Idi Mayo 27, 2023, naidedikar ti baro nga eskuelaan a pagadalan iti Biblia idiay Antananarivo, Madagascar iti asideg laeng a Kingdom Hall. Ni Brother Kenneth Cook, Jr. a miembro ti Bagi a Manarawidwid ti nangiparang iti palawag ti dedikasion a natemaan iti “Pasilidad a Pakaidayawan ni Jehova.” Iti simmaruno nga aldaw, adda espesial a programa iti maysa nga Assembly Hall iti dayta a lugar ken nai-broadcast dayta isu a nabuya ken nangngeg ti nasurok a 45,000 a tattao.

Nangrugi ti panagadal kadagiti teokratiko nga eskuelaan idi Disiembre 1999 iti sanga nga opisina iti Madagascar. Ngem gapu ta adu a kakabsat ti mayat nga ageskuela tapno masanay, saanen nga umanay ti espasio isu a kasapulan ti dakdakkel a pasilidad. Idi Hulio 2020, nagatang ti maysa a lote a 1,348 a metro kuadrado (14,510-sq-ft) nga asideg laeng iti sanga nga opisina. Di nagbayag, nangrugi ti pannakaibangon ti pasilidad. Uray no adda dagiti restriksion gapu iti COVID-19 pandemic, nalpas ti proyekto iti dandani dua a tawen laeng. Iti dayta a lote, naibangon ti maysa a pasdek a pakaangayan dagiti eskuelaan kas iti School for Kingdom Evangelizers ken School for Circuit Overseers and Their Wives. Ti sabali met a pasdek ket pagdagusan dagiti estudiante ken dagiti instruktor.

Gapu kadagita nga eskuelaan, masansanay ti adu a kakabsat tapno agbalinda a nalalaing a ‘mangilawlawag kadagiti naespirituan a bambanag babaen ti naespirituan a sasao.’—1 Corinto 2:13.