Idiay Brazil, adda agarup 1,500 a siudad nga awanan kadagiti kongregasion. Ti dadduma kadagitoy a siudad ket adda kadagiti nasulinek a lugar ken adu a residente ti saan pay a nakasabaan dagiti Saksi ni Jehova. Gapu iti dayta, nangyurnos ti sangay iti Brazil iti espesial a kampania tapno makasabaan dagitoy a siudad manipud Septiembre agingga iti Disiembre 2020. Gapu kadagiti restriksion iti COVID-19, naaramid ti kampania babaen ti surat. Nakiraman iti daytoy dagiti agibumbunannag manipud iti 3,000 a kongregasion.

Nag-research dagiti agibumbunannag iti Internet maipapan iti siudad a naited a kasabaanda tapno maibagayda ti suratda iti kasapulan dagiti residente. Kas pagarigan, adda maysa a payunir a nagsurat kadagiti tattao nga agnanaed kadagiti siudad iti estado ti Tocantins. Naammuanna a nabiit pay a naapektaran dayta a lugar kadagiti wildfire. Kadagiti suratna, inramanna ti Apocalipsis 21:5 ken inlawlawagna a ‘pabaruento ni Jehova ti amin a bambanag’ ken solbarennanto dagiti problema iti aglawlaw. Kalpasan ti sumagmamano nga aldaw, nakaawat ti kabsat a payunir iti audio message manipud iti maysa a babai a nangibaga a maragsakan a nakaammo a “kabaelan ti Dios a pasayaaten ti biagtayo.” Nagkiddaw iti ad-adu pay nga impormasion.

Adda kabsat a nakaawat iti teks manipud iti maysa a bumalay, a mangipakita nga epektibo ti kampania. Kastoy ti mabasa iti teks: “Diak mailawlawag no kasano nga inusarnaka ti Dios tapno matulongannak. . . . Agyamanak unay! Gapu kenka, mamatiak manen nga ay-ayatennak ti Dios ken ay-aywanannak ken ti pamiliak! Kasla inarakupnak ti Dios. Nupay saanka nga am-ammo, sika ti sungbat ti kararagko! Talaga nga agyamanak unay!”

Inlawlawag ti maysa a panglakayen iti Itamarati Congregation idiay Petrópolis, Rio de Janeiro, ti rikna dagiti kakabsat a nakiraman iti kampania: “Panagriknami, special pioneer-kami a mangaskasaba kadagiti nakaad-adayo a teritoria. Manmano a mapadasan daytoy dagiti kakabsat gapu iti kasasaad ken kadagiti responsabilidad iti pamilia.”

Talaga a binendisionan ni Jehova daytoy a kampania. Pribilehiotayo ti tumulong tapno ti naimbag a damag ket ‘maikaskasaba iti amin a parsua iti baba ti langit.’—Colosas 1:23.