Idi Marso 2019, ti Supreme Court of Cassation iti Bulgaria, ti kangatuan a korte iti dayta a pagilian, ket nangipaulog kadagiti paborable a desision iti tallo a kaso a nakairamanan dagiti kakabsattayo. Mangipaay dagitoy a desision iti napateg a pagtuladan tapno maprotektaran ti wayawaya dagiti kakabsattayo nga agdaydayaw iti intero a pagilian.

Dua kadagiti kaso ket ti panangpadakes ti maysa a diario ken estasion ti TV kadagiti kakabsattayo. Idi 2012, nangipablaak ti diario a Vseki Den iti ulbod nga artikulo maipapan kadagiti patpatientayo. Idi 2014, nangibrodkas met ti estasion nga SKAT TV kadagiti di umiso a damag maipapan iti organisasiontayo. Kadagita a kaso, saan a pinatgan dayta a diario ken estasion ti TV ti kiddaw dagiti kakabsattayo nga ibabawida dagiti di umiso nga impadamagda. Kalpasan ti agsasaruno a nayuli a kaso ken apelar iti korte, dagita ket naidanon iti Supreme Court. Idi Marso 18, 2019, nagdesision ti Supreme Court kontra iti SKAT TV. Idi Marso 26, inusar ti Korte dayta nga inyetnagna a desision iti pannusa nga impatawna iti Vseki Den gapu iti impablaakna a kinaulbod ken gura nga impakitana.

Ti maikatlo a kaso ket ti naulpit a panangidadanes ti napolitikaan a grupo a VMRO-Bulgarian National Movement kadagiti kapammatiantayo. Idi Abril 17, 2011, nagtataripnong dagiti kakabsattayo tapno selebraranda ti Pananglaglagip iti ipapatay ni Jesus. Ti naranggas a grupo a buklen ti 60 a tattao nga inorganisar ti napolitikaan a lider a ni Georgi Drakaliev iti VMRO dinangranda dagiti kakabsattayo. Inyuli dayta dagiti kakabsattayo kadagiti korte. Idi agangay, naidanon dayta a kaso iti Supreme Court. Idi Marso 20, 2019, imbilin ti Korte ken Mr. Drakaliev a masapul nga agbayad iti danios.

Maragsakantayo kadagitoy a tallo a desision a pabor kadatayo. Mabalin itan a mausar dagita a desision kas pagibatayan iti panangprotektar iti wayawaya dagiti kakabsattayo tapno ‘maitultuloyda ti agbiag a natalna ken naulimek nga addaan iti naimpusuan a debosion iti Dios.’—1 Timoteo 2:2.