EGBERITỊBỊ 23
DUMA 28 Gaining Jehovah’s Friendship
Jehovah Omịnị Bo Wó Igeni-otuama A Paamọ Tịịnbịbị kọn Wo Pịrịdẹ
“Ine warị mị á mọ mọ́ timi mịnị, ịmịnị ánị Ọkpọnanaowei a paa mịnị.”—EZEK. 37:27.
TOLUMỌ DỌỤMỊNỊ YEBO
Jehovah wo tịịn wó warị bọọ bo, bá ebibara wo kekeremịnị yọbị wo tọrụkẹrị emi, bịsẹ tọrụkẹrịyọ mịẹ dụbamọ dẹịnmọ yeama wo mọ ditụa mịnị.
1-2. Jehovah te tịịnbịbị ka kị ụ karịmịnị kịmịbo pịrị wẹrịemi a o?
Ị́MỊNỊ Jehovah akị tebara kị dimọ wẹrịemi a o? Jehovah kị iné Ọkpọnanaowei, ị́ daụ, bá iné ikieowei bara kị ị́ mọ parụ a paaemi. Ị́mịnị zịnị kile-ama kọn Jehovah tịịnmịnị kpọ paaemi. Anịa Jehovah igeni kẹrị-akịmịnị Warịnana-owei bara ị́ mọ irorodẹ wẹrị mị?
2 Pẹrẹowei David Jehovah mọ ụ karịmịnị otubo mọ nana wẹrịemi ikie mị tọnmọ timi ifiemị, akị igeni-otu, bá igeniotu kẹrịakịmịnị warịnana-owei kị tọnmọ mị. David Jehovah bii mị: “O Jehovah, te ụbọ kị laa iné warị duosụọ mịnị a o? Te ụbọ kị iné yalịyalị ogun bọọ timi mịnị a o?” (Ps. 15:1) Bei Bible yọmị wo tolumọ amọ, omịnị kpọ bo Jehovah ikie-otuama a paamọ fomuun nana wẹrịemi—anị kọkọ opu fomuun ka paa wo pịrịemi!
JEHOVAH OMỊNỊ BO WÓ IKIE-OTUAMA A PAA KỊ DỌỤMỊNỊ
3. Te ụbọ kị bọlọụ Jehovah igeni-ụbọ a paa ma, Jehovah mọ wó igeni-owei mọ tebara ka kị zọzọ diwẹrị ma o?
3 Jehovah naa kẹnịye kpọ tẹmẹgha wẹrị ifiemị, ụ bẹtịbị kị timi mị. Anịa bo kẹnị ifie laa bị, Jehovah wó bọlọụ tọbọụ tẹmẹ wẹrị akị wó warị ma tụa mị. Jehovah bo warịnana-owei ka paa mị, wó tọbọụ ba igeni-owei ka paa mị, Jehovah pọwẹịtimi igeni kẹrịakị owei a paa mị. Bible gbaa amọ Jehovah wó Tọbọụ “tarị kụrọmọ mị.” Jehovah tọbọụ kị bọlọụ igeni-owei bị, ómịnị “ifiebosẹ [Jehovah] tọrụyọ bọọ timi pọwẹịtimi mị.”—Prov. 8:30.
4. Te otu kị mọkpọ bo Jehovah igeni-otuama a paa ma o?
4 Jehovah angel-otubo tẹmẹ mị, ámịnị kpọ tẹmẹ angọ kị nana wẹrịemi, mị angel-otubo kpọ bo Jehovah igeniotuama a paamọ fomuun nana mị. “Ọkpọnanaowei awọụama” ka kị á tịịn mị, bá ámịnị Jehovah mọ emi yọmị ámịẹ pọwẹịmịnị. (Job 38:7; Dan. 7:10) Jehovah naa kịmịawọụ tẹmẹgha ifiemị, angel-otubo bẹtịbị kị Jehovah ikie-otuama a timi mị. Ámịnị biin kụraịama kọn Jehovah ikie-otuama a paadẹ kị Jehovah kịmịawọụ tẹmẹ mị. Jehovah kịmịawọụ tẹmẹ ifiemị, ámịnị bo wó igeniotụama a paamụ fomuun kọn á pịrị mị. Zụa kịmịama bo Jehovah igeniotu a paa mị, gbaamaba Enoch, Noah, Abraham, bá Job kpọ. Ámịnị gesii bara kọn Ọkpọnanaowei karị mị. Ọkpọnanaowei ikie-otuama anịghakpọ “Ọkpọnanaowei mọ wẹnịmịnị kịmịama” ka kị á tịịn mị.—Gen. 5:24; 6:9; Job 29:4; Isa. 41:8.
