Idi Biernes, Enero 25, 2019, narba ti dam iti pagminasan iti siudad ti Brumadinho, iti estado ti Minas Gerais, Brazil, isu a naglayus iti pitak a nakatayan ti adu. Di kumurang a 150 ti natay ken adda 182 a mapukpukaw pay laeng.

Adda dua a kongregasion iti Brumadinho, a buklen ti agarup 180 a Saksi. Adu kadakuada ti agtrabtrabaho iti kompania ti pagminasan. Sangapulo a kakabsat a lallaki ti madama nga agtrabtrabaho iti dam idi narba dayta. Nupay kompirmado a saan a naan-ano ti siam, nakalkaldaang ta mapukpukaw pay laeng ti maysa a kabsat nga agserserbi kas panglakayen. Di kumurang a lima a pamilia a Saksi ti nangpanaw met iti balbalayda ken adda maysa a balay nga interamente a nadadael.

Ti maysa a miembro ti Komite ti Sangay iti Brazil ken dagiti manangaywan iti sirkito iti dayta a rehion binisitada dagiti naapektaran iti trahedia tapno paregtaenda ida ken mangipaayda iti praktikal a tulong. Ikarkararagtayo nga agtultuloy nga ipaay ti nailangitan nga Amatayo ti kasapulan a liwliwa ken tulong para kadagiti amin a naapektaran iti trahedia.—Roma 15:5.