Kas naireport iti kasangsangpet a damag iti jw.org, sumagmamano a bomba ti bimtak bayat ti rehional a kombension iti Kerala, India idi Domingo, Oktubre 29, 2023. Makapaladingit ta malaksid iti dua a sister a natay, natay met ti maysa nga ubing a babai nga agtawen iti 12 gapu kadagiti sugatna. Adda pay 55 a kakabsat a nadangran, ket dadduma kadakuada ti nakaro ti pannakauramna.

Iti agdama, tallo a sister ken dua a brother ti adda pay laeng iti ospital ken kritikal ti kondisionda. Kinompirma ti autoridad a saan a nababbaba ngem tallo a bomba ti bimtak bayat ti panglukat a kararag iti agarup 9:40 ti agsapa. Inareston dagiti polis ti suspek iti daytoy a nagdakes nga aramid ken madaman ti imbestigasion.

Agyamyamantayo kadagiti emergency personnel a dagus a rimmesponde iti pagkombensionan, kasta met kadagiti staff iti ospital a mangas-asikaso kadagiti nadangran.

Agyamyaman met ken naparegta unay dagiti immatender iti ayat ken suporta nga impakita dagiti kapammatianda. Malagip ti maysa a sister nga adda iti auditorium idi bimtak dagiti bomba: “Dagus a nagkararagak ken Jehova. Inaywanandakami dagiti attendant ken ti dadduma a brother, ken dagus a nagtignayda tapno natalgedkami. Nariknak a talaga nga ay-ayaten ken ipatpateg ni Jehova ti tunggal maysa kadakami.”

Agtultuloy a mangipapaay iti naespirituan ken praktikal a tulong dagiti pannakabagi ti sanga nga opisina iti India, manangaywan iti sirkito, ken dagiti lokal a panglakayen. Kuna ti maysa a panglakayen manipud iti sanga nga opisina a napan iti Kerala tapno mangliwliwa kadagiti kakabsat: “Nupay nakaro ti pannakakigtot, buteng, ken trauma dagiti kakabsat, naparegtaak iti kinapositiboda. Adu kadagiti kakabsat a nadangran ti nakasaritak. Bimmileg ti pammatik ta nakitak a mismo no kasano nga agtaltalekda ken Jehova.”

Kas paset ti sangalubongan a panagkakabsat, ikarkararagantayo ti pamilia dagiti biktima ken ti amin a naapektaran ti daytoy a nakaro a trahedia idiay India. Maliwliwatayo ken agbalintayo a kalmado gapu iti ikarkari ti Biblia nga awanton ti kinaranggas, panagrigrigat, ken ipapatay. Determinadotayo nga agtultuloy a naan-anay nga agtalek ken agpannuray ken Jehova.—Salmo 56:3.