5. Ezekiel 37:26, 27 bọọ emi bụrụ-egberi mị te ka kị wo tolumọ ma o?
5 Jehovah biin kụraịama akị pẹlẹgha bara wó ikieotubo tịịn wó warịma bomịnị̇. (Ezekiel 37:26, 27 goo.) Gbaamaba, Ezekiel bụrụ-egberi bị wo mọ diidaba, Ọkpọnanaowei ụ karịmịnị otubo, ụ mọ mọ́ ebi ikie-otuama a paa kị dọụmịnị bara akị wo tolumọ wẹrịemi. Jehovah “á mọ mọ́ dọọ avụọ” fịmụ bara gbaa wẹrịemi. Bịsẹ bụrụ-egberi bị, agọnọ amú mụ otubo mọ kiriogbo bọọ timi inyenrinmụ ukiemọye nana wẹrịemi otubo mọ bo kẹnịsụọmọ wẹrị “kẹnị anịna ikpudu” a paamọ ifie kị gbaamịnị. (John 10:16) Omịnị bịsẹ ifie k’emi!
WO EMIYỌ EMIYỌ ỌKPỌNANAOWEI WO KEKEREMỊNỊ
6. Kịmị tebara kị mịẹtimị laa Jehovah warị duosụọ mịnị a o, anịa Jehovah warị mị teyọ kị emi a o?
6 Bible ifiemị, warị gbaa daba, anị kịmị timi laa ịmbafọụ bá ụraụ mọ osuo mọ duo angọ kekeremịnị yọ. Igeni-kịmị bo bịsẹ warị duosụọ daba, warị nana-ụbọ mị ebibara igeni-ụbọ dimịnị. Omịnị angọdịẹpaamọ Jehovah pịrị daba, omịnị Jehovah wạrị kị duosụọdẹ. (Ps. 61:4) Omịnị Jehovah warị bọọ emi biin kịmịbo mọ ebi ikie-otuama a paadẹ, bá biin tẹmẹ-anga fịyaịama kpọ fịmịnị. Jehovah warị mị kẹnịyọ bẹtịbị a fa. Gbaamaba, ị́mịnị zịnị ibe opubẹnịị amúwẹrị, Jehovah warị duo tarịama nanadẹ kịmịama mọ gbeleidẹ kpọ paaemi. Mị warị mị gesii bara akị Jehovah karịmịnị otu emiyọbosẹ k’emi.—Rev. 21:3.
7. Tetuu kị duonị peibolou nanawẹrị fịịdẹ otubo mọkpọ Jehovah warị bọọ emibara wo mọ gbaa a paaemi a o? (Foto kpọ dii.)
7 Peibolou akị Jehovah a nanawẹrị fịịdẹ otubo ba? Ámịnị mọkpọ Jehovah wạrị bọọ emibara wo mọ gbaa a paaemi a? Iin! Omịnị tetuu kị duonị bịsẹbara gbaa ma o? Tuubị Jehovah bei kịmịbo ukie wẹrịemi. Jesus gbaa baramị: “Fịịdẹ otubo waị serii mịnị duonị, Moses kpọ yọụntimi ịgbalịbou gbelemọ egberi gbaatimi ifiemị, ómịnị Jehovah akị ‘Abraham daụ, Isaac daụ, bá Jacob daụ’ kị tịịn mị. Ómịnị fịịdẹ otu Ọkpọnanaowei-gha, anịa inyenrinmịnị otu Ọkpọnanaowei, ásẹsẹ wó tọrụyọ bọọ inyenrin kị inyenrinmịnị”—Luke 20:37, 38.
