Idi Hunio 29, 2017, imbilin ti maysa a korte idiay Kazakhstan iti sanga nga opisina dagiti Saksi ni Jehova idiay Almaty, Kazakhstan, nga isardengda ti trabahoda iti tallo a bulan ken pinagmultana ida iti agarup 680,000 KZT ($2,107).

Inruar ti korte ti desision kalpasan ti puersado a panangserrek dagiti autoridad iti sanga nga opisina idi Mayo 17, 2017, a nangala iti atension ti publiko. Karaman kadagiti nangserrek iti sangay ti agarup 40 nga armado nga opisial, a dadduma kadakuada ket nakaabbungot. Plano dagiti Saksi ti mangipila iti reklamo maipapan iti dayta.

Idi Hunio 5, 2017, ininspeksion dagiti polis ti sangay ket imbaga dagiti autoridad nga adda dagiti linteg a saan a sursuroten ti sangay. Kinontra dagiti Saksi ti resulta ti inspeksion, a naaramid iti pamay-an a saan a maitunos iti legal a proseso.

Dagiti nabiit pay a pasamak idiay Kazakhstan ket kapada ti pamutbuteng dagiti polis ken ibubusor a mapaspasaran dagiti Saksi ni Jehova idiay Russia, nga iti nabiit pay, imparit ti gobierno sadiay dagiti aktibidad dagiti Saksi ni Jehova. Iyapelar dagiti Saksi ti desision a nairuar idi Hunio 29, a masapul a maipila saan a naladladaw ngem Hulio 14, 2017.

Media Contacts:

International: David A. Semonian, Office of Public Information, +1-845-524-3000

Kazakhstan: Bekzat Smagulov, +7-747-671-45-01