KINSHASA, Congo—Mangipapaay dagiti Saksi ni Jehova kadagiti material a tulong ken pammabileg kadagiti kapammatianda a naapektaran iti nakaro a gulo iti rehion ti Kasai iti Democratic Republic of the Congo. Gapu iti gulo iti nagbaetan dagiti etniko a grupo, armado a militia (grupo dagiti sibilian a nasanay a kasla soldado), ken riribuk iti kagimongan idiay Congo, umad-adu ti bilang dagiti refugee nga immabuten iti nasurok a 1.3 milion a tattao, a pakairamanan ti nasurok a 30,000 a taga-Kasai a nagkamang iti kaabayna a pagilian ti Angola. Adu kadagiti refugee ti nakaro a nadangran ken idi simmangpetda idiay Angola, masapul a maagasanda a dagus. Adda dagiti nasinit, nakaro a nasugatan iti buneng, ken natamaan iti bala. Sigun kadagiti kaudian a report, nasurok a 870 kadagiti refugee idiay Angola ti Saksi ni Jehova ken dagiti menor de edad nga annakda, ken saan a nababbaba ngem 10 ti nadangran kadakuada. Makapaladingit ta immabuten iti 22 a Saksi ni Jehova ti naireport a napapatay.

“Maladingitankami ta nagadu ti napapatay ken nadangran iti panaglalaban, aglalo ta nakaub-ubing pay ti dadduma kadakuada,” imbaga ni Robert Elongo, a pannakangiwat dagiti Saksi ni Jehova iti sanga nga opisinada idiay Kinshasa. “Adda dagiti nairaman gapu laeng ta asidegda iti lugar a nangrugian ti nakaro a gulo. Pampanunotenmi ti seguridad dagiti kapammatianmi ken iparparegtami kadakuada nga agan-annadda. Kaduami ti sanga nga opisina dagiti Saksi ni Jehova iti Angola a mangar-aramid iti amin a kabaelanmi a mangipaay iti material, emosional, ken kangrunaanna, iti naespirituan a tulong.”

Nangbukel dagiti Saksi ni Jehova idiay Angola ken Congo kadagiti disaster relief committee a mangorganisar iti dakkel ken agpatpatuloy a trabaho a panangsaranay. Nasurok a 31 a tonelada a naidonar a suplay ti naipatuloden kadagiti refugee, a pakairamanan dagiti bed sheet, ules, bado, makan, moskitero, ken sapatos, kasta met ti 525 a kilo a suplay a mausar iti panangagas. Maysa a doktor a Saksi ni Jehova ti napan met kadagiti refugee camp tapno tumulong iti 135 a tattao a masapul a maagasan a dagus.

Mainayon pay, adda dagiti pannakabagi ti sanga nga opisina ti Angola ken Congo a bimmisita kadagiti refugee tapno mangpabileg. Nangyurnosda kadagiti espesial a gimong nga addaan kadagiti lektiur a naibatay iti Biblia ken naibagay iti kasapulan dagiti nagbakuit. Portuguese ti kangrunaan a lengguahe ti Angola ngem Tshiluba, a maysa kadagiti uppat a kangrunaan a lengguahe ti Congo, ti nausar kadagiti gimong tapno mabenepisiaran dagiti refugee, kas makita iti ladawan iti rugi.

Ti Bagi a Manarawidwid dagiti Saksi ni Jehova, nga adda iti sangalubongan a hedkuarterda idiay Warwick, New York, ti mangor-organisar iti panangtulong kadagiti naapektaran iti didigra, nga usarenda ti pondo a naidonar para iti sangalubongan a trabaho dagiti Saksi.

Media Contacts:

International: David A. Semonian, Office of Public Information, +1-845-524-3000

Angola: Todd Peckham, +244-923-166-760

Democratic Republic of the Congo: Robert Elongo, +243-81-555-1000