Jehovah karịtimi fịịdẹ otubo, mọkpọ Jehovah igeni-otuama (Gooyọ 7 dii)
OMỊNỊ AREREAMA MỌ WẸNỊFỊRỊAMA MỌ NANA WẸRỊEMI
8. Jehovah igeni-otubo wó warịma timi daba te arereama kị nana mịnị a o?
8 Omịnị wạrị duosụọ daba, ụraụ mọ osuo mọ duo angọ kekeremịnị, bá baratụa wo pịrịwẹrị embafoumịnị. Bịsẹbara kị, Jehovah wạrị kpọ tẹmẹanga kekereyọ mịẹpaamọ akị warị duosụọdẹ igenibosẹ pịrịmịnị bá ukiemọye kpọ kọn á pịrịmịnị. Omịnị Jehovah ebi ikie-otuama a paa daba, Satan ba laa kẹnịye kpọ kọn wo mịẹgha fa. (Ps. 31:23; 1John 3:8) Ayakpọ ladaba, Jehovah mọkpọ ụ karịmịnị otubo kekere mịnị, bá fịị kpọ kọnsiin mịnị.—Rev. 21:4.
9. Jehovah te ka kị wó warịma emi igeni-otubo bara ma dọụ wẹrịemi a o?
9 Omịnị Jehovah igeni-otuama a paa, bá Jehovah ebi ikieotu a timi bẹseri bẹseri laa a paaemi—opu fomuun kị wo laaemi. Omịnị kọkọ Jehovah warị bọọ timi dọụmịnị-aba tebara ka kị angọ wẹrị agbẹị-emi a o? Kịmị ị́ tịịn wó wạrị amú daba, ụbọ mịẹ pọwẹị nanamụ yeama kị ị́ mọ mịẹ mịnị. Gbaamaba, ị́mịnị iné tụa wẹrịemi agbakabo siindẹ kị bịsẹ warị duosụọ kị gbaa wẹrịemi aba, ị́mịnị gbaa bara kị mịẹ mịnị. Bịsẹ kpekẹnị bara kị, omịnị Jehovah warị ka timi dọụmịnị ifiesẹ, Jehovah dọụ wẹrịemi yebo omịnịmọ nimi mịnị. Wo akị Jehovah a nana wẹrịemi tarị kị wo dịnẹmọwẹrị wo kụrọsẹ akị “Jehovah dọụbara mịẹ mịnị.” (Col. 1:10) Jehovah wo ikie-owei bẹtịbịgha, Jehovah wo daụ. Anịduonị omịnị Jehovah didụbamọ agbẹị-emi (Ps. 25:14) Omịnị bịsẹbara mị akị wo ịkịọụbo a wẹrị dá, ifiemọsẹ Jehovah esiin. Bịsẹ yọmị baratụa wo pịrịwẹrị Jehovah dịsẹgha ye mịẹgha fa. Omịnị ifiebosẹ angọ-iyerimọ bara ka kị ụ karị dọụ mịnị.—Mic. 6:8.
JEHOVAH OGBO-ABADỊ BỌỌ KẸNỊANGA KPỌ A SỤỌGHA BARA MỊẸDỊA MỊ
10-11. Sinai ogbo-abadị mị, Jehovah akị Israel-otubo mọ inyenrin bara diidaba, ómịnị tebara ka kị kẹnịanga kpọ a sụọgha bara mịẹdịa ma o?
10 Jehovah kẹnịanga kpọ a sụọgha bara ka kị wó igeni-otubo mọ inyenrinmịnị. (Rom. 2:11) Jehovah Sinai ogbo-abadị bọọ Israel otubo mọ inyenrin bara kị baratụa wo pịrịwẹrị bịsẹyọ nimi.
