Idi Disiembre 3, 2023, nagpalawag ni Brother Eduardo Martines, a miembro ti Branch Committee iti Brazil, iti maysa nga Assembly Hall para iti pannakaidedikar ti baro a Bible educational center iti Cabreúva, Brazil. Nasurok a 2,400 a kakabsat ti in person nga immatender iti programa ti dedikasion, ken nasurok a 4,900 ti nagbuya babaen iti videoconference.

Ti baro a Bible educational center ket kangrunaan a mausar para iti School for Kingdom Evangelizers ken School for Circuit Overseers and Their Wives. Mabalin a makapaggigiddan ti tallo a klase iti dayta a pasilidad ken mapan a 600 nga estudiante ti makapageskuela iti kada tawen.

Idi 2020, ginatang dagiti kakabsattayo ti maysa a hotel sa inrugida a pagbalinen a Bible educational center. Nangaramidda iti dayta iti tallo a classroom, 54 a kuarto a pagyanan dagiti estudiante, maysa a dining room, ken pagopisinaan. Bayat ti panagtrabahoda, sinurot dagiti boluntario dagiti COVID-19 protocol. Kalpasan ti konstruksion, nayurnos a dagus ti maysa nga open house wenno panangawis kadagiti lumugar a bumisita. Ti panggep ket tapno agbalin a pamiliar dagiti lumugar, agraman dagiti opisial, kadagiti Saksi ni Jehova ken iti trabahotayo a panangisuro iti Biblia. Imbaga ti maysa nga opisial a bimmisita iti pasilidad: “Nagpintas ti inaramidyo ken de kalidad ti trabahoyo. No adda banag nga aramidentayo para iti Dios, kastoy koma ti masapul a pannakaaramidna.”

Imbaga ni brother Rogério Braganholo a timmulong iti renovation: “Nalawag a nakitami nga inwanwan ni Jehova ti intero a proyekto. Ti panangbendisionna iti panangikagumaanmi ipakitana nga agpaypayso ti sasao iti Salmo 127:1: ‘No saan a ni Jehova ti mangbangon iti balay, awan serserbi ti panagbannog dagiti nangibangon iti dayta.’”

Maragsakantayo iti daytoy a baro a Bible educational center ta ad-adu a kakabsattayo iti Brazil ti matulongan tapno ad-adda a mapasayaatda pay ti ‘pamay-an ti panangisuroda.’—Tito 1:9.