Ti 2023 ti maika-75 a tawen ti pannakaipasdek ti sanga nga opisina dagiti Saksi ni Jehova iti Malawi idi 1948 iti siudad ti Blantyre.

Sakbay dayta, ti sangay ti South Africa ti mangor-organisar iti trabaho dagiti Saksi ni Jehova iti Malawi. Sipud idi 1930’s, nagtultuloy nga immadu ti bilang dagiti kakabsat iti Malawi manipud 28 idi 1934 agingga iti nasurok a 5,600 idi 1948. Bayat nga umad-adu ti bilang dagiti Saksi, naluktan ti umuna a sanga nga opisina iti naabangan a bassit nga apartment iti Blantyre idi Septiembre 1, 1948. Nagtultuloy a nausar dayta kas opisina agingga a naibangon ti baro a pasilidad ti Bethel iti asidegna idi 1958.

Awan pay sangapulo a tawen kalpasanna, imparit ti gobierno ti Malawi ti trabaho dagiti Saksi ni Jehova idi Oktubre 1967. Kas resultana, innalada ti sanga nga opisina. Nupay kasta, intultuloy latta dagiti responsable a kakabsat nga inorganisar ti trabaho a panangasaba iti Malawi ken tinulonganda dagiti kapammatianda iti intero a pagilian. Iti uneg ti dandani 26 a tawen, napasaran dagiti Saksi ni Jehova ti nakaro a pannakaidadanes ken kinaranggas gapu iti neutral a takderda kas Kristiano. Naibaludda, nakabkabilda, ken napapatay pay ketdi ti dadduma kadakuada iti dayta a tiempo. Nagdesision met ti dadduma a kakabsat nga agkamang kadagiti asideg a pagilian, a pakairamanan ti Mozambique, Zambia, ken Zimbabwe.

Idi Agosto 12, 1993, nagsardengen ti panangiparit ti gobierno iti trabahotayo. Iti simmaruno a dua a tawen, dagiti kakabsat iti Zambia a nangasikaso iti trabaho iti Malawi iti sumagmamano a tawen bayat ti pannakaiparit ket timmulong a nangorganisar iti trabaho. Kalpasanna, gimmatang dagiti kakabsattayo iti dua a balay iti siudad ti Lilongwe a mausar kas baro a sanga nga opisina ti Malawi. Idi 1994, inaprobaran ti Bagi a Manarawidwid ti plano a mangbirok iti maitutop a lugar a pakaibangonan ti baro a pasilidad ti Bethel iti pagilian. Iti dedikasion dagitoy a pasilidad ti sangay idi Mayo 19, 2001, nasurok a 2,000 a kakabsat ti immatender iti programa. Adu kadakuada ti simamatalek a nagibtur iti pannakaidadanes iti dinekdekada. Karaman kadagiti immatender iti programa ket ni Brother Trophim Nsomba, a nagserbi kas manangaywan iti sirkito bayat ti pannakaiparit. Maipapan kadagiti baro a pasilidad ti Bethel ken ti naespirituan a panagrang-ay iti Malawi, imbaga ni Brother Nsomba: “Maparparegtakami unay ken baketko gapu kadagitoy a bendision ni Jehova. Dimi pulos ninamnama dagita!”

Ita, addan 1,924 a kongregasion iti Malawi ken nasuroken a 109,000 ti bilang dagiti kakabsat. Karaman iti daytoy a bilang ti 225 nga agserserbi iti sangay ti Malawi iti Lilongwe, a pakaar-aramidan ti trabaho a panagipatarus kadagiti naibatay iti Biblia a literatura iti pito a lengguahe.

Ikararagtayo nga itultuloy a bendisionan ni Jehova dagiti kakabsattayo iti Malawi a nangirekomenda iti bagida kas ministro babaen ti panagibturda iti adu a tawen.—2 Corinto 6:4.