11 Jehovah wó kịmịbo kọn Egypt omoni bolou duo zụọbụọmọdẹ mị, Jehovah karịwarị bọọ ịkịan-kụn otuama sẹlẹ mị. Karịwarị gbelemọ yalịyalị fịrịama dịẹpaamọ akị Levite-otubo pịrị mị. Jehovah kọkọ karịwarị bọọ fịrịwẹnịmịnị otu, anịghakpọ karịwarị mọ naịnyọ a timi inyenrinmịnị otubo kị kekere akị zịnị otuama dẹịn ma? Benebene! Jehovah kịmịsẹ kị kekere mị.
12. Jehovah tebara ka kị kẹnịanga kpọ a sụọgha bara mịẹ Israel otubo dịa ma o? (Exodus 40:38) (Foto kpọ dii.)
12 Israel otubosẹ kpekẹnị fomuun kị nana mị, karịwarị bọọ fịrịwẹnị timi otu, fịrịwẹnịgha otu, bá karịwarị mọ naịnyọ a timi inyenrintimi otubo mọ, bá alayọ a timi otubo kpọ, kịmịsẹ kị Jehovah ebi ikieotu a paamọ fomuun nana mị. Gbaamaba, Jehovah fomuun akị kịmịsẹ pịrịwẹrị karịwarị agọnọ bọọ tịẹmịnị obudu mọ, bá fẹnị mọ ẹrịtimi mị. (Exodus 40:38 goo.) Obudu mị wẹnị zịnịyọ amú daba, karịwarị mọ alayọ emi otu kpọ laa ẹrịwẹrị, ánị nanayebo bẹnịmọ, bá tapolin warị kpọkpọ wẹrị biin kịmị ikpudu sụọmọ wẹnịmịnị. (Num. 9:15-23) Maá silver egbelegbelebo fiye daba, wẹnịmụ ifie laadẹ bara kịmịsẹ mọ nimidẹ, kịmịsẹ kị laa fiye naawẹrị wẹnịmịnị. (Num. 10:2) Gesii mị, kịmị karịwarị ka timi fịrịwẹnịmịnị duonị Jehovah bịsẹ ụbọ tarịdẹịn bara mịẹgha. Israel ibe duo paaemi kịmịbosẹ, bo Jehovah ikie-ụbọ apaa, Jehovah pịrị tolumọ bá kekeremụ fomuun nana mị. Bịsẹ kpekẹnị bara mị, wo emiyọ emiyọ Jehovah wo tarị, tụrọtụa wo dii, bá wo kekeremịnị.
Ọkpọnanaowei karịwarị tịẹmọwẹrị yọbị, wó kẹnịanga kpọ a sụọgha bara mịẹdịa mị (Gooyọ 12 dii)
WO IFIE KPỌ JEHOVAH KẸNỊANGA KPỌ A SỤỌGHA BARA MỊẸDỊAMỊNỊ
13. Mị tịẹkiri mị, Jehovah te ụwọụ ka kị kẹnịanga kpọ a sụọgha bara mịẹdịamịnị a o?
13 Zụa Jehovah karịmịnị otuama, Jehovah Iseriotu fịrị-tịbịyọ mọ naịn-emiyọ ka timi inyenrinmịnị. Zụa otu ba Branch office mọ naịn-emiyọ ka emị. Zịnị otuama ba bethel ka timi fịrị wẹnịmịnị. Anịduonị, bei kịmịbo zụa fomuun-ama nana kpọ paaemi. Fịrị-tịbịyọ mọ, Branch officebọ mọ zụa yeama mịẹmịnị ifiesẹ, bei kịmịbo kpọ laa sụọ mịẹ a paaemi. Ámịnị Jehovah ogbo ma bọlọụdá mịnị otubomọ ẹrẹteimụ fomuun kpọ nana wẹrịemi. Mọkpọ zụa otu yọụpaa zịnịyọ a mú itu-ama mọ Branch Office-ama mọ dii fịrị kị wẹnịmịnị. Zụa kịmịama ba beinmọ-beinmọ bara Jehovah ogbo bọọ zịnị fịrịama kị wẹnịmịnị. Mị tịẹkiri mị, bịsẹ fomuun-ama ị́ mọ nanagha kị gbaa kpọ, Ọkpọnanaowei wó warị bọọ emi igeni-otubosẹ kị tarị wẹrịemi bara nimi. Jehovah tụrọtụa wo ikie-otubosẹ kị dimịnị. (1Pet. 5:7) Jehovah tẹmẹanga fịyaị, tolumọyeama bá kekereyọ akị ebibara ụ karịmịnị kịmịbosẹ pịrịmịnị.
