Ti umuna a phase ti pannakasiuting ti Episode 1 Ti Naimbag a Damag Sigun ken Jesus ket nakompleto idi Agosto 12, 2022. Kalpasan ti ababa a pannakaisardengna, mangruginton ti maikadua a phase ti panagsiuting, a makompleto inton Oktubre 2022.

Kas nadakamat iti napalabas a report, inrugi dagiti kakabsat ti panagsiuting iti Ti Naimbag a Damag Sigun ken Jesus idi Mayo 20, 2022, a dagiti laeng indoor set ti nagsiutinganda. Iti dayta a tiempo, ur-urayen pay laeng dagiti kakabsat dagiti pinal a dokumento para iti dadduma a paset ti maysa a support building ken ti outdoor historical film set. Nalpas dagitoy a dokumento idi Hulio 15, 2022. Inyawat ti Australasia Branch Construction Department ti building ken film set iti Regional Video Team (RVT). Mabalinen a pagsiutingan dagitoy a pasilidad.

Nasurok a 500 a boluntario manipud Australia ken New Zealand ti nagtrabaho iti nasurok a 7,000 square meters (75,347 sq ft) a film set para kadagiti nagkauna nga eksena. Maipapan iti konstruksion, imbaga ni Brother Russell Grygorcewicz, a koordineytor ti Construction Committee: “Uray no adu ti problema, nalawag a nakitami ti tulong ni Jehova a mangsolbar kadagita. Awan duadua a naaramid dayta babaen ti espiritu ni Jehova.”

Ni Brother Ronald Curzan, a katulongan ti Teaching Committee, ket adda iti kaadduan a paset ti umuna a phase ti panagsiuting. Kunana: “Nakaskasdaaw ti panagtutunos ken naragsak a panagkakadua dagiti construction volunteer ken ti pamilia ti Bethel. Makaparagsak a makita a mausaren dagiti set kalpasan ti adu a tawen a panagplano ken panagibangon. Makapabileg ti naan-anay a suporta dagiti kakabsat iti intero a teritoria ti sangay. Sigurado a daytoy a 18 nga episode a pelikula ti biag ken panangisuro ni Jesus ti mangdanon iti puso dagiti tattao iti intero a lubong.”

Adda ni Brother Kenneth Cook a miembro ti Bagi a Manarawidwid kadagiti maudi nga aldaw ti pannakasiuting ti Episode 1. Imbagana: “Nalawag a ti ima ti naayat nga Amatayo a ni Jehova ti mangsupsuporta iti daytoy a proyekto. Agyamantayo ken Jehova ken iti amin a karaman iti pannakaibangon dagiti set ken panagsiuting, gapu iti panagsakripisio ken naayat a panagtrabahoda. Ikararagmi a daytoy nga espesial a video series matulonganna ti adu a sumurot a naimbag ken Jesus ken suminged ken Jehova.”