DISIEMBRE 23, 2019
GUATEMALA
Dagiti Polis ken Opisial ti Fire Department Idiay Guatemala Nabenepisiaran Kadagiti Naibatay-Biblia a Seminar
Idi Mayo 2019, pinalubosan dagiti autoridad ti Guatemala dagiti kakabsattayo a mangikondukta kadagiti seminar a naibatay kadagiti prinsipio iti Biblia kadagiti polis ken bombero. Iti agdama, 450 a bombero ken polis ti nakaatenderen kadagitoy a seminar a naaramid kadagiti siudad ti Coatepeque, Colomba Costa Cuca, Malacatán, ken San Rafael Petzal.
Imbaga ni Juan Carlos Rodas, maysa kadagiti panglakayen a nangseminar: “Nasurok a 15 a tawenen a mangyad-adal iti Biblia dagiti Saksi ni Jehova kadagiti balud iti tallo a pagbaludan idiay Guatemala. Nadlaw dagiti opisial ti pagbaludan a simmayaat ti kababalin dagiti balud a nakipagadal iti Biblia kadakami isu a kiniddawda a mangikonduktakami met kadagiti naibatay-Biblia a seminar kadagiti polis ken bombero.”
Iti panangiwanwan ti sangay ti Central America, mamindua iti makalawas a maang-angay dagitoy a seminar nga agpaut iti 15 a minuto. Ilawlawagda dagiti topiko kas iti no kasano a mapasayaat ti pannakilangen iti sabsabali, no kasano ti umiso a panangusar iti autoridad ken no kasano a makapagtitinnulongda kas maysa a team. Dagiti kakabsat a mangikonkondukta kadagiti presentasion mangipapaimada kadagiti maitutop a literatura, mangipabpabuyada kadagiti video manipud iti website, ken ipakpakitada no kasano ti agbirok kadagiti makatulong nga impormasion babaen ti JW Library app.
Ibilang dagiti Saksi ni Jehova a pribilehio ti panangisuro kadagiti polis ken opisial ti fire department. Sapay koma ta agtultuloy a magunggonaanda kadagiti praktikal nga impormasion a masarakan iti Biblia.—2 Timoteo 3:16.