14. Jehovah mọkpọ te zịnị ụwọụ ka kị kẹnịanga kpọ a sụọgha bara mịẹdịamịnị a o?
14 Jehovah kọkọ kẹnịanga kpọ a sụọgha bara mịẹdịadẹ zịnị ụwọụ emi. Jehovah, kịmịsẹ laa Bible goo angọ pịrịmụ ụwọụ mịẹpaamọ mị. Bọlọụ ifiemị, Bible mị akị tara bẹẹlị ka gẹẹpaamọ mị: Hebrew, Aramaic, bá Greek bẹẹlị mọ. Laa mị tara bẹẹlịbo akị Bible goomịnị otubo kị Jehovah mọ naịn dẹịn-emi a? Benebene, bịsẹ bara fa.—Matt. 11:25.
15. Omịnị tebara kị mịẹtimi Jehovah kẹnịanga kpọ a sụọgha bara nimi ma? (Foto kpọ dii.)
15 Jehovah, wo nimi wẹrịemi fun bá wo fiemịnị bẹẹlịama diwẹrị wo tịịn bo wó ikie-otuama paagha. Jehovah kịlịkịlị nimiye akị yenimi dẹịn-emi otu bẹtịbị pịrịgha, Jehovah akị fun nimi bá nimigha otubosẹ kpọ pịrịmịnị. Jehovah Bible mị kọn biin bẹẹlị-ama kọọ gẹẹ paamọdẹ; anịduonị, biin kịmịama Jehovah tolumọyebo duo biin arereama nana a paadẹ bá mịẹdẹ kị bo wó ikie-otuama paamụ yebo kpọ nimi a paadẹ.—2Tim. 3:16, 17.
Jehovah Bible mịẹpaamọ yọmị, tebara ka kị wó kẹnịanga kpọ a sụọgha bara mịẹdịa ma o? (Gooyọ 15 dii)
IFIEBOSẸ JEHOVAH IKIE-ỤBỌ KA PAA
16. Acts 10:34, 35, gbaa bara dii daba, omịnị teeki mịẹwẹrị Jehovah ikieotu a timi dụụ laa mịnị a o?
16 Omịnị Jehovah igeni-otuama a paa yọmị opu fomuun kị wo laaemi. Jehovah kị tarịnana, ebimịẹdịa bá igeni kẹrịakị dẹịnmịnị daụ. Jehovah kẹnịanga kpọ a sụọgha daụ, anịduonị kịmị paabosẹ kẹrịakịmịnị. Kala, okosu, pẹrẹ, ingọ, pịna, dirima, ere, owei, fun nimi bá fun nimigha otu kpọ Jehovah warị bọọ timi a paaemi. Jehovah kịmị duo paayọ bá kịmị inyenrinmịnị yọ diwẹrị kịmị kẹrịakịgha kị gbaa kpọ, Jehovah wó gbaa bara mịẹmịnị kịmịbo kị kẹrịakịmịnị, bịsẹ otubo kị Jehovah igeni-otuama.—Acts 10:34, 35 goo.
17. Omịnị mịẹwẹrị ifiebosẹ Jehovah igeni-otu a paamọ yebo nimidẹịn dọụmịnị ifiesẹ, teyọ kị wo mọ dii mịnị a o?
17 Psalm 15:1 didaba, David mị biibịbị bii mị: “O Jehovah, te ụbọ kị iné igeni-ụbọ a paa mịnị a o? Te ụbọ kị iné yalịyalị ogun ma timi mịnị a o?” Jehovah baratụa David pịrịwẹrị mị biibịbịbo parụ mị. Barịị egberitịbị mị, omịnị mịẹwẹrị Ifiebosẹ Jehovah igeni-otu a paamụ yeama kẹrị ẹrẹtei mịnị.
DUMA 32 Jehovah Anga Ka Timi!
