IFIEBOSẸ LETIMI!
Ukraine Sụụ Duonị Akpọyọrẹịsẹ Mọụn Koro Dẹịndẹ
May 19 , 2022 erein bị, 75 dẹịnemi yelaa United Nations Security Council fịrịwẹnị-otu gbaa bara mị “Ukraine bọọ paamịnị sụụ mọ, COVID-19 dọọn mọ bá climate change mọ akpọyọrẹịsẹ mịẹ bo mọụn bolou ka sụọmịnị e.” Alagha bị, Economist gaan bara gbaamị “sụụ duonị, mị bụụdọọnye bein-emi akpọ mị, biin kịmịama mịẹ kụrọ mọụn bolou ka tụa mịnị.” Wó bei inyenrin-mịnị ifie bị Bible mọụn paamịnị bara gbaa mị, má mọkpọ baratụa wó pịrị wẹrị inyenrinmụ ye kpọ gbaamị.
Bible mọụn paamịnị bara bụrụ koromọ mị
Jesus bụrụ mị: “Ibe mọ ibe mọ sụụmịnị bá daabụọ mọ daabụọ mọ kpọ, bá mọụn kpọ koromịnị.”—Matthew 24:7.
Revelation fun mị, ye a tịbịtịẹmọ wẹrịemi nia asi anịghakpọ ọnyanyan yọụmịnị kịmịama egberi gbaa wẹrịemi. Bọlọụ yemị sụụ ka tịbịtịẹmọ wẹrịemi. Maamụkaramọ yemị mọụn ka tịbịtịẹmọ wẹrịemi, bịsẹ ifie laadẹsẹ, dọlọdọlọ ka kị fịyaị dịẹ mịnị bá fịyaịbo kpọ gaanrin mịnị. “Kẹnị dirimọ asi anịghakpọ ọnyanyan ị mịnị mọ ẹrị mị, ụ yọụmịnị owei mị kẹnị ye-tọnye wo bara ma emi. Okolo mọ lei ye ị mọ naa mị . . . Ụ gbaa mị, ‘Kẹnị wheat kilo, kẹnị erein fịrịwẹnị gbẹẹ ka kị fẹịmịnị! Kẹnị erein fịrịwẹnị gbẹẹ ka kị tara barley kilo kpọ fẹịmịnị.’”—Revelation 6:5, 6, Contemporary English Version.
Mọụn koro mịnị Bible bụrụ-ebgeribo, bei “fatuu ereinbo” a paa beinmịnị. (2 Timothy 3:1) Ị́mịnị “kunumọ ereinbo” mọ Revelation gbaa asi anịghakpo ọyanyan yọụmịnị owei mọ gbelemọ yọmị zịnị yeama nimi dọụemi aba, bei vidio dii The World Has Changed Since 1914 bá “The Four Horsemen—Who Are They?” egberitịbị kpọ goo.
Bible baratụa Ị́ pịrịmụ bara bị
Akpotu ifie a sụọ dẹsẹ tolumọ poun-ama nị baratụa wó pịrịmụ yaị Bible bolou a emi, gbaamaba fịyaị gaanrin anịghakpọ biingha fa. “How to Live on Less” egberitịbị ma zụa mịẹdịayeama emi.
Yemọsẹ ebi mịnị ukiemọye Bible mụ kọn wó pịrị wẹrịemi. “Kiriogbosẹ fịyaị bein mịnị” bara Bible mọ kiikoromọ wẹrịemi, anịduonị kịmịsẹ fịyaị ẹrị fịị mịnị. (Psalm 72:16) Bible mị bọlọu a kiikoromọ wẹrịemi yebo mọ bá eti kọn tụa agbẹị-emi zịnị tuu-ama í mọ tolumọ dọụemi aba, “A Real Hope for a Better Tomorrow” egberitịbị goo.