Nasurok nga 47,000 a kakabsattayo ti agnanaed kadagiti rehion iti makinlaud a Japan. Nakaro ti dadael daytoy a lugar gapu iti layus idi Hulio 2018. Kalpasan unay ti didigra, agarup 4,900 a boluntario iti panagsaranay ti dagus a napan nagdalus ken nagtarimaan kadagiti pagtaengan dagiti Saksi ken kadagiti Kingdom Hall.

Babaen ti panangiwanwan ti tallo a Disaster Relief Committee, dinalusan ken tinarimaan dagiti kakabsattayo ti siam a Kingdom Hall a dinadael ti layus. Madama pay laeng a matartarimaan ti dadduma a Kingdom Hall. Maysa pay, 184 a balay dagiti Saksi ti natarimaan wenno matartarimaan pay laeng, ken 11 a balay ti nakaeskediul a matarimaan ita a tawen.

Da Taro ken Keiko Abe, nga addaan iti tallo nga annak, ti maysa kadagiti pamilia a natulongan iti Ehime. Tallo nga aldaw kalpasan a nalayus ti balayda, simmangpet dagiti kakabsat manipud iti maysa a sirkito ket tinarimaanda ti balayda ken sinuktanda ti datarda. Kanayonanna, nagdonar dagiti lumugar a Saksi kadagiti baro a kutson ken lamisaan para kadagiti ubbing.

Idi Septiembre 20, 2018, ni Kabsat Geoffrey Jackson, a miembro ti Bagi a Manarawidwid, ket nairana nga adda iti Japan para iti maysa nga annongen. Ginundawayanna ti nangipaay iti makaparegta a palawag iti maysa nga espesial a miting iti Kingdom Hall iti Okayama. Agdagup iti 36,691 a kakabsat ti dimngeg bayat nga inlawlawag ni Kabsat Jackson no kasano a kanayon nga ay-aywanan ken liwliwaen ni Jehova ti ilina iti amin a pakarigatanda. Dadduma kadagiti dimngeg ti naapektaran kadagiti bagyo ken ginggined a napasamak iti Japan iti nabiit pay. Inwayaan met ni Kabsat Jackson a sinaggaysa a liwliwaen dagiti biktima ti didigra.

Agyamyamantayo ken dagiti kakabsat iti Japan ta pasettayo ti organisasion ni Jehova, nga agtigtignay iti naayat a pamay-an ken mangipakpakita iti pannakaseknan ti nailangitan nga Amatayo.​—2 Corinto 1:3, 4.