Itultuloy latta dagiti kakabsat iti intero a lubong ti mangasaba uray adda COVID-19 pandemic. Nagduduma ti pamay-an dagiti Saksi idiay Ecuador a mangidanon iti naimbag a damag kadagiti tattao.

Iti siudad ti Ambato, adda pito ti tawenna nga agibumbunannag a kadua ni nanangna a nag-send iti text messages kadagiti maestrana. Kastoy ti maysa a teksna: “Good morning, Ma’am. Nagteksak ta adda makaliwliwa a mensahe a kayatko nga ibaga uray no narigat ti situasiontayo. Ikarkari ti Biblia iti Apocalipsis 21:4 nga addanto nasaysayaat a masakbayantayo. Daytoy ti link tapno maammuanyo ti ad-adu pay nga impormasion.”

In-reply ti maysa a maestra: “Thank you, neneng. Ubingka pay ngem naunegen ti panagpampanunotmo.” Nagyaman ti sabali pay a maestra ken dinamagna no adda digital format Ti Librok dagiti Estoria ti Biblia. Imbaga ti maestra nga adda idin kasta a librona ngem impabulodna iti maysa nga estudiante. Imbaga kenkuana ti ubing nga agibumbunannag a mabalinna nga i-download dayta a libro iti jw.org.

Adda agassawa iti siudad ti Quevedo a nagbirok kadagiti saan a Saksi iti contact list-da, sada inteks ti kastoy: “Maysaak a Saksi ni Jehova. Gapu iti krisis iti pagiliantayo ken iti intero a lubong, saankami a makapangasaba iti binalaybalay, ngem kayatdaka a makasarita babaen ti videoconference.”

Adu ti immanamong a makisarita kadakuada babaen ti videoconference. Maysa kadagita ket ti babai a saan idi a makisarsarita kadagiti Saksi. Nagyaman ken inapresiarna ti agassawa gapu iti ar-aramidenda. Imbagana a mais-stress iti agdama a situasion. Nag-send ti agassawa iti PDF format ti Agriingkayo!, No. 1 2020, a napauluan iti “Malabanam ti Stress.” Iti simmaruno a panagsaritada, nagyaman ti babai gapu iti magasin ket imbagana a namin-adun a nabasana dayta.

Iti probinsia ti Santo Domingo de los Tsáchilas, adda umel a kabsat nga agnagan Johana a nagaramid iti “surat” babaen kadagiti ladawan. a Kalpasanna, piniktiurna dayta sa impatulodna iti amin nga umel nga adda iti contact list-na. Ngem nai-send-na met dayta iti maysa a babai a saan nga umel. Dagus a nag-reply ti babai ken nagsaludsod. Saan a maawatan ni Johana dagiti saludsod ti babai isu a sinungbatan dayta ti payunir nga agnagan Rhonda.

Imbaga ti interesado a babai ken Rhonda a nagpampanunotanna dagiti drowing nga in-send ni Johana. Dinamagna no adda pay dagiti teksto iti Biblia a mangilawlawag iti mapaspasamak ditoy daga. Imbasa ni Rhonda ti Lucas 21:10, 11 ken nangi-send iti link kadagiti video nga Apay nga Ipalpalubos ti Dios ti Panagsagaba? ken Apay a Pinarsua ti Dios ti Daga? Kayat ti babai nga agsaritadanto manen.

Kas ken apostol Pablo a ‘naan-anay a nangilawlawag iti Pagarian ti Dios’ uray nakabalud, ikagkagumaan latta dagiti kakabsattayo ti mangasaba, uray no dida makapanaw iti balbalayda.—Aramid 28:23.