Nalayus ti makintengnga ken makin-abagatan a paset ti Nigeria gapu iti napigsa a tudo. Nagdinakkel dagiti Karayan Benue ken Niger, ti dua a kadakkelan a karayan iti pagilian, isu a rinibu ti nangpanaw kadagiti balayda ken nasurok a 100 ti natay.

Ipakita dagiti immuna a report nga awan ti kabsattayo a natay wenno nadangran. Ngem gapu iti layus, di kumurang a 2,000 nga agibumbunannag ti nangpanaw kadagiti balayda, ket nasurok a 1,000 kadagitoy ti agkasapulan iti saranay. Kaaduan kadagiti nangpanaw kadagiti balayda ti nakidagus kadagiti kapamatianda nga adda kadagiti natalged a lugar.

Nabukel ti Disaster Relief Committee tapno mayurnos ti pannakaipaay ti saranay ken naespirituan a pammaregta. Ti dua a miembro ti Komite ti Sangay iti Nigeria, agraman ti manangaywan iti sirkito ken dagiti kakabsat nga agtrabtrabaho iti Service Department ken Local Design/Construction Department, binisitada dagiti agibumbunannag iti apektado a lugar tapno mangipaayda iti tulong.

Iti laksid dagiti rigat nga inyeg daytoy a didigra, ti nailangitan nga Amatayo a ni Jehova ket agtultuloy nga agbalin a ‘pagkamangan iti tiempo ti rigat.’—Salmo 37:39.