LILONGWE, Malawi—Idi Mayo 3, 2017, da Aaron Mankhamba, 18, ken Hastings Mtambalika, 15, nga annak dagiti Saksi ni Jehova, ket napalubosan nga agsubli iti eskuelaan kalpasan a naikkatda iti Khombe Primary School gapu ta saanda a nagkanta iti kanta ti pagilian bayat ti maysa a programa iti eskuelaan. Naparitanda a sumrek iti klase sipud idi Pebrero 13, 2017. Naawat manen dagitoy a babbaro kalpasan a nagapelar dagiti nagannakda ken dagiti pannakabagi ti sanga nga opisina dagiti Saksi ni Jehova kadagiti opisial ti eskuelaan.

Bayat ti panagsasaritada, nakatulong kadagiti pannakabagi ti sangay ti dua a surat a naggapu iti gobierno ti Malawi nga impakitada kadagiti opisial ti eskuelaan. Ti maysa a surat a naaramid idi 1997 ket naiturong kadagiti Saksi ni Jehova iti Malawi. Naglaon dayta iti opisial a pammalubos kadagiti Saksi ni Jehova a saan nga agkanta iti kanta ti pagilian. Ti maikadua a surat a naaramid iti 2017 iparparegtana kadagiti titser a respetuenda ti wayawaya ti relihion dagiti estudiante.

Inlawlawag ni Hastings a nagmayat ti pannakaitiempo ti panagsublida ta dandani idin ti national exam. Kunana: “Permi idi ti danagmi ta baka saankami a makaraman iti national exam. Maminsan laeng iti kada tawen dagitoy nga eksam.” No saan a makapasa dagiti estudiante iti national exam, masapul nga ulitenda ti tukadda iti eskuelaan.

Kuna ni Augustine Semo a pannakangiwat dagiti Saksi ni Jehova iti Malawi: “Maragsakan dagiti estudiante ta rinespeto ti eskuelaan ti panangsurotda iti konsiensiada, ken agyamankami iti administrasion ti eskuelaan ta nagdesisionda a suportaran ti wayawaya ti relihion ket inawatda manen dagiti estudiante iti klase.”

Media Contacts:

International: David A. Semonian, Office of Public Information, +1-845-524-3000

Malawi: Augustine Semo, +265-1-762-111