịbị kọn tụa inyenrin a paa emi a o?

Zụa Warịbolou-otu Bible tolumọye mịẹ mịnị ụwọụama:

Itu bọọ tolumọmụ yebo akị angọ tọlọmọ.
Iné warịbolou-otubo dịsẹ a paa emi Bible yọ akị a mọ mọ́ ẹrẹtei.
Iné warị bị kala tọbọụ emi aba, jw.org bọọ emi kala awọụ gbelemọ yebo download anịghakpọ printi.
Iné warị bị asịyaị-pesi emi aba, jw.org duo a gbelemọ egberitịbị kọn a tolumọ.
Ị́ mọ iné awọụbo mọ Bible bolou a paa ye dii wẹrị mịẹ gbelei.
Jw.org a emi vidio dii dá kẹrị ẹrẹtei.

ZỤA KỊMỊAMA GBAA MỊNỊ: “Bible kụrọ kaamị, kala awọụ laa sụọtuu nimigha fa.”

Teeki ị́ mọ gbaa a paa emi a o?

KỊLỌỌBARA

Jehovah dọụ wẹrị emi bara mị, daụ mọ yin mọ otuama anị awọubo tarị, a tolumọ bá a kekere; awọụbo anị daụ mọ yin mọ gbaa egberi pei, a diidụbamọ; bá warịbolou kịmịbosẹ gbelei ụ karị.

Waị diitụa

Daụ mọ yin mọ otu tebara ka kị anị awọụbo tolumọ má a kekere mịnị a o?
Awọụbo tebara ka kị anị daụ mọ yin mọ otumọ diidụbamọ mịnị a o?
Warịbolousẹ wiki bolou bọọ ifie mịẹpaamọ wẹrị Bible tolumọ mịnị yọmị, te ebiama k’emi a o?

Tolumọ siin erein mị:

Mịẹmụye

Ị́mịnị akị warịbolou Bible tolumọye mịẹ a paa emi yeama akị itu bọọ zịnịotu bii.

Zịnị:

Your other goal