1. Psalm 15:​1-5 tebara ka kị baratụa wo pịrị mịnị a o?

 BỤỌDẸ egberitịbị mị, omịnị tolumọ amọ, angọdịẹpaamọ Jehovah pịrị bá ifiebosẹ ụ mọ mọ́ palịemi otubo laa bo Jehovah igeniotu a paatimi bẹseri bẹseri laa mịni. Omịnị teeki mịẹwẹrị bo Jehovah igeni-otuama a paa mịnị a o? Psalm 15 biin yeama gbaa wo pịrị wẹrịemi. (Psalm 15:​1-5 goo.) Mị Psalm fun mị, mịẹdẹ kị Jehovah ebi ikieotu a paamụ yeama gbaa wẹrịemi.

2. Teeki Psalm fun gẹẹowei David dịnẹmọ wẹrị Jehovah warị tịịn ma o?

² Psalm 15 ị́ mọ didaba, bọlọụ gooyọ mị biibịbị kị emi: “O Jehovah, te ụbọ kị laa iné warị duosụọwẹrị bo iné igeni-ụbọ a paa mịnị a o? Te ụbọ kị laa iné yalịyalị ogun ma timi mịnị a o?” (Ps. 15:1) David, Jehovah “warị” tịịn bị, Jehovah karịtimi tapolin karịwarị kị wó ịkịọụ ma timi kpọ paaemi, bịsẹ karịwarị mị Gibeon ka timi mị. David Jehovah ‘’yalịyalị ogun’’ kpọ tịịn mị, kaanghaba Jerusalem bọọ emi Zion ogun kị wó ịkịọụ bọọ timi mị. Naa karịwarị kẹrịgha ifiemị, David bịsẹyọ bọọ kẹnị warị mịẹpaamọ wẹrị avụọ ekpedi tụawẹrị mị—2Sam. 6:17.

3. Omịnị tetuu kị duonị Psalm 15 bọọ sụọtuu nimi agbẹị-emi a o? (Foto kpọ dii.)

³ Biin Israel-otu karịwarị bọọ mú fịrịwẹnịmụ fomuun nanagha. Biingha kịmịama kị laa avụọ ekpedi tụa wẹrị warị duosụọ timimị. Anịa Jehovah warị mị peibolou akị wó atụa wẹrịemi  kịmịbosẹ laa sụọwẹrị Jehovah igeni-otu a paatimi bẹseri bẹseri laa mịnị. Wo kpọ bịsẹ bara kị dọụmịnị. Psalm 15 wo mọ didaba, omịnị ifiebosẹ Ọkpọnanaowei ikieotu ka paa dọụmịnịsẹ, wo nana bá mịẹdịa agbẹị-emi yeama gbaa wẹrịemi.

GESII BARA WẸNỊ BÁ KỊRỊỊYE KỊ MỊẸ

4. Omịnị tebara kị mịẹtimi Jehovah wo benibileyọ bẹtịbị kị dọụgha bara nimi ma o? (Isaiah 48:1)

⁴ Omịnị Psalm 15:2 gbaa bara didaba, “gesii bara wẹnịmịnị kịmị, bá kịrịịye mịẹmịnị kịmị” kị Jehovah ikie-ụbọ a paamịnị. Bei yọbị, “wẹnịmịnị” bá “mịẹmịnị” gbaa egberi mị, omịnị pẹlẹgha bara mịẹ bọlọụ amú bara kị gbaamịnị. Anịa omịnị laa gesii bara wẹnị a paaemi a? Iin, seibolou ka wo zii wẹrịemi kị gbaa kpọ, omịnị adụdụsẹ akị Jehovah dọụbara mịẹ daba, omịnị laa Jehovah tọrụyọ bọọ “gesii bara wẹnịmịnị” otu a paa mịnị. Omịnị angọdịẹpaamọ Jehovah pịrị wẹrị benibile erein kị, omịnị koro Jehovah mọ wẹnị erein mị. Bible ifiemị, Israel ibe duo paaemi kịmịsẹ kị Jehovah ikie-ụbọ a paadẹ bara fa. Zụa Israel-otu “gesii bá kịrịịye bara” akị Jehovah tịịngha timi mị (Isaiah 48:1 goo.) Ebi adụdụ nana wẹrịemi Israel-otubo, Jehovah dọụyebo tolumọ nimi bá akị tụa inyenrin mị. Wo kpọ Jehovah ebi ikieotu a paa dọụmịnị ifiesẹ, benibile bá itu mọ kẹnịsụọmọ wẹnị mịnị. Anịa bịsẹyọ bẹtịbịgha, zịnịye mọkpọ emi, omịnị pẹlẹgha bara “kịrịịye kị mịẹmịnị” kịmịama ka paa mịnị. Teeki kịrịịye mịẹ bolou bọọ sụọemi a o?

5. Teeki ifiebosẹ Jehovah dọụbara akị yemịẹmụ yọ bọọ sụọemi a o?

⁵ Jehovah tọrụyọ mị, “gesii bara wẹnịmịnị” bá “kịrịịye mịẹmịnị” yọmị dụba akị paa Kingdom hall amúmịnị yọ dẹịn-emi. (1Sam. 15:22) Omịnị bẹtịbị k’emi ifie kpọ Ọkpọnanaowei dọụbara mịẹ, ifiebosẹ Ọkpọnanaowei dọụbara mịẹ. (Prov. 3:6; Eccl. 12:​13, 14)  Zaụ emi yeama kpọ, omịnị Jehavah dọụbara mịẹmụ yọmị yelaaemi. Bịsẹbara wo mọ mịẹ daba, omịnị Jehovah tarịemi bara kị mịẹdịamịnị. Jehovah kpọ olomú bara akị wo tarị mịnị.—John 14:23; 1John 5:3.

6. Hebrews 6:​10-12 didaba, teeki yelaa akị wo wẹnịbụọmọdẹ ebi fịrịbo dẹịn-emi a o?

⁶ Wo mịẹ Jehovah pịrịdẹ yebo wó a tọrụkẹrịemi. Anịa, bụọdẹ ifiebị wo nanawẹrị peibolou bẹtịbị kị wo mịẹ ifiebosẹ Jehovah warị bọọ timi bá Jehovah igeni-ụbọ a paagha fa. Kẹnị Bible yọ, bei egberi mịẹgaan wẹrịemi, anị Hebrews 6:​10-12. (Goo.) Jehovah wo mịẹbụọmọdẹ ebi fịrịbọ baragha. Anịa omịnị mọkpọ pẹlẹgha bara adụdụsẹ akị ụ karịtimi “mú dụụ laa” kị Jehovah mọ dọụ wẹrịemi. Kọkọ “omịnị dẹịnsụọgha ifiesẹ,” omịnị Jehovah ikieotu a paatimi bẹseri bẹseri laa mịnị —Gal. 6:9.

ADỤDỤ DUOBO BARA KA KỊ GESII EGBERI GBAA

7. Teeki adụdụ duobo bara akị gesii egberi gbaa bolou bọọ sụọemi a o?

⁷ “Adụdụ duobo bara akị gesii egberi gbaamịnị” kịmị kị, Jehovah igeni ụbọ a paamịnị. (Ps. 15:2) Ikpegha yọ bẹtịbịgha. Jehovah, omịnị ifiebosẹ gerede bara inyenrin bá gesii egberi gbaa kị dọụ wẹrịemi. (Heb. 13:18) Bịsẹ bara mịẹmụ yọbị kọkọ yelaaemi, “Jehovah aritụamịnị kịmị goluemi, anịa kịrịịye mịẹmịnị kịmị mọ kị ikie kẹrịmịnị.”—Prov. 3:32.

8. Omịnị te inyenrinbụọ kị kịlẹ agbẹị-emi a o?

⁸ “Adụdụ duobo bara akị gesii egberi gbaamịnị” otubo, kịmị faa yọ kpọ, Jehovah dọụbara kị mịẹmịnị. (Isa. 29:13) Ámịnị aritụagha. Anịa aritụamịnị kịmị mị, Jehovah olokobo zụa yaị kịrịịgha bara kị iroromịnị. (Jas. 1:​5-8) Anịduonị, aritụamịnị kịmị wó tọrụyọma zaụemi olokobo kekeregha. Bịsẹ bara kịmị mị, seiye mịẹ daba, naa akpotu a sụọgha ifiesẹ, mịẹ bọlọụ bọlọụ ka múmịnị. Bịsẹ paa kịmị bị, agọnọbeniyaị kị mịẹmịnị kịmị. Ómịnị afen ka Jehovah karịmịnị. (Eccl. 8:11) Omịnị ifiebosẹ gerede kịmịama ka paa dọụmịnị.

9. Jesus mọ Nathanael mọ bọlọụ gbelei erein bọọ paa yemị te ka kị wo tolumọ ma o? (Foto kpọ dii.)

⁹ Jesus mọ Nathanael mọ bọlọụ gbelei ifie bọọ paa yemị, gerede adụdụ nanamụ yọmị yelaaemi  bara kọn wo tolumọ mi. Philip wó ikie-owei Nathanael kọn Jesus emiyọ ma bo ifiemị, kẹnị yelaa ye paa mị. Jesus naa Nathanael mọ gbeleigha wẹrị mị, anịa Jesus gbaa mị: “Dii, bei kọkọ aritụagha Israel owei.” (John 1:47) Jesus tuuduo-otubosẹ aritụagha kị gbaa kpọ, Nathanael yebị ḅebẹ paaemi bara Jesus mọ ẹrị mị. Nathanael kpọ yalịyalịgha kịmị kị gbaa kpọ, omịnị agọnọbeniyaị mịẹ inyenrinbụọ nanagha, Nathanael gerede kịmị. Bịsẹ inyenrinbụọ mị Jesus angọ duosụọ kị duonị, ómịnị Nathanael kule mị. Jesus bịsẹ inyenrinbụọ mị akị wo angọma ẹrị kị wo mọ dọụmịnị!

10. Wo ẹrẹmịnị egberibo tetuu kị duonị angọdii agbẹị-emi a o? (James 1:26)

¹⁰ Psalm 15 bọọ gbaa wẹrịemi yebo wo mọ diidaba, akị zịnịotu mọ inyenrinmụ bara kị gbele dẹịn-emi. Jehovah warị ka timi dọụmịnị kịmịsẹ Psalm 15:3 bọọ gbaa wẹrịemi yebo mịẹgha fa, ómịnị “wó mụlọụ kọn kịmị gbaaseimọgha, sei yeama kọn zịnị kịmị mịẹgha, bá ikpe wó ikie-ụbọ tịbị kpọ a gbanagha” fa. Omịnị wo bẹbẹ kọn zịnịotu ụyamọ daba, omịnị laa Jehovah warị bọọ timigha fa.—James 1:26 goo.

11. Kịmị gbaseimọmịnị ụbọ mị deighasẹ, teeki ụbọ paamọ mịnị a o?

¹¹ David kịmị gbaaseimọ tịịn wẹrịemi. Kịmị gbaaseimọ ba teye a o? Anị, kịmị mịẹgha yeama akị ụbọ gbaịnmọ wẹrị, ụbọ ebi ẹrẹ seimọmịnị yọ kị, kịmị gbaaseimọ. Bịsẹbara mịẹmịnị kịmị mị boloudeigha ifiesẹ, kọn itu duo duoseri mịnị.—Jer. 17:10.

12-13. Te ifieama kị omịnị tọngha bara ikpe wo ikieotu tịbị a gbana a paaemi a o? (Foto kpọ dii.)

¹² Psalm 15:3 mọkpọ wo ukiemọ wẹrịemi, Jehovah warị bọọ timi mịnị otubo, sei yeama kọn zịnị kịmị mịẹgha fa, bá ikpe wó ikie-ụbọ tịbị kpọ a gbanagha fa. Omịnị tebara ka kị ikpe wo ikie-ụbọ tịbị a gbana kpọ paaemi a o?

¹³ Omịnị tọngha bara ikpe wo ikie-ụbọ tịbị a gbanagha kpọ paaemi. Gbaamaba: (1) kẹnị bịna-araụ ánị wẹnịtimi beinmọ beinmọ  ụwọụpẹlẹ fịrị bọọ barasindẹ, (2) kẹnị tamọ yei mọ otu Bethel duo serịdẹ anịghakpọ (3) kẹnị bịnaowei itukosuowei anịghakpọ baratụa itukosuowei pịrịtimi owei ka timi mị, anịa omịnị bá bịsẹ fịrị wẹnịghaba, ámịnị sei yeama mịẹdẹ kị duonị bịsẹbara paa kpọ paaemi bara wo mọ iroro agbẹị-emi? Anịghakpọ bịsẹbara gbaa zịnịotu pịrị agbẹị-emi? Omịnị paayebosẹ nimigha kpọ paaemi, bịịn yeama kị bei deiyọbo mịẹpaamọmịnị. Bịsẹyọ kị bụọmọ kpọ, Jehovah warị ka timi dọụmịnị kịmịsẹ, “sei yeama kọn zịnị kịmị mịẹgha, bá ikpe wó ikie-ụbọ tịbị kpọ a gbanagha fa.”

JEHOVAH ESIINMỊNỊ OTUBO DIDỤBAMỌ

14. Jehovah warị kọọ emi kịmịsẹ tebara ka kị “sei inyenrinbụọ nana wẹrịemi kịmị mọ palịgha” bara timi mịnị a o?

¹⁴ Psalm 15:4 gbaa amọ Jehovah ikie-ụbọ “sei inyenrinbụọ nana wẹrịemi kịmị mọ palịgha.” Omịnị tebara kị mịẹtimi sei inyenrinbụọ nana wẹrịemi kịmị nimi a paaemi a o? Zụa kịmịama, ánị inyenrinbụọ bị wo dịsẹ-emi duonị omịnị á mọ mọ́ palịmịnị, zụa otu ba, ánị inyenrinbụọ wo dịsẹgha duonị omịnị á mọ mó palịị dọụgha. Anịa wosẹ yalịyalịgha duonị omịnị kịmị inyenrinbụọ dii wẹrị ụgụlapẹlẹ ụbọ pịrịmụ kụrọ nanagha. Anịduonị omịnị Jehovah tọrụyọ bọọ sei inyenrinbụọ nana wẹrịemi kịmịbo mọ kị palịgha fa. (1Cor. 5:11) Gbaamaba omịnị, boloudei dọụgha, wó peibolou mọ wo tolumọmịnị yebo mọ diseimọmịnị, bá wo mọ Jehovah mọ nana wẹrịemi ikie seimọ dọụmịnị otubo mọ palịgha fa.—Prov. 13:20.

15. Omịnị te ụwọụ ka kị “Jehovah esiinmịnị otubo” didụbamọ wẹrịemi bara mịẹdịa a paaemi a o?

¹⁵ Barịị yọmị, Psalm 15:4 gbaa wo pịrị amọ, omịnị “Jehovah esiinmịnị otubo” didụbamọ. Anịduonị, omịnị ifiebosẹ Jehovah ikieotubo didụbamọmịnị bá ebimịẹ á dịamụ ụwọụama kị dọụmịnị. (Rom. 12:10) Tebara ka kị bịsẹbara mịẹ mịnị a o? Kẹnị ụwọụ Psalm 15:4 bọọ emi, bịsẹ yọbị gbaa amọ, Jehovah warị kọọ timi dọụmịnị kịmịsẹ “paabara paabara, wó kikoromọdẹ yebị, mịẹbeinmọ mịnị.” Omịnị wo kikoromọdẹ yebị mịẹbeinmọgha ifiesẹ, zịnịotu mịẹ pọwẹịgha fa. (Matt. 5:37) Jehovah dọụ wẹrịemi bara mị, taa mọ yei mọ otu ánị fịdẹ avụọmị kekere kị dọụ wẹrịemi. Daụ mọ yin mọ otu kpọ angọtụa ánị kikoromọdẹ yebo mịẹbeinmọ ánị awọụbo pịrị daba Jehovah mịẹ pọwẹịmịnị. Omịnị Jehovah mọ zịnịotu mọ tarịemi duonị angọtụa wo kikoromọdẹ yebo mịẹbeinmọ mịnị.

16. Omịnị mọkpọ te ụwọụ ka kị Jehovah ikieotubo didụbamọ wẹrịemi bara mịẹdịa a paaemi a o?

¹⁶ Akị Jehovah ikieotubo didụbamọmịnị zịnị ụwọụ emi, anị barafinimọ bá igeni kẹrịakị inyenrinbụọ nanamịnị yọmị. (Rom. 12:13) Omịnị ifie mịẹpaamọ wẹrị wo bịnaotubo mọ zoru bá ẹrẹtei daba, wo mịẹ á mọ mọ́ naịndẹịn mịnị bá Jehovah mọ kpọ naịndẹịn mịnị. Omịnị bịsẹbara mịẹmịnị ifiesẹ, Jehovah kị dimịẹmịnị.

SỊLỊ TARỊ INYENRINBỤỌ NANA KỤMỌ

17. Tetuu kị duonị Psalm 15 sịlị egberi kpọ gbaa ma o?

¹⁷ Jehovah warị ka timi dọụmịnị kịmịsẹ “gbanasa koromọgha fa, bá sịlị akịwẹrị agbẹịgha bara akị ụgụlapẹlẹ kịmị bara a seimọgha fa.” (Ps. 15:5) Omịnị sịlị tarị daba, wo mọ Jehovah mọ nana wẹrịemi ikie seimọ a paaemi, bá wo bịnaotubo kpọ ụyamọ a paaemi. (1Tim. 6:10) Bible ifiemị, zụa Israel otu gbanasa koromọ ánị ingo bịnaotubo pịrị timi mị. Bịsẹ ifiemị, zụa ụgụlapẹlẹ otuama kịmịotu bara sịlịama akịwẹrị ụgụlapẹlẹ seimọ kịmịotu pịrị timi mị. Jehovah bịsẹ inyenrinbụọbo dịsẹgha.—Ezek. 22:12.

18. Wo akị sịlị dimọ wẹrịemi bara bị wo mọ nimi dọụmịnị aba, te biibịbịama kị baratụa wo pịrị mịnị a o? (Hebrews 13:5)

 ¹⁸ Omịnị wo akị sịlị dimịnị bara kẹrị iroro agbẹị-emi. Iné angọ bii: ‘Ịmịnị ifiebosẹ sịlị bá sịlị akị fẹị mọ yebo kị kẹrị iroromịnị a? Ịmịnị saarfị daba, ụbọ mị sịlị akị wẹnịmụ fịrị fa bara irorowẹrị saramọ gbẹịgha bara mịẹmịnị a? Ine nana wẹrịemi sịlịbo duonị ịmịnị angọ dụbamọmịnị a? barafinimọ inyenrinbụọ nanamụ yọmị kụrọ ị pịrị emi a o? Bịna-ụbọ sịlị nana wẹrịemi-aba, ịmịnị bịsẹ bịna-ụbọ mị, nanaye tarị akị Jehovah dẹịn-emi bara ka kị ụbọ dimọ agbẹị-emi a? Ịmịnị angọ akị sịlị nana wẹrịemi otu bẹtịbị mọ kị naịndẹịn mịnị a?’ Jehovah bo wó warị bọọ timimụ yelaa fomuun akị wosẹ pịrịdẹ duonị, Omịnị bei biibịbịmọ akị angọ bii agbẹị-emi. Omịnị sịlị tarị inyenrinbụọ nanagha ifiesẹ, omịnị ifiebosẹ Jehovah igeni-otuama ka paa mịnị. Jehovah benebene wo a barasingha fa!—Hebrews 13:5 goo.

JEHOVAH WÓ IKIEOTUBO TARỊEMI

19. Tetuu kị duonị Jehovah Psalm 15 bọọ emi egberibo gbaa ma o?

¹⁹ Psalm 15 kunumọ yọmị gbaa amọ: “Bei yebo dii wẹnịmịnị kịmịsẹ benebene zigeigha fa.” (Ps. 15:5) Bei Psalm gooyọ bị wo mọ diidaba, Jehovah omịnị pọwẹịtimi kị dọụmịnị, anịduonị, ómịnị wo kekere bá tarịama akị wo pịrịmụ yeama gbaa wo dịamịnị.—Isa. 48:17.

20. Jehovah warị bọọ emi otubo teeki korumịnị a o?

²⁰ Biin tarịama kị timi Jehovah warị bọọ emi kịmịbosẹ korumịnị. Sẹlẹ wẹrịemi otubo agọnọ amú inyenrin mịnị, Jesus “biin inyenrinmụ yọama” tọlọmọwẹrị á korumịnị. (John 14:2) bei kịrị bọọ timimụ kịmịbo Revelation 21:3 gbaa egberibo paamụ ifie kị korumịnị. wosẹ Jehovah ikie-otuama a paamụ fomuun nanadẹ, Jehovah ikieotuama a paatimi bẹseri bẹseri laamụ yọmị wo mịẹ pọwẹịmịnị!