ABRIL 6, 2020
CANADA
Natalna a Panunot Bayat ti Tiempo ti Panagdanag
Da Brother Jean-Yves ken ti asawana a ni Vasthie Mudaheranwa, ket karaman kadagiti adda iti front line iti coronavirus pandemic iti Montreal, Canada. Respiratory therapist ni Brother Mudaheranwa iti maysa nga ospital, ken nurse met ni Sister Mudaheranwa iti maysa nga ospital a pakaas-asikasuan dagiti nakaptan iti COVID-19. Kadagitoy a tiempo a madandanagan unay dagiti tattao, agtaltalek da Brother ken Sister Mudaheranwa a papigsaen ida ni Jehova ken addaanda iti ‘nasayaat a puso’ a kas iti inkari ni Jehova.—Isaias 65:14.
“Mabutbuteng unay ti adu a katrabahuak. Itak la ida a nakita a kasta,” kuna ni Brother Mudaheranwa. “Dakkel ti maitultulong ti personal a panagadalko,” kuna ni Sister Mudaheranwa. “Pampanunotenmi dagiti pagilasinan iti maudi nga al-aldaw, ken kanayon a laglagipenmi a tultulongannakami ken dinakami baybay-an ni Jehova. Dakkel met ti maitultulong ti kararag. Sakbay a mapanak agtrabaho ken rugiak ti aldawko, agkararagak ket agbalin a natalna ti panunotko.”
Da Brother ken Sister Mudaheranwa a makigimgimong
“Naggapuak idiay Rwanda, ket nalasatak ti panagiinnibus idi ti puli sadiay,” kuna ni Brother Mudaheranwa. “Di pay napaspasamak ti kasta ditoy Canada, isu a no dadduma, maawan iti panunotmi nga agbibiagtayon iti maudi nga al-aldaw. Aminek nga uray siak, saanak unay a sipapanunot a nakaas-asidegen ti aldaw ni Jehova. Gapu iti daytoy a pandemic, ad-addan a kombinsidoak nga agbibiagtayon iti maudi nga al-aldaw, ken bimmileg ti pammatik iti Biblia ken kadagiti padto a mabasa iti dayta.”
Kasta met laeng ti pammati nga ipakpakita dagiti agdaydayaw ken Jehova iti intero a lubong ken natalna ti panunotda iti daytoy a tiempo ti pakarigatan.—Isaias 48:18.