Goomịnị-otu Biimịnị Biibịbịbo
“Ị́mịnị á kekere mịnị” Psalm 12:7 emi egberi mị, akị “ụyamịnị kịmịbo kị bịmọmịnị a” (gooyọ 5) anịghakpọ “Jehovah gbaamịnị egberibo” kị bịmọmịnị a o (gooyọ 6)?
Gooyọbo didaba, bei egberi bị kọn kịmịama kị bịmọ wẹrịemi.
Psalm 12:1-4, gbaa amọ “peibolou nana otubo ba fa.” Psalm 12:5-7, ómịnị ba gbaa amọ.
“‘Ụyamịnị otubo á pịrị penimọmịnị duonị,
Ingo otubo ineni kẹrịmịnị duonị,
Ịmịnị seritịe baratụa á pịrị mịnị,’ Jehovah gbaa mị.
‘Ịmịnị ánị ụyamọmịnị otubo baraduo á zụọmịnị.’
Jehovah egberibo gesii k’emi;
Apẹdẹ fenịbụrọ akị mịẹ wẹrịemi Silver kị dei emi, sọnọma ifie ka kị mịẹ ayamọdẹ bara k’emi.
Ị́mịnị á kekere mịnị, O Jehovah;
Ị́mịnị kịmị kẹnị-ụbọ kẹnị-ụbọ kekeretimi bẹseri bẹseri kị laa mịnị.”
Verse 5 Jehovah mịẹ akị “ụyamịnị kịmịbo” pịrịmụye gbaa mị. Ómịnị á zụọmịnị.
Verse 6 gbaa amọ “Jehovah egberibo gesii emi,” ‘mịẹ ayamọ werịemi Silver kị dei emi.’ Jehovah karịmịnị kịmịsẹ beinmọ beinmọ bara bei egberi bị pei wẹrịemi.—Ps. 18:30; 119:140.
Wo wẹrị barịị gooyọ dii, Psalm 12:7: “ímịnị á kekeremịnị, O Jehovah; Ímịnị kịmị kẹnị-ụbọ kẹnị-ụbọ akị bei ziitu duo kekeretimi bẹseri bẹseri kị laamịnị.” Mị egberi mị akị te “otu” kị bimọmịnị a o?
Verse 6 “Jehovah egberibo,” kị gbaa wẹrịemi, anịa verse 7 mọkpọ verse 6 gbaa egberi kị gbaa bọlọụ amúmịnị duonị zụa-otu Ọkpọnanaowei wo egberibo kị kekeremịnị bara kị tọn wẹrịemi. Egiren-otu kị emi kị gbaa kpọ Ọkpọnanaowei Bible kekeretimi bei ifie laadẹ.—Isa. 40:8; 1Pet. 1:25.
Gbẹsị mị, verse 5 gbaa egberi mị gesii egberi. Jehovah gbaa amọ Ómịnị ifiebosẹ baratụa akị “Ụyamịnị kịmịbo” mọ bá “penimọye laamịnị otubo” mọ pịrịmịnị—Job 36:15; Ps. 6:4; 31:1, 2; 54:7; 145:20.
Anịa, verse 7 bị, teekị kekeremu bara kị gbaamịnị a o?
Omịnị ebibara bei egberi ditụa daba, akị kịmịama kị bịmọ wẹrịemi.
Psalm 12:1 bolousei-otu ekpe egberiama akị “peibolou nana otuama” lelemọ bara kị gbaa wẹrịemi. Barịị verse mị, Jehovah gbaa amọ ómịnị ekpe egberi gbaamịnị otubosẹ baásiin mịnị bara wo mọ dọụ ẹrẹmị. Bei Psalm tịbịyo bị gbaa wo pịrịmịnị yọsẹ, Ọkpọnanaowei egberibosẹ gesii-emi anịduonị Ọkpọnanaowei wo zụọmụ eti wo mọ nana agbẹị-emi.
Verse 7 gbaa amọ Jehovah baratụa “á” pịrị mịnị, anị ụyafịmịnị bá penimọ bolouemi otubosẹ pịrị mịnị.
Bei “á” egberi ụngbọ bị oruseri Hebrew bẹẹlị akị gẹẹ wẹrịemi Bible funbo k’emi. Anịa Hebrew bẹẹlị duọ gẹẹ Greek a paa Bible funbo wo mọ didaba, bei Verse 7 bị, maáyọ “omịnị” ki gẹẹ wẹrịemi. bei egberi bị akị peibolou nanayo duonị á pịrị ụyamọmịnị otuama kị gbaamịnị. Kunumọ yọbị, verse 7 gbaa amọ peibolou nana otubo “kẹnị-ụbọ kẹnị-ụbọ” akị “bei ziitu duo” zụọbụọmọ mịnị, anị seiyaịmịẹ otu bara duo á zụọ mịnị. (Ps. 12:7, 8) Hebrew bẹẹlị duo waị Aramaic bẹẹlị bọọ gẹẹ yebị wo mọ didaba, verse 7 gbaa amọ: “Ị́mịnị, O NANAOWEI, kịrịịye mịẹmịnị otubo kekeremịnị, ímịnị bei bolousei ziitu duo á zụọtimi bẹseri bẹseri laa mịnị. Bolousei otubo, kịmị asịịn boumịnị ụkụlaị bara k’emi.” Bei gẹẹ wẹrịemi bara bị kọkọ mịẹdịa amọ Psalm 12:7 bọọ emi “a” egberi ụngbọ bị, akị Ọkpọnanaowei egberibo bịmọgha.
Gesii bị, bei gooyọ bị ukiemọye kị mịẹpaamọ “peibolou nana otubo” pịrị wẹrịemi—Ọkpọnanaowei wó kịmịbo zụọbụọmọ mịnị.
