Idi Oktubre 24, 2018, ti Northern Mariana Islands ket dinalapus ti Super Typhoon Yutu, a Category 5 a bagyo. Nangnangruna a naapektaran dagiti kadakkelan nga isla ti Saipan ken Tinian iti angin a 280 kilometro kada oras (174 mph) ti kapigsana. Gapu iti dayta, nadadael dagiti pagtaengan ken naawanan iti koriente ti adu a residente.

Inreport ti sanga nga opisina iti Micronesia, a mangiwanwanwan iti trabaho iti Northern Mariana Islands, nga awan ti kabsattayo a natay wenno nadangran. Ngem nadadael ti pagtaengan ti 15 a Saksi ken naperdi ti 40 a pagtaengan. Adda met bassit a dadael ti pagtaengan dagiti misionero iti Saipan ken dagiti Kingdom Hall iti Saipan ken Tinian.

Imatmatonan ti Disaster Relief Committee ti pannakaiwaras ti saranay kadagiti naapektaran. Kanayonanna, ay-aywanan met dagiti lumugar a Saksi dagiti nangpanaw iti lugarda gapu iti bagyo. Addanto miembro ti Komite ti Sangay a mapan kadagiti nadidigra a lugar tapno mangipaay iti naespirituan a pammaregta.

Ikarkararagantayo dagiti kakabsattayo tapno makarekoberda iti daytoy a didigra. Makaliwliwa a maammuan nga “asideg ni Jehova iti amin nga umaw-awag kenkuana” ken “dengdenggenna ti panagpatulongda.”—Salmo 145:18